Keti Biblia Ke Landa Kusoba Luzingu na Nge?
“Beno kumisa mabanza na beno ya mpa.”—BAROMA 12:2.
BANKUNGA: 61, 52
1-3. (a) Inki bansoba beto lenda mona mpasi na kusala na nima ya mbotika? (b) Inki bangiufula beto lenda kudiyula kana beto ke kuka ve kuyambula bifu ya nkaka? (Tala bifwanisu ya luyantiku ya disolo.)
NA NSUNGI ya bamvula mingi, Kevin vandaka kusala bansaka ya mbongo, kunwa malafu mingi, makaya mpi bima ya nkaka ya ke lawusaka. [1] (Tala noti na nsuka ya disolo.) Na nima, yandi longukaka mambu ya Yehowa mpi zolaka kukuma nduku na yandi. Yo lombaka nde yandi soba kibeni bikalulu na yandi. Yehowa mpi Ndinga na yandi Biblia sadisaka Kevin na kusoba.—Baebreo 4:12.
2 Na nima ya mbotika, Kevin landaka kusoba bikalulu na yandi sambu na kukuma Mukristu ya mbote kibeni. (Baefezo 4:31, 32) Mu mbandu, yandi vandaka kuwa makasi nswalu. Yandi yitukaka na kumona nde kuyambula kifu yina vandaka pete ve. Kevin ke tuba nde kuyambula kifu yina vandaka mpasi kuluta kuyambula mambu yina yandi vandaka kusala na ntwala ya kubaka mbotika! Kansi kusamba Yehowa mpi kulonguka mbote Biblia sadisaka yandi na kununga.
3 Na ntwala ya kubaka mbotika, bampangi mingi salaka bansoba ya nene sambu na kukuma ti bikalulu ya mbote yina Biblia ke lombaka Bakristu. Kansi bubu yai beto lenda mona nde beto fwete soba mwa bikalulu ya nkaka sambu na kulanda mbote mbandu ya Yehowa ti ya Yezu. (Baefezo 5:1, 2; 1 Piere 2:21) Mu mbandu, beto lenda mona nde beto ke bokutaka mingi, ke tongaka bampangi to ke tubaka mambu ya mbi sambu na bo. Bantangu ya nkaka, kudiyangisa mingi sambu na mambu yina bantu ya nkaka lenda yindula to kutuba sambu na beto ke kangaka beto nzila ya kusala mambu ya mbote. Ziku, beto me mekaka bamvula mingi kuyambula bikalulu yai, kansi beto ke kukaka ve. Yo yina beto lenda kudiyula nde: ‘Sambu na nki mono ke kuka ve kusala mwa bansoba yai? Inki mono lenda sala sambu na kusadila bandongisila ya Biblia mpi kukuma ti bikalulu ya mbote?’
NGE LENDA SEPEDISA YEHOWA
4. Sambu na nki beto ke kukaka ve kusepedisa Yehowa na mambu yonso?
4 Beto ke zolaka Yehowa mpi nzala na beto ya ngolo kele ya kusepedisa yandi. Kansi sambu beto kele bantu ya kukonda kukuka, beto lenda sepedisa yandi ve konso ntangu. Mbala mingi beto ke kudiwaka bonso ntumwa Polo, yina tubaka nde: “Mono kele ti nzala ya kusala mambu ya mbote kansi mono ke kukaka ve kusala yo.”—Baroma 7:18; Yakobo 3:2.
5. Inki bansoba beto salaka na ntwala ya kubaka mbotika, kansi nki bifu beto lenda vanda ti yo kaka?
5 Na ntwala ya kukuma Bambangi ya Yehowa, beto yambulaka mambu yina Yehowa ke zolaka ve. (1 Bakorinto 6:9, 10) Kansi beto kele kaka bantu ya kukonda kukuka. (Bakolosai 3:9, 10) Beto ke landa kusala bifu ata beto me bakaka mbotika banda ntama. Bangindu ya mbi lenda kwisila beto mbala na mbala na mabanza, to ziku beto ke kukaka ve kuyambula kifu mosi buna. Ya kieleka, beto lenda nwana ti kifu mosi bamvula mingi.
6, 7. (a) Inki me sadisaka beto na kukuma banduku ya Yehowa ata beto kele bantu ya kukonda kukuka? (b) Sambu na nki beto fwete yambula ve kulomba Yehowa ndolula?
6 Ata beto kele bantu ya kukonda kukuka, beto lenda landa kuvanda banduku ya Yehowa mpi kusadila yandi. Yibukaka ntangu yonso mutindu nge kumaka nduku ya Yehowa. Yandi muntu monaka mambu ya mbote yina nge kele ti yo mpi zolaka nde nge zaba yandi. (Yoane 6:44) Yehowa zabaka bifu na nge. Yandi zabaka mpi nde nge ta salaka bifu. Kansi yandi zolaka kaka nde nge kuma nduku na yandi.
7 Yehowa ke zolaka beto mingi, yo yina yandi me pesaka beto dikabu mosi ya mbalu mingi. Yandi tindaka Mwana na yandi Yezu na ntoto sambu na kutambika luzingu na yandi bonso kimenga sambu na masumu na beto. (Yoane 3:16) Kana beto me sala disumu, beto lenda lomba Yehowa ndolula. Beto lenda tula ntima nde Yehowa ta lolula beto na nsadisa ya kimenga ya Yezu mpi beto ta vanda kaka banduku na yandi. (Baroma 7:24, 25; 1 Yoane 2:1, 2) Kuvila ve nde Yezu fwaka sambu na bantu ya masumu yina ke balulaka ntima. Yo yina, ata beto me salaka mambu ya mbi kibeni, beto fwete yambula ve ata fioti kulomba Yehowa ndolula. Kubuya kulomba Yehowa ndolula kele bonso kubuya kuyobisa maboko kana yo me kuma mvindu. Beto ke tonda Yehowa mingi mutindu yandi me sadisaka beto na kukuma banduku na yandi ata beto kele bantu ya kukonda kukuka!—Tanga 1 Timoteo 1:15.
Kana beto ke zola kukuma banduku ya ngolo ya Yehowa, beto fwete landa mbandu na yandi ti Mwana na yandi
8. Sambu na nki beto fwete tula dikebi na bifu na beto?
8 Ya kieleka, beto fwete kanga ve meso na bifu na beto to kupesa-pesa bikuma. Yehowa me zabisaka beto bikalulu yina yandi ke zolaka nde banduku na yandi kuvanda ti yo. (Nkunga 15:1-5) Yo yina, kana beto ke zola kukuma banduku na yandi ya ngolo, beto fwete landa mbandu na yandi ti Mwana na yandi. Beto fwete sala mpi bikesa ya kuyala banzala na beto ya mbi; nkutu beto lenda kuka kuyambula ya nkaka. Yo vanda beto me bakaka mbotika ntama to ve, beto fwete landa kutomisa bikalulu na beto.—2 Bakorinto 13:11.
9. Inki mutindu beto me zaba nde beto lenda landa kulwata kimuntu ya mpa?
9 Ntumwa Polo zabisaka Bakristu nde: “Bo longaka beno na kukatula kimuntu ya ntama, yina ke wakana ti bikalulu na beno ya ntama mpi yina ke beba na kulanda banzala na yo ya ke kusaka. Mpi beno fwete landa kukuma ya mpa na ngolo yina ke twadisaka mabanza na beno, mpi beno fwete lwata kimuntu ya mpa yina bo gangaka na kuwakana ti luzolo ya Nzambi na lunungu mpi na kwikama ya kieleka.” (Baefezo 4:2224) Yo ke tendula nde beto fwete landa kusala bikesa sambu na kusoba mpi ‘kulwata kimuntu ya mpa.’ Yo yina, ata beto ke sadilaka Yehowa banda ntama to ve, beto fwete landa na kulonguka bikalulu na yandi. Biblia lenda sadisa beto mpi na kusoba bikalulu na beto sambu na kukuma bonso Yehowa.
SAMBU NA NKI YO KE VANDAKA MPASI MINGI?
10. Inki beto fwete sala sambu Ndinga ya Nzambi kulanda kusoba kimuntu na beto, mpi nki bangiufula beto lenda kudiyula?
10 Beto yonso ke zolaka kusala mambu yina Biblia ke tubaka. Kansi beto fwete sala ngolo kana beto ke zola kulanda na kusoba. Keti kusala mpidina kele mfunu? Keti Yehowa lenda kumisa ve mambu pete sambu beto kuka kusala mambu ya mbote?
11-13. Sambu na nki Yehowa ke zolaka nde beto sala bikesa mingi sambu na kuyambula bifu na beto?
11 Kana beto tala bima yonso yina Yehowa me gangaka, beto ke ndima nde yandi kele ti ngolo ya kusala konso kima. Mu mbandu, yandi me salaka ntangu, kima mosi ya ngolo mingi kibeni. Na konso sekondi, ntangu ke basisaka nsemo mpi tiya ya mingi mpenza; kansi ndambu mpamba ke kumaka awa na ntoto mpi ke sadisaka bigangwa yonso na kuzinga. (Nkunga 74:16; Yezaya 40:26) Yehowa ke pesaka mpi bansadi na yandi awa na ntoto ngolo yina bo kele na yo mfunu. (Yezaya 40:29) Yo kele pwelele nde, kana Yehowa me zola, yandi lenda kumisa mambu pete kibeni sambu beto yambula bifu na beto mpi beto wa diaka ve nzala ya kusala mbi. Kansi sambu na nki yandi ke salaka ve mpidina?
12 Yehowa me pesaka beto kimpwanza ya kupona beto mosi kana beto ta lemfukila yandi to ve. Ntangu beto ke bakaka lukanu ya kulemfukila yandi mpi ke salaka bikesa ya kusala luzolo na yandi, beto ke monisaka nde beto ke zolaka yandi mpi ke zolaka kupesa yandi kiese. Satana ke tubaka nde Yehowa kele ve ti nswa ya kuyala. Yo yina, ntangu beto ke lemfukilaka Yehowa, beto ke monisaka nde beto ke zolaka nde yandi yala beto. Beto tula ntima nde Tata na beto ya zola ke bakaka na mbalu bikesa yina beto ke salaka sambu na kulemfukila yandi. (Yobi 2:3-5; Bingana 27:11) Kana beto ke sala bikesa sambu na kuyala bifu na beto, ata yo kele ve pete, beto ke monisaka kwikama na beto na Yehowa mpi ke zolaka nde yandi yala beto.
13 Yehowa ke lombaka beto na kusala ngolo sambu na kulanda mbandu na yandi. (Bakolosai 3:12; tanga 2 Piere 1:5-7.) Yandi ke zolaka mpi nde beto yala bangindu mpi mawi na beto. (Baroma 8:5; 12:9) Beto ke waka kiese mingi kana beto me sala bikesa sambu na kununga mpi kusoba kifu mosi.
BIKA NDINGA YA NZAMBI LANDA KUSOBA NGE
14, 15. Inki mutindu beto lenda kuma ti bikalulu yina ke sepedisaka Yehowa? (Tala lupangu “ Biblia mpi Kisambu Sobaka Luzingu na Bo.”)
14 Inki beto fwete sala sambu na kukuma ti bikalulu yina Yehowa ke zolaka? Beto fwete bika Ndinga ya Nzambi kusonga beto mambu yina beto fwete soba, na kisika ya kuyindula yo beto mosi. Baroma 12:2 ke tuba nde: “Beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa, sambu beno kudindimisa luzolo ya Nzambi yina kele ya mbote, yina yandi lenda ndima, mpi yina kele ya kukuka.” Yo yina, sambu na kuzaba luzolo ya Yehowa, beto fwete tula ntima na lusadisu yina yandi ke pesaka beto. Beto fwete tangaka Biblia konso kilumbu, kuyindula mambu ya beto ke tanga mpi kulomba Yehowa mpeve santu. (Luka 11:13; Bagalatia 5:22, 23) Kana beto sala mpidina, Yehowa lenda sadisa beto na kuzaba mambu yina ke pesaka yandi kiese, mpi beto lenda kuma kuyindula bonso yandi. Nsuka-nsuka, bangindu na beto, mambu ya beto ke tuba mpi ke sala ta sepedisa Yehowa, mpi beto ta zaba mutindu ya kuyambula bifu na beto. Ata mpidina, yo ta lomba kaka nde beto landa kunwana ti bifu na beto.—Bingana 4:23.
Tula kisika mosi masolo ya mikanda na beto to baverse ya Biblia yina lenda sadisa nge na kuyambula bikalulu na nge ya mbi, mpi tangaka yo mbala na mbala (Tala paragrafe 15)
15 Katula kutanga Biblia konso kilumbu, beto fwete longukaka yo na nsadisa ya mikanda na beto, mu mbandu Nzozulu ya Nkengi mpi Réveillez-vous ! Masolo mingi ya mikanda yai ke sadisaka beto na kulanda mbandu ya Yehowa mpi kuzaba mutindu ya kununga bifu na beto. Beto lenda kuta mpi masolo to baverse yina ta sadisa beto mingi. Beto lenda tula baverse ti masolo yina kisika mosi sambu na kutangaka yo mbala na mbala.
16. Sambu na nki beto fwete lemba ve kana beto ke kuka ve kusala bansoba nswalu?
16 Yo ke lombaka ntangu mingi sambu na kukuka kulanda mbandu ya Yehowa. Yo yina, kana nge mona nde nge me sala ve bansoba yina nge ke zolaka kusala, kulemba ve nitu. Ziku yo ke lomba nde nge sala bikesa sambu na kusala mambu yina Biblia ke tuba. Kuyindula mpi kusala mambu yina Yehowa ke lomba nge ta sadisa nge na kukuma kuyindula bonso yandi mpi kusala mambu ya mbote.—Nkunga 37:31; Bingana 23:12; Bagalatia 5:16, 17.
YINDULA MAMBU YA KITOKO YINA KE VINGILA BETO NA BILUMBU KE KWISA
17. Inki mambote beto ta baka kana beto me bikala ya kwikama na Yehowa?
17 Beto ke vingila na kiese ntangu yina beto ta kuma bantu ya kukuka mpi ta sadila Yehowa mvula na mvula. Na ntangu yina, beto ta vanda diaka ve ti bikalulu ya mbi, mpi beto ta landaka mbandu ya Yehowa kukonda mpasi. Kansi ata bubu yai, beto lenda sambila mpi Yehowa sambu yandi me pesaka beto dikabu ya nkudulu. Ata beto kele bantu ya kukonda kukuka, beto lenda sepedisa Yehowa kana beto ke landa kusala ngolo sambu na kusoba mpi kuzitisa mambu yina yandi ke longa beto na Biblia.
18, 19. Inki ke ndimisa beto nde Biblia kele ti ngolo ya kulanda kusoba luzingu na beto?
18 Kevin salaka bikesa sambu na kuyambula kikalulu na yandi ya makasi. Yandi yindululaka mambu yina yandi tangaka na Biblia mpi salaka bikesa sambu na kusoba bikalulu na yandi. Yandi sadilaka mpi bandongisila yina bampangi pesaka yandi. Kevin yambulaka kikalulu yina, ata yo bakaka yandi mwa bamvula. Na nima, yandi kumaka nsadi ya kisalu. Bubu yai yandi kele nkuluntu banda bamvula 20. Kansi ata bubu yai, yandi me zaba nde yandi fwete landa kunwana ti bifu na yandi.
19 Beto lenda landa kutomisa mpi bikalulu na beto bonso Kevin. Kana beto sala yo, beto ta landa kuvanda banduku ya ngolo ya Yehowa. (Nkunga 25:14) Kana beto ke sala bikesa sambu na kusoba mpi kusepedisa Yehowa, yandi ta sadisa beto na kununga. Beto lenda tula ntima nde Biblia ta sadisa beto na kulanda kusoba kimuntu na beto.—Nkunga 34:8.
^ [1] (paragrafe 1) Beto me soba zina.
