1-2. (a) Inki ke ndimisa beto nde Yezu monisaka beto mutindu ya pete ya kuyibuka lufwa na yandi? (b) Inki bikalulu ya Yezu beto ta longuka?

KETI nge lenda tendula mambu yina ke salamaka na Lusungiminu ya lufwa ya Kristu? Ntembe kele ve nde beto lenda yibuka mambu yina ke salamaka na Madia ya Nkokila ya Mfumu. Sambu na nki? Sambu nkinsi yango ke vandaka ya kukonda mindondo. Ya kieleka, yo kele kibeni lukutakanu mosi ya mfunu. Yo yina, beto lenda kudiyula nde, ‘Sambu na nki nkinsi yai ke vandaka ya kukonda mindondo?’

² Ntangu Yezu vandaka kulonga, yandi zabanaka sambu yandi vandaka kulonga kieleka na mutindu ya pete mpi ya pwelele. (Mat. 7:28, 29) Yandi longaka beto mutindu ya pete mpi ya mfunu mingi ya kuyibuka lufwa na yandi. Sambu na kubakisa mutindu Yezu monisaka kudikulumusa, kikesa mpi zola, beto tubila Lusungiminu ti mambu ya nkaka yina Yezu tubaka mpi salaka. Beto ta longuka mpi mutindu beto lenda landa mbandu na yandi.

3. Sambu na nki Lusungiminu yina Yezu yantikaka, yina Matayo 26:26-28 ke tubila, vandaka ya kukonda mindondo mpi mampa ti vinu vandaka kumonisa nki?

³ Yezu salaka Lusungiminu ya ntete ya lufwa na yandi ti bantumwa 11 ya kwikama. Yandi bakaka madia yina bikalaka na nkinsi ya Paki mpi salaka Lusungiminu yai ya kukonda mindondo. (Tanga Matayo 26:26-28.) Yandi sadilaka kaka mampa ya kukonda levire mpi vinu yina bikalaka. Yezu songaka bantumwa na yandi nde bidimbu yai zole ke monisa nitu mpi menga  na yandi ya kukuka, yina yandi pesaka sambu na mambote na bo. Bantumwa yitukaka ve mutindu lukutakanu yai ya mpa ya mfunu salamaka kukonda mindondo. Sambu na nki?

4. Inki mutindu ndongisila yina Yezu pesaka Marta ke sadisa beto na kubakisa kikuma yina Yezu salaka Lusungiminu ya kukonda mindondo?

⁴ Beto tubila mambu yina salamaka bangonda fioti na luyantiku ya nsungi ya bamvula tatu ya kisalu ya Yezu na ntoto, ntangu yandi kwendaka kutala nduku na yandi Lazare, Marta ti Maria. Ntangu Yezu vandaka kulutisa ntangu ti bo, yandi yantikaka mpi kulonga bo. Marta vandaka ve kutula dikebi na malongi sambu yandi vandaka kulambila Yezu, munzenza na yandi ya lukumu madia mingi. Ntangu Yezu bakisaka yo, yandi sungikaka Marta na mayele mpi sadisaka yandi na kubakisa nde madia mingi vandaka mfunu mingi ve. (Luka 10:40-42) Na nima, mwa bangunga fioti na ntwala ya kutambika luzingu na yandi, Yezu sadilaka ndongisila yina yandi pesaka Marta. Yandi salaka Lusungiminu ya kukonda mindondo. Yo ke longa beto nki sambu na Yezu?

5. Nkinsi ya kukonda mindondo ke monisa nki sambu na Yezu mpi nki mutindu yo ke wakana ti Bafilipi 2:5-8?

⁵ Yezu monisaka kudikulumusa na mambu yonso yina yandi vandaka kutuba mpi kusala. Yo yina, beto fwete yituka ve ntangu yandi monisaka kudikulumusa ya nene na mpimpa ya nsuka ya luzingu na yandi na ntoto. (Mat. 11:29) Yandi zabaka nde yandi ke pesa kimenga ya kuluta nene sambu na bantu mpi nde Yehowa ta futumuna yandi mpi na nima yandi ta vanda ntotila. Ata yandi zabaka yo, yandi bendaka ve dikebi ya bantu na kusala nkinsi mosi ya nene sambu na kuyibuka lufwa na yandi. Kansi, yandi songaka balongoki na yandi na kusala nkinsi yina mbala mosi na mvula sambu na kuyibuka yandi na nsadisa ya madia ya kukonda mindondo. (Yoa. 13:15; 1 Bak. 11:23-25) Nkinsi yina ya mfunu mpi ya kukonda mindondo monisaka nde Yezu vandaka ve lulendo. Beto kele na kiese sambu kudikulumusa kele kikalulu mosi ya nene ya Ntotila na beto ya zulu.—Tanga Bafilipi 2:5-8.

6. Inki mutindu beto lenda landa mbandu ya kudikulumusa ya Yezu ntangu beto ke kutana ti bampasi?

⁶ Inki mutindu beto lenda landa mbandu ya kudikulumusa ya Yezu? Kana beto ke tula mambote ya bantu ya nkaka na kisika ya ntete. (Bafil. 2:3, 4) Yindula diaka mpimpa ya nsuka ya  Yezu na ntoto. Yezu zabaka nde ntama mingi ve yandi ta fwa, lufwa ya mpasi kansi yandi vandaka kudiyangisa mingi sambu na bantumwa na yandi yina ta bikala na mawa ya ngolo sambu na yandi. Yo yina, na mpimpa ya nsuka yina yandi lutisaka ti bo, yandi longaka bo, pesaka bo kikesa mpi kivuvu. (Yoa. 14:25-31) Na kudikulumusa yonso, Yezu tulaka mambote ya bantu ya nkaka na kisika ya ntete. Yo kele mbandu ya mbote kibeni sambu na beto!

7. Inki mutindu Yezu monisaka kikesa ya mingi na nima ya Madia ya Nkokila ya Mfumu?

⁷ Na nima ya Madia ya Nkokila ya Mfumu, Yezu monisaka kikesa ya mingi. Inki mutindu? Yezu ndimaka nde luzolo ya Tata na yandi kusalama ata yandi zabaka nde yandi fwete fwa lufwa ya nsoni bonso muyibi. (Mat. 26:65, 66; Luka 22:41, 42) Yezu bikalaka ya kwikama sambu zina ya Yehowa kubaka lukumu, sambu na kunwanina luyalu ya Nzambi mpi kupesa bantu yina ta balula ntima dibaku ya kuzinga mvula na mvula. Na ntangu yina, Yezu yidikaka mabanza ya balongoki na yandi sambu na mambu yina bo ta kutana ti yo.

8. (a) Inki Yezu songaka bantumwa na yandi ya kwikama? (b) Inki mutindu balongoki landaka mbandu ya kikesa ya Yezu na nima ya lufwa na yandi?

⁸ Yezu monisaka mpi kikesa ntangu yandi kudiyangisaka ve sambu na bampasi na yandi kansi yandi tulaka dikebi na bampusa ya bantumwa na yandi ya kwikama. Yezu salaka nkinsi ya kukonda mindondo na nima ya kubasika ya Yudasi, sambu na kuyibusa balongoki yina bo ta tula mafuta mambote ya kimenga na yandi mpi ya kuvanda na kati ya kuwakana ya mpa yina yandi salaka ti bo. (1 Bak. 10:16, 17) Sambu na kusadisa balongoki na kutanina dibaku na bo ya kuyala na zulu, yandi songaka balongoki mambu yina yandi ti Tata na yandi ke zola nde bo  sala. (Yoa. 15:12-15) Yezu songaka mpi bantumwa bampasi yina bo ta kutana ti yo. Yo yina, yandi songaka bo na kulanda mbandu na yandi mpi siamisaka bo na ‘kuvanda kikesa!’ (Yoa. 16:1-4a, 33) Bamvula mingi na nima, balongoki ya Yezu landaka mbandu na yandi ya kuditambika mpi monisaka kikesa. Ata yo lombaka nde bo niokwama, bo sadisanaka na bampasi.—Baeb. 10:33, 34.

9. Inki mutindu beto lenda vanda kikesa bonso Yezu?

⁹ Bubu yai, beto ke landaka mbandu ya Yezu ntangu beto ke monisaka kikesa. Mu mbandu, yo ke lombaka kikesa na kusadisa bampangi yina ke kutana ti mbangika sambu na lukwikilu na bo. Bantangu ya nkaka, bo ke tulaka bampangi na beto na boloko kukonda lunungu. Kana mambu ya mutindu yai me salama, beto ke salaka yonso sambu na kunwanina bo mpi ke sambaka sambu na bo. (Bafil. 1:14; Baeb. 13:19) Mutindu ya nkaka ya kumonisa kikesa kele kulanda kusamuna “ti kikesa.” (Bis. 14:3) Bonso Yezu, beto ke vandaka ti lukanu ya kulonga nsangu ya Kimfumu ata bantu ke buya to ke bangika beto. Kansi bantangu ya nkaka beto ke vandaka ve kikesa. Inki beto lenda sala?

10. Inki beto fwete sala mwa bamposo na ntwala ya Lusungiminu mpi sambu na nki?

¹⁰ Beto lenda kumisa kikesa na beto mingi kana beto ke yindula kivuvu yina beto kele na yo sambu na kimenga ya Yezu. (Yoa. 3:16; Baef. 1:7) Mwa bamposo na ntwala ya Lusungiminu, beto ke vandaka ti dibaku ya kumonisa ntonda sambu na kimenga yai. Na nsungi yina, landa kutanga Biblia sambu na Lusungiminu mpi yindula mingi na kisambu mambu yina salamaka bilumbu fioti na ntwala ya lufwa ya Yezu. Na nima, ntangu beto ke vukana sambu na Madia ya Nkokila ya Mfumu, beto ta bakisa mbote ntendula ya mampa ti vinu  mpi mfunu ya kimenga ya Yezu. Ntangu beto ke bakisa mambu yina Yezu ti Yehowa me salaka sambu na beto mpi mambote yina yo ke natilaka beto ti bantu yina beto ke zolaka, kivuvu na beto ke kumaka ngolo mpi yo ke sadisaka beto na kukanga ntima tii na nsuka.

11-12. Inki mambu beto me longuka na disolo yai?

¹¹ Beto me mona nde Madia ya Nkokila ya Mfumu ke yibusaka beto kimenga ya mbalu ya Yezu, kikalulu na yandi ya kudikulumusa mpi ya kikesa. Beto fwete monisa ntonda na Yezu, Nganga-Nzambi na beto ya Nene yina ke landa kumonisa bikalulu yai mpi ke lombaka sambu na mambote na beto. (Baeb. 7:24, 25) Sambu na kumonisa ntonda ya mingi, beto fwete yibuka lufwa ya Yezu na kwikama yonso mutindu yandi songaka beto. (Luka 22:19, 20) Beto ke salaka yo na kilumbu yina ke wakanaka ti Nisani 14, kilumbu ya kuluta mfunu na mvula.

¹² Nkinsi ya Madia ya Nkokila ya Mfumu ya kukonda mindondo ke longaka beto kikalulu ya nkaka yina pusaka Yezu na kufwa sambu na beto. Ntangu yandi vandaka na ntoto, yandi zabanaka sambu na kikalulu yina. Kikalulu yango kele nki?

13. Inki mutindu Yoane 15:9 mpi 1 Yoane 4:8-10 ke monisa zola yina Yehowa ti Yezu monisaka mpi banani ke bakilaka yo mambote?

¹³ Na mambu yonso yina Yezu salaka, yandi monisaka na mutindu ya kukuka zola ya nene ya Yehowa sambu na beto. (Tanga Yoane 15:9; 1 Yoane 4:8-10.) Diambu ya kuluta mfunu yina Yezu salaka kele luzingu yina yandi pesaka sambu na beto. Yo vanda beto kele Bakristu yina bo me tulaka mafuta to “mameme ya nkaka,” beto ke bakaka mambote na zola yina Yehowa ti Mwana na yandi monisilaka beto na nzila ya kimenga yina. (Yoa. 10:16; 1 Yoa. 2:2) Yindula mpi bima yina beto ke sadilaka na madia ya Nkokila ya Mfumu; yo ke monisaka zola mpi dikebi ya Yezu sambu na balongoki na yandi. Inki mutindu?

14. Inki mutindu Yezu monisilaka balongoki na yandi zola?

¹⁴ Yezu monisilaka balongoki yina bo me tulaka mafuta zola ntangu yandi salaka nkinsi ya kukonda mindondo na mbala ya ntete na mutindu ya pete sambu bo landa kusala yo. Na nima, yo lombaka nde balongoki yina ya bo me tulaka mafuta kusala Lusungiminu konso mvula, na mabaku mingi ata na boloko. (Kus. 2:10) Keti bo lemfukaka na ntuma ya Yezu? Ee, bo lemfukaka na yo!

15-16. Inki mutindu bampangi ya nkaka salaka Lusungiminu na bantangu ya mpasi?

¹⁵ Banda na mvu-nkama ya ntete tii bubu yai, Bakristu ya kieleka ke salaka ngolo sambu na kuyibuka lufwa ya Yezu. Ata na bantangu ya mpasi, bo ke landaka kusala Madia ya Nkokila ya Mfumu. Beto tadila bambandu yai. Ntangu mpangi Harold King vandaka na boloko na Chine, yandi salaka bikesa sambu na kusala Lusungiminu yandi mosi. Yandi yidikaka na kinsweki mampa mpi vinu yina bo ke sadilaka na Lusungiminu. Yandi salaka mpi yonso sambu na kuzaba mbote-mbote kilumbu ya Lusungiminu. Ntangu ngunga ya Lusungiminu lungaka, yandi yimbaka, sambaka mpi salaka diskure yandi mosi.

¹⁶ Kimvuka mosi ya bampangi-bankento yina vandaka na boloko na Mvita ya Zole ya Ntoto ya Mvimba, tulaka luzingu na bo na kigonsa sambu na kusala Madia ya Nkokila ya Mfumu. Sambu mampa mpi vinu ya Lusungiminu ke vandaka kukonda mindondo, bo salaka Lusungiminu na kinsweki. Bo ke tuba nde: “Beto vukanaka na ntwala ya kazune yina beto tulaka mampa ti vinu mpi fikaka lele  ya mpembe. Beto sadilaka ve kura kansi beto tulaka buzi sambu bantu kumona beto ve. . . . Beto vutukilaka lusilu yina beto salaka na Tata ya kusadila ngolo na beto yonso sambu na kusantisa zina na yandi ya santu.” Bo monisaka lukwikilu ya ngolo mpenza! Yezu monisaka zola kibeni ntangu yandi salaka nde Lusungiminu kuvanda ya kukonda mindondo sambu beto sala yo ata na bantangu ya bampasi!

17. Inki bangiufula beto lenda kudiyula?

¹⁷ Mutindu Lusungiminu me finama, beto lenda kudiyula nde: ‘Inki mutindu mono lenda landa mbote-mbote mbandu ya Yezu ya kumonisa zola? Keti mono ke tulaka dikebi mingi na bampusa na mono kuluta ya bampangi ya nkaka? Keti mono ke vingilaka nde bampangi kusadila mono mambu mingi kuluta yina bo lenda sala to mono ke bakisaka bandilu na bo?’ Bika nde beto landa ntangu yonso mbandu ya Yezu mpi beto monisa “kikalulu ya kuditula na kisika ya bankaka.”—1 Pie. 3:8.

18-19. (a) Inki mambu beto lenda ndima? (b) Inki lukanu nge me baka?

¹⁸ Ntuma ya kuyibuka lufwa ya Kristu ta suka ntama mingi ve. Ntangu Yezu “ta kwisa” na nsungi ya mpasi ya nene, yandi ta vukisa “bantu yina yandi me solaka,” bayina me bikalaka na ntoto sambu na kukwenda na zulu mpi Lusungiminu ta salamaka diaka ve.—1 Bak. 11:26; Mat. 24:31.

¹⁹ Ata Lusungiminu ta vanda ti nsuka, beto ke ndima nde bansadi ya Yehowa ta landaka kuyibuka kibeni nde nkinsi yai ya kukonda mindondo kele kidimbu ya kudikulumusa, ya kikesa mpi ya zola ya kuluta nene yina ata muntu mosi ve me monisaka. Na ntangu yina, ntembe kele ve nde bantu yina vandaka kusala Lusungiminu ta zabisaka bantu ya nkaka mambote na yo. Sambu na kubaka mambote ya nkinsi yai banda bubu, beto fwete landa mbandu ya kudikulumusa, ya kikesa mpi ya zola ya Yezu. Kana beto sala yo, beto ta baka lufutu yina Yehowa ta pesa.—2 Pie. 1:10, 11.