1, 2. (a) Inki lufutu bansadi ya Nzambi ke vingila? (b) Inki ke sadisaka beto na kulanda kutula mabanza na lufutu? (Tala kifwanisu ya luyantiku ya disolo.)

BAKRISTU yina bo me tulaka mafuta kele ti kivuvu ya mbote kibeni. Bo ta kwenda kuzinga na zulu. Ntumwa Polo bingaka kivuvu yango “lufutu ya kukwenda na zulu mutindu Nzambi me bingaka [bo].” (Bafilipi 3:14) Kuna, bo ta yala ti Yezu Kristu na Kimfumu na yandi mpi ta sadisa bantu na kukuma bantu ya kukuka. (Kusonga 20:6) Yo kele kivuvu ya mbote mpenza! Mameme ya nkaka ke vingila mpi lufutu na bo, bo ta zinga mvula na mvula na Paladisu na ntoto mpi kivuvu yango ke pesaka bo kiese kibeni!—2 Piere 3:13.

² Polo sadisaka bampangi na yandi yina bo me tulaka mafuta na kubikala ya kwikama sambu na kubaka lufutu. Yandi songaka bo nde: “Beno tula mabanza na beno ntangu yonso na mambu yina kele na zulu.” (Bakolosai 3:2) Yo lombaka nde bo tula mabanza na bo na kivuvu na bo ya kukwenda na zulu.  (Bakolosai 1:4, 5) Kuyindula balusakumunu ya Yehowa ke sadisaka bansadi na yandi yonso, bayina kele ti kivuvu ya kuzinga na zulu to na ntoto, na kulanda kutula mabanza na lufutu.—1 Bakorinto 9:24.

3. Polo kebisaka Bakristu na nki mambu?

³ Polo kebisaka mpi Bakristu na bigonsa yina lenda kanga bo nzila ya kubaka lufutu. Mu mbandu, yandi kebisaka bampangi ya Kolose sambu na Bakristu ya luvunu yina vandaka kulanda Nsiku ya Moize na kisika ya kumonisa lukwikilu na Kristu. (Bakolosai 2:16-18) Polo tubilaka mpi bigonsa yina lenda kanga beto nzila bubu yai na kubaka lufutu. Yandi tendulaka mutindu beto lenda buya banzala ya mbi mpi mambu yina beto fwete sala kana beto ke wakana ve ti mpangi mosi na dibundu to na dibuta. Bandongisila ya Polo lenda sadisa beto bubu yai. Bika beto tadila mwa bandongisila yina yandi pesaka bampangi ya Kolose.

4. Inki mutindu banzala ya mbi lenda kanga beto nzila ya kubaka lufutu?

⁴ Na nima ya kuyibusa bampangi kivuvu na bo ya kuluta mbote, Polo sonikaka nde: “Yo yina, beno fwa bitini ya nitu na beno yina kele na ntoto sambu na pite, mambu ya mvindu, nzala ya ngolo ya kuvukisa nitu ya bo lenda yala ve, nzala ya mbi mpi lukasi.” (Bakolosai 3:5) Banzala ya mbi lenda vanda ngolo kibeni mpi lenda bebisa kinduku na beto ti Yehowa mpi kukanga beto nzila ya kubaka lufutu. Mpangi-bakala mosi yalaka ve banzala na yandi ya nitu, yo yina bo basisaka yandi na dibundu, na nima ya kuvutuka na dibundu, yandi ke tuba nde banzala na yandi ya mbi kumaka ngolo kibeni na mpila nde yandi “kukaka ve kuyala yo, yo yina yandi salaka disumu.”

5. Inki mutindu beto lenda kuditanina na bigonsa?

⁵ Beto fwete keba mingi-mingi na mambu yina lenda nata beto na kufwa bansiku ya Yehowa. Mu mbandu, yo kele mbote nde bampangi yina ke zola kukwelana kutula bandilu na mambu bonso kusimbana, kuyambana mpi kuvanda bo mosi na kingenga. (Bingana 22:3) Bigonsa ya nkaka lenda kumina beto ntangu beto ke sala nzietelo to ke sala kisalu ti muntu yina kele ve nkwelani na beto. (Bingana 2:10-12, 16) Inki nge lenda sala sambu na kuditanina? Zabisa bantu nde nge kele Mbangi ya Yehowa. Vanda ti bikalulu ya mbote mpi kuvila ve nde kumonisila muntu zola ya kuluta ndilu kele kigonsa. Beto fwete keba mpi ntangu beto kele na mawa to ke kudiwa beto mosi. Beto lenda zola nde muntu mosi kuvanda na lweka na beto. Beto lenda vanda ti basusi mingi mpi kusosa nde muntu mosi kutudila beto dikebi mingi. Yo kele kigonsa. Kana nge ke kudiwaka mutindu yai, kusala ve mambu yina lenda kanga nge nzila ya kubaka lufutu. Sosa lusadisu ya Yehowa mpi ya bampangi.—Tanga Nkunga 34:18; Bingana 13:20.

6. Inki beto fwete vila ve ntangu beto ke pona bansaka?

⁶ Sambu na kufwa banzala ya mbi, beto fwete buya bansaka ya mbi. Bubu yai, bansaka mingi ke yibusaka beto mambu yina vandaka kusalama na Sodome mpi na Gomore. (Yude 7) Bansaka yango ke sosaka kumonisa bantu nde kuvukisa nitu kele mbi ve mpi kele ve ata ti kigonsa. Yo yina beto fwete keba ntangu yonso. Beto fwete kudipesa ve na bansaka yonso yina nsi-ntoto ke basisa. Beto fwete pona bansaka yina ta kanga beto ve nzila ya kubaka lufutu.—Bingana 4:23.

7. Inki mambu lenda basika na dibundu?

⁷ Kuvanda na dibundu ke pesaka beto  kiese mingi. Beto ke longukaka Ndinga ya Nzambi na balukutakanu mpi ke pesanaka kikesa. Yo ke pusaka beto na kulanda kutula mabanza na lufutu. Bantangu ya nkaka mavwanga lenda basika na kati na beto ti mpangi mosi mpi yo lenda sala nde beto wakana diaka ve ti yandi. Kana beto yidika yo ve, beto lenda bumbila mpangi kimbeni na ntima.—Tanga 1 Piere 3:8, 9.

8, 9. (a) Inki bikalulu ta sadisa beto na kubaka lufutu? (b) Inki lenda sadisa beto na kulanda kutula ngemba kana mpangi mosi me pesa beto makasi?

⁸ Beto fwete bika ve nde kimbeni kukanga beto nzila ya kubaka lufutu. Polo monisaka mambu yina Bakristu fwete sala: “Sambu beno kele bantu yina Nzambi me solaka, bantu ya santu mpi yina yandi ke zolaka, beno lwata mawa ya ngolo, ntima ya mbote, kudikulumusa, mawete, mpi ntima ya nda. Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba ata muntu mosi kele na makambu ti muntu ya nkaka. Mutindu Yehowa lolulaka beno na ntima ya mvimba, beno fwete sala mpi mutindu mosi. Kansi katula mambu yai yonso, beno lwata zola, sambu yo ke vukisaka beto na mutindu ya kukuka.”—Bakolosai 3:12-14.

⁹ Zola mpi ntima ya mbote lenda sadisa beto na kulolula bantu ya nkaka. Kana muntu mosi me tuba to me sala mambu yina me pesa beto mpasi, beto lenda yindula mpi kilumbu mosi yina beto tubaka mpi salaka mambu yina pesaka bantu ya nkaka mpasi mpi bo lolulaka beto. Beto tondaka bo sambu na zola mpi ntima na bo ya mbote! (Tanga Longi 7:21, 22.) Beto ke tondaka Kristu mutindu yandi me vukisaka bansadi ya kieleka. (Bakolosai 3:15) Beto yonso ke zolaka Nzambi mosi, ke longaka nsangu mosi mpi ke kutanaka ti bampasi ya mutindu mosi. Kana beto ke monisa ntima ya mbote, ke zolana mpi ke lolulana, dibundu ta vanda na bumosi mpi beto ta landa kutula mabanza na lufutu.

10, 11. (a) Sambu na nki kimpala kele kigonsa? (b) Inki beto lenda sala sambu kimpala kukanga beto ve nzila ya kubaka lufutu?

¹⁰ Kimpala lenda kanga beto nzila ya kubaka lufutu. Bambandu yina kele na Biblia ke monisa bigonsa ya kimpala. Mu mbandu, Kaini wilaka Abele kimpala mpi fwaka yandi. Kora, Datani mpi Abirami wilaka Moize kimpala mpi bo kolamaka. Ntotila Saule wilaka Davidi kimpala mpi sosaka kufwa yandi. Ndinga ya Nzambi ke tuba kieleka yai: “Kisika yina kimpala mpi mpeve ya kuswana kele, mavwanga mpi mambu ya mbi ya konso mutindu ta vanda mpi.”—Yakobo 3:16.

¹¹ Kana beto ke sala bikesa ya kumonisa zola mpi ntima ya mbote, beto ta wila ve bantu ya nkaka kimpala. Biblia ke tuba nde: “Zola kele ntima-nda mpi ntima-mbote. Zola kele na kimpala ve.” (1 Bakorinto 13:4) Sambu beto wila ve bankaka kimpala, beto fwete tadila mambu mutindu Yehowa ke tadilaka. Beto fwete tadila bampangi na dibundu bonso bitini ya nitu mosi. Biblia ke tuba nde: “Kana kitini mosi me baka nkembo, bitini yonso ya nkaka ke waka kiese ti yo.” (1 Bakorinto 12:16-18, 26) Kana mpangi mosi kele na kiese, beto fwete sepela mpi ti yandi kansi beto wila yandi ve kimpala. Yindula mbandu ya mbote ya Yonatani, mwana ya ntotila Saule. Yonatani wilaka ve Davidi kimpala ntangu Nzambi ponaka Davidi na kuvanda ntotila na kisika ya kupona yandi. Nkutu Yonatani pesaka Davidi kikesa mpi sadisaka yandi. (1 Samuele 23:16-18) Keti beto lenda vanda ntima-mbote mpi kumonisila bantu ya nkaka zola bonso Yonatani?

12. Inki ndongisila ya Biblia ta sadisa dibuta na beno na kubaka lufutu?

¹² Kana konso muntu na dibuta ke zitisa bansiku ya Biblia, dibuta ta vanda na ngemba, na kiese mpi ta baka lufutu. Polo pesaka mabuta ndongisila yai: “Beno bankento, beno lemfuka na babakala na beno, mutindu yo me fwana na Mfumu. Beno babakala, beno landa kuzola bankento na beno mpi beno dasukila bo ve. Beno bana, beno lemfuka na bibuti na beno na mambu yonso, sambu yo kele mbote na Mfumu. Beno batata, beno pesa ve bana na beno makasi, sambu bo lemba nitu ve.” (Bakolosai 3:18-21) Inki mutindu ndongisila yai lenda sadisa dibuta na beno?

13. Inki mutindu mpangi-nkento lenda sadisa bakala na yandi na kusadila Yehowa?

¹³ Mbala ya nkaka bakala na nge ke sadilaka ve Yehowa. Inki nge ta sala kana nge ke mona nde yandi ke sadilaka nge ve mambu na mutindu ya mbote? Kana nge wa makasi mpi nge swanisa yandi, keti yo ta yidika mambu? Ata yandi muntu kele na kifu, keti mambu ya nge ke sala ta sadisa yandi na kusadila mpi Yehowa? Ata fioti ve. Kansi kana nge zitisa yandi sambu yandi kele mfumu ya dibuta, nge lenda sadisa dibuta na nge na kuvanda na ngemba mpi nge ta pesa Yehowa lukumu. Mbandu na nge ya mbote lenda sala  nde bakala na nge kubaka lukanu ya kusadila Yehowa. Nsuka-nsuka, beno yonso lenda baka lufutu.—Tanga 1 Piere 3:1, 2.

14. Inki mpangi-bakala fwete sala kana nkento na yandi ke zitisa yandi ve?

¹⁴ Kana nkento na nge ke sadilaka ve Yehowa. Inki nge lenda sala kana yandi ke zitisa nge ve? Kana nge ke nganinaka yandi sambu na kumonisa nde nge muntu kele mfumu, keti yandi ta zitisa nge? Ata fioti ve! Nzambi ke zola nde nge vanda bakala ya zola mpi nge landa mbandu ya Yezu. (Baefezo 5:23) Yezu, mfumu ya dibundu, ke vandaka ntangu yonso ntima-nda mpi ke zolaka bantu. (Luka 9:46-48) Kana nge landa mbandu ya Yezu, nsuka-nsuka nkento na nge mpi lenda kuma kusadila Yehowa.

15. Inki mutindu mpangi-bakala lenda monisa nde yandi ke zolaka nkento na yandi?

¹⁵ Yehowa ke lomba babakala na ‘kulanda kuzola bankento na bo mpi na kudasukila bo ve.’ (Bakolosai 3:19) Bakala ya mbote ke pesaka nkento na yandi lukumu. Inki mutindu? Yandi ke widikilaka yandi sambu na kumonisa nde yandi ke bakaka na mbalu mambu yina nkento na yandi ke tubaka. (1 Piere 3:7) Ata yandi ta sala ve mambu yonso yina nkento ke lomba, kuwidikila nkento na yandi ta sadisa bakala na kubaka balukanu ya mbote. (Bingana 15:22) Bakala ya mbote ke pusaka ve nkento na kuzitisa yandi. Kansi yandi ke salaka mambu yina ke pusaka nkento na kuzitisa yandi. Kana bakala ke zola nkento ti bana na yandi, ntembe kele ve nde bo ta vanda na kiese ya kusadila Yehowa mpi ta baka lufutu ya luzingu.

16, 17. Inki lenda sadisa baleke na kuwila ve bibuti na bo makasi?

¹⁶ Leke, ziku nge lenda mona nde bibuti na nge ke bakisaka nge ve to nde bo kele makambu ngolo. Mambu ya mutindu yai lenda pesa nge makasi mpi yo lenda pusa nge na kudiyula kana nge fwete landa kusadila Yehowa. Kansi kana nge yambula kusadila Yehowa, nge ta bakisa nde ata muntu mosi ve na nsi-ntoto ke zolaka nge mingi kuluta bibuti mpi bampangi ya dibundu.

¹⁷ Yindula fioti, kana bibuti na nge ke sungika nge ve, nki mutindu nge ta zaba kana bo ke kudibanzaka sambu na nge? (Baebreo 12:8) Ya kieleka, bo kele ve bantu ya kukuka, yo yina mutindu na bo ya kusungika nge lenda pesa nge mpasi. Kansi tula dikebi na bandongisila na bo kansi ve na mutindu bo ke pesa yo. Vanda pima mpi kuwa ve makasi. Biblia ke tuba nde: “Muntu ya kele ti nzayilu ke yalaka bangogo na yandi, mpi muntu ya luswasukusu ta bikala pima.” (Bingana 17:27) Baka lukanu ya kukuma muntu ya kuyela, ndimaka bandongisila mpi bakila yo malongi ata bo me pesa yo ve na mutindu ya mbote. (Bingana 1:8) Kuvila ve nde kuvanda ti bibuti yina ke zolaka Yehowa kele lusakumunu ya nene. Bo ke zolaka kusadisa nge sambu nge baka luzingu ya mvula na mvula.

18. Sambu na nki nge me baka lukanu ya kutula mabanza kaka na lufutu?

¹⁸ Ata beto kele ti kivuvu ya kuzinga na zulu to na paladisu na ntoto, beto yonso ke vingila mambu ya mbote na bilumbu ke kwisa. Kivuvu yina kele ya kieleka. Ngangi ya zulu ti ntoto me pesaka lusilu yai, nde: “Ntoto ta fuluka kibeni ti nzayilu ya Yehowa.” (Yezaya 11:9) Ntama mingi ve bantu yonso na ntoto ta longama na Nzambi. Yai kele lufutu ya mbote mpi beto fwete sala bikesa sambu na kubaka yo. Yo yina, yindula ntangu yonso mambu yina Yehowa ke sila nge, mpi kubika ve nde kima mosi kukanga nge nzila ya kubaka lufutu.