“Kisalu Kele Mingi”

TALA NA

“Kisalu Kele Mingi”

NTOTILA DAVIDI sadisaka lukutakanu mosi ya nene na Yeruzalemi. Yandi bingisaka bamfumu mpi bantu yonso ya ngolo. Yandi zabisaka bo nsangu mosi yina pesaka bo kiese mingi. Yehowa tubaka nde Salomo, mwana ya Davidi, fwete tunga tempelo mosi ya nene sambu na lusambu ya kieleka. Ntotila Davidi vandaka mbuta na ntangu yina mpi yandi monaka na mbona meso pula ya tempelo yina Salomo ta tunga. Yandi tubaka nde “kisalu kele mingi, sambu yo kele ve tempelo ya muntu, kansi ya Yehowa Nzambi.”—1 Bans. 28:1, 2, 6, 11, 12; 29:1.

Na nima Davidi yulaka nde: “Nani kele ti luzolo ya mbote sambu yandi kwisa bubu yai na ntwala ti dikabu na maboko sambu na Yehowa?” (1 Bans. 29:5) Kana nge vandaka pana, inki nge zolaka kusala? Keti nge zolaka kupesa maboko na kisalu yina ya nene? Bantu ya Izraele pesaka maboko. Bo “vandaka na kiese na kupesa makabu . . . ya luzolo ya mbote, sambu bo pesaka makabu ya luzolo ya mbote na Yehowa na ntima ya mvimba.”—1 Bans. 29:9.

Bamvu-nkama mingi na nima, Yehowa salaka kima ya nkaka ya nene kuluta tempelo yina bo tungaka. Yandi yidikaka tempelo ya nene ya kimpeve, disongidila ngidika yina fwete sadisa bantu na kusambila yandi mpi kukuma banduku na yandi na nsadisa ya kimenga ya Yezu. (Baeb. 9:11, 12) Inki mutindu Yehowa ke sadisaka bantu bubu yai na kuwakana diaka ti yandi? Yandi ke sadisaka bo na nzila ya kisalu ya kukumisa bantu balongoki. (Mat. 28:19, 20) Bansamuni ke longukaka Biblia ti bamilio ya bantu; yo yina konso mvula bantu mingi ke longukaka Biblia, ke bakaka mbotika, mpi mabundu mingi ya mpa ke basikaka.

Mambu yai ke pusaka beto na kubasisa mikanda mingi, kutunga Banzo ya Kimfumu mingi, kuyidika yo, mpi kutunga banzo ya nkaka sambu na balukutakanu ya nene. Keti nge ke ndimaka nde kulonga nsangu ya mbote kele kisalu mosi ya nene mpi ya ke nataka balusakumunu?—Mat. 24:14.

Bansadi ya Nzambi ke zolaka Nzambi ti bamfinangani na bo, mpi bo me zaba nde bo fwete samuna kukonda kusukinina; yo yina bo ‘ke kwisaka ti makabu’ ya luzolo ya mbote sambu na kupesa Yehowa. Beto ke vandaka na kiese ya ‘kukumisa Yehowa ti bima na beto ya ntalu’ mpi ya kumona mutindu dibundu ke sadila yo mbote mpi na mayele sambu na kusala kisalu yai ya kuluta nene na disolo ya luzingu ya bantu.—Bing. 3:9.

Mutindu Bantu Ya Nkaka Ke Pesaka Makabu Sambu Na Kisalu Yina Ke Salama Na Nsi-ntoto Ya Mvimba

Bubu yai bampangi mingi ke bumbaka mbongo sambu na kutula na bakesi ya makabu ya dibundu, mutindu Bakristu ya mvu-nkama ya ntete vandaka kusala. (1 Bakorinto 16:2) Konso ngonda, mabundu ke tindaka makabu yina na biro ya filiale ya Bambangi ya Yehowa ya nsi na bo. Nge lenda tinda mpi mbala mosi makabu na nge na kimvuka mosi ya me zabanaka na nsiku yina Bambangi ya Yehowa ke sadilaka na nsi na beno. Sambu na kuzaba kimvuka yango, kota na site Internet www.pr418.com mpi binga to sonikila biro ya Bambangi ya Yehowa ya nsi na beno. Nge lenda pesa makabu yai:

MAKABU

Nge lenda tinda mbongo na banki, na konti ya Bambangi ya Yehowa na nzila ya Internet to ya ba karte ya banki. Na bansi ya nkaka, bantu lenda sala yo mpi na site Internet jw.org to na basite Internet ya nkaka.
Nge lenda pesa mpi babiju to bima ya nkaka ya mbalu. Sonika mpi mukanda ya ke monisa nde bima yina kele makabu ya luzolo ya mbote.

KUDEFISA MBONGO

Nge lenda defisa kimvuka ya Bambangi ya Yehowa mbongo mpi kutuba nde bo ta vutudila nge yo konso ntangu yina nge me zola.
Sonika mukanda mosi ya ke tendula makabu ya mutindu yai.

MITINDU YA NKAKA YA KUPESA MAKABU

Awa na nsi, beto me tubila makabu ya nkaka yina muntu lenda pesa sambu na kupesa maboko na kisalu ya kulonga ya ke salama na ntoto ya mvimba. Na ntwala ya kupesa yo, binga to sonikila biro ya filiale ya nsi na beno sambu na kuzaba makabu yina bo ke ndimaka na kutadila nsiku ya leta. Konso nsi kele ti bampaku mpi bansiku na yo; yo yina na ntwala ya kupesa makabu yai, yula muntu mosi ya me zaba nsiku mbote.

Asiranse: Muntu lenda sonika zina ya kimvuka mosi ya me zabanaka na nsiku yina Bambangi ya Yehowa ke sadilaka sambu yo baka mbongo na yandi ya asiranse to ya pansio kana yandi me fwa.

Konti ya Banki: Na kutadila bansiku ya babanki ya nsi na beno, muntu lenda kangula konti na banki, to kupesa certificat de dépôt, to mbongo na yandi ya pansio na zina ya kimvuka mosi ya me zabanaka na nsiku yina Bambangi ya Yehowa ke sadilaka. Yandi lenda tuba mpi nde kimvuka yina ta baka mbongo na yandi kana yandi me fwa.

Nswa ya Kubaka Mbongo: Muntu lenda pesa kimvuka mosi ya me zabanaka na nsiku yina Bambangi ya Yehowa ke sadilaka nswa na yandi (titres et obligations) ya kubaka mbongo. Yandi lenda sonika mpi nde bo baka yo na nima ya lufwa na yandi.

Kupesa Lupangu to Nzo: Muntu lenda pesa lupangu to nzo na yandi bonso makabu na kimvuka mosi ya me zabanaka na nsiku yina Bambangi ya Yehowa ke sadilaka. Kana yandi ke zingaka na kati, yandi lenda sadila yo ntete tii ntangu yandi ta fwa.

Kupesa Makabu Yina Bo Ta Vutulaka Ndambu-Ndambu: Muntu lenda pesa mbongo to bima na yandi na kimvuka mosi ya me zabanaka na nsiku yina Bambangi ya Yehowa ke sadilaka mpi kulomba nde bo vutudila yandi ndambu ya mbongo konso mvula ntangu yandi kele ntete na luzingu. Leta ta kulumusa ntalu ya mpaku yina yandi fwete futa banda na mvula yina yandi me pesa makabu yina.

Testama: Muntu lenda sonika mukanda ya kubaka difwa, yina nsiku ya leta ke ndimaka, sambu kimvuka mosi ya me zabanaka na nsiku yina Bambangi ya Yehowa ke sadilaka kubaka yo na nima ya lufwa na yandi. Leta ke kulumusaka mpaku yina yandi fwete futa sambu na bima yina.

Sambu na kuzaba mambu ya nkaka, bweta na kisika bo me sonika “Faire un don pour notre œuvre mondiale,” yo kele na nsi na jw.org, ya Kifalansa, nge lenda binga mpi to kusonikila biro ya filiale ya Bambangi ya Yehowa ya nsi na beno.

Nge Lenda Sepela Mpi Ti

Kupesa Makabu na Internet

NZOZULU YA NKENGI—NIMERO YA KULONGUKA