KILUMBU mosi, Yezu tubaka nde: “Kiese ke vandaka mingi na kupesa, kansi na kubaka kiese ke vandaka fioti.” (Bis. 20:35) Kieleka yai ya mfunu ke tadila mpi kinduku na beto ti Yehowa. Inki mutindu? Yehowa me pesaka beto bima mingi yina ke pesaka beto kiese, kansi beto mpi lenda vanda na kiese ya mingi kana beto kabila Yehowa. Inki beto lenda kabila Yehowa? Bingana 3:9 ke tuba nde: “Kumisa Yehowa ti bima na nge ya ntalu, ti bambuma ya ntete ya bima na nge yonso.” ‘Bima na beto ya ntalu’ kele ntangu, mayele, ngolo mpi bima ya kinsuni. Kana beto ke sadila bima yai sambu lusambu ya kieleka kukwenda na ntwala, pana beto ke kabila Yehowa mpi kusala mutindu yina ta pesa beto kiese mingi.

Ntangu beto me baka lukanu ya kukabila Yehowa bima na beto ya kinsuni, nki ta sadisa beto na kuvila ve kusala yo? Ntumwa Polo songaka bampangi ya Korinto na ‘kutula ndambu ya mbongo na lweka’ sambu na kupesa makabu. (1 Bak. 16:2) Inki mutindu nge lenda zaba mitindu mingi ya kupesa makabu na insi na beno? Tala lupangu yai na nsi.

Bansi yonso ve ke pesaka makabu na nzila ya Internet. Kansi, bo lenda zwa mitindu ya nkaka ya kupesa makabu na site Internet. Na bansi ya nkaka, bo me tulaka mukanda mosi na site Internet sambu na kupesa bamvutu na bangiufula yina bantu ke yulaka mingi na yina me tala kupesa makabu.