INKI kilumbu nge waka kiese mingi na luzingu na nge? Keti yo kele kilumbu ya nge kwelaka to yina mwana na nge ya ntete butukaka? Keti yo kele kilumbu ya nge bakaka mbotika? Ntembe kele ve nde kilumbu ya mbotika kele kilumbu mosi ya kuluta mfunu mpi ya kiese mingi. Bampangi vandaka na kiese kilumbu yina sambu nge monisaka nde nge ke zolaka Yehowa na ntima na nge ya mvimba, na moyo na nge ya mvimba, mpi na mabanza na nge yonso!—Marko 12:30.

Beto ke ndima nde nge ke sadilaka Yehowa na kiese mingi banda nge me bakaka mbotika. Kansi bampangi ya nkaka ke vandaka diaka ve ti kiese yina. Sambu na nki? Sambu na nki beto fwete sadila Yehowa na kiese?

Nsangu ya Kimfumu ke pesaka beto kiese mingi. Sambu na nki? Sambu Yehowa ke sila beto nde, ntama mingi ve Kimfumu na yandi ta fwa nsi-ntoto yai ya mbi mpi ta tula nsi-ntoto ya mpa. Sefania 1:14 ke tuba nde: “Kilumbu ya nene ya Yehowa kele pene-pene! Yo kele pene-pene mpi yo ke finama nswalu kibeni!” Kansi kana beto ke mona nde bamvula me luta mingi banda beto ke vingila, kiese na beto lenda mana. Beto lenda lemba mpi na kisalu ya Nzambi.—Bingana 13:12.

Kana beto ke lutisa ntangu mingi ti bampangi na beto, bo ta sadisa beto na kusadila Yehowa na kiese. Ziku bikalulu ya mbote ya Bambangi ya Yehowa kele kima yina bendaka beto na lusambu ya kieleka mpi sadisaka beto na kuyantika kusadila Nzambi na kiese. (1 Piere 2:12) Kansi nki lenda salama kana mpangi mosi me sala disumu mpi me baka ndola na dibundu? Yo lenda lembisa bantu ya nkaka mpi kumanisa kiese bo.

Kusosa kuvanda ti bima mingi ya kinsuni lenda manisa beto mpi kiese. Inki mutindu? Nsi-ntoto ya Satana ke pusaka beto na kusumba bima yina beto kele na mfunu na yo mpenza ve. Yo ke yibusa beto mambu yai Yezu tubaka: “Muntu mosi ve lenda sala bonso mpika sambu na bamfumu zole; sambu yandi ta menga mosi mpi ta zola ya nkaka to yandi ta kangama na mosi mpi ta vweza ya nkaka. Beno lenda sala ve bonso bampika sambu na Nzambi mpi sambu na Kimvwama.” (Matayo 6:24) Beto ta kuka ve kusadila Yehowa na kiese kana beto ke sosa kaka kuzwa bima mingi na nsi-ntoto yai.

Kusadila Yehowa ke vandaka kilo ve sambu na bantu yina ke zolaka yandi. (1 Yoane 5:3) Kuvila ve bangogo yai ya Yezu: “Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono  kele mpasi ve na kunata mpi kizitu na mono kele kilo ve.” (Matayo 11:28-30) Kuvanda Mukristu ya kieleka ke pesaka kikesa mpi kiese kibeni. Beto kele ti bikuma mingi ya kusadila Yehowa na kiese. Beto tadila ntangu yai bikuma tatu.—Habakuki 3:18.

Beto ke sadilaka Ngangi na beto; yandi kele Nzambi ya kiese. (Bisalu 17:28; 1 Timoteo 1:11) Beto me zaba nde Nzambi muntu salaka beto. Yo yina beto fwete landa na kusadila yandi na kiese, ata beto me bakaka mbotika banda bamvula mingi.

Beto baka mbandu ya Héctor, yina vandaka nkengi-ntambudi bamvula 40. Yandi ke landa kusadila Yehowa “ata na kimununu.” (Nkunga 92:12-14) Yandi ke salaka diaka ve kisalu ya ntangu yonso sambu na maladi ya nkento na yandi. Kansi Héctor ke vandaka kaka na kiese. Yandi ke tuba nde: “Ata maladi ya nkento na mono ke pesaka mono mpasi, mono me bikaka ve nde yo katula mono kiese ya kusadila Nzambi ya kieleka. Kuzaba nde Yehowa muntu me gangaka mono, mpi yandi salaka bantu ti kikuma, ke pusaka mono na kuzola yandi mingi mpi kusadila yandi na ntima ya mvimba. Mono ke salaka bikesa sambu na kusamuna mbala na mbala; mono ke vilaka mpi ve kivuvu ya Kimfumu; yo ke sadisaka mono na kuvanda kaka na kiese.”

Nkudulu yina Yehowa me pesaka ke sadisaka beto na kuzinga na kiese. Ya kieleka, “Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoane 3:16) Ee, kana beto ke monisa lukwikilu na nkudulu, dikabu ya zola ya Nzambi, yandi ta lolula masumu na beto mpi beto ta baka luzingu ya mvula na mvula. Yai kele kikuma ya nene ya kutonda Nzambi! Ntonda na beto sambu na nkudulu ta pusa beto mpi na kusadila Yehowa na kiese.

Mpangi-bakala Jesús, yina vandaka kuzinga na Mexique, tubaka nde: “Mu vandaka mpika ya kisalu; bantangu ya nkaka, mu vandaka kusala bisalu tanu na mbala mosi, kaka sambu na kuzwa mbongo mingi. Na nima, mono zabaka Yehowa mpi mutindu yandi tambikaka Mwana na yandi ya zola sambu na bantu. Mu kumaka na nzala ya ngolo ya kusadila yandi. Yo yina mu kudipesaka na Yehowa. Mono katukaka na kompani mosi ya mono salaka bamvula 28, mpi mono yantikaka kisalu ya ntangu yonso.” Mpidina Jesús yantikaka kusadila Yehowa na kiese yonso.

Kuvanda ti bikalulu ya mbote ke pesaka beto kiese. Keti nge ke yibuka mutindu nge vandaka na ntwala ya kuzaba Yehowa? Ntumwa Polo yibusaka Bakristu ya Roma nde, bo “vandaka ntete bampika ya disumu” kansi na nima, bo “kumaka bampika  ya lunungu.” Sambu bo vandaka ti bikalulu ya mbote, bo vandaka ti kivuvu ya kuzinga mvula na mvula. (Baroma 6:17-22) Beto mpi, kana beto ke zitisaka bansiku ya Yehowa, beto ta kutana ve ti mambu ya mpasi yina ke kuminaka bantu ya mbi to ya mubulu. Beto ta vanda na kiese kibeni!

Beto baka mbandu ya Jaime, boksere mosi yina vandaka kukwikila ve nde Nzambi to Ngangi kele. Kansi ntangu Jaime yantikaka kukwenda na balukutakanu ya Bambangi ya Yehowa, yandi yitukaka na kumona zola na beto. Sambu na kusoba luzingu na yandi, Jaime bondilaka Yehowa na kupesa yandi lukwikilu. Yandi ke tuba nde, “Malembe-malembe mono bakisaka nde Nzambi kele, mpi yandi kele Tata ya zola mpi ya mawa. Kuzitisa bansiku ya Yehowa me taninaka mono. Kana mono sobaka ve, mono zolaka kufwa bonso baboksere ya nkaka. Bamvula yina mono me lutisaka na kisalu ya Yehowa ke pesaka mono kiese mingi.”

Inki mutindu beto fwete kudiwa ntangu beto ke vingila nsuka ya nsi-ntoto yai ya mbi? Kuvila ve nde beto ke sala luzolo ya Nzambi mpi ke vingila luzingu ya mvula na mvula. “Yo yina, beto yambula ve kusala mambu ya mbote, sambu na ntangu yina me fwana, beto ta katula bambuma kana beto yambula ve.” (Bagalatia 6:8, 9) Yehowa ta sadisa beto na kukanga ntima mpi na kukuma ti bikalulu ya mbote yina ta sadisa beto na kuguluka na “mpasi ya nene” mpi kulanda na kusadila yandi na kiese.—Kusonga 7:9, 13, 14; Yakobo 1:2-4.

Beto kele ti kivuvu nde, kana beto kanga ntima, Yehowa ta sakumuna beto sambu yandi me zaba kisalu na beto mpi mutindu beto ke zolaka yandi ti zina na yandi. Kana beto ke sadila yandi na kiese, beto ta tuba bonso muyimbi-bankunga Davidi: “Mono ke tulaka Yehowa na ntwala na mono ntangu yonso. Sambu yandi kele na diboko na mono ya kitata, mono ta nikana ve ata fioti. Yo yina ntima na mono ke yangalala, mono kele na kiese kibeni. Mpi mono ke zinga na lutaninu.”—Nkunga 16:8, 9.