1. Tanga mwa bansiku ya Biblia, mpi tubila mambote yina beto ke bakaka ntangu beto ke zitisaka yo.

YEHOWA me pesaka beto bansiku na Biblia sambu na kuzaba luzolo na yandi. Mu mbandu, yandi ke tuba nde beto fwete sambila ve biteki, beto fwete yiba ve, kulawuka malafu ve, to kusala ve mansoni. (1 Bakorinto 6:9, 10) Yezu, Mwana ya Yehowa, me pesaka mpi balongoki na yandi nsiku yai: “Beno kumisa bantu ya makanda yonso balongoki, beno botika bo na zina ya Tata mpi ya Mwana mpi ya mpeve santu, beno longa bo na kuzitisa mambu yonso ya mono songaka beno. Mpi mono kele ti beno bilumbu yonso tii na nsukilu ya ngidika ya bima.” (Matayo 28:19, 20) Bansiku yonso ya Yehowa ti ya Yezu ke vandaka kaka sambu na mambote na beto. Yo ke sadisaka beto na kulungisa bampusa na beto mosi mpi ya mabuta na beto, kuvanda ti mavimpi ya mbote mpi kuzinga na kiese. Kima ya mfunu kele nde, ntangu beto ke zitisaka bansiku ya Yehowa, mu mbandu nsiku ya kusamuna, yandi ke sepelaka ti beto mpi ke sakumunaka beto.

2, 3. (a) Sambu na nki Biblia ke pesaka beto ve bansiku na konso kima ya beto fwete sala? (b) Inki bangiufula beto ta tadila na disolo yai? (Tala kifwanisu ya luyantiku ya disolo.)

 ² Ata mpidina, Biblia ke pesaka ve bansiku na mambu yonso ya luzingu. Mu mambu, yo ke tubilaka ve na siki-siki bilele ya beto fwete lwata. Yo ke monisa mpenza mayele ya Yehowa. Ata na ntoto ya mvimba bantu ke lwataka bilele ya mutindu na mutindu mpi bo ke sobaka ntangu yonso mutindu ya kulwata, bandongisila ya Biblia na mambu ya kulwata ke manaka ve ngala. Yo ke pesaka mpi ve bansiku mingi ya me tala kisalu yina beto fwete sala, bansaka ya kulutisila ntangu, to mambu yina beto fwete sala sambu na kuvanda ti mavimpi ya mbote. Na mambu ya mutindu yai, Yehowa ke bikaka nde muntu yandi mosi to bamfumu ya mabuta kubaka lukanu.

³ Yo yina, kana beto ke zola kubaka lukanu mosi ya mfunu, yina lenda natila beto mambote to bampasi, kansi ata nsiku mosi ve ya Biblia ke tubila yo, beto lenda kudiyula nde: ‘Inki mutindu Yehowa ta tadila lukanu yai? Keti yandi ta sepela na konso lukanu yina mono lenda baka, yina ke fwa ve bansiku ya Biblia? Inki lenda ndimisa mono nde yandi ta sepela ti lukanu ya mono ke baka?’

4, 5. Tendula mutindu balukanu na beto lenda natila beto mosi to bankaka mambote to bampasi.

⁴ Bantu ya nkaka ke yindulaka nde bo lenda sala konso kima yina bo me zola. Kansi beto fwete sala mambu yina ke pesaka Yehowa kiese. Yo yina, na ntwala ya kubaka lukanu mosi, beto fwete tadila mbote mambu Biblia ke tuba mpi kulemfukila yo. Mu mbandu, Biblia ke songaka beto mabanza ya Yehowa sambu na menga mpi beto ke zitisaka yo. (Kuyantika 9:4; Bisalu 15:28, 29) Beto lenda lomba Yehowa na kusadisa beto na kubaka balukanu yina ta pesa yandi kiese.

⁵ Balukanu na beto lenda natila beto mambote to bampasi. Lukanu ya mbote ta sadisa beto na kukangama ti Yehowa. Kansi lukanu ya mbi lenda fwa kinduku na beto ti yandi. Balukanu na beto lenda natila mpi bankaka mambote to bampasi. Beto ke sosaka ve kusala mambu yina lenda pesa bampangi na beto mpasi to kulembisa lukwikilu na bo. Beto ke zolaka mpi ve kubasisa mavwanga na kati ya bampangi na dibundu. Yo yina, kubaka balukanu ya mbote kele mfunu mingi.—Tanga Baroma 14:19; Bagalatia 6:7.

6. Inki lenda sadisa beto na kubaka balukanu?

⁶ Inki lenda sadisa beto na kubaka balukanu ya mbote na mambu yina Biblia ke tuba ve pwelele? Beto sala ve kaka mambu yina beto ke zola, kansi beto fwete tadila mbote luzingu na beto mpi kubaka lukanu yina ta pesa Yehowa kiese. Kana beto ke sala mpidina, Yehowa ta sadisa beto na kubaka mambote mingi.—Tanga Nkunga 37:5.

7. Kana Biblia ke tubila ve kima mosi ya beto ke zola kusala, nki mutindu beto lenda bakisa luzolo ya Yehowa?

⁷ Inki mutindu beto lenda zaba mambu yina ta pesa Yehowa kiese? Baefezo 5:17 ke tuba nde: “Landa kubakisa kana luzolo ya Yehowa kele inki.” Kana Biblia ke monisa ve pwelele nsiku ya Yehowa na kima mosi ya beto ke zola kusala, beto fwete sosa kaka  kubakisa luzolo ya Yehowa. Inki mutindu? Beto fwete samba yandi mpi kubika nde mpeve santu na yandi kutwadisa beto.

8. Inki mutindu Yezu bakisaka luzolo ya Yehowa? Pesa mbandu.

⁸ Yezu vandaka kubakisa ntangu yonso luzolo ya Yehowa. Mu mbandu, na mabaku zole, ntangu bantu vandaka na nzala, Yezu sambaka mpi salaka kimangu sambu na kudisa bo. (Matayo 14:17-20; 15:34-37) Kansi na ntoto ya zelo na zelo, ntangu yandi mosi waka nzala mpi Diabulu songaka yandi na kukumisa matadi mampa, Yezu buyaka. (Tanga Matayo 4:2-4.) Yandi zabaka Tata na yandi mbote-mbote. Yo yina yandi bakisaka nde Yehowa ta zola ve nde yandi sadila mpeve santu sambu na mambote na yandi mosi. Yandi zabaka nde Tata na yandi ta sadisa yandi mpi ta pesa yandi madia na ntangu ya me fwana.

9, 10. Inki ta sadisa beto na kubaka balukanu ya mbote? Pesa mbandu.

⁹ Bonso Yezu, beto lenda baka balukanu ya mbote kana beto ke sosa lutwadisu ya Yehowa. Biblia ke tuba nde: “Tula ntima na nge ya mvimba na Yehowa, mpi kutula ve ntima na mayele na nge mosi ya kubakisa mambu. Na banzila na nge yonso, yindula yandi, ebuna yandi ta katula basakuba na banzila na nge. Kukuma ve mayele na meso na nge mosi. Wa Yehowa boma mpi tina mambu ya mbi.” (Bingana 3:5-7) Kana beto ke longuka Biblia mpi ke sosa kuzaba mabanza ya Yehowa, beto ta bakisa luzolo na yandi ntangu beto ke zola kusala kima mosi. Kulonguka mingi bangindu ya Yehowa ta sadisa beto na kubaka balukanu yina ta pesa yandi kiese. Mpidina, beto ta lemfukaka “kukonda mpasi na lutwadisu ya Nzambi.”—Ezekiele 11:19, noti na nsi ya lutiti.

¹⁰ Beto baka mbandu. Nkento mosi me mona sapatu ya kitoko na zandu. Kansi yo kele ntalu mingi. Ata bakala na yandi kele ve pana, yandi me zaba nki bakala ta tuba kana yandi basisa mbongo mingi sambu na kusumba yo. Inki me sadisa yandi? Sambu bo me kwelanaka ntama, yandi me zaba mutindu bakala na yandi ke zolaka nde bo sadila mbongo na bo. Mutindu mosi, kana beto ke longuka bangindu ya Yehowa mpi mambu yina yandi salaka na ntama, beto ta zaba luzolo na yandi na mambu mingi.

11. Inki bangiufula beto lenda kudiyula ntangu beto ke tanga Biblia to ke longuka yo? (Tala lupangu “ Biblia Ke Landa Kusoba Luzingu na Bo.”)

¹¹ Inki mutindu beto lenda zaba bangindu ya Yehowa? Kutanga mpi kulonguka Biblia konso kilumbu ta sadisa beto mingi. Ntangu beto ke tanga mpi ke longuka yo, beto lenda kudiyula nde: ‘Mambu yai ke longa mono nki sambu na Yehowa? Sambu na nki Yehowa salaka mambu mutindu yai?’ Bonso Davidi, beto fwete lomba Yehowa na kusadisa beto na kuzaba yandi mbote. Davidi  lombaka nde: “Songa mono banzila na nge, O Yehowa; longa mono banzila na nge. Tambusa mono na kieleka na nge mpi longa mono, sambu nge kele Nzambi na mono ya luguluku. Mono ke tula kivuvu na nge kilumbu ya mvimba.” (Nkunga 25:4, 5) Ntangu beto me longuka kima mosi ya me tala Yehowa, beto lenda yindula mutindu ya kusadila yo. Keti yo ke lomba kusadila yo na dibuta, na kisalu, na nzo-nkanda, to na kisalu ya kusamuna? Kuyindula mpidina ta sadisa beto na kubakisa mutindu Yehowa ke zola nde beto sadila mambu yina beto ke longuka.

12. Inki mutindu mikanda na beto mpi balukutakanu ke sadisaka beto na kuzaba dibanza ya Yehowa na mambu mingi?

¹² Kutula dikebi na malongi ya Biblia yina dibundu na yandi ke longaka beto ta sadisa beto mpi na kuzaba bangindu ya Yehowa. Mu mbandu, kana beto ke zola kubaka lukanu mosi buna, Index ti Mukanda ya Bansosa Sambu na Bambangi ya Yehowa lenda sadisa beto na kuzaba bangindu ya Yehowa. Beto lenda baka mpi mambote na balukutakanu na beto kana beto ke landa na dikebi yonso, ke pesa bakomantere, mpi ke yindulula mambu yina bo ke longa. Yo ta sadisa beto na  kutadila mambu bonso Yehowa. Mpidina, yo ta sadisa beto na kubaka balukanu yina ta pesa yandi kiese mpi yandi ta sakumuna beto.

13. Pesa mbandu ya ke monisa mutindu kuzaba bangindu ya Yehowa lenda sadisa beto na kubaka balukanu ya mbote.

¹³ Beto tadila mbandu mosi ya ke monisa mutindu beto lenda baka lukanu ya mbote kana beto me zaba ngindu ya Yehowa. Ziku nge ke zolaka kukuma mupasudi-nzila. Nge me sala bansoba na luzingu na nge sambu na kukuma ti ntangu mingi ya kusamuna. Kansi nge ke kudiyula kana nge ta zinga kibeni na kiese mutindu nge ta kuma kuzinga ti mbongo fioti mpi bima fioti. Ya kieleka, Biblia ke tuba ve nde sambu na kusadila Yehowa, beto fwete kuma bapasudi-nzila. Beto lenda landa kusadila Yehowa na kwikama yonso ata beto kele kaka bansamuni. Kansi, beto vila ve nde Yezu tubaka nde Yehowa ke sakumunaka bantu yina ke salaka bibansa sambu na Kimfumu. (Tanga Luka 18:29, 30.) Biblia ke tuba diaka nde Yehowa ke sepelaka ntangu beto ke salaka bikesa sambu na kupesa yandi lukumu, mpi yandi ke zolaka nde beto sadila yandi na kiese. (Nkunga 119:108; 2 Bakorinto 9:7) Kana beto ke samba sambu na mambu yai mpi ke yindula yo, beto lenda baka balukanu yina ta sadisa beto na luzingu mpi Yehowa ta sakumuna beto.

14. Inki mutindu nge lenda zaba kana lele mosi kele mbote na meso ya Yehowa?

¹⁴ Mbandu ya nkaka yo yai: Nge ke sepela mingi ti lele mosi, kansi nge me zaba nde kana nge lwata yo, yo lenda pesa bampangi ya nkaka mpasi. Ata Biblia ke tuba ve ata kima sambu na lele yina, nki mutindu nge lenda zaba ngindu ya Yehowa? Biblia ke tuba nde: “Bankento fwete kuditomisa ti bilele ya me fwana, kukonda kulutisa ndilu mpi bo vanda ti mabanza ya mbote, kansi ve ti mitindu ya kutunga nsuki mpi wolo to mayaka to bilele ya ntalu mingi kibeni, kansi na mutindu yina me fwana sambu na bankento yina ke tubaka nde bo ke kangamaka na Nzambi, disongidila, na nzila ya bisalu ya mbote.” (1 Timoteo 2:9, 10) Bansadi ya Yehowa yonso, yo vanda babakala, lenda baka mambote ya ndongisila yai. Kudikulumusa ta sadisa beto na kuyindula mutindu bankaka ta kudiwa kana beto me lwata lele mosi buna. Zola na beto sambu na bampangi ta sadisa beto na kusala ve mambu yina ta pesa bo nsoni to mpasi. (1 Bakorinto 10:23, 24; Bafilipi 3:17) Kana beto ke tadila mambu yina Biblia ke tuba mpi bangindu ya Yehowa, beto ta baka balukanu yina ta pesa Yehowa kiese.

15, 16. (a) Yehowa ke kudiwaka nki mutindu kana beto ke landa kuyindula mambu ya mansoni? (b) Kana beto ke pona nsaka ya kulutisila ntangu, nki mutindu beto lenda zaba yina ke sepedisa Yehowa? (c) Inki beto fwete sala na ntwala ya kubaka balukanu ya nene?

¹⁵ Biblia ke longa beto nde Yehowa ke waka mpasi mingi mpi mawa ntangu bantu ke salaka to ke yindulaka mambu ya mbi. (Tanga Kuyantika 6:5, 6.) Yo ke pwelele nde Yehowa ke zolaka ve nde beto yindula mambu ya mansoni. Nkutu kana beto ke landa kuyindula mambu ya mbi, beto lenda sala yo mpenza. Yo yina Yehowa ke  zolaka nde beto yindula mambu ya mbote mpi ya bunkete. Longoki Yakobo sonikaka nde, mayele ya Yehowa kele “ntete-ntete bunkete, na nima ngemba, makambu ngolo ve, ya kuyilama na kulemfuka, ya kufuluka ti mawa mpi bambuma ya mbote, yo ke pona-ponaka ve, mpi yo ke vandaka ve ti luvunu.” (Yakobo 3:17) Biblia ke longa beto nde beto fwete buya bansaka yina lenda pusa beto na kuyindula to kuzola mambu ya mvindu mpi ya mbi. Kana beto ke bakisa mbote mambu yina Yehowa ke zolaka mpi ke mengaka, beto ta pona mbote mikanda, bafilme, to bansaka na beto. Beto ta vingilaka ve nde bantu kusonga beto mambu ya beto fwete sala.

¹⁶ Mbala mingi kana beto ke zola kubaka lukanu mosi, bangindu ya kusadila sambu na kusepedisa Yehowa ke vandaka mingi. Kansi, kana beto ke zola kubaka lukanu mosi ya mfunu mingi, yo kele mbote na kulomba ndongisila na nkuluntu to na mpangi mosi ya kuyela na kimpeve. (Tito 2:3-5; Yakobo 5:13-15) Ata mpidina, beto fwete lomba ve mpangi yina na kubakila beto lukanu. Beto fwete tadila mbote-mbote mambu yina Biblia ke tuba mpi kubaka lukanu beto mosi. (Baebreo 5:14) Ntumwa Polo tubaka nde: “Konso muntu ta nata kilo na yandi mosi.”—Bagalatia 6:5.

17. Inki mambote beto ta baka kana beto ke baka balukanu yina ke sepedisa Yehowa?

¹⁷ Kana beto ke baka balukanu yina ke sepedisa Yehowa, beto ta kuma banduku na yandi ya ngolo, yandi ta ndima mpi ta sakumuna beto. (Yakobo 4:8) Lukwikilu na beto ta kuma mpi ngolo. Yo yina beto fwete yindulula mambu ya beto ke tanga na Biblia sambu na kubakisa bangindu ya Yehowa. Beto ta longukaka ntangu yonso mambu ya mpa ya me tala Yehowa. (Yobi 26:14) Kansi kana beto ke sala bikesa sambu na kuzaba yandi bubu yai, beto ta kuma mayele mpi ta bakaka balukanu ya mbote. (Bingana 2:1-5) Bangindu ti balukanu ya bantu ke sobaka; kansi Yehowa ke sobaka ve ata fioti. Muyimbi-bankunga tubaka nde: “Balukanu ya Yehowa ta bikala kimakulu; bangindu ya ntima na yandi kele tii na bandonga yonso ya bantu yina ta kwisa.” (Nkunga 33:11) Ya kieleka, beto lenda baka balukanu ya kuluta mbote kana beto ke tadila mambu bonso Yehowa mpi kana beto ke sala mambu yina ke pesa yandi kiese.