1, 2. Na 2018, nki lukutakanu ta vukisa beto na mutindu ya kuyituka mpi sambu na nki? (Tala kifwanisu ya luyantiku ya disolo.)

NA MARSI 31, 2018, bantu mingi na ntoto ya mvimba ta vanda na lukutakanu yina ke salamaka mbala mosi na mvula. Na nima ya kudinda ya ntangu, Bambangi ya Yehowa mpi bantu mingi ya nkaka ta vukana sambu na kuyibuka kimenga yina Yezu pesaka sambu na beto. Konso mvula, Lusungiminu ya lufwa ya Kristu ke vukisaka bantu na mutindu ya kuyituka kuluta balukutakanu ya nkaka.

² Yehowa ti Yezu ke sepelaka kibeni kumona bantu mingi na ntoto ya mvimba ke kwenda na lukutakanu yai ya mfunu. Biblia ke binga bantu yai “kimvuka mosi ya nene ya bantu, yina muntu mosi ve lenda tanga ntalu na bo, ya me katuka na makanda yonso, na mabuta yonso, na bansi yonso, mpi na bandinga yonso.” Bantu yango ke tuba na ndinga ya ngolo nde: “Luguluku me katuka na Nzambi na beto, yina me vanda na kiti ya kimfumu, mpi na Mwana-Dimeme.” (Kusonga 7:9, 10) Yo kele kiese na kuzaba nde na Lusungiminu ya konso  mvula, bantu mingi kibeni ke pesaka Yehowa ti Yezu lukumu sambu na mambu ya kuluta mbote ya bo me salaka!

3. Disolo yai ta pesa mvutu na nki bangiufula?

³ Na disolo yai, beto ta baka mvutu na bangiufula iya: (1) Inki mutindu mono lenda kudibongisa sambu Lusungiminu kunatila mono mambote? (2) Inki mutindu Lusungiminu ke vukisaka bansadi ya Nzambi? (3) Inki mono lenda sala sambu na kuzinga na ngemba ti bansadi ya Nzambi? (4) Keti Lusungiminu ya nsuka ta vanda? Kana mpidina, nki ntangu?

4. Sambu na nki yo kele mfunu nde beto kwenda na Lusungiminu?

⁴ Sambu na nki kukwenda na Lusungiminu kele mfunu? Beto ke kwendaka na balukutakanu sambu na kusambila Yehowa. Beto ke ndimaka nde Yehowa ti Yezu ke monaka bikesa yina konso muntu ke salaka sambu na kukwenda na lukutakanu yai ya kuluta mfunu ya ke salamaka mbala mosi na mvula. Beto ke zola nde Yehowa ti Yezu kubakisa nde beto ta vanda na Lusungiminu katula kaka kana diambu mosi ya kuluta mpasi me kumina beto. Kana mambu ya beto ke sala ke monisa nde beto ke bakaka na mbalu balukutakanu, yo ta pusa Yehowa na kutula bazina na beto na “mukanda ya kuyibuka.” Biblia ke binga yo mpi “mukanda ya luzingu.” Yo kele ti bazina ya bantu yina Yehowa ta pesa luzingu ya mvula na mvula.—Malaki 3:16; Kusonga 20:15.

5. Mwa bamposo na ntwala ya Lusungiminu, nki mutindu beto lenda “landa kudimeka sambu na kuzaba kana [beto] kele na lukwikilu”?

⁵ Mwa bamposo na ntwala ya Lusungiminu, beto fwete samba mpi kuyindula mingi mutindu beto lenda kumisa ngolo kinduku na beto ti Yehowa. (Tanga 2 Bakorinto 13:5.) Ntumwa Polo songaka Bakristu nde: “Beno landa kudimeka sambu na kuzaba kana beno kele na lukwikilu.” Inki mutindu beto lenda sala yo? Kudiyula nde: ‘Keti mono ke kwikilaka kibeni nde yai kele dibundu mosi kaka yina Yehowa me ponaka sambu na kusala luzolo na yandi? Keti mono ke salaka bikesa sambu na kusamuna mpi kulonga nsangu ya mbote? Keti mambu yina mono ke salaka ke monisaka kibeni nde beto ke zinga na bilumbu ya nsuka mpi nde nsuka ya luyalu ya Satana me finama? Keti mono ke tulaka kibeni ntima na Yehowa mpi na Yezu mutindu mono vandaka kusala yo ntangu mono yantikaka kusadila Yehowa?’ (Matayo 24:14; 2 Timoteo 3:1; Baebreo 3:14) Kuyindula bangiufula yai ta sadisa beto na ‘kulanda kuditala’ mbote-mbote.

6. (a) Inki kele mutindu mosi kaka yina ta sadisa beto na kubaka luzingu ya mvula na mvula? (b) Inki mutindu nkuluntu mosi ke kudibongisaka sambu na Lusungiminu konso mvula, mpi nki mutindu nge lenda landa mbandu na yandi?

⁶ Mutindu ya nkaka ya mbote ya kudibongisa sambu na Lusungiminu kele kutanga mpi kuyindula mingi masolo yina ke monisaka mfunu ya Lusungiminu. (Tanga Yoane 3:16; 17:3.) Beto ta baka luzingu ya mvula na mvula kaka kana beto me zaba Yehowa mpi ke kwikila na Mwana na yandi, Yezu. Sambu na kudibongisa na Lusungiminu, beto lenda longuka masolo yina ta sadisa beto na kukwenda pene-pene na Yehowa ti Yezu. Nkuluntu mosi ya ntama ke salaka mpidina. Banda ntama, mwa bamposo na ntwala ya Lusungiminu, yandi ke tangaka masolo ya Nzozulu ya Nkengi yina ke tubilaka Lusungiminu mpi zola yina Yehowa ti Yezu me monisilaka beto. Yandi ke tangaka yo mbala na mbala mpi ke yindulaka na dikebi yonso mfunu ya Lusungiminu. Mbala mingi yandi ke yikaka disolo mosi to masolo zole ya mpa. Yandi ke tangaka mpi ke yindulaka mingi baverse ya Biblia ya beto ke tangaka na nsungi ya Lusungiminu. Nkuluntu yai ke tuba nde kusala mutindu yai ke sadisaka yandi na kulonguka mambu ya mpa konso mvula. Diambu ya kuluta mfunu kele nde malongi yai ke sadisaka yandi na kuzola Yehowa ti Yezu mingi. Kulonguka mutindu yai ta sadisa nge mpi na  kuzola Yehowa ti Yezu mingi. Nge ta kuma kutonda Yehowa ti Yezu mingi sambu na mambu yina bo me salaka mpi Lusungiminu ta natila nge mambote mingi.

7. (a) Na nima ya Madia ya Nkokila ya Mfumu, Yezu sambaka sambu na nki mambu? (b) Inki ke monisa nde Yehowa pesaka mvutu na kisambu ya Yezu?

⁷ Na nima ya Madia ya Nkokila ya Mfumu, Yezu salaka kisambu mosi ya mfunu. Yandi sambaka sambu na bumosi yina kele na kati na yandi ti Tata na yandi. Yandi lombaka Yehowa nde balongoki na yandi yonso mpi kuvanda na bumosi. (Tanga Yoane 17:20, 21.) Yehowa pesaka mvutu na kisambu yai ya Mwana na yandi. Kuluta balukutakanu yonso, Lusungiminu ke monisaka nde Bambangi ya Yehowa ke vandaka na bumosi. Na kilumbu ya Lusungiminu, bantu ya bansi mingi mpi ya bampusu ya kuswaswana ke vukanaka na ntoto ya mvimba mpi ke kwikilaka nde Yehowa tindaka Mwana na yandi. Na bisika ya nkaka, bantu ke sepelaka ve nde bantu ya bampusu ya kuswaswana kuvukana kisika mosi sambu na kusambila. Kansi Yehowa ti Yezu ke yindulaka ve mutindu yina. Bo ke waka kiese mingi mutindu beto ke vukanaka na Lusungiminu.

8. Inki mambu Yehowa songaka Ezekiele?

⁸ Beto bansadi ya Yehowa ke yitukaka ve sambu na bumosi yina kele na kati na beto. Yehowa tubilaka bumosi yai na nzila ya Ezekiele. Yandi songaka Ezekiele na kubaka bitini ya banti zole, kitini mosi “sambu na Yuda” mpi kitini ya nkaka “sambu na Yozefi” mpi kuvukisa yo sambu yo kuma nti mosi. (Tanga Ezekiele 37:15-17.) “Bangiufula ya Batangi” na Nzozulu ya Nkengi ya Yuli 2016 tendulaka nde: “Na nzila ya profete Ezekiele, Yehowa zabisaka na ntwala nde bansadi na yandi ta vutuka na Ntoto ya Lusilu, bo ta vukana mpi ta kuma diaka dikanda mosi. Mbikudulu yango monisaka mpi nde, na bilumbu ya nsuka, bantu ta sambila Nzambi na bumosi.”

9. Inki mutindu Lusungiminu ya konso mvula ke monisaka bumosi na beto yina Ezekiele tubilaka?

⁹ Banda 1919, Yehowa yantikaka kuyidika mambu malembe-malembe mpi kuvukisa diaka Bakristu yina bo me tulaka mafuta. Bo vandaka bonso kitini ya nti “sambu na Yuda.” Na nima, bantu mingi yina kele ti kivuvu ya kuzinga na ntoto vukanaka ti Bakristu yina bo me tulaka mafuta. Bantu yai kele bonso kitini ya nti “sambu na Yozefi.” Yehowa silaka nde yandi ta vukisa bitini ya banti yina zole sambu “yo kuma kaka kitini mosi ya nti.” (Ezekiele 37:19) Yandi me vukisaka Bakristu yina bo me tulaka mafuta ti “mameme ya nkaka” sambu bo kuma “kimvuka mosi.” (Yoane 10:16; Zekaria 8:23) Bubu yai, bimvuka yai zole ke sadilaka Yehowa na bumosi, na lutwadisu ya Ntotila mosi, Yezu Kristu, yina Nzambi ke bingaka na mukanda ya Ezekiele nde, “nsadi na mono Davidi.” (Ezekiele 37:24, 25) Konso mvula, ntangu beto ke vukanaka na Lusungiminu sambu na kuyibuka lufwa ya Yezu, beto ke monaka bumosi ya bimvuka yai zole, mutindu Ezekiele tubilaka yo na ntwala. Kansi konso muntu fwete sala nki sambu na kutanina bumosi na beto mpi kulanda kukumisa yo ngolo?

10. Inki beto fwete sala sambu na kukumisa ngolo bumosi na beto?

¹⁰ Inki kima ya ntete ta sadisa beto na kulanda kukumisa ngolo bumosi na beto? Kana beto ke sala bikesa sambu na kuvanda bantu ya kudikulumusa. Yezu songaka balongoki na yandi na kuvanda bantu ya kudikulumusa. (Matayo 23:12) Bantu mingi ke monaka nde bo kele mfunu mingi kuluta bantu ya nkaka. Kansi kana beto ke kudikulumusa, beto ta lemfukila bampangi yina ke twadisaka dibundu. Kana beto sala mpidina bumosi ta vandaka na dibundu. Diambu ya kuluta mfunu kele nde kana beto ke kudikulumusa,  beto ta pesa Nzambi kiese sambu yandi “kele mbeni ya bantu ya lulendo, kansi yandi ke monisaka ntima ya mbote ya nene na bantu ya kudikulumusa.”—1 Piere 5:5.

11. Inki mutindu kuyindula mampa mpi vinu yina beto ke sadilaka na Lusungiminu ta kumisa bumosi na beto ngolo?

¹¹ Inki kima ya zole ta sadisa beto na kulanda kukumisa ngolo bumosi na beto? Kana beto ke yindula mbote-mbote ntendula ya mampa mpi ya vinu. Beto fwete yindula mambu yai na ntwala ya Lusungiminu mpi na mpimpa ya Lusungiminu. (1 Bakorinto 11:23-25) Mampa ya kukonda levire ke monisa nitu ya kukuka ya Yezu, yina yandi pesaka sambu na beto. Vinu ya mbwaki ke monisa menga na yandi. Beto fwete suka ve kaka na kubakisa mambu yai. Beto fwete yibuka nde kimenga ya Yezu kele kidimbu ya kuluta nene ya zola yina Yehowa ti Yezu me monisaka. Yehowa pesaka Mwana na yandi sambu na beto mpi Yezu ndimaka kupesa luzingu na yandi sambu na beto. Kuyindula zola yai ya mingi ta pusa beto na kuzola Yehowa ti Yezu mingi. Zola yina beto yonso kele na yo sambu na Yehowa ke kumisaka ngolo bumosi na beto.

12. Inki mutindu kingana ya Yezu ya ntotila ti bampika ke monisa nde Yehowa ke zolaka nde beto lolula bantu ya nkaka?

¹² Inki kima ya tatu ta sadisa beto na kukumisa ngolo bumosi na beto? Kana beto ke lolula bampangi na ntima ya mvimba. Kana beto ke sala mpidina, Yehowa ta lolula mpi masumu na beto na nsadisa ya kimenga ya Yezu. Yezu monisaka mfunu ya kulolula bankaka na kingana mosi yina yandi pesaka, kingana ya ntotila ti bampika na yandi. Tanga Matayo 18:23-34 mpi kudiyula nde: ‘Keti mono kele ti luzolo ya kusadila malongi yai ya Yezu? Keti mono ke vandaka ntima-nda mpi ke zingaka mbote ti bampangi? Keti mono ke lolulaka bantu yina me sala mono mbi?’ Ya kieleka, sambu masumu ya nkaka kele nene kuluta ya nkaka, yo yina kukonda kukuka lenda sala nde bantangu ya nkaka beto kuka ve kulolula mbi yina bo me sala beto. Kansi kingana ya Yezu ke longa beto nde Yehowa ke zolaka nde beto lolula bantu yina ke sala beto mbi. (Tanga Matayo 18:35.) Yezu monisaka pwelele nde Yehowa ta lolula beto kaka kana beto ke lolula bankaka, mingi-mingi bayina ke balula ntima. Beto fwete yindula mingi dilongi yai. Sambu na kutanina  bumosi na beto mpi kulanda kukumisa yo ngolo, beto fwete lolula bankaka mutindu Yezu tubaka.

13. Inki mutindu kuzinga na ngemba ti bampangi ke kumisaka ngolo bumosi na beto?

¹³ Kana beto ke lolula bampangi, beto ta zinga na ngemba ti bo. Ntumwa Polo tubaka nde beto fwete sala bikesa sambu na kulanda kukumisa ngolo bumosi na beto mpi kuzinga na ngemba. (Baefezo 4:3) Yo yina na nsungi ya Lusungiminu, mingi-mingi na nkokila ya Lusungiminu, yindula mbote mutindu nge ke sadilaka bankaka mambu. Kudiyula nde: ‘Keti bantu ke zabaka nde mono ke bumbilaka ve bantu ya nkaka makasi? Keti bo ke bakisaka nde mono kele muntu ya ke tulaka ngemba?’ Beto fwete yindula mingi bangiufula yai ya mfunu.

14. Inki mutindu konso muntu fwete “kanga ntima na mambu ya muntu ya nkaka na zola”?

¹⁴ Inki kima ya iya ta sadisa beto na kukumisa ngolo bumosi na beto? Kana beto ke monisa zola bonso Yehowa. (1 Yoane 4:8) Beto fwete tuba ve nde, “Mono ta zolaka bampangi kansi mono fwete kangama ve ti bo.” Kana beto ke yindula mutindu yina, beto ke zitisa ve ndongisila yai ya Polo, “konso muntu kukanga ntima na mambu ya muntu ya nkaka na zola.” (Baefezo 4:2) Polo tubaka kaka ve nde beto fwete “kanga ntima na mambu ya muntu ya nkaka,” kansi yandi yikaka nde “na zola.” Yehowa me bendaka bantu ya mutindu na mutindu na dibundu na yandi. (Yoane 6:44) Yo kele pwelele nde yandi kele ti bikuma yina ke pusaka yandi na kuzola bo. Kana Yehowa ke zola bampangi na beto mpi ke baka bo na valere, keti beto fwete zola bo ve? Yehowa ke zolaka nde beto zola bampangi mutindu yandi ke zolaka bo.—1 Yoane 4:20, 21.

15. Inki mutindu beto me zaba nde Lusungiminu ya nsuka ta vanda?

¹⁵ Kilumbu kele, beto ta sala Lusungiminu ya nsuka. Inki mutindu beto me zaba yo? Polo songaka Bakristu yina bo me tulaka mafuta nde ntangu bo ke yibukaka lufwa ya Yezu konso mvula, bo ke landaka “kuzabisa lufwa ya Mfumu, tii kuna yandi ta kwisa.” (1 Bakorinto 11:26) Yezu mpi tubilaka ‘kukwisa’ na yandi na mbikudulu yina yandi tubaka sambu na bilumbu ya nsuka. Ntangu Yezu tubilaka mpasi ya nene yina ke kwisa, yandi tubaka nde: “Kidimbu ya Mwana ya muntu ta monana na zulu mpi makanda yonso ya ntoto ta kudibula na mawa, mpi bo ta mona Mwana ya muntu ke kwisa na zulu ya matuti ya zulu ti ngolo mpi nkembo ya nene. Ebuna yandi ta tinda bawanzio na yandi ti makelele ya mpungi ya nene, mpi bo ta vukisa bantu yina yandi me solaka katuka na mipepe iya, katuka na ndambu mosi ya zulu tii na ndambu na yo ya nkaka.” (Matayo 24:29-31) Yezu ta “vukisa bantu yina yandi me solaka” ntangu yandi ta nata na zulu Bakristu yonso yina bo me tulaka mafuta, yina kele ntete na ntoto. Yo ta salama na mpasi ya nene kansi na ntwala nde bitumba ya Armagedoni kuyantika. Na bitumba yina, Yezu ti Bakristu 144000 ta nwana ti bantotila ya ntoto mpi Yezu ti Bakristu yai ta nunga. (Kusonga 17:12-14) Lusungiminu yina beto ta sala na ntwala nde Yezu ‘kukwisa’ sambu na kuvukisa Bakristu yina bo me tulaka mafuta ta vanda Lusungiminu ya nsuka.

16. Sambu na nki nge fwete kwenda na Lusungiminu ya mvula yai?

¹⁶ Baka lukanu ya kukwenda na Lusungiminu yina ta salama na Marsi 31, 2018. Lomba Yehowa na kusadisa nge na kutanina bumosi ya bansadi na yandi. (Tanga Nkunga 133:1.) Kilumbu kele beto ta sala Lusungiminu ya nsuka. Mutindu beto ke vingila Lusungiminu yina, bika beto monisa nde beto ke bakaka na valere bumosi na beto yina ke monanaka konso mvula ntangu beto ke salaka Lusungiminu.