Yimba na Kiese!
“Yo kele mbote na kuyimba bankunga sambu na kukumisa Nzambi na beto.”—NKUNGA 147:1.
BANKUNGA: 10, 2
1. Kuyimba ke sadisaka beto na kusala nki?
MUNTU mosi ya mayele ya ke sonikaka bankunga tubaka nde: “Bangogo ke pusaka muntu na kuyindula. Miziki ke pesaka muntu kiese. Kansi nkunga ke basisaka mawi ya muntu.” Bankunga na beto ke kumisaka Yehowa, Tata na beto ya zulu mpi ke monisaka zola na beto sambu na yandi. Yo ke sadisaka beto na kukwenda pene-pene na yandi. Mambu yai ke sadisa beto na kubakisa nde na lusambu ya kieleka kuyimba kele mfunu mingi, yo vanda beto ke yimba beto mosi to ti bampangi.
2, 3. (a) Inki mutindu bampangi ya nkaka ke tadilaka kuyimba na ndinga ya ngolo na dibundu? (b) Inki bangiufula beto ta tadila na disolo yai?
2 Inki mutindu nge ke tadilaka kuyimba na ndinga ya ngolo na dibundu? Keti yo ke yangisaka nge? Na bansi ya nkaka, babakala ke zolaka ve kuyimba na meso ya bantu. Diambu yai lenda pesa mpasi na dibundu, mingi-mingi kana bankuluntu ke zola ve kuyimba to ke sala mambu ya nkaka na ntangu ya kuyimba.—Nkunga 30:12.
3 Yehowa ke sepelaka ntangu beto ke yimbaka. Beto ke zolaka ve kutambula ntangu bampangi ke yimba to kukonda kitini yai ya mfunu. Yo yina, beto yonso fwete kudiyula nde: ‘Inki mutindu mono ke kudiwaka ntangu beto ke yimbaka na balukutakanu? Inki mono lenda sala kana mono ke wa nsoni na kuyimba na meso ya bantu? Inki mutindu mono lenda yimba na kiese?’
KUYIMBA KELE MFUNU NA LUSAMBU YA KIELEKA
4, 5. Inki mutindu bo yidikaka bantu ya Izraele sambu na kuyimba na tempelo?
4 Bansadi ya Yehowa ya ntangu ya ntama vandaka kuyimba sambu na kukumisa yandi. Kima ya kiese kele nde ntangu bantu ya Izraele vandaka ya kwikama na Yehowa, kuyimba vandaka mfunu na lusambu na bo. Mu mbandu, ntangu Davidi vandaka kubongisa bima ya kutunga tempelo, yandi yidikaka Balevi 4 000 sambu na kuyimbila Yehowa. Balevi 288 na kati na bo, “yikanaka ti bankunga sambu na Yehowa, bo yonso zabaka kisalu mbote-mbote.”—1 Bansangu 23:5; 25:7.
5 Miziki mpi bankunga vandaka mpi mfunu na nkinsi ya kuyantika kusadila tempelo. Biblia ke tuba nde: “Ntangu bantu yina ke bulaka bampungi ti miyimbi-bankunga vandaka kukumisa mpi kupesa Yehowa matondo na bumosi, mpi ntangu makelele ya bampungi, ya basembale, mpi ya bima ya nkaka ya kubudila miziki tombukaka na zulu ntangu bo vandaka kukumisa Yehowa, . . . nkembo ya Yehowa fulukaka na nzo ya Nzambi ya kieleka.” Ziku bantangu ya mutindu yai kumisaka ngolo lukwikilu ya bantu ya Izraele!—2 Bansangu 5:13, 14; 7:6.
6. Inki bangidika Nehemia bakaka sambu na miziki mpi kuyimba ntangu yandi vandaka guvernere ya Yeruzalemi?
6 Nehemia, yina twadisaka bantu ya Izraele na kutunga diaka bibaka ya Yeruzalemi, yidikaka mpi Balevi sambu na kuyimba mpi kubula miziki. Kuyimba na bo tomisaka nkinsi ya bo salaka ntangu bo manisaka kutunga bibaka. Nehemia tulaka “bimvuka zole ya nene ya miyimbi-bankunga yina ke pesaka matondo.” Bimvuka ya miyimbi-bankunga vandaka kutambula na zulu ya kibaka ya mbanza na bandambu ya kuswaswana tii ntangu bo kutanaka na kibaka yina vandaka pene-pene ya tempelo. Bankunga na bo vandaka kuwakana ngolo tii na bisika ya ntama. (Nehemia 12:27, 28, 31, 38, 40, 43) Beto ke ndima nde Yehowa sepelaka ngolo mutindu bansadi na yandi yimbaka na kiese sambu na kukumisa yandi.
7. Inki mutindu Yezu monisaka nde kuyimba ta vandaka mfunu na lusambu ya Bakristu?
7 Na bilumbu ya Yezu, kuyimba vandaka mpi mfunu na lusambu ya kieleka. Yindula mambu yina salamaka na mpimpa ya nsuka ya Yezu na ntoto. Na nima ya kudia Madia ya Nkokila ya Mfumu ti balongoki na yandi, bo yonso yimbaka bankunga sambu na kukumisa Yehowa.—Tanga Matayo 26:30.
8. Inki mutindu Bakristu ya ntete pesaka mbandu ya mbote ya kukumisa Nzambi na bankunga?
8 Bakristu ya ntete pesaka mbandu ya mbote ya kukumisa Nzambi na bankunga. Bo vandaka ve kukwenda kusambila Yehowa na tempelo bonso bantu ya Izraele, bo vandaka kuvukana na banzo ya bampangi. Ata banzo yango vandaka ve kitoko bonso tempelo, bampangi vandaka kuyimba na kiese. Yo yina, ntumwa Polo songaka bampangi nde: ‘Beno landa kulonga bampangi mpi kupesana kikesa ti bankunga, bankunga ya kupesa Nzambi lukumu, bankunga ya kimpeve yina beno ke yimba na ntonda, mpi beno yimbila Yehowa na bantima na beno.’ (Bakolosai 3:16) Beto fwete yimba bankunga yina kele na mukanda na beto ya bankunga “na ntonda.” Yo kele na kati ya madia yina “mpika ya kwikama mpi ya mayele” ke yidikilaka beto “na ntangu ya me fwana.”—Matayo 24:45.
INKI LENDA SADISA NGE NA KUYIMBA NA KIESE?
9. (a) Sambu na nki bampangi ya nkaka ke waka nsoni na kuyimba na balukutakanu? (b) Inki mutindu beto fwete kumisa Yehowa mpi banani fwete pesa mbandu? (Tala kifwanisu ya luyantiku ya disolo.)
9 Inki lenda sala nde nge wa nsoni na kuyimba? Mbala ya nkaka na dibuta to na bwala na beno, bantu ke yimbaka mpenza ve bankunga, to nge ke widikilaka bantu yina ke yimbaka mbote na baradio, na televizio mpi ntangu nge ke fwanisa mutindu na nge ya kuyimba ti ya bo, nge ke waka nsoni to ke lembaka nitu. Kansi beto yonso fwete yimbila Yehowa sambu na kukumisa yandi. Yo yina, simba mukanda na nge ya bankunga, tombula ntu mpi yimba na kiese! (Esdrasi 3:11; tanga Nkunga 147:1.) Na Banzo ya Kimfumu mingi, bo ke lutisaka bangogo ya bankunga na écran, yo ke sadisaka bampangi na kuyimba. Diambu ya kiese kele nde na Nzo-Nkanda ya bankuluntu, bo ta kuma mpi kuyimba bankunga ya Kimfumu. Mambu yai ke monisa nde bankuluntu fwete vanda bantu ya ntete na kuyimba na balukutakanu.
10. Sambu na nki beto fwete wa ve nsoni ya kuyimba na ndinga ya ngolo?
10 Bantu mingi ke kukaka ve kuyimba na ndinga ya ngolo, bo ke waka nsoni nde ndinga na bo ta wakana ngolo to nde bo ke yimbaka mbote ve. Kansi yindula fioti, “beto yonso ke bulaka sakuba mbala mingi” ntangu beto ke tubaka, kansi beto ke yambulaka ve kutuba. (Yakobo 3:2) Sambu na nki beto fwete bika nde ndinga na beto yina kele mbote ve kukanga beto nzila ya kuyimba sambu na kumisa Yehowa?
11, 12. Inki mutindu beto lenda tomisa mutindu na beto ya kuyimba?
11 Mbala ya nkaka beto ke waka nsoni na kuyimba sambu beto ke zabaka ve kuyimba. Kansi kele ti mambu ya pete yina beto lenda sala sambu na kutomisa mutindu na beto ya kuyimba. *
12 Kuzaba bisika yina beto fwete pema ntangu beto ke yimba lenda sadisa beto na kuyimba mbote. Mutindu kura ke sadisaka ampule na kupela, mpema na nge lenda sadisa nge mpi na kutuba to kuyimba mbote. Nge fwete yimba ngolo mutindu nge ke tubaka to nkutu kuluta mutindu nge ke tubaka. (Tala bandongisila na mukanda Baka Mambote na Malongi ya Nzo-Nkanda ya Kisalu ya Teokrasi, balutiti 181 tii na 184, na kantu-diambu “Pemaka na Mutindu Mosi ya Mbote.”) Ya kieleka, bantangu ya nkaka Biblia ke siamisaka bansadi ya Yehowa na kutula “milolo ya kiese” sambu na kukumisa Yehowa.—Nkunga 33:1-3.
13. Inki lenda sadisa beto na kuyimba na ndinga ya ngolo?
13 Na lusambu ya dibuta to na kulonguka na nge mosi, nge lenda pona nkunga mosi ya nge ke zolaka mingi. Tanga bangogo na yo na ndinga ya ngolo. Na nima, tanga nsa ya mvimba na ndinga ya ngolo kukonda kupema. Ebuna, yimba yo na ndinga ya ngolo. (Yezaya 24:14) Nge ta kuma kuyimba na ndinga ya ngolo disongidila nge ta kuma kuyimba mbote. Kuwa ve nsoni to boma ya kuyimba na ndinga ya ngolo.
14. (a) Inki mutindu kukangula munoko lenda sadisa beto na kuyimba mbote? (Tala lupangu “ Tomisa Mutindu na Nge ya Kuyimba.”) (b) Inki bandongisila na mutindu ya kutomisa ndinga me sepedisa nge?
14 Sambu na kuyimba mbote, beto fwete kangula munoko. Yo yina ntangu nge ke yimba, kangula munoko kuluta mutindu nge ke kangulaka ntangu nge ke tubaka. Kansi nki nge fwete sala kana ndinga na nge kele na nsi mingi to mpi na zulu mingi? Tala bandongisila ya mfunu na lupangu “Mutindu ya Kumanisa Mambu ya Mpasi ya Metala Ndinga,” na mukanda Baka Mambote na Malongi ya Nzo-Nkanda ya Kisalu ya Teokrasi, lutiti 184.
YIMBILA YEHOWA NA NTIMA YA MVIMBA
15. (a) Inki mambu bo zabisaka na lukutakanu ya nsuka-mvula ya 2016? (b) Sambu na nki Nto-Kimvuka basisaka mukanda ya mpa ya bankunga?
15 Bantu yonso yina vandaka na lukutakanu ya nsuka-mvula ya 2016 sepelaka ntangu mpangi Stephen Lett ya Nto-Kimvuka zabisaka kubasika ya mukanda ya mpa ya bankunga ‘Beto Yimbila Yehowa na Kiese Yonso’. Mpangi Lett tendulaka nde kikuma mosi ya salaka nde bo basisa mukanda ya mpa ya bankunga kele nde bo me tomisaka Mbalula ya Nsi-Ntoto ya Mpa. Yo yina, bo me soba bangogo ya nkaka na mukanda ya bankunga, bangogo yina Mbalula ya Nsi-Ntoto ya Mpa ke sadila diaka ve. Diaka, bo me yika bankunga ya ke tubila kisalu ya kusamuna mpi kimenga ya Yezu. Sambu kuyimba kele mfunu na lusambu na beto, Nto-Kimvuka zolaka nde mukanda ya bankunga kuvanda kitoko mingi. Kimpusu na yo kele bonso ya Biblia—Mbalula ya Nsi-Ntoto ya Mpa.
16, 17. Inki bansoba ya nkaka bo me sala na mukanda ya mpa ya bankunga?
16 Sambu na kusadila mukanda ya mpa ya bankunga kukonda mpasi, bo me yidika bankunga na ndonga. Mu mbandu, bankunga 12 ya ntete ke tubila Yehowa, bankunga 8 ya me landa ke tubila Yezu mpi kimenga na yandi, ebuna na nima bo me landisa bankunga yina ya nkaka. Bantu-Diambu ya bankunga yonso kele na luyantiku ya mukanda ya bankunga. Yo lenda sadisa bampangi na kupona bankunga sambu na badiskure.
17 Sambu na kusadisa bantu yonso na kuyimba na ntima ya mvimba, bo me soba bangogo ya nkaka sambu bantu kubakisa mambu yina bo ke yimba. Bo me katula bangogo yina bantu ke sadilaka diaka ve. Bo me soba mpi mambu ya nkaka, mu mbandu ntu-diambu ya nkunga “Ntima ya Nda” me kuma “Monisa Ntima ya Nda,” bo me soba mpi bangogo na yo.
Beno yimbaka bankunga na lusambu ya dibuta (Tala paragrafe 18)
18. Sambu na nki beto fwete longuka bankunga ya mukanda na beto ya mpa? (Tala noti na nsi ya lutiti.)
18 Bankunga mingi ya mukanda ‘Beto Yimbila Yehowa na Kiese Yonso’ kele bonso bisambu. Bankunga yai lenda sadisa nge na kusonga Yehowa mabanza na nge. Bankunga ya nkaka ta pusa beto na “kumonisa zola mpi na kusala bisalu ya mbote.” (Baebreo 10:24) Beto fwete zaba miziki na yo, mutindu ya kuyimba yo mpi bangogo na yo. Kuwidikila miziki na yo yina kele ti ndinga ya bantu ke yimba ta sadisa beto mpi na kuyimba mbote, nge lenda zwa yo na jw.org. Kana nge meka kuyimba yo na nzo, nge ta kuma kuyimba na kiese kibeni. *
19. Inki mutindu beto yonso lenda sambila Yehowa?
19 Kuvila ve nde kuyimba kele mfunu na lusambu na beto. Yo ke mutindu ya mbote ya kumonisila Yehowa zola mpi ntonda sambu na mambu yonso yina yandi ke sadilaka beto. (Tanga Yezaya 12:5.) Kana nge ke yimba na kiese, nge ta pesa mpi bampangi ya nkaka nzala ya kuyimba na kiese. Beto yonso, baleke, bambuta mpi bampangi ya mpa, lenda yimbila Yehowa na kiese. Kuwa nsoni ve na kuyimba na ntima ya mvimba. Lemfuka na mambu yai ya muyimbi-bankunga tubaka: “Beno yimbila Yehowa!” Ee, beto yimba na Kiese!—Nkunga 96:1.
^ par. 11 JW Télédiffusion ya Desembri 2014 ke monisa mambu mingi ya kusala sambu na kutomisa mutindu na beto ya kuyimba.
^ par. 18 Na balukutakanu ya nene, manaka ya ntwala-midi mpi ya nima-midi ke yantikaka ti miziki ya minuta kumi. Miziki yai ke pesaka beto mpusa ya kuyimba mpi ke yidikaka bantima na beto sambu na kulanda malongi. Yo yina, beto yonso fwete vanda na bisika na beto sambu na kulanda miziki.
