DISOLO YA KULONGUKA 5
Bikalulu Yina Ke Sadisaka Beto na Kukwenda na Balukutakanu
“Landa kuzabisa lufwa ya Mfumu, tii kuna yandi ta kwisa.”—1 BAK. 11:26.
NKUNGA 18 Ntonda Sambu na Nkudulu
MAMBU YINA DISOLO YAI KE TUBILA *
1-2. (a) Inki Yehowa ke monaka ntangu bantu mingi ke kwendaka na Madia ya Nkokila ya Mfumu? (Tala kifwanisu ya lutiti ya zulu.) (b) Inki beto ta longuka na disolo yai?
YINDULA mambu yina Yehowa ke monaka ntangu bantu mingi na ntoto ya mvimba ke vukanaka sambu na Madia ya Nkokila ya Mfumu. Yandi ke talaka kaka ve ntalu ya bantu mingi yina kele na lukutakanu kansi yandi ke tulaka dikebi na konso muntu yina kele pana. Mu mbandu, yandi ke monaka bantu yina ke kwisaka konso mvula, ata bayina ke kutana ti bampasi ya ngolo. Bantu ya nkaka ke kwisaka ve na balukutakanu ya dibundu, kansi bo ke monaka nde kukwenda na Lusungiminu kele mfunu mingi. Yehowa ke zabaka mpi bantu yina me kwisa na mbala ya ntete na Lusungiminu, ziku sambu na kutala kaka mutindu yo ke salamaka.
2 Ya kieleka, Yehowa ke sepelaka mutindu bantu mingi ke kwendaka na Lusungiminu. (Luka 22:19) Yehowa ke tulaka ve dikebi kaka na ntalu ya bantu yina ke kwisaka. Kansi, yandi ke tulaka dikebi mingi na kikuma yina ke pusaka bo; yo kele mfunu mingi sambu na Yehowa. Disolo yai ta tadila ngiufula mosi ya mfunu mingi: Sambu na nki beto ke kwendaka na Lusungiminu mpi na balukutakanu ya konso mposo yina Yehowa me yidikaka sambu na bantu yina ke zolaka yandi?
(Tala paragrafe 1-2) *
KUDIKULUMUSA KE SADISAKA BETO NA KUKWENDA NA BALUKUTAKANU
3-4. (a) Sambu na nki beto ke kwendaka na balukutakanu? (b) Kukwenda na balukutakanu ke tendula nki sambu na beto? (c) Na kutadila 1 Bakorinto 11:23-26, sambu na nki beto fwete konda ve na Lusungiminu?
3 Beto ke kwendaka na balukutakanu ntete-ntete sambu yo kele kitini ya lusambu na beto. Diaka, beto ke kwendaka sambu Yehowa kulonga beto. Bantu ya lulendo ke zolaka ve nde bo longa bo. (3 Yoa. 9) Kansi, beto ke vandaka na mpusa ya ngolo nde Yehowa ti dibundu na yandi kulonga beto.—Yez. 30:20; Yoa. 6:45.
4 Kukwenda na balukutakanu ke monisaka nde beto kele bantu ya kudikulumusa, ya kuyilama mpi ke zola nde bo longa beto. Na nkokila ya Lusungiminu ya lufwa ya Yezu, beto ke kwendaka na lukutakanu yai ya mfunu kaka ve sambu beto fwete kwenda kansi sambu beto kele bantu ya kudikulumusa yina ke zitisaka ntuma yai ya Yezu: “Beno landa kusala yo sambu na kuyibuka mono.” (Tanga 1 Bakorinto 11:23-26.) Lukutakanu yai ke kumisaka kivuvu na beto ngolo sambu na bilumbu ke kwisa mpi ke yibusaka beto mutindu Yehowa ke zolaka beto mingi. Yehowa ke zabaka nde beto kele na mfunu ya kikesa mpi yandi ke pesaka beto yo. Yo yina, yandi me yidikaka balukutakanu konso mposo mpi ke lombaka beto na kukwenda na balukutakanu yango. Kudikulumusa ke sadisaka beto na kulemfuka. Konso mposo beto ke lutisaka bangunga mingi na kuyidika mpi na kukwenda na balukutakanu yai.
5. Sambu na nki bantu ya kudikulumusa ke ndimaka emvitasio ya Yehowa?
5 Konso mvula, bantu mingi ya kudikulumusa ke ndimaka nde Yehowa kulonga bo. (Yez. 50:4) Bo ke sepelaka kukwenda na Lusungiminu mpi ke yantikaka kukwenda na balukutakanu ya nkaka. (Zek. 8:20-23) Beto yonso ke vandaka na kiese nde Yehowa ‘nsadisi mpi ngulusi na beto,’ kulonga mpi kutwadisa beto. (Nk. 40:17) Yo kele kiese kibeni mpi yo kele mfunu mingi nde Yehowa ti Yezu, Mwana yina yandi ke zolaka mingi kulonga beto!—Mat. 17:5; 18:20; 28:20.
6. Inki mutindu kudikulumusa sadisaka bakala mosi na kukwenda na Lusungiminu?
6 Konso mvula, beto ke salaka ngolo na kubinga bantu mingi na Lusungiminu ya lufwa ya Yezu. Bantu mingi ya kudikulumusa ke bakaka mambote ntangu bo ke ndimaka emvitasio na beto. Beto tadila diambu yai. Bamvula mingi me luta, muntu mosi bakaka emvitasio ya Lusungiminu kansi yandi songaka mpangi yina pesaka yandi yo nde yandi ta kwisa ve. Kansi na nkokila ya Lusungiminu, mpangi yina yitukaka ntangu yandi monaka muntu yango na Nzo ya Kimfumu. Muntu yango yitukaka mingi na mutindu bo yambaka yandi mpi kumaka kukwisa na balukutakanu konso mposo. Na mvula yina landaka, yandi kondaka balukutakanu mbala tatu mpamba. Inki pusaka yandi na kukwenda na balukutakanu yonso? Yandi vandaka ya kudikulumusa mpi sobaka mabanza na yandi. Mpangi yina bingisaka yandi tubaka na nima nde: “Yandi vandaka muntu ya kudikulumusa.” Ntembe kele ve nde Yehowa bendaka muntu yina sambu na kusambila yandi mpi muntu yango me bakaka mambote.—2 Sam. 22:28; Yoa. 6:44.
7. Inki mutindu mambu ya beto ke longukaka na balukutakanu mpi yina beto ke tangaka na Biblia ke sadisaka beto na kudikulumusa?
7 Mambu yina beto ke longukaka na balukutakanu mpi na Biblia lenda sadisa beto na kukuma bantu ya kudikulumusa. Mwa bamposo na ntwala ya Lusungiminu, mbala mingi balukutakanu na beto ke tubilaka mbandu ya Yezu mpi kudikulumusa yina yandi monisaka ntangu yandi pesaka luzingu na yandi bonso kimenga. Na nsungi yango, bo ke siamisaka beto na kutanga masolo ya Biblia yina ke tubilaka mambu yina salamaka na lufwa mpi na lufutumuku ya Yezu. Mambu ya beto ke longukaka na balukutakanu mpi yina beto ke tangaka na Biblia ke kumisaka ngolo ntonda na beto sambu na kimenga yina Yezu pesaka. Yo ke pusaka beto na kulanda mbandu na yandi ya kudikulumusa mpi kusala luzolo ya Yehowa, ata yo kele mpasi sambu na beto.—Luka 22:41, 42.
KIKESA KE SADISAKA BETO NA KUKWENDA NA BALUKUTAKANU
8. Inki mutindu Yezu monisaka kikesa?
8 Beto ke landaka mbandu ya Yezu ntangu beto ke monisaka kikesa. Yindula kikesa yina yandi monisaka na bilumbu yina yitaka lufwa na yandi. Yandi zabaka kibeni nde ntama mingi ve bambeni ta pesa yandi nsoni, ta bula mpi ta fwa yandi. (Mat. 20:17-19) Ata mpidina, yandi ndimaka kufwa na luzolo yonso. Ntangu ngunga na yandi lungaka, yandi songaka bantumwa na yandi ya kwikama yina vandaka ti yandi na Getsemane nde: “Beno telama; beto kwenda. Tala, muntu yina ke teka mono me kuma pene-pene.” (Mat. 26:36, 46) Ntangu bantu mingi yina vandaka ti binwaninu kwisaka kukanga yandi, yandi kwendaka na ntwala, kudimonisaka na bo mpi lombaka basoda na kuyambula bantumwa na yandi. (Yoa. 18:3-8) Yezu monisaka kikesa mpenza! Bubu yai, Bakristu yina bo me tulaka mafuta mpi mameme ya nkaka ke landaka mbandu ya Yezu ntangu bo ke monisaka kikesa. Inki mutindu?
Kikesa na nge ya kukwenda na balukutakanu ke sadisaka bampangi ya nkaka (Tala paragrafe 9) *
9. (a) Sambu na nki kukwenda mbala na mbala na balukutakanu ke lombaka kikesa? (b) Inki mutindu mbandu na beto lenda sadisa bampangi yina kele na boloko?
9 Sambu na kukwenda mbala na mbala na balukutakanu, beto fwete monisa kikesa ata ntangu beto ke kutana ti bampasi. Bampangi ya nkaka ke kwendaka na balukutakanu ata bo ke kutana ti bampasi ya ngolo, me lemba nitu to ke bela. Bankaka diaka ke kwendaka na balukutakanu ata bantu ya dibuta to bamfumu ya luyalu ke telemina bo. Yindula mutindu mbandu na beto ke sadisaka bampangi na beto yina kele na boloko. (Baeb. 13:3) Ntangu bo ke waka nde beto ke landa kusadila Yehowa ata na bantangu ya mpasi, lukwikilu na bo ke kumaka ngolo, bo ke bakaka kikesa mpi ke bikalaka ya kwikama. Ntumwa Polo waka mpi mutindu mosi. Ntangu yandi vandaka na boloko na Roma, yandi waka kiese mingi ntangu yandi waka nde bampangi ke landa kusadila Nzambi na kwikama. (Bafil. 1:3-5, 12-14) Ziku ntangu fioti na ntwala ya kubasika na boloko to kaka ntangu yandi basikaka na boloko, Polo sonikilaka bampangi ya Ebreo. Na mukanda yango yandi siamisaka bampangi yai ya kwikama na kubika nde “zola na [bo] ya kimpangi kuvanda kaka” mpi bo yambula ve kuvukana na balukutakanu.—Baeb. 10:24, 25; 13:1.
10-11. (a) Banani beto fwete bingisa na Lusungiminu? (b) Inki mutindu Baefezo 1:7 ke monisa mfunu ya kusala yo?
10 Beto ke monisaka kikesa ntangu beto ke bingisaka bantu ya dibuta, banduku ya kisalu mpi bantu ya ke zingaka pene-pene ti beto na Lusungiminu. Sambu na nki beto ke bingisaka bo? Beto ke monisaka ntonda na mambu yina Yehowa ti Yezu me salaka sambu na beto, yo yina beto ke zolaka kubingisa bo. Beto ke zolaka nde bo mpi kubaka mambote ya “ntima ya mbote ya nene” ya Yehowa na nzila ya kimenga ya Yezu.—Tanga Baefezo 1:7; Kus. 22:17.
11 Kana beto ke monisa kikesa ya kukwenda na balukutakanu, beto ta monisa mpi kikalulu ya nkaka yina Nzambi ti Mwana na yandi monisaka na mutindu ya kuyituka.
ZOLA KE SADISAKA BETO NA KUKWENDA NA BALUKUTAKANU
12. (a) Inki mutindu balukutakanu ke sadisaka beto na kukumisa ngolo zola na beto sambu na Yehowa mpi Yezu? (b) Mukanda ya 2 Bakorinto 5:14, 15 ke siamisa beto na kusala nki sambu na kulanda mbandu ya Yezu?
12 Zola sambu na Yehowa mpi Yezu ke sadisaka beto na kukwenda na balukutakanu. Na nima, mambu yina beto ke longukaka ke kumisaka ngolo zola na beto sambu na Yehowa mpi Mwana na yandi. Na balukutakanu, beto ke yibukaka mbala na mbala mambu yina bo salaka sambu na beto. (Bar. 5:8) Lusungiminu ke yibusaka beto zola ya nene yina Yehowa ti Yezu me monisaka ata na bantu yina ke bakaka ve nkudulu na mbalu. Ti ntonda ya mingi, beto ke salaka ngolo na kulanda mbandu ya Yezu. (Tanga 2 Bakorinto 5:14, 15.) Diaka, yo ke pusaka beto na kukumisa Yehowa sambu na kimenga ya Yezu. Mutindu ya nkaka ya kukumisa yandi kele kupesa bamvutu ya masonga na balukutakanu.
13. Inki mutindu beto lenda monisa zola ya mingi sambu na Yehowa mpi Mwana na yandi? Tendula.
13 Beto lenda monisa zola ya mingi sambu na Yehowa mpi Mwana na yandi ntangu beto ke ndima kusala bibansa sambu na bo. Mbala mingi beto ke salaka bibansa ya mutindu na mitindu sambu na kukwenda na balukutakanu. Mabundu mingi ke salaka lukutakanu na nsuka ya kilumbu ntangu beto ke vandaka ya kulemba kibeni. Mabundu ya nkaka ke salaka lukutakanu na Mposo to na Lumingu ntangu bantu ya nkaka ke pemaka. Keti Yehowa ke bakisaka nde beto ke kwendaka na balukutakanu ata beto kele ya kulemba? Ee! Yehowa ke monaka mpi ke bakaka na mbalu bibansa yina beto ke salaka sambu na kukwenda na balukutakanu.—Mar. 12:41-44.
14. Inki mutindu Yezu me bikilaka beto mbandu ya zola ya kuditambika?
14 Yezu me bikilaka beto mbandu ya zola ya kuditambika. Yandi ndimaka kufwa sambu na balongoki na yandi mpi tulaka mambote na bo na kisika ya ntete. Mu mbandu, yandi kutanaka ti balongoki na yandi ata yandi vandaka ya kulemba to mabanza na yandi vandaka kisaka-saka. (Luka 22:39-46) Yandi vandaka kusadila bantu ya nkaka kansi yandi vandaka kuvingila ve nde bantu kusadila yandi. (Mat. 20:28) Kana zola na beto sambu na Yehowa mpi bampangi na beto kele ngolo, beto ta sala bibansa sambu na kukwenda na Madia ya Nkokila ya Mfumu mpi na balukutakanu yonso.
15. Banani beto fwete sadisa mingi-mingi?
15 Beto kele na dibuta ya kieleka ya bampangi ya ntoto ya mvimba mpi beto ke vandaka na kiese ya kubingisa bantu ya nkaka sambu na kuvukana ti beto. Kansi, beto ke sadisaka mingi-mingi “bampangi na beto na lukwikilu,” bayina ke kwisaka diaka ve na balukutakanu to ke samunaka diaka ve. (Bag. 6:10) Beto ke monisilaka bo zola ntangu beto ke siamisaka bo na kukwenda na balukutakanu mingi-mingi na Lusungiminu. Bonso Yehowa mpi Yezu, beto ke vandaka na kiese mingi ntangu mpangi yina ke samunaka diaka ve to ke kwisaka diaka ve na balukutakanu me vutukila Yehowa, Tata mpi Ngungudi na beto ya zola.—Mat. 18:14.
16. (a) Inki mutindu beto fwete pesana kikesa mpi nki mutindu balukutakanu ke sadisaka beto? (b) Sambu na nki yai kele ntangu ya mbote ya kuyibuka bangogo ya Yezu yina kele na Yoane 3:16?
16 Na bamposo ya ke landa, bingisa bantu mingi na Lusungiminu na Kitanu na nkokila, na Aprili 19, 2019. (Tala lupangu “ Keti Nge Ta Bingisa Bo?”) Na bamvula yai, beto fwete pesana kikesa sambu na kukwenda na balukutakanu yonso yina Yehowa me yidikilaka beto. Sambu nsuka me kuma pene-pene, balukutakanu ke sadisaka beto na kubikala ya kudikulumusa, na kuvanda kikesa mpi kuzola bampangi. (1 Bate. 5:8-11) Na luzolo yonso, bika beto monisa ntonda sambu na zola ya mingi yina Yehowa mpi Mwana na yandi me monisilaka beto!—Tanga Yoane 3:16.
NKUNGA 126 Kangula Meso, Vanda Ngolo
^ par. 5 Lusungiminu ya lufwa ya Kristu yina ta salama na Kitanu na nkokila, Aprili 19, 2019, ta vanda lukutakanu ya kuluta mfunu na mvula ya mvimba. Inki ta sadisa beto na kukwenda na lukutakanu yai? Beto ke zolaka kusepedisa Yehowa. Disolo yai ta tubila bikalulu yina ta sadisa beto na kukwenda na Lusungiminu mpi na balukutakanu ya konso mposo.
^ par. 50 KIFWANISU YA LUTITI YA ZULU: Bampangi ke yamba bantu mingi yina me kwisa na Madia ya Nkokila ya Mfumu
^ par. 52 NTENDULA YA BIFWANISU: Mpangi-bakala mosi yina bo kangaka sambu na lukwikilu na yandi ke baka kikesa na mukanda yina bantu ya dibuta na yandi me tindila yandi. Mpangi-bakala yango ke bakisa nde bo me vila yandi ve mpi yandi ke sepelaka na kuzwa bansangu ya dibuta sambu bo kele ya kwikama na Yehowa mpi ke zola ve nde mavwanga ya politiki kukanga bo nzila.
