1, 2. (a) Inki mutindu Bambangi ya Yehowa ke tadilaka Biblia? (b) Inki mukanda ya Biblia nge ke zolaka mingi?

BETO Bambangi ya Yehowa, beto ke zolaka Biblia. Yo ke lembikaka beto, ke pesaka beto kivuvu mpi malongi ya me fwana. (Baroma 15:4) Yo kele ve bangindu ya bantu, kansi “ndinga ya Nzambi.”—1 Batesalonika 2:13.

² Ya kieleka, konso muntu na kati na beto ke vandaka ti mukanda mosi ya Biblia yina yandi ke zolaka mingi. Bantu ya nkaka ke zolaka Baevanzile sambu yo ke monisaka mutindu Yezu monisaka bikalulu ya kitoko ya Yehowa. (Yoane 14:9) Bankaka ke sepelaka ti mikanda ya bambikudulu, mu mbandu Kusonga, yina ke monisaka “mambu yina fwete salama ntama mingi ve.” (Kusonga 1:1) Bankaka diaka ke bakaka kikesa ntangu bo ke tangaka mukanda ya Bankunga, mpi bankaka ke sepelaka na bandongisila ya mbote yina kele na Bingana. Yo kele pwelele nde, Biblia kele mukanda ya bantu yonso.

3, 4. (a) Inki mutindu beto ke tadilaka mikanda na beto? (b) Inki mikanda ya nkaka ke basisaka sambu na bantu ya mutindu mosi buna?

³ Sambu beto ke zolaka Biblia, beto ke zolaka mpi mikanda  na beto sambu yo ke tendulaka Ndinga ya Nzambi. Mikanda yonso, disongidila mikanda, tumikanda, bazulunalu mpi mikanda ya nkaka kele makabu yina Yehowa ke pesaka beto. Yo ke sadisaka beto na kutanina kinduku na beto ti yandi mpi kuvanda ti lukwikilu ya ngolo.—Tito 2:2.

⁴ Bo ke sonikaka mikanda na beto mingi sambu na beto mosi Bambangi ya Yehowa. Kansi bo ke sonikaka ya nkaka sambu na batoko to bibuti. Masolo mpi bavideo mingi yina kele na site Internet na beto, bo me tulaka yo mingi-mingi sambu na bantu yina kele ve Bambangi ya Yehowa. Mikanda yai yonso ke monisa nde Yehowa ke lungisa lusilu na yandi ya kulonga kibeni bantu yonso.—Yezaya 25:6.

5. Inki ke sepedisaka Yehowa?

⁵ Bampangi mingi ke bakaka ntangu mingi ya kutanga Biblia mpi mikanda na beto. Bantangu ya nkaka beto lenda baka ntangu mingi sambu na kulonguka mukanda mosi kuluta mukanda ya nkaka. Ata mpidina, Yehowa ke sepelaka kana beto ke bumba ntangu sambu na kutanga mpi kulonguka Biblia mpi mikanda na beto. (Baefezo 5:15, 16) Kansi beto fwete keba na kigonsa mosi. Inki kigonsa?

6. Inki lenda sala nde beto baka ve mambote ya malongi ya Yehowa?

⁶ Kana beto keba ve, beto lenda yindula nde mikanda ya nkaka ya Biblia to mikanda na beto ya nkaka kele ve ti malongi yina lenda sadisa beto. Mu mbandu, nki beto ta sala kana beto ke mona nde mukanda mosi ya Biblia ke tubila ve mambu ya luzingu na beto? Inki beto ke salaka kana mukanda mosi ke tadila beto mpenza ve? Keti beto ke tangaka yo nswalu-nswalu to nkutu kubuya kibeni kutanga yo? Kana mpidina, beto ta baka ve mambote ya malongi ya mfunu yina kele na kati. Inki beto lenda sala sambu na kubwa ve na mutambu yai? Beto fwete vila ve nde Yehowa muntu ke pesaka beto malongi yina yonso. Yandi ke tuba nde: “Mono, Yehowa, mono kele Nzambi na nge, Muntu yina ke longa nge sambu na mambote na nge mosi.” (Yezaya 48:17) Na disolo yai, beto ta tubila mambu tatu yina ta sadisa beto na kubaka mambote na malongi yonso yina Yehowa ke pesaka beto.

7. Sambu na nki beto fwete tanga Biblia ti mabanza ya mbote?

⁷ Tanga ti mabanza ya mbote. Ya kieleka, bo sonikaka mikanda ya nkaka ya Biblia sambu na bantu ya mutindu mosi buna. Ata mpidina, Biblia ke tuba nde “Masonuku yonso kele ya kupemama na Nzambi mpi yo kele mfunu.” (2 Timoteo 3:16) Yo yina beto fwete vanda ti mabanza ya mbote ntangu beto ke tanga Biblia. Mpangi-bakala mosi ke tuba nde yandi lenda baka malongi mingi na disolo mosi ya Biblia, ata disolo yango me tubila ve pwelele malongi yango. Yo yina, na ntwala ya kutanga Biblia, beto fwete lomba Yehowa na kupesa beto mabanza ya mbote mpi mayele sambu na kubakisa malongi yina yandi ke zola nde beto baka.—Esdrasi 7:10; tanga Yakobo 1:5.

8, 9. (a) Inki bangiufula beto fwete kudiyula ntangu beto ke tanga Biblia? (b) Mambu yina Yehowa ke lombaka bankuluntu ke longa beto nki sambu na Yehowa?

⁸ Kudiyula bangiufula. Ntangu nge ke tanga Biblia, pema mpi kudiyula bangiufula  yai: ‘Mambu yai ke longa mono nki sambu na Yehowa? Inki mutindu mono lenda sadila dilongi yai na luzingu na mono? Inki mutindu mono lenda sadila yo sambu na kusadisa bantu ya nkaka?’ Kana beto ke yindulula mutindu yai, beto ta baka mambote mingi ntangu beto ke tanga Biblia. Mu mbandu, Biblia ke monisa bikalulu yina bankuluntu fwete vanda ti yo. (Tanga 1 Timoteo 3:2-7.) Kansi bampangi mingi kele ve bankuluntu, yo yina bo lenda yindula nde mambu yina lenda sadisa bo ve ata fioti. Bika beto tadila bangiufula tatu yina beto me tubila sambu na kumona mutindu mambu yina bo ke lombaka bankuluntu lenda sadisa beto yonso.

⁹ “Mambu yai ke longa mono nki sambu na Yehowa?” Yehowa me songaka beto bikalulu yina bankuluntu fwete vanda ti yo. Yandi ke lombaka bampangi yina ke twadisaka dibundu na kuvanda ti bikalulu ya kuluta mbote. Yo ke monisa nde Yehowa ke bakaka dibundu na mbalu. Biblia ke tuba nde yandi sumbaka dibundu ti “menga ya Mwana na yandi mosi.” (Bisalu 20:28) Yo yina Yehowa ke zolaka nde bankuluntu kupesa mbandu ya mbote, mpi yandi ta sambisa bo na mutindu bo ke sadila bampangi mambu. Yandi ke zolaka nde beto kudiwa mbote na nsi ya lutaninu na bo. (Yezaya 32:1, 2) Ntangu beto ke tanga mambu yina Yehowa ke lombaka bankuluntu, beto ke bakisa nde yandi ke zolaka beto mingi.

10, 11. (a) Na luzingu na beto, nki mutindu beto lenda sadila mambu yina Biblia ke lombaka bankuluntu? (b) Inki mutindu beto lenda sadila yo sambu na kusadisa bantu ya nkaka?

 ¹⁰ “Inki mutindu mono lenda sadila dilongi yai na luzingu na mono?” Kana nge kele nkuluntu, tadilaka mbala na mbala mambu yina Biblia ke lombaka bankuluntu mpi sala bikesa sambu na kutomisa diaka bikalulu na nge. Kana nge ke zola kukuma nkuluntu, sala bikesa ya kulungisa mambu yina bo ke lombaka. (1 Timoteo 3:1) Kansi Bakristu yonso lenda vanda mpi ti bikalulu yango. Mu mbandu, Yehowa ke zolaka nde beto yonso kuvanda ti bukati-kati mpi mabanza ya mbote. (Bafilipi 4:5; 1 Piere 4:7) Kana bankuluntu kele “bambandu sambu na mameme,” beto lenda “landa mbandu ya lukwikilu na bo.”—1 Piere 5:3; Baebreo 13:7.

¹¹ “Inki mutindu mono lenda sadila dilongi yai sambu na kusadisa bantu ya nkaka?” Beto lenda monisa balongoki ya Biblia mpi bantu yina ke sepelaka na kieleka mambu yina Biblia ke lombaka bankuluntu sambu bo bakisa nde bankuluntu me swaswana ti bantwadisi ya mabundu. Mambu yango lenda sadisa beto mpi na kuyibuka kisalu ya ngolo yina bankuluntu ke salaka na dibundu. Kuyindula yo ta sadisa beto na kuzitisa bankuluntu. (1 Batesalonika 5:12) Kana beto ke zitisa bo, bo ta landa kusala kisalu na bo ti kiese.—Baebreo 13:17.

12, 13. (a) Inki bansosa beto lenda sala na mikanda na beto? (b) Pesa mbandu ya ke monisa mutindu bansangu ya nkaka lenda sadisa beto na kumona malongi yina kele ve pwelele na disolo mosi ya beto ke tanga?

¹² Sala bansosa. Ntangu beto ke longuka Biblia, beto lenda sosa bamvutu na bangiufula yai:

• Nani sonikaka mukanda yai?

• Inki ntangu mpi nki kisika bo sonikaka yo?

• Inki mambu ya mfunu vandaka kusalama ntangu bo sonikaka mukanda yai?

Bansangu ya mutindu yai lenda sadisa beto na kubaka malongi yina ke monana ve pwelele na mukanda yina beto ke tanga.

¹³ Beto baka mbandu. Ezekiele 14:13, 14 ke tuba nde: “Kana insi mosi kusala disumu na meso na mono mpi kusala mambu kukonda kwikama, mono ta tandula diboko na mono sambu na kunwanisa yo mpi ta bebisa kima na yo yina ke pesaka yo madia, ebuna mono ta tinda nzala na insi yina mpi ta fwa muntu ti mbisi na kati na yo. ‘Ata kana babakala yai tatu—Noa, Daniele, mpi Yobi—vandaka na kati na yo, bo zolaka kudigulusa kaka bo mosi sambu na lunungu na bo,’ Yehowa Mfumu ya Kuluta Nene muntu me tuba.” Kana nge sala bansosa, nge ta mona nde Ezekiele sonikaka mambu yai bamvula kiteso ya 612 na ntwala ya Kristu. Noa mpi Yobi vandaka dezia me fwa bamvula mingi me luta, kansi Yehowa vilaka ve kwikama na bo. Kansi Daniele vandaka na luzingu. Ziku, yandi vandaka ti bamvula 20 ntangu Yehowa bingaka yandi muntu ya lunungu bonso Noa mpi Yobi. Yo ke longa beto nki?  Yehowa ke monaka mpi ke bakaka na mbalu bansadi na yandi ya kwikama, baleke mpi bambuta.—Nkunga 148:12-14.

14. Masolo ya bo ke sonikaka sambu na batoko ke sadisaka bo na nki mambu, mpi nki mutindu bantu ya nkaka lenda bakila yo mambote? (Tala kifwanisu ya luyantiku ya disolo.)

¹⁴ Mikanda ya batoko. Beto me mona nde mikanda yonso ya Biblia lenda longa beto mambu mingi. Mutindu mosi mpi, mikanda na beto yonso lenda longa beto mambu mingi. Beto tadila mwa bambandu. Na bamvula ya me katuka kuluta, Yehowa me longa batoko mambu mingi. ^[1] (Tala noti na nsuka ya disolo.) Malongi yango ke sadisaka bo na kununga mambu ya mbi na banzo-nkanda mpi mambu ya mpasi yina bo ke kutanaka ti yo ntangu bo ke yela. Kansi nki mutindu beto yonso lenda baka mambote na masolo mpi mikanda ya batoko? Kutanga yo ta sadisa beto na kubakisa mambu yina batoko ke kutanaka ti yo, mpi beto ta zaba mutindu ya kusadisa bo mpi kupesa bo kikesa.

15. Sambu na nki bambuta fwete tangaka masolo yina bo ke sonikaka sambu na batoko?

¹⁵ Bambuta fwete tuba ve na lulendo yonso nde bo lenda tanga ve masolo yina ke tubila batoko. Masolo yango ke tubilaka mambu mingi ya ke tadila Bakristu yonso. Mu mbandu, beto yonso fwete tendudila bantu balukwikilu na beto, kuyala mawi na beto, kulanda ve bangindu ya mbi ya bantu, kubuya banduku ya mbi mpi bansaka ya mbi. Yo yina ata mikanda yina kele ya batoko, malongi na yo ke katukaka na Biblia mpi Bakristu yonso lenda bakila yo mambote.

16. Mikanda na beto ke sadisaka batoko na nki mambu ya nkaka?

¹⁶ Mikanda ya batoko ke sadisaka bo mpi na kukumisa kinduku na bo ti Yehowa ngolo. (Tanga Longi 12:1, 13.) Bambuta mpi lenda bakila yo mambote. Mu mbandu, Réveillez-vous ! ya Aprili 2009 vandaka ti disolo “Baleke ke kudiyula . . . Inki Mono Lenda Sala Sambu Kutanga Biblia Kupesa Mono Kiese?” (na Kifalansa.) Disolo yai vandaka ti bandongisila ya mfunu mpi bo tulaka lupangu na lutiti mosi, yina muntu lenda zenga sambu na kusadila ntangu yandi ke longuka Biblia. Keti bambuta mpi bakaka mambote na disolo yai? Mama mosi ke tuba nde, yandi vandaka kutanga Biblia na mpasi. Kansi yandi sadilaka bandongisila ya disolo yango mpi bubu yai kutanga Biblia ke sepedisaka yandi mingi. Yandi ke tuba nde, kumona kuwakana yina kele na kati ya mikanda ya Biblia mpi mutindu yo ke monisaka mambu pwelele ke pesaka yandi kiese. Yandi ke yika nde: “Bubu yai, kutanga Biblia me kumaka kupesa mono kiese mingi kuluta.”

17, 18. Inki mambote beto lenda baka kana beto ke tanga masolo yina bo ke sonikaka sambu na bantu yonso? Pesa mbandu.

¹⁷ Mikanda sambu na bantu yonso. Banda na 2008, beto me kumaka ti Nzozulu ya Nkengi nimero ya kulonguka. Bo ke  basisaka yo sambu na Bambangi ya Yehowa, kansi beto kele mpi ti bazulunalu sambu na bantu yonso. Inki mutindu beto lenda bakila yo mambote? Beto tadila mbandu mosi. Nge kele na kiese sambu muntu mosi ya nge bingisaka na lukutakanu me kwisa. Ntangu mutubi ke sala diskure, nge ke yindula mpi ke kudiyula mutindu muntu yango ke kudiwa sambu na malongi yina yandi ke wa mpi mutindu yo lenda soba luzingu na yandi. Inki mambote nge ta baka? Diskure yango ta simba mpi ntima na nge, nkutu nge ta sepela ti yo mingi.

¹⁸ Beto lenda kudiwa mpi mutindu yai ntangu beto ke tanga mikanda yina bo ke basisaka sambu na bantu yonso. Mu mbandu, Nzozulu ya Nkengi nimero ya bantu yonso mpi masolo yina kele na site jw.org ke tendulaka malongi ya Biblia na bangogo ya pete yina bantu lenda bakisa. Kutanga yo ta sadisa beto na kubakisa diaka Biblia mbote-mbote mpi kuzola diaka mingi bakieleka ya Biblia yina beto ke zabaka dezia. Yo lenda sadisa beto mpi na kutendudila bantu pwelele balukwikilu na beto na kisalu ya kusamuna. Mutindu mosi, Réveillez-vous ! ke landaka kundimisa beto nde kele ti Nzambi yina gangaka bima yonso. Yo ke sadisaka beto mpi na kutendudila bantu balukwikilu na beto.—Tanga 1 Piere 3:15.

19. Inki mutindu beto lenda tonda Yehowa sambu na mambu yina yandi ke longaka beto?

¹⁹ Ya kieleka, Yehowa ke pesaka beto bandongisila mpi malongi mingi sambu na mambote na beto mosi. (Matayo 5:3) Bika beto landa kutanga mpi kusadila yo. Kana beto sala mpidina, beto ta baka mambote mpi beto ta monisa Yehowa nde beto kele na ntonda sambu na mambu yonso yina yandi ke longaka beto.—Yezaya 48:17.