MONO butukaka na 1926 na bwala Crooksville, na provense ya Ohio na États-Unis. Papa ti mama vandaka kutinda beto na nzo-nzambi, kansi bo mosi vandaka kukwenda ve. Mono vandaka kukwenda na dibundu ya Méthodiste. Ntangu mono kumaka ti bamvula 14, pastere pesaka mono kado sambu mono vandaka kukwenda na nzo-nzambi konso lumingu.

Na ntangu yina, Mbangi ya Yehowa mosi, Margaret Walker, yantikaka kulonga Mama Biblia. Kilumbu mosi mono bakaka lukanu ya kulonguka mpi ti bo. Mama yindulaka nde mono ta bebisa kulonguka na bo; yo yina yandi basisaka mono na nganda. Kansi mono vandaka kaka kuwidikila masolo na bo. Kilumbu ya nkaka Margaret yulaka mono nde, “Nge me zaba zina ya Nzambi?” Mono vutulaka nde, “Bantu yonso me zaba nde, yo ke Nzambi.” Yandi tubaka nde, “Baka Biblia na nge mpi tanga Nkunga 83:18.” Mono tangaka, mpi mono monaka nde zina ya Nzambi kele Yehowa. Mono kwendaka ntinu kusonga banduku na mono nde, “Ntangu beno ta vutuka na nzo na nkokila, beno tanga Nkunga 83:18; beno ta mona zina ya Nzambi.” Ziku nge ta tuba nde mono yantikaka mbala mosi kusamuna.

Mono longukaka Biblia mpi bakaka mbotika na 1941. Ntangu fioti na nima, bo lombaka mono na kutwadisaka kulonguka ya mukanda ya dibundu. Mono bingisaka mama mpi bantu ya dibuta na mono na lukutakanu; bo yantikaka kukwisa na kimvuka yina mono vandaka. Kansi Papa buyaka.

Bo pesaka mono mikumba mingi na dibundu, mpi mono kumaka ti mikanda mingi ya Bambangi ya Yehowa. Kilumbu mosi, Papa tubaka nde: “Nge ke mono mutindu mikanda me fuluka na nzo yai? Basisa yo mpi kwenda.” Mono basikaka mpi kwendaka kuzinga pene-pene ya mbanza Zanesville, na Ohio; kansi mono vandaka kuvutuka na nzo sambu na kupesa dibuta na beto kikesa.

Papa sosaka kubuyisa Mama na kukwenda na balukutakanu. Bilumbu ya nkaka, kana Mama ke kwenda na lukutakanu, Papa vandaka kulanda yandi mpi kuvutula yandi na nzo. Kansi Mama vandaka kubasika na kielo ya nkaka. Mono songaka Mama nde: “Kudiyangisa ve. Yandi ta lemba.” Na nima Papa lembaka, mpi mama kumaka kukwenda na balukutakanu na ngemba yonso.

 Ntangu Nzo-Nkanda ya Kisalu ya Teokrasi yantikaka na 1943, mono kumaka kusala masolo na dibundu na beto. Bandongisila yina bo vandaka kupesa mono na nima ya konso disolo sadisaka mono na kukuma mutubi ya mbote.

Na 1944, na Mvita ya Zole ya Ntoto ya Mvimba, bo pusaka mono na ngolo na kukuma soda. Bo tindaka mono na Fort Hayes, camp mosi ya basoda na mbanza Columbus, na Ohio. Bo salaka mono ekzame mpi mono fulusaka formilere ya kisalu ya kisoda. Mono songaka bamfumu nde mono ta kuma ve soda. Bo yambulaka mono. Kansi bilumbu fioti na nima, mfumu mosi ya basoda kwisaka na nzo mpi zabisaka mono nde, “Corwin Robison, yai convocation na nge.”

Bamposo zole na nima, zuzi mosi songaka mono na tribinale nde: “Kana sambu na mono, nge lenda basika ve na boloko. Nge kele ti kima ya kutuba?” Mono vutulaka nde: “Mfumu, Mono kele nsadi ya Nzambi. Mono ke longaka na banzo yonso mpi ke zabisaka bantu mingi nsangu ya mbote ya Kimfumu.” Zuzi yina songaka bazuzi ya nkaka nde: “Beno kwisaka ve awa sambu na kuzaba kana yandi kele nsadi ya Nzambi to ve, kansi sambu na kuzaba kana yandi ndimaka kukuma soda to ve.” Ntangu fioti na nima, bazuzi zengilaka mono nkanu ya bamvula tanu na boloko ya mbanza Ashland, na provense ya Kentucky.

Mono salaka bamposo zole na boloko ya mbanza Columbus, na Ohio; na kilumbu ya ntete bo tulaka mono na kasho ya mono mosi. Mono sambaka Yehowa nde: “Mu ta kuka ve kusala bamvula tanu awa. Mu ke zaba ve nki mu lenda sala.”

Na kilumbu yina landaka, bo basisaka mono na kasho yina. Mono kwendaka kisika muntu mosi ya boloko telamaka. Yandi vandaka bapake mpi ntulu nene. Zina na yandi Paul. Beto telamaka na fenetre mpi vandaka kutala na nganda. Yandi yulaka mono nde, “Leke, nge me sala nki?” Mono tubaka nde, “Mono kele Mbangi ya Yehowa.” Yandi yitukaka nde, “Mbangi ya Yehowa? Ebuna nge ke sala nki awa?” Mono tubaka nde, “Beto Bambangi ya Yehowa, beto ke nwanaka ve mvita mpi ke fwaka ve bantu.” Yandi tubaka nde, “Bo me kanga nge sambu nge me buya kufwa bantu. Bantu ya nkaka, bo me kanga bo sambu bo fwaka bantu! Yo ke yitukisa!” Mono vutulaka nde, “Yo ke yitukisa mono mpi.”

Na nima yandi tubaka nde, “Mu tangaka mikanda na beno ntangu mu vandaka na boloko ya nkaka; mu salaka bamvula 15 kuna.” Ntangu mono waka mpidina, mono sambaka nde, “Yehowa, sadisa mu na kusolula mbote ti muntu yai.” Yandi tubaka nde: “Kana muntu mosi ya boloko kusimba nge, binga mono. Yandi ta zaba mono.” Yo yina bantu yonso 50 ya boloko vandaka kuyangisa mono ve.

Ntangu bamfumu ya basoda tindaka mono na boloko ya Ashland, mono kutanaka ti bampangi ya  nkaka ya kuyela na kimpeve. Bo sadisaka mono ti bampangi ya nkaka na kukangama ngolo na Yehowa. Konso mposo, bo vandaka kupesa beto mikapu ya Biblia; beto vandaka kuyidika bangiufula ti bamvutu sambu na balukutakanu yina beto vandaka kubinga Abeilles de la Bible. Beto vandaka na shambre mosi ya nene yina vandaka ti bambeto. Mpangi mosi vandaka kutwadisa beto. Yandi zabisaka mono nde: “Robison, mbeto yai ti yina, kele teritware na nge. Nge ta solulaka ti konso muntu yina bo ta tula pana. Nge fwete sala yonso sambu na kulonga yandi na ntwala nde bo katula yandi.” Beto vandaka kusamuna mutindu yina.

Mvita ya Zole ya Ntoto ya Mvimba manaka na 1945; kansi mono vandaka kaka na boloko. Mono vandaka kuyindula bampangi na mono sambu Papa zabisaka mono nde, “Mu ke sosa ntete kukatula nge na nzo yai; na nima, mu ta tadila bampangi na nge.” Kansi ntangu mono basikaka na boloko, kima mosi yitukisaka mono. Ata Papa vandaka kuniokula beto, bampangi na mono 7 vandaka kukwenda na balukutakanu, mpi mosi ya nkento bakaka mbotika.

Ntangu bantu ya Corée nwanaka mvita na 1950, bo lombaka mono diaka na kukuma soda. Bo tindaka mono na camp ya Fort Hayes. Ntangu mfumu ya basoda monaka mayele ti ngolo na mono, yandi tubaka nde: “Nge ke ngolo mingi kuluta banduku na nge.” Mono vutulaka nde, “Mersi, kansi mono ta kuma ve soda.” Mono yibukaka 2 Timoteo 2:3 mpi tubaka nde, “Mono kele dezia soda ya Kristu.” Yandi vandaka pima ntangu ya nda, mpi tubaka nde, “Kwenda.”

Ntangu fioti na nima, beto salaka lukutakanu ya nene na mbanza Cincinnati, na Ohio; mono kotaka mpi lukutakanu ya bantu yina ke zola kusala na Betele. Mpangi Milton Henschel songaka beto nde Betele ke sosa bampangi yina ke zola kusala mingi sambu na mambote ya Kimfumu. Mono fulusaka formilere ya Betele mpi bo ndimaka mono. Na Augusti 1954, mono yantikaka kusala na Betele ya Brooklyn; tii bubu yai mono kele na Betele.

Na Betele, mono ke vandaka ti bisalu mingi. Na nsungi ya bamvula mingi, mono vandaka kusala na bamasini ya ke kumisaka masa tiya, mpi mono vandaka kuyidika bansapi. Mono vandaka mpi kusala na Nzo ya Balukutakanu ya Nene, na mbanza New York.

Mono ke zolaka mingi mambu yina beto ke salaka na Betele; mu mbandu lusambu ya suka, Kulonguka ya Nzozulu ya Nkengi, mpi kusamuna ti bampangi ya dibundu. Na kutuba masonga, mabuta yonso ya Bambangi ya Yehowa fwete sala mambu yai mbala na mbala. Ntangu bibuti mpi bana ke tadila mukapu ya kilumbu kumosi, ke sala Lusambu ya Dibuta mbala na mbala, ke pesa bamvutu na balukutakanu, mpi ke samuna ti kikesa, dibuta ya mvimba ta vanda ngolo mpi ta kuma pene-pene ya Yehowa.

 Mono me zwaka banduku mingi na Betele mpi na dibundu. Bankaka vandaka Bakristu yina bo me tulaka mafuta mpi bo me kwendaka dezia na zulu. Bankaka vandaka ve Bakristu yina bo me tulaka mafuta. Kansi bansadi ya Yehowa yonso, ata bampangi ya Betele, kele bantu ya kukonda kukuka. Kana mono me wakana ve ti mpangi mosi, mono ke sosaka kutula ngemba. Mono ke yibukaka Matayo 5:23, 24 mpi mutindu beto fwete yidika mambu yina me basika. Yo ke vandaka ve pete na kulomba “pardo,” kansi yo ke yidikaka mambu mingi.

Bubu yai, mono ke kukaka diaka ve kusamuna nzo na nzo sambu mono me kuma mbuta, kansi mono me yambulaka ve. Mono me longukaka ndambu ya Kishinwa, mpi na bala-bala, mono ke vandaka na kiese ya kusolula ti bantu yina ke tubaka Kishinwa. Bilumbu ya nkaka na suka, mono ke kabulaka bazulunalu 30 to 40 na bantu yina ke sepelaka na nsangu.

Nkutu mono me salaka mvutukilu ya mpa na Chine! Kilumbu mosi, mwana-nkento mosi monaka mono mpi yandi yantikaka kuseka; yandi vandaka kuluta mpi kuteka bambuma. Mono sekaka mpi pesaka yandi Nzozulu ya Nkengi ti Réveillez-vous ! ya Kishinwa. Yandi bakaka yo mpi yandi songaka mono nde zina na yandi kele Katie. Na nima, ntangu beto vandaka kukutana, Katie vandaka kukwisa kusolula ti mono. Mono zabisaka yandi mutindu bo ke bingaka bambuma yina na Kingelesi mpi bima ya nkaka yina yandi vandaka kuteka; yandi vandaka kumeka kubinga yo mutindu mono bingaka. Mono tangilaka yandi baverse ya Biblia mpi yandi ndimaka kubaka mukanda Biblia Kelongaka. Kansi na nima ya bamposo, mono vandaka diaka kumona yandi ve.

Bangonda mingi na nima, mono pesaka mwana-nkento ya nkaka yina vandaka kuteka bambuma bazulunalu mpi yandi bakaka yo. Na mposo yina landaka, yandi pesaka mono telefone na yandi mpi tubaka nde, “Solula ti muntu mosi na Chine.” Mono tubaka nde, “Mono me zaba ve ata muntu mosi na Chine.” Kansi yandi songaka mono na kusolula kaka; mono bakaka telefone mpi tubaka nde, “Mbote, yai Robison.” Muntu yango vutulaka nde, “Robby, yai mono Katie. Mono me vutukaka na Chine.” Mono tubaka nde, “Na Chine?” Katie vutulaka nde “Ee. Robby, nge me zaba mwana-nkento yina me pesa nge telefone? Yandi kele mpangi na mono. Nge longaka mono mambu mingi ya mbote. Pardo, longa yandi mpi Biblia.” Mono tubaka nde, “Katie, mono ta longa yandi. Mersi mutindu nge me songa mu kisika nge kele.” Bilumbu fioti na nima, beto kutanaka ti mpangi ya Katie na mbala ya nsuka. Mono ke tula ntima nde bana-bankento yai ke landa kulonguka mambu ya Yehowa.

Mono me sala bamvula 73 na kisalu ya Yehowa. Yandi me sadisaka mono na kuzinga na kiese, na kukota ve na mambu ya politiki, mpi na kubikala ya kwikama ata na boloko. Bampangi na mono zabisaka mono mpi nde, ntangu Papa vandaka kuniokula mono, kukanga ntima na mono pesaka bo kikesa. Na nima ya bamvula, Mama ti bampangi na mono 6 bakaka mbotika. Papa sobaka fioti mabanza; nkutu yandi kumaka kukwenda na balukutakanu na ntwala nde yandi fwa.

Kana Nzambi me zola, bampangi mpi banduku na mono yina me fwaka ta futumuka sambu na kuzinga na nsi-ntoto ya mpa. Yindula mutindu beto ta vandaka na kiese ya kusambila Yehowa mvula na mvula kumosi ti bantu yina beto ke zolaka! *—Tala noti na nsi ya lutiti.