Na masonga yonso, bubu yai ata muntu mosi ve lenda zaba mutindu Polo vandaka. Bafoto ya nkaka na mikanda na beto ke vandaka kaka bifwanisu yina bo me sala, kansi yo ke monisaka ve kibeni mutindu muntu kele to mutindu muntu vandaka.

Kansi mikanda ya nkaka ke tubilaka mutindu Polo vandaka. Mu mbandu, Nzozulu ya Nkengi ya Sioni (Kingelesi) ya Marsi 1, 1902, ke tubila mukanda mosi, “Actes de Paul et de Thècle,” yina bo sonikaka na bamvu 150 ya ntangu na beto. Mukanda yango tubilaka “mutindu Polo vandaka, ziku yo tubilaka mambu yina vandaka ya kieleka. Yo monisaka nde yandi vandaka ‘nda mingi ve, muntu ya dibandi, makulu na mwa lweka, nene, bankongi mingi, mpi mbombo mwa nsongi.’”

Mukanda mosi yina bo basisaka na 1997 (The Oxford Dictionary of the Christian Church) tubaka mutindu yai sambu na mukanda yina bo sonikaka na bamvu 150: “Yo me fwana nde mukanda ‘Actes de Paul et de Thècle’ kutubila mambu ya nkaka ya kieleka ya ntangu ya ntama.” Na mvu-nkama ya ntete, bantu vandaka kuzitisa mingi mukanda yango, nkutu bakopi na yo 80, yina bo sonikaka na Kigreki, mpi yina bo balulaka na bandinga ya nkaka kele tii bubu yai. Yo yina, bafoto ya Polo na mikanda na beto ke wakanaka ti mutindu bo ke monisaka yandi na mikanda yina ya ntama.

Kansi, beto fwete zaba nde mambu mingi ya nkaka kele mfunu mingi kuluta kimuntu ya nganda ya Polo. Ntangu Polo vandaka kulonga, bantu ya nkaka vwezaka yandi mpi tubaka nde ‘ntangu yandi vandaka awa yandi vandaka ngolo ve mpi kutuba na yandi vandaka mpamba.’ (2 Bak. 10:10) Kansi beto fwete vila ve nde Polo kumaka Mukristu na nzila ya kimangu yina Yezu salaka. Beto lenda tula mpi dikebi na mambu yina Polo salaka ntangu yandi kumaka “dibungu ya [Kristu] me sola sambu na kunata zina [ya Yezu] na makanda.” (Bis. 9:3-5, 15; 22:6-8) Beto yindula mingi mambote yina beto ke bakaka na mikanda yina Polo sonikaka na nsadisa ya mpeve santu.

Na mikanda yina Polo sonikaka, yandi kudikumisaka ve sambu na mambu yina yandi salaka na ntwala ya kukuma Mukristu; yandi tubilaka mpi ve kimuntu na yandi ya nganda. (Bis. 26:4, 5; Bafil. 3:4-6) Yandi tubaka nde: “Mono kele muntu ya kuluta fioti na kati ya bantumwa, mpi yo me fwana ve nde bo binga mono ntumwa.” (1 Bak. 15:9) Na nima, yandi sonikaka nde: “Nzambi monisilaka mono ntima ya mbote yai ya nene, mono muntu yina kele muntu ya fioti kuluta muntu ya fioti kibeni na basantu yonso, sambu mono zabisa na makanda nsangu ya mbote ya bimvwama ya kukonda nsuka ya Kristu.” (Baef. 3:8) Ya kieleka, mambu yai kele mfunu mingi kuluta kuzaba mutindu Polo vandaka.