Keti nge tangaka na dikebi yonso banimero ya Nzozulu ya Nkengi ya me katuka kubasika? Meka kupesa mvutu na bangiufula yai:

Inki banzikisa ke ndimisa nde Nzambi ke kuditulaka na kisika na beto?

Ntangu bantu ya Izraele ya ntama vandaka bampika na Ezipte, Nzambi vandaka kuzaba bampasi na bo mpi kuwa mpasi yina bo vandaka kuwa. (Kub. 3:7; Yez. 63:9) Nzambi me salaka beto na kifwani na yandi, yo yina beto lenda kuditula na kisika ya bantu ya nkaka. Yandi ke kuditulaka na kisika na beto ata beto mosi ke mona nde yo me fwana ve nde yandi zola beto.—wp18.3, balut. 8-9.

Inki mutindu malongi ya Yezu sadisaka bantu na kumenga ve bantu ya nkaka?

Na bilumbu ya Yezu, Bayuda mingi vandaka kumenga bantu ya nkaka. Kristu monisaka mfunu ya kudikulumusa mpi buyisaka kikalulu ya lulendo ya kumenga bantu ya mpusu ya nkaka. Yandi siamisaka balongoki na yandi na kuvanda na bumosi.—w18.06, balut. 9-10.

Inki dilongi beto ke baka mutindu Nzambi pesaka ve Moize nswa ya kukota na Ntoto ya Lusilu?

Moize vandaka nduku ya ngolo ya Yehowa. (Kul. 34:10) Ntangu bantu ya Izraele kumaka pene-pene ya bamvula 40 na ntoto ya zelo na zelo, bo bokutaka diaka sambu masa vandaka ve. Nzambi songaka Moize na kutubila ditadi. Kansi, Moize bulaka nti na ditadi. Ziku Yehowa sepelaka ve sambu Moize lemfukaka ve na bantuma na yandi mpi pesaka yandi ve nkembo sambu na kimangu yina. (Kut. 20:6-12) Mambu yai ke longa beto nde yo kele mfunu na kulemfukila Yehowa mpi kupesa yandi nkembo.—w18.07, balut. 13-14.

Inki kifu beto lenda sala kana beto ke sambisa na kutadila mambu yina ke monana?

Mambu tatu yina lenda sala nde bantu kusambisa na kutadila mambu yina ke monana kele: mpusu ya nitu to insi, mbongo mpi bamvula ya muntu. Yo kele mfunu nde beto tadila bantu mutindu Nzambi ke tadilaka bo kukonda kupona-pona! (Bis. 10:34, 35)—w18.08, balut. 8-12.

Inki mutindu bampangi yina kele bambuta lenda sadisa bampangi ya nkaka?

Bampangi ya me kuma bambuta yina mukumba na bo me sobaka ke vandaka kaka mfunu na meso ya Nzambi mpi bo lenda sadisa bampangi ya nkaka. Bo lenda sadisa bampangi yina bankwelani na bo kele ve Bakristu, bo lenda sadisa bampangi yina me lembaka na kimpeve, kulonguka Biblia ti bantu mpi kusamuna mingi.—w18.09, balut. 8-11.

Inki Bisadilu Bakristu kele na yo Sambu na Kulonga Bantu?

Beto kele ti bakarti ya viziti mpi baemvitasio. Batrakiti nana yina bo me yidika mbote, bazulunalu, Nzozulu ya Nkengi mpi Telama! Diaka beto kele ti tumikanda mpi mikanda, mikanda zole ya beto ke longukaka Biblia ti bantu, na kati ya bavideo iya, beto kele ti video Sambu na Nki Beto Fwete Longuka Biblia?​—w18.10, lut. 16.

Inki mutindu Mukristu lenda “sumba kieleka” mutindu Bingana 23:23 ke siamisa beto?

Beto ke futaka ve mbongo sambu na kulonguka kieleka. Kansi, yo ke lombaka ntangu mpi bikesa sambu na kuzwa yo.—w18.11, lut. 4.

Inki dilongi beto ke baka mutindu Ozea sadilaka nkento na yandi Gomere mambu?

Gomere salaka bizumba mbala mingi ata mpidina Ozea lolulaka yandi mpi fwaka ve makwela. Kana nkwelani mosi me sala pite, nkwelani yina me sala mbi ve lenda lolula nkwelani yina me sala mbi. Kana nkwelani yina salaka mbi ve me vukisa diaka nitu ti nkwelani na yandi, Biblia ke pesa bo ve nswa ya kufwa makwela.—w18.12, lut. 13.