“NKENTO.” Bantangu ya nkaka, Yezu vandaka kubinga bankento mutindu yai. Mu mbandu, ntangu yandi belulaka nkento mosi yina vandaka mukongo ya kufumbama bamvula 18, yandi tubaka nde: “Nkento, nge me beluka na maladi na nge.” (Luka 13:10-13) Na ntangu yina yo vandaka kumonisa luzitu. Nkutu Yezu bingaka mpi mama na yandi mutindu yina. (Yoa. 19:26; 20:13) Kansi, bo vandaka kusadila mpi ngogo ya nkaka yina vandaka kumonisa luzitu mpi mambu ya nkaka.

Biblia ke sadilaka ngogo mosi ya mawete mpi ya zola ntangu yo ke tubilaka bankento ya nkaka. Yezu sadilaka ngogo yango ntangu yandi vandaka kusolula ti nkento mosi yina vandaka kubasika menga bamvula 12. Sambu nkento yai kwendaka kusimba Yezu, yandi zitisaka ve nsiku yina Nzambi pesaka sambu na bantu yina vandaka ve bunkete. Bantu lendaka kutuba nde, nkento yina vandaka ve ti nswa ya kukwenda kisika bantu vandaka sambu na maladi na yandi. (Levi 15:19-27) Kansi yandi vandaka na mpasi ya ngolo. Ya kieleka “yandi monaka mpasi mingi na maboko ya minganga mingi mpi yandi manisaka bima na yandi yonso, mpi yandi bakaka ve mambote, kansi mpasi na yandi kumaka mingi.”—Mar. 5:25, 26.

Nkento yina kotaka malembe na kati ya bantu, pusanaka na nima ya Yezu mpi simbaka lele na yandi ya zulu. Na mbala mosi, menga yina vandaka kubasika diaka ve! Yandi yindulaka nde mambu yina ta zabana ve, kansi Yezu yulaka nde: “Nani me simba mono?” (Luka 8:45-47) Ntangu nkento yina waka ngiufula yai, yandi waka boma mpi yantikaka kutekita; yandi fukamaka na ntwala ya Yezu mpi “songaka yandi kieleka yonso.”—Mar. 5:33.

Sambu na kulembika yandi, Yezu songaka yandi na mawete yonso nde: “Mwana na mono [ya nkento], vanda kikesa!” (Mat. 9:22) Bantu ya mayele yina ke longukaka Biblia ke tuba nde bo ke sadilaka mpi ngogo ya Kiebreo mpi ya Kigreki yina bo ke balulaka nde “mwana ya nkento” sambu na kumonisa “mawete mpi zola.” Yezu pesaka yandi diaka kikesa mingi ntangu yandi tubaka nde: “Lukwikilu na nge me belula nge. Kwenda na ngemba, mpi beluka na maladi na nge ya mpasi.”—Mar. 5:34.

Bozi, mvwama mosi ya Izraele, bingaka Ruti ya bwala Moabi mutindu yina. Ruti mpi vandaka kudiyangisa sambu yandi zabaka ve munkwa ya bilanga yina yandi vandaka kulokuta bima. Bozi songaka yandi nde: “Wa, mwana na mono [ya nkento].” Na nima yandi zabisaka Ruti na kulanda kulokuta bima na bilanga na yandi. Ruti fukamaka na ntwala ya Bozi mpi tulaka luse na ntoto; yandi yulaka Bozi nde, “sambu na nki nge me tudila mono dikebi, ata mono kele munzenza?” Mvutu ya Bozi pesaka yandi kikesa: “Bo me zabisa mono mambu yonso ya nge me sala sambu na bokilo na nge ya nkento [Naomi] . . . Bika Yehowa kufuta nge sambu na mambu yina nge me sala.”—Ruti 2:8-12.

Yezu ti Bozi me bikilaka bankuluntu mbandu ya mbote mpenza! Bantangu ya nkaka, bankuluntu zole lenda solula ti mpangi-nkento mosi yina me lemba mpi kele na mfunu ya kikesa. Kana bankuluntu me samba sambu na kulomba mpeve santu ya Yehowa mpi me widikila mpangi-nkento na dikebi yonso, bo ta bakisa baverse yina bo lenda sadila sambu na kusadisa yandi mpi kupesa yandi kikesa.—Bar. 15:4.