1-3. (a) Inki mutindu beto fwete kudiwa sambu na kieleka ya Biblia? Pesa mbandu. (Tala bifwanisu ya luyantiku ya disolo.) (b) Inki beto ta longuka na disolo yai?

BUBU yai, bantu mingi lenda sumba bima na magazini mpi kuvutula yo diaka. Ziku kima ya bo sumbaka vandaka ve ya mbote to yina bo yindulaka. Yo yina, bo ke vutulaka yo sambu na kupona ya nkaka to bo ke lombaka nde bo vutudila bo mbongo.

² Beto lenda sala ve mpidina sambu na kieleka ya Biblia. Kana beto me “sumba” yo beto fwete ‘teka’ yo ve ata fioti, disongidila, kana beto me longuka kieleka, beto fwete yambula yo ve. (Tanga Bingana 23:23; 1 Timoteo 2:4) Na disolo yina me luta, beto monaka nde yo ke lombaka ntangu mingi sambu na kulonguka kieleka. Mbala ya nkaka, beto yambulaka kisalu ya mbote yina vandaka kupesa beto mbongo mingi. Ziku yo lombaka mpi nde beto yambula banduku na beto ya nkaka, kusoba mabanza mpi bikalulu na beto to beto yambulaka mambu yina ke sepedisaka ve Yehowa. Ata mpidina, beto ke ndimaka nde balusakumunu yina beto me bakaka sambu beto me zabaka kieleka kele mbalu mingi kuluta mambu yina beto me yambulaka.

 ³ Yezu pesaka kingana ya muntu ya mumbongo ya ke salaka banzietelo yina vandaka kusosa mayaka ya kitoko. Ntangu yandi zwaka diyaka mosi ya mfunu mingi, na mbala mosi yandi tekaka bima na yandi yonso sambu na kusumba diyaka yina. Diyaka ke monisa kieleka ya Kimfumu ya Nzambi. Na mutindu yina, Yezu monisaka nde kieleka kele mfunu mingi sambu na bantu yina ke sosaka yo. (Matayo 13:45, 46) Ntangu beto yantikaka kulonguka kieleka ya Kimfumu ya Nzambi mpi mambu ya nkaka ya mfunu ya Biblia, beto buyaka na luzolo yonso mambu ya nkaka sambu na kuzwa yo. Kana beto ke landa kubaka kieleka na mbalu, beto ta yambula yo ve ata fioti. Kansi diambu ya mawa kele nde, bansadi ya nkaka ya Nzambi ke bakaka diaka ve kieleka na mbalu mpi nkutu bo me yambulaka yo. Beto ta sala yo ve ata fioti! Beto fwete sadila bandongisila ya Biblia sambu beto “landa kutambula na kieleka.” (Tanga 3 Yoane 2-4.) Disongidila beto fwete tula kieleka na kisika ya ntete mpi kusadila yo na luzingu na beto. Kansi, sambu na nki mpi nki mutindu muntu lenda ‘teka’ to kuyambula kieleka? Inki lenda ndimisa beto nde beto ta sala ve diambu yai ata fioti? Inki mutindu beto lenda “landa kutambula na kieleka”?

4. Sambu na nki bantu ya nkaka na bilumbu ya Yezu yambula kieleka?

⁴ Na bilumbu ya Yezu, bantu ya nkaka yina ndimaka kieleka yambulaka yo. Mu mbandu, ntangu Yezu disaka bantu mingi na mutindu ya kuyituka, bantu yango landaka yandi na simu ya nkaka ya Nzadi-Mungwa ya Galilea. Na nima, diambu yina Yezu tubaka pesaka bo mpasi, yandi tubaka nde: “Kana beno dia ve nsuni ya Mwana ya muntu mpi beno nwa ve menga na yandi, beno kele ve ti luzingu na kati na beno mosi.” Na kisika ya kuyula Yezu ntendula ya mambu yina, bo tubaka nde: “Mambu yai kele mpasi na kundima; nani lenda wa yo?” Nsuka-nsuka, “balongoki na yandi mingi kwendaka na bima yina vandaka na nima mpi vandaka kutambula diaka ve ti yandi.”—Yoane 6:53-66.

5, 6. (a) Sambu na nki bampangi ya nkaka ke yambulaka kieleka bubu yai? (b) Inki mutindu muntu lenda yambula kieleka?

⁵ Diambu ya mawa kele nde bampangi ya nkaka me yambula kieleka. Sambu na nki? Mbala ya nkaka bo yambulaka sambu dibundu ya Yehowa sobaka mutindu ya kubakisa verse mosi to sambu na kima mosi yina mpangi ya kele ti mukumba tubaka to salaka. Ziku bankaka sepelaka ve ti ndongisila ya Biblia yina mpangi mosi pesaka bo to bo vandaka ve kuwakana ti mpangi ya nkaka. Bankaka ndimaka malongi ya luvunu ya ba-aposta to ya bantu ya nkaka yina ke tubaka mambu ya luvunu sambu na Bambangi ya Yehowa. Yai kele mwa bikuma yina me pusaka bankaka na kuyambula Yehowa mpi dibundu na luzolo yonso. (Baebreo 3:12-14) Yo zolaka kuvanda mbote kibeni kana bo monisaka lukwikilu na Yezu bonso Piere! Ntangu bantu ya nkaka waka mpasi sambu na mambu yina Yezu tubaka, Yezu yulaka bantumwa kana bo mpi ke zola kuyambula yandi. Piere tubaka nde: “Mfumu, na nani beto ta kwenda? Nge kele ti bangogo ya luzingu ya mvula na mvula.”—Yoane 6:67-69.

⁶ Bantu ya nkaka ke yambulaka kieleka malembe-malembe, ziku kukonda kubakisa. Muntu yina ke yambulaka kieleka malembe-malembe kele bonso maswa  yina ke yantika kuvila nzila malembe-malembe. Biblia ke longisila beto na kuvanda mayele sambu beto “vila ve nzila ata fioti.” (Baebreo 2:1) Mbala mingi muntu yina ke yambulaka kieleka ke bakisaka ve diambu ya yandi ke sala. Kansi yandi ke bikaka nde kinduku na yandi ti Yehowa kulemba mpi nsuka-nsuka yandi ke vidisaka yo. Inki lenda ndimisa beto nde diambu yai ta kumina beto ve ata fioti?

7. Inki ta sadisa beto na kuteka ve kieleka ata fioti?

⁷ Sambu na kulanda kutambula na kieleka, beto fwete ndima mpi kulemfuka na mambu yonso yina Yehowa ke tuba. Beto fwete tula kieleka na kisika ya ntete na luzingu na beto mpi kusadila minsiku ya Biblia na mambu yonso. Ntotila Davidi silaka Yehowa na kisambu nde: “Mono ta tambula na kieleka na nge.” (Nkunga 86:11) Davidi bakaka lukanu ya kulanda kutambula na kieleka, beto mpi fwete sala yo. Kana ve, beto lenda kuma kuyindula mambu yina beto yambulaka sambu na kieleka mpi nkutu kuvutukila diaka mambu ya nkaka. Kansi, beto lenda ndima ve bakieleka ya Biblia ya nkaka mpi kubuya ya nkaka. Beto fwete ndima ‘bakieleka yonso.’ (Yoane 16:13) Na disolo yina me luta, beto tubilaka mambu tanu yina beto yambulaka sambu na kulonguka kieleka mpi kusadila yo. Na disolo yai, beto ta tubila mambu yina lenda sadisa beto na kuvutukila ve ata fioti mambu yina beto yambulaka.—Matayo 6:19.

8. Inki mutindu kusadila ntangu mbote ve lenda pusa Mukristu na kuyambula kieleka? Pesa mbandu.

⁸ Ntangu. Kima ta sadisa beto na kuyambula ve kieleka kele kusadila mbote ntangu na beto. Kana beto keba ve, beto lenda lutisa ntangu mingi na bansaka, na Internet to na kutala televizio. Ata mambu yai kele kibeni mbi ve, yo lenda baka beto ntangu yina beto zolaka kulonguka to kusamuna. Diambu yai kuminaka mpangi-nkento Emma. * Ntangu yandi vandaka leke, yandi vandaka kuzola bampunda mpi kutambwisa yo bisika yonso yina yandi vandaka kuzola. Kansi kansansa kumaka kuyangisa yandi sambu na bantangu yina yandi vandaka kulutisa na bansaka mpi yandi bakaka lukanu ya kusoba. Mbandu ya mpangi-nkento Cory Wells yina vandaka kusakana na zulu bampunda sadisaka mpi Emma. * Ntangu yai, Emma ke lutisaka ntangu mingi na kisalu ya Yehowa, ti dibuta na yandi mpi ti bampangi ya dibundu. Yandi kele na kiese mpi ke kudiwaka pene-pene na Nzambi sambu yandi ke sadilaka ntangu na yandi na mayele yonso.

9. Inki mutindu bima ya kinsuni lenda kuma mfunu mingi sambu na beto?

⁹ Bima ya kinsuni. Sambu na kulanda kutambula na kieleka, beto fwete tula ve bima ya kinsuni na kisika ya ntete na luzingu na beto. Ntangu beto longukaka kieleka, beto bakisaka nde kusadila Yehowa kele mfunu mingi kuluta bima ya kinsuni mpi beto vandaka na kiese ya kuyambula yo sambu na kieleka. Kansi na nima ya bamvula, beto lenda mona bantu ya nkaka ke sumba ba-apareyi ya mpa to ke sepela ti bima ya nkaka yina bo me sumba. Beto lenda kuma kudiyangisa sambu na bima yango. Beto lenda sepela diaka ve ti bima yina beto kele na yo mpi kuyantika kudipesa mingi na kusosa bima ya kinsuni na kisika  ya kusadila Yehowa. Diambu yai ke yibusa beto mambu yina kuminaka Demasi. Yandi zolaka mingi “ngidika yai ya bima” yo yina, yandi yambulaka kisalu yina yandi vandaka kusala ti ntumwa Polo. (2 Timoteo 4:10) Mbala ya nkaka Demasi zolaka mingi bima ya kinsuni kuluta kusadila Nzambi. Ziku yandi zolaka diaka ve kusala bibansa ya kutambula ti Polo. Diambu yai ke longa beto nki? Mbala ya nkaka beto vandaka kuzola mingi bima ya kinsuni. Kana beto keba ve, zola yina lenda yela, kukuma ngolo kibeni mpi kupusa beto na kuzola diaka ve kieleka.

10. Inki mambu beto fwete buya?

¹⁰ Kinduku ti bantu ya nkaka. Sambu na kutambula na kieleka, beto fwete buya kinduku ti bantu yina ke sambilaka ve Yehowa. Ntangu beto longukaka kieleka, kinduku na beto ti bantu yina kele ve Bambangi ya Yehowa mpi bantu ya dibuta na beto sobaka. Ziku bantu ya nkaka vandaka kuzitisa balukwikilu na beto kansi bankaka vandaka kutelemina yo. (1 Piere 4:4) Ya kieleka, beto ke salaka ngolo na kuzinga mbote ti bantu ya dibuta mpi kuvanda mawete. Kansi beto lenda fwa ve bansiku ya Yehowa sambu na kusepedisa bo. Mutindu 1 Bakorinto 15:33 ke monisaka yo, banduku na beto fwete vanda bayina ke zolaka Yehowa.

11. Inki mutindu beto lenda buya bangindu mpi mambu ya mbi?

¹¹ Mambu mpi mabanza ya mbi. Sambu na kutambula na kieleka, beto fwete vanda santu to bunkete na meso ya Yehowa. (Yezaya 35:8; tanga 1 Piere 1:14-16.) Ntangu beto longukaka kieleka, beto salaka bansoba sambu na kuzitisa minsiku ya Biblia. Bampangi ya nkaka me salaka bansoba ya nene kibeni. Kansi beto fwete landa kukeba sambu na kubebisa ve luzingu na beto ya bunkete mpi kukuma kusala mansoni. Inki lenda sadisa beto na kununga bampusa ya kusala mansoni? Yindula diambu yina Yehowa me salaka sambu beto vanda ya santu. Yandi pesaka luzingu ya mbalu ya Mwana na yandi, Yezu Kristu! (1 Piere 1:18, 19) Sambu beto landa kuvanda ya santu na meso ya Yehowa ntangu yonso, beto fwete yibuka mfunu ya kimenga ya Yezu.

12, 13. (a) Sambu na nki beto fwete tadila bankisi mutindu Yehowa ke tadilaka? (b) Inki beto ta tadila na disolo yai?

¹² Bikalulu mpi mambu yina ke sepedisaka ve Nzambi. Bantu ya dibuta, banduku ya kisalu mpi ya nzo-nkanda lenda pusa beto na kuvukana na bankinsi na bo. Inki lenda sadisa beto na kubuya bikalulu mpi bankinsi yina ke sepedisaka ve Yehowa? Beto fwete bakisa mbote-mbote bikuma yina Yehowa ke zolaka ve bankinsi yai. Beto lenda sala bansosa na mikanda na beto sambu kuzaba mutindu bankisi ya nkaka yantikaka. Kana beto ke yindula mingi bikuma yina Biblia ke buyisa beto na kusala ve bankinsi yai, beto ta bakisa nde beto ke tambula na nzila yina “Mfumu ke ndimaka.” (Baefezo 5:10) Kana beto ke kwikila na Yehowa mpi na Ndinga na yandi, beto ta wa ve boma ya mambu yina bantu ya nkaka ke yindulaka.—Bingana 29:25.

¹³ Beto fwete landa kutambula na kieleka kimakulu. Inki lenda sadisa beto na kutambula kaka na kieleka? Beto tadila mambu tatu yina beto lenda sala.

14. (a) Inki mutindu kulanda kulonguka Biblia ta sadisa beto na kuyambula ve kieleka ata fioti? (b) Sambu na nki beto kele na mfunu ya mayele, malongi, mpi mayele ya kubakisa mambu?

¹⁴ Ya ntete, landa kulonguka Biblia mpi  yindula mingi mambu yina nge ke longuka. Yidika manaka sambu na kusala yo mbala na mbala. Kana nge ke tanga mingi, nge ta kuma kuzola mingi kieleka mpi lukanu na nge ta vanda ya kuyambula yo ve ata fioti. Bingana 23:23 ke tuba nde: “Sumba kieleka” mpi “sumba mayele, malongi, mpi mayele ya kubakisa mambu.” Beto fwete suka ve kaka na kuzaba kieleka. Beto fwete sadila yo na luzingu na beto. Ntangu beto ke tomisaka mutindu na beto ya kubakisa mambu, beto ke yikaka mambu ya beto me zaba na yina beto zabaka dezia. Mayele ke sadisaka beto na kusadila mambu yina beto me zaba. Bantangu ya nkaka, kieleka ke sungikaka beto na kuzaba bansoba yina beto fwete sala. Yo yina, beto fwete ndima nswalu disipline yina sambu Biblia ke tuba nde yo kele mfunu mingi kuluta arza.—Bingana 8:10.

15. Inki mutindu kieleka ke taninaka beto bonso mukaba?

¹⁵ Ya zole, sadila mambu ya nge ke longuka. Biblia ke fwanisa kieleka ti mukaba ya soda. (Baefezo 6:14) Na ntangu ya ntama, mukaba vandaka kusadisa soda mpi kutanina yandi na bitumba kana yo me kanga yandi mbote na luketu. Kana mukaba yango ke lunga yandi mbote ve, yo ta tanina yandi ve. Inki mutindu kieleka ke taninaka beto bonso mukaba? Kana beto ke bikala na kieleka ntangu yonso, yo ta sadisa beto na kubuya mabanza ya mbi mpi kubaka balukanu ya mbote. Kana beto ke kutana ti diambu mosi ya mpasi mingi to kima mosi ke pusa beto na kusala mambu ya mbi, kieleka ya Biblia ta sadisa beto na kusala mambu ya mbote. Mutindu soda ke yambulaka ve mukaba na yandi ntangu yandi ke kwendaka na bitumba, beto mpi lenda yambula ve kieleka. Beto ke salaka bikesa na kusadila kieleka ya Biblia na mambu yonso ya luzingu na beto. Soda ke kangaka mpi mbele na mukaba na yandi. Beto tala mutindu beto mpi lenda sala yo.

16. Inki mutindu kulonga kieleka ke sadisaka beto na kulanda kutambula na kieleka?

¹⁶ Ya tatu, longa bantu kieleka ya Biblia. Bo ke fwanisa Biblia ti mbele. Mutindu soda ya mbote ke kangaka ngolo mbele na yandi, beto mpi fwete kangama ngolo na Ndinga ya Nzambi. (Baefezo 6:17) Beto yonso lenda kuma balongi ya mbote yina me zaba kutendula “ndinga ya kieleka mbote-mbote.” (2 Timoteo 2:15) Kana beto ke sadila Biblia sambu na kulonga bantu ya nkaka, beto ta zaba kieleka mpi ta zola yo mingi kibeni. Mambu yai ta pusa beto na kulanda kutambula na kieleka.

17. Sambu na nki nge ke bakaka kieleka na mbalu?

¹⁷ Kieleka kele dikabu mosi ya mfunu yina Yehowa me pesaka beto. Yo ke sadisaka beto na kusala kinduku ya mbote ti Tata na beto ya zulu. Yai kele diambu ya kuluta mfunu ya beto fwete sala. Yehowa ke longaka beto mingi kibeni kansi yo kele kaka luyantiku! Yandi ke sila na kulanda kulonga beto mvula na mvula. Yo yina, baka kieleka na mbalu mutindu nge ke bakaka diyaka ya ntalu. “Sumba kieleka mpi kuteka yo ve ata fioti.” Bonso Davidi, sila Yehowa nde: “Mono ta tambula na kieleka na nge.”—Nkunga 86:11.