1, 2. (a) Inki vandaka kisalu ya kuluta mfunu sambu na Yezu mpi sambu na nki? (b) Inki beto fwete sala sambu na kuvanda kibeni “banduku ya kisalu ya Nzambi”?

YEZU KRISTU vandaka sharpantie mpi na nima yandi kumaka kulonga. (Marko 6:3; Baroma 15:8) Yandi salaka bisalu yai zole mbote kibeni. Ntangu yandi vandaka sharpantie yandi longukaka mutindu ya kusadila bisadilu na yandi sambu na kusala mabaya mbote. Ntangu yandi vandaka kulonga, yandi sadilaka mbote mambu yina yandi zabaka na Masonuku sambu na kusadisa bantu ya kukonda mfunu na kubakisa kieleka ya Ndinga ya Nzambi. (Matayo 7:28; Luka 24:32, 45) Ntangu Yezu lungisaka bamvula 30, yandi yambulaka kisalu ya mabaya mpi kumaka kulonga sambu yandi zabaka nde kisalu yai vandaka mfunu mingi kibeni. Yandi tubaka nde kulonga nsangu ya mbote ya Kimfumu ya Nzambi vandaka na kati ya bikuma yina Nzambi tindaka yandi na ntoto. (Matayo 20:28; Luka 3:23; 4:43) Yezu kudipesaka ya mvimba na kulonga nsangu ya mbote mpi yandi vandaka kuzola nde bantu ya nkaka kulanda mbandu na yandi.—Matayo 9:35-38.

² Bampangi mingi ke salaka ve kisalu ya mabaya, ata mpidina beto yonso ke longaka bantu nsangu ya mbote. Kisalu ya kusamuna kele mfunu mingi, yo yina Nzambi ke sadisaka beto na kusala yo. Nkutu, Biblia ke binga beto “banduku ya kisalu ya Nzambi.” (1 Bakorinto 3:9; 2 Bakorinto 6:4) Beto ke ndimaka mambu yai ya muyimbi-bankunga  tubaka: “Ndinga na nge ya mvimba kele kieleka.” (Nkunga 119:159, 160) Ndinga ya Yehowa kele kieleka. Yo yina, beto fwete kuditadila mbote kana beto ke “tendulaka ndinga ya kieleka mbote-mbote.” (Tanga 2 Timoteo 2:15.) Diaka, beto ke salaka bikesa sambu na kusadila mbote Biblia, kisadilu na beto ya ntete-ntete ya ke sadisaka beto na kulonga bantu mambu ya Yehowa, ya Yezu mpi mambu ya me tala Kimfumu. Dibundu ya Yehowa ke pesaka beto bisadilu ya nkaka sambu na kutomisa kisalu na beto ya kusamuna, yo yina beto fwete zaba mpi mutindu ya kusadila yo. Bisadilu yango kele na lupangu; Bisadilu Sambu na Kulonga Bantu.

3. Na nki mambu beto fwete tula dikebi ntangu beto kele na kisalu ya kusamuna mpi nki mutindu Bisalu 13:48 ke sadisa beto na kusala yo?

³ Nge lenda kudiyula nde sambu na nki beto ke bingaka yo Bisadilu Sambu na Kulonga Bantu, kansi ve Bisadilu Sambu na Kusamuna? Kikuma kele nde “kusamuna” ke tendula kuzabisa nsangu kansi, “kulonga” kele kutendudila muntu nsangu yango sambu yandi bakisa mambu yina yandi ke wa mpi yo pusa yandi na kusadila mambu yina yandi ke longuka. Sambu nsi-ntoto me kuma na nsuka, beto fwete sala ngolo na kulonguka Biblia ti bantu mpi kulonga bo kieleka sambu bo kuma balongoki ya Kristu. Yo ke tendula nde beto fwete sosa bantu ya ntima-masonga yina kele ya kuyilama “sambu na kubaka luzingu ya mvula na mvula” mpi kusadisa bo na kusadila Yehowa.—Tanga Bisalu 13:44-48.

4. Inki mutindu beto lenda zwa bantu ya ntima-masonga yina kele ya kuyilama “sambu na kubaka luzingu ya mvula na mvula”?

⁴ Inki mutindu beto lenda zwa bantu ya ntima-masonga yina kele ya kuyilama “sambu na kubaka luzingu ya mvula na mvula”? Kisalu ya kusamuna sadisaka Bakristu ya mvu-nkama ya ntete na kuzwa bantu ya mutindu yai. Yezu songaka balongoki na yandi nde: “Na konso mbanza to bwala yina beno ke kota, beno sosa nani na kati na yo me fwana.” (Matayo 10:11) Bubu yai, beto fwete sala mpi mutindu mosi. Ya kieleka, beto ke yindulaka ve nde bantu ya luvunu, bantu ya lulendo to bayina ke tulaka ve dikebi na mambu ya Nzambi, lenda ndima nsangu ya mbote. Beto ke sosaka bantu ya ntima-masonga, ya kudikulumusa mpi bayina ke vandaka kibeni na mpusa ya kuzaba kieleka. Beto lenda fwanisa kisalu na beto ya kusosa bantu ti kisalu ya mabaya yina Yezu salaka. Na ntwala ya kusala bima ya nzo, mu mbandu kielo, vangu to kima ya nkaka, yandi vandaka kusosa ntete mabaya ya mbote. Na nima, yandi vandaka kubaka bisadilu mpi yandi vandaka kusala bima yango na mayele yonso. Mutindu mosi mpi beto fwete sosa ntete bantu ya ntima-masonga, na nima beto lenda sadila bisadilu mpi mayele na beto sambu na kusadisa bo na kukuma balongoki.—Matayo 28:19, 20.

5. Inki beto fwete zaba na yina me tala Bisadilu na Beto Sambu na Kulonga Bantu? Pesa mbandu. (Tala bifwanisu ya luyantiku ya disolo.)

⁵ Na kati ya kesi ya bisadilu, konso kisadilu ke vandaka ti kisalu na yo. Mu mbandu, yindula bisadilu yina Yezu vandaka kusadila ntangu yandi vandaka sharpantie. * Yandi vandaka na mfunu ya bisadilu sambu na kutesa mabaya, kutenda yo, kuzenga yo, kutobula yo, kuyidika yo sambu yo kuma kitoko mpi kuvukisa yo kisika mosi. Mutindu mosi mpi konso kisadilu yina kele na kati ya lupangu ya Bisadilu na Beto Sambu na Kulonga Bantu kele ti kisalu na yo. Bika beto tadila mutindu ya kusadila bisadilu yai ya mfunu.

6, 7. (a) Inki mutindu nge ke sadilaka bakarti ya viziti? (b) Sambu na nki beto ke sadilaka baemvitasio ya lukutakanu?

⁶ Bakarti ya Viziti. Yo ke vandaka fioti, kansi yo ke sadisaka mpenza bantu na kuzaba beto mpi na kukota na site na beto jw.org. Na site Internet na beto, bo lenda longuka mambu mingi ya me tala beto mpi nkutu kulomba beto na kulonguka Biblia ti bo. Bantu kuluta 400 000 yina ke zingaka  na bisika ya ntama me lombaka nde beto longuka Biblia ti bo na nzila ya jw.org mpi konso kilumbu bantu mingi ke lombaka nde beto longuka Biblia ti bo! Nge lenda baka mwa bakarti ya viziti mpi kupesa bantu yina nge ke kutana ti bo.

⁷ Baemvitasio. Bangogo yina kele na lutiti ya zulu ya emvitasio na beto ya balukutakanu ke tubaka nde: “Beto ke lomba nge na kulonguka Biblia ti Bambangi ya Yehowa.” Yo ke tubaka mpi nde nge lenda longuka Biblia “na balukutakanu na beto” to “mpangi mosi lenda kwisa kulonguka ti nge.” Diaka, emvitasio yango ke sadisaka bantu na kuzaba beto mpi yo ke lombaka bantu yina ke “bakisaka mbote nde bo kele ti nzala ya mambu ya kimpeve” na kulonguka Biblia ti beto. (Matayo 5:3) Ya kieleka, bantu lenda kwisa na balukutakanu na beto, ata bo ndima kulonguka Biblia to ve. Kana bo kwisa na balukutakanu na beto, bo ta bakisa mbote mutindu ya kulonguka Biblia.

8. Sambu na nki yo kele mfunu nde bantu kukwisa ata mbala mosi na balukutakanu na beto? Pesa mbandu.

⁸ Yo kele mfunu nde beto landa kubingisa bantu na kukwisa na balukutakanu na beto, ata mbala mosi. Sambu na nki? Sambu kana bo kwisa, bo ta bakisa nde Bambangi ya Yehowa ke longaka kieleka ya Biblia mpi ke sadisaka bantu na kuzaba Nzambi, diambu yina mabundu ya luvunu ke salaka ve. (Yezaya 65:13) Mu mbandu, Ray ti nkento na yandi Linda na États-Unis, bakisaka diambu yai mwa bamvula me luta. Bo vandaka kukwikila na Nzambi mpi vandaka na mpusa ya kuzaba yandi mbote. Yo yina, bo bakaka lukanu ya kukwenda na banzo-nzambi yonso ya mbanza na bo sambu na kutadila mambu zole yina bo vandaka kusosa na ntwala ya kupona dibundu yina bo ta kwendaka. Ya ntete, dibundu yango fwete longa mbote kibeni mpi ya zole, bantu ya dibundu yango fwete lwata mbote bonso bansadi ya Nzambi. Bo salaka bamvula mingi sambu banzo-nzambi vandaka mingi na mbanza na bo. Kansi, bo lembaka nitu kibeni sambu mabundu vandaka kulonga mbote ve mpi bantu ya mabundu yango vandaka kulwata na mutindu ya mbi. Na nima ya kukwenda na dibundu ya nsuka yina vandaka na lisiti na bo, Linda kwendaka na kisalu mpi Ray vutukaka na nzo. Na nzila, Ray monaka Nzo ya Kimfumu mosi. Yandi kuditubilaka nde, ‘Mono ke kota kuna sambu na kutala mutindu bo ke sambaka.’ Ya kieleka, mambu yina yandi monaka sepedisaka yandi mingi! Bantu yonso na Nzo ya Kimfumu vandaka mawete, lutondo mpi bo lwataka mbote mpenza. Ray vandaka na ntwala mpi sepela mingi ti malongi! Mbandu yai ke yibusa beto mambu yai ya ntumwa Polo tubaka sambu na muntu yina ke kwisa na mbala ya ntete na balukutakanu: “Ya kieleka, Nzambi kele na kati na beno.” (1 Bakorinto 14:23-25) Ray kumaka kukwenda na balukutakanu konso Lumingu. Na nima, yandi kumaka mpi kukwenda na balukutakanu yonso ya kati-kati ya mposo. Linda mpi kumaka kukwenda na balukutakanu mpi ata bo vandaka ti bamvula kiteso ya 70, bo longukaka Biblia mpi bakaka mbotika.

9, 10. (a) Sambu na nki yo kele pete na kusadila batrakiti? (b) Tendula mutindu ya kusadila trakiti Kimfumu ya Nzambi Kele Nki?

⁹ Batrakiti. Na kati ya bisadilu na beto, beto kele ti batrakiti nana. Yo kele pete na kusadila mpi na kuyantika disolo ti muntu kukonda mpasi. Banda bo me basisaka batrakiti yai na 2013, bo me niemaka diaka batrakiti yango bamilio kiteso ya tanu! Bo me salaka batrakiti yai yonso kiteso mosi. Yo yina, kana nge me zabaka dezia mutindu ya kusadila trakiti mosi, nge ta sadila mbote batrakiti yango yonso! Inki mutindu nge lenda sadila trakiti sambu na kuyantika disolo ti muntu?

¹⁰ Ziku nge ta zola kusadila trakiti Kimfumu ya Nzambi Kele Nki? Songa muwi ngiufula yina kele na lutiti ya zulu mpi yula yandi nde: “Keti nge me kudiyulaka dezia nde Kimfumu ya Nzambi kele nki? Nge ta tuba nde yo kele . . . ?” Na nima, songa yandi na kupona mvutu mosi na kati ya bamvutu tatu yina kele na trakiti. Ata yandi pesa mvutu ya mbote to ya mbi, kangula trakiti na kantu-diambu “Mambu Yina Biblia Ke Tubaka” mpi  tanga baverse yina kele pana, mu mbandu Daniele 2:44 mpi Yezaya 9:6. Na nsuka ya disolo, yula yandi ngiufula ya kele na nima ya trakiti na kantu-diambu “Kudiyula,” yina ke tuba nde: “Luzingu ta vanda nki mutindu ntangu Kimfumu ya Nzambi ta yala?” Nge lenda pesa mvutu na ngiufula yina ntangu nge ta vutukila yandi. Ntangu beno ta kutana diaka, nge lenda sadila dilongi 7 ya kamukanda Nsangu ya Mbote ya Mekatuka na Nzambi!, yo kele mpi na kati ya bisadilu yina ke sadisaka beto na kulonguka Biblia ti muntu.

11. Sambu na nki beto ke basisaka bazulunalu yai mpi nki beto fwete zaba na yina me tala bazulunalu yango?

¹¹ Bazulunalu. Nzozulu ya Nkengi mpi Telama! kele bazulunalu yina beto ke balulaka mpi ke niemaka mingi kuluta bazulunalu yonso! Sambu bantu ya bansi mingi ke tangaka bazulunalu yai, bantu-diambu yina kele na lutiti ya zulu ke bendaka dikebi ya bantu yonso. Beto fwete sadila bazulunalu yai sambu na kusadisa bantu na kutula dikebi na mambu ya kuluta mfunu na luzingu. Kansi, beto fwete zaba ntete sambu na banani bo ke basisaka bazulunalu yango.

12. (a) Bo ke basisaka Telama! sambu na banani mpi nki kele lukanu na yo? (b) Inki mambote nge me bakaka ntangu nge sadilaka kisadilu yai?

¹² Telama! bo ke basisaka yo sambu na bantu yina me zaba mambu fioti ya Biblia to sambu na bayina me zaba ve ata kima. Bo ke zabaka ve ata fioti malongi ya Bakristu, ziku bo ke kwikilaka ve na mabundu to bo ke ndimaka ve nde Biblia lenda sadisa bo. Bo ke basisaka Telama! ntete-ntete sambu na kusadisa bantu na kundima nde Nzambi kele. (Baroma 1:20; Baebreo 11:6) Yo ke sadisaka mpi batangi na kundima nde Biblia “kele kibeni . . . ndinga ya Nzambi.” (1 Batesalonika 2:13) Banimero tatu ya Telama! ya 2018 kele ti bantu-diambu yai: “Nzila ya Ke Nataka na Kiese,” “Mambu 12 Yina Ke Salaka nde Mabuta Kuvanda na Kiese,” mpi “Lusadisu Sambu na Bantu Yina Me Bwila Mpasi ya Lufwa.”

13. (a) Bo ke basisaka Nzozulu ya Nkengi nimero ya bantu yonso sambu na banani? (b) Inki mambote nge me bakaka ntangu nge sadilaka kisadilu yai?

¹³ Bo ke basisaka Nzozulu ya Nkengi nimero ya bantu yonso ntete-ntete sambu na kutendula malongi ya Biblia na bantu yina ke vandaka ti mwa luzitu sambu na Nzambi mpi sambu na Biblia. Bo lenda zaba mwa malongi ya Biblia kansi bo ke bakisaka mpenza ve mambu yina yo ke longaka. (Baroma 10:2; 1 Timoteo 2:3, 4) Banimero tatu ya Nzozulu ya Nkengi ya 2018 ke pesa mvutu na bangiufula yai: “Keti Biblia Kele Kaka na Mfunu Bubu Yai?,” “Luzingu Ta Vanda Nki Mutindu na Bilumbu Ke Kwisa?,” mpi “Keti Nzambi Ke Kudiyangisaka Sambu na Nge?”

14. (a) Inki kele lukanu ya bavideo iya yina kele na kati ya bisadilu yina ke sadisaka beto na kulonga bantu? (b) Inki mambote nge me bakaka na kusadila bavideo yai?

¹⁴ Bavideo. Na bilumbu ya Yezu, basharpantie vandaka kaka ti bisadilu ya maboko. Kansi ntangu yai, bo ke sadilaka mpi bisadilu ya kura, mu mbandu, si ya kura, masini sambu na kutobula mpi kukulula mabaya. Katula mikanda yina beto ke sadilaka na kisalu ya kusamuna, beto ke basisaka mpi bavideo ya kitoko sambu na kusonga bantu. Bavideo yai iya kele na kati ya bisadilu yina ke sadisaka beto na kulonga bantu: Sambu na Nki Beto Fwete Longuka Biblia?, Inki Mutindu Kulonguka ya Biblia Ke Salamaka?, Inki Ke Salamaka na Nzo ya Kimfumu?, mpi Bambangi ya Yehowa Kele Banani? Beto lenda songa bantu bavideo ya nkufi na mbala ya ntete ya beto me kutana ti bo. Beto lenda songa bavideo ya nda ntangu beto ke sala bamvutukilu ya mpa mpi na bantu yina me ndima kusolula ti beto. Bavideo yai kele bisadilu ya mbote sambu yo ke pesaka bantu mpusa ya kulonguka Biblia mpi ya kukwisa na balukutakanu na beto.

15. Inki mutindu bantu ke kudiwaka kana bo me tala video na beto na ndinga na bo mosi? Pesa bambandu.

¹⁵ Mu mbandu, mpangi-nkento kutanaka ti nkento mosi ya katukaka na Micronésie mpi ndinga na bo kele Yap. Mpangi-nkento songaka yandi  video Sambu na Nki Beto Fwete Longuka Biblia? na ndinga Yap. Ntangu video yantikaka nkento yina tubaka nde: “Yai ndinga na beto. Mono ke ndima ve! Mutindu muntu yai ke tuba ke ndimisa mono nde yandi kele muntu ya kisanga na beto. Yandi ke tuba ndinga na beto!” Na nima, nkento yina tubaka nde yandi ke kwenda kutanga mikanda mpi kutala bavideo yonso yina kele na ndinga na bo na jw.org. (Fwanisa ti Bisalu 2:8, 11.) Mbandu ya nkaka kele ya mpangi-nkento mosi na États-Unis, yina mwana ya mpangi na yandi vandaka kuzinga na ndambu ya nkaka. Mpangi-nkento songaka yandi mutindu ya kuzwa video Sambu na Nki Beto Fwete Longuka Biblia? na ndinga na bo. Yandi talaka yo mpi tindilaka mpangi-nkento message nde: “Kitini ya ke tubila kiyeka yina Diabulu ke sadilaka sambu na kuyala nsi-ntoto me benda kibeni dikebi na mono. Mono lombaka nde bo longuka Biblia ti mono na nzila ya jw.” Mambu yai ke yitukisa kibeni sambu yandi ke zingaka na insi yina bo me buyisaka kisalu na beto!

16. Sambu na nki bo me basisaka kamukanda: (a) Widikila Nzambi mpi Zinga Mvula na Mvula. (b) Nsangu ya Mbote ya Mekatuka na Nzambi! (c) Banani Ke Sala Luzolo ya Yehowa Bubu Yai?

¹⁶ Tumikanda. Inki mutindu beto lenda longa kieleka na muntu yina ke tangaka mbote ve to na muntu yina beto me basisaka ntete ve mikanda na ndinga na bo? Beto lenda sadila kamukanda Widikila Nzambi mpi Zinga Kimakulu. * Kamukanda Nsangu ya Mbote ya Mekatuka na Nzambi! kele kisadilu ya mbote sambu na kuyantika kulonguka Biblia ti bantu. Nge lenda songa muntu masolo 14 yina kele na lutiti ya nsuka mpi kuyula yandi disolo yina me sepedisa yandi. Na nima, yantika kulonguka disolo yango ti yandi. Keti nge me sadilaka yo dezia na mvutukilu ya mpa? Kamukanda ya tatu yina kele na bisadilu na beto sambu na kulonga bantu kele Banani Ke Sala Luzolo ya Yehowa Bubu Yai? Bo me basisaka yo sambu na kulonga balongoki ya Biblia mambu ya me tala dibundu ya Yehowa. Sambu na kuzaba mutindu ya kusadila yo, tala Mukanda ya Lukutakanu—Luzingu mpi Kisalu na Beto ya Bukristu ya Marsi 2017.

17. (a) Inki kele lukanu ya mikanda yina beto ke longukaka Biblia ti bantu? (b) Inki mambu bantu yina me baka mbotika fwete sala mpi sambu na nki?

¹⁷ Mikanda. Na nima ya kulonguka kamukanda mosi ti muntu, nge lenda kuma kulonguka ti yandi na mukanda Inki Biblia Ke Longa Beto? Kisadilu yai lenda sadisa bantu na kulonguka mingi malongi ya ntete-ntete ya Biblia. Kana longoki ke yela mpi me manisa mukanda yai, nge lenda landa kulonguka ti yandi na mukanda Mutindu ya Kubikala na Zola ya Nzambi. Mukanda yai ta sadisa longoki na kusadila minsiku ya Biblia luzingu na yandi ya mvimba. Kuvila ve nde ata yandi me baka mbotika, yandi fwete landa kulonguka tii ntangu yandi ta manisa mikanda yai zole. Yo ta sadisa yandi na kuvanda ti lukwikilu ya ngolo mpi kubikala ya kwikama na Yehowa.—Tanga Bakolosai 2:6, 7.

18. (a) Verse ya 1 Timoteo 4:16 ke siamisa bansamuni na kusala nki mpi nki mambote bo ta baka? (b) Inki kele lukanu na beto ntangu beto ke sadila bisadilu yina ke sadisaka beto na kulonga bantu?

¹⁸ Bambangi ya Yehowa kele ti mukumba ya kulonga bantu “kieleka ya nsangu ya mbote” yina ta sadisa bo na kubaka luzingu ya mvula na mvula. (Bakolosai 1:5; tanga 1 Timoteo 4:16.) Sambu na kusala mbote kisalu yango, beto kele ti bisadilu yina ke sadisaka beto na kulonga bantu. (Tala lupangu “ Bisadilu Sambu na Kulonga Bantu.”) Bika beto sadila bisadilu yai na mutindu ya mbote. Konso nsamuni lenda pona kisadilu yina yandi ta sadila mpi ntangu ya kusadila yo. Kansi beto vila ve nde lukanu na beto kele kaka ve ya kupesa bantu mikanda mpi beto fwete pesa ve mikanda na bantu yina ke sepelaka ve na nsangu na beto. Lukanu na beto kele ya kukumisa bantu balongoki, mu mbandu, bantu ya ntima-masonga, bantu ya kudikulumusa, bantu yina ke zolaka mpenza kuzaba Nzambi mpi bantu yina kele ya kuyilama “sambu na kubaka luzingu ya mvula na mvula.”—Bisalu 13:48; Matayo 28:19, 20.