1. Inki kima ke salaka nde bantu kuluta bambisi?

YEHOWA me pesaka bantu kansansa, kima ya mfunu mingi. Kansansa ke salaka nde bantu kuluta bambisi. Inki ke ndimisa beto nde Adami ti Eva vandaka ti kansansa? Ntangu bo kolamaka na Nzambi, bo bumbanaka sambu kansansa yangisaka bo.

2. Inki mutindu kansansa na beto kele bonso busole? (Tala kifwanisu ya luyantiku ya disolo.)

² Kansansa ke sadisaka beto na kuzaba mambu ya mbote mpi ya mbi. Muntu yina ke longaka ve mbote kansansa na yandi kele bonso maswa yina kele ti busole ya kufwa. Mipepe mpi bitembo ya nzadi lenda nata maswa na ndambu mosi ya mbi. Kansi busole yina ke sala mbote ta sadisa muntu ya ke tambwisa maswa na kunata yo na ndambu ya mbote. Kiteso mosi mpi, kana beto ke longa mbote kansansa na beto, yo ta twadisa luzingu na beto mbote.

3. Inki lenda kumina beto kana beto ke longa ve mbote kansansa na beto?

³ Kana beto ke longa ve mbote kansansa na beto, yo ta kebisa beto ve ntangu beto ke zola kusala diambu ya mbi. (1 Timoteo  4:1, 2) Nkutu yo lenda pusa beto na kundima nde “mbi kele mbote.” (Yezaya 5:20) Yezu songaka balongoki na yandi nde: “Ntangu ke kwisa ntangu konso muntu yina ke fwa beno ta yindula nde yandi me sadila Nzambi kisalu ya santu.” (Yoane 16:2) Bantu ya fwaka longoki Etiene yindulaka mutindu yina. (Bisalu 6:8, 12; 7:54-60) Mabundu mingi me salaka mambu ya nku, mu mbandu kufwa bantu mpi kutuba nde bo salaka yo sambu na Nzambi. Kansi na kutuba ya masonga, mambu yina bo salaka fwaka bansiku ya Nzambi. (Kubasika 20:13) Ya kieleka, kansansa na bo me twadisaka bo ve mbote!

4. Inki lenda ndimisa beto nde kansansa na beto ke sala mbote kibeni?

⁴ Inki lenda ndimisa beto nde kansansa na beto ke sala mbote kibeni? Bansiku mpi minsiku ya Biblia kele “mfunu sambu na kulonga, sambu na kunganina, sambu na kusungika mambu, sambu na kupesa ndola na lunungu.” (2 Timoteo 3:16) Beto fwete longuka Biblia mbala na mbala, kuyindula mingi mambu yina beto ke longuka mpi kusadila yo na luzingu na beto. Mpidina, beto ta kuma kuyindula bonso Yehowa. Ebuna beto lenda ndima nde kansansa na beto ta twadisa beto mbote. Bika beto tadila mutindu beto lenda sadila bansiku mpi minsiku ya Yehowa sambu na kulonga kansansa na beto.

5, 6. Inki mutindu bansiku ya Nzambi ke sadisaka beto?

⁵ Katula kutanga mpi kuzaba bansiku ya Nzambi, beto fwete sala mambu ya nkaka sambu bansiku yango kusadisa beto. Beto fwete zola yo mpi kuzitisa yo. Biblia ke tuba nde: “Beno menga mambu ya mbi, mpi beno zola mambu ya mbote.” (Amosi 5:15) Kansi nki mutindu beto lenda sala yo? Beto fwete sala ngolo na kukuma kutadila mambu bonso Yehowa. Yindula nde nge ke lala ve mpongi mbote mpi munganga me pesa nge bandongisila na kudia madia ya mbote, na kusala bangalasisi mingi mpi na kusala bansoba ya nkaka na luzingu. Nge me zitisa bandongisila na yandi mpi nge me kuma kulala mpongi mbote! Nge ta sepela mingi na bandongisila ya munganga yina!

⁶ Mutindu mosi, Ngangi me pesaka beto bansiku sambu na kutanina beto na bampasi yina masumu ke nataka mpi sambu na kutomisa luzingu na beto. Mu mbandu, Biblia ke longaka nde beto fwete kusa ve, kuyiba ve, kusala ve pite, kusala ve mubulu to mambu yina kele ti kuwakana ti bademo. (Tanga Bingana 6:16-19; Kusonga 21:8) Ntangu beto ke monaka mambote yina kulemfukila Yehowa ke nataka, zola na beto sambu na yandi mpi bansiku na yandi ke kumaka ngolo.

7. Inki mutindu masolo ya Biblia ke sadisaka beto?

⁷ Beto fwete vingila ve nde beto kutana ti bampasi yina kufwa bansiku ya Nzambi ke nataka na ntwala ya kuzaba mambu ya mbote mpi ya mbi. Beto lenda baka malongi na bifu yina bantu ya nkaka me salaka. Bambandu yango kele na Biblia. Bingana 1:5 ke tuba nde: “Muntu ya mayele ke waka mpi ke bakaka malongi mingi.” Malongi yango ke katukaka na Nzambi mpi yo ke vandaka mfunu mingi! Mu mbandu, yindula bampasi yina kuminaka Davidi ntangu yandi kolamaka na Yehowa mpi salaka bizumba ti Bat-sheba. (2 Samuele 12:7-14) Ntangu nge ke tanga disolo yina, kudiyula nde: ‘Inki zolaka kusadisa Davidi na kutina bampasi yina? Kana yo vandaka mono, nki mono zolaka kusala? Keti mono zolaka kulanda mbandu ya Davidi to ya Yozefi?’ (Kuyantika 39:11-15) Kana beto ke yindula na dikebi  yonso bampasi yina disumu ke nataka, beto ta ‘mengaka mambu ya mbi.’

8, 9. (a) Kansansa na beto ke sadisaka beto na kusala nki? (b) Inki mutindu minsiku ya Yehowa ke sadisaka kansansa na beto?

⁸ Beto ke salaka bikesa ya kusala ve mambu yina Nzambi ke mengaka. Kansi nki beto fwete sala kana beto me kutana ti diambu yina ata nsiku mosi ve ya Biblia ke tubila pwelele? Inki mutindu beto ta zaba mambu yina Nzambi ke zolaka nde beto sala? Kana beto ke bika nde Biblia kulonga kansansa na beto, beto ta bakaka balukanu ya mbote.

⁹ Sambu Yehowa ke zolaka beto, yandi ke pesaka beto minsiku yina ke twadisaka kansansa na beto. Yandi ke tuba nde: “Mono, Yehowa, mono kele Nzambi na nge, Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula.” (Yezaya 48:17, 18) Kana beto ke yindula mingi minsiku ya Biblia mpi ke bika nde yo simba ntima na beto, beto ta sungika kansansa na beto mpi ta longa yo. Mpidina, beto ta kuma kubaka balukanu ya mbote.

10. Munsiku kele nki mpi nki mutindu Yezu sadilaka minsiku na malongi na yandi?

¹⁰ Munsiku kele kieleka yina ke sobaka ve yina ke twadisaka mabanza na beto mpi ke sadisaka beto na kubaka balukanu ya mbote. Kuzaba minsiku ya Yehowa ke sadisaka beto na kubakisa mutindu yandi ke yindulaka mpi bikuma yina yandi ke pesaka beto bansiku. Yezu sadilaka minsiku sambu na kulonga balongoki na yandi nde mambu ya beto ke yindulaka mpi ke salaka lenda natila beto mambote to bampasi. Mu mbandu, yandi longaka nde kuwa makasi ke pusaka na kusala mubulu mpi nde bangindu ya mansoni lenda pusa muntu na kusala pite. (Matayo 5:21, 22, 27, 28) Kana beto bika nde minsiku ya Yehowa kutwadisa beto, beto ta longa kansansa na beto mbote mpi beto ta baka balukanu yina ta pesa Nzambi lukumu.—1 Bakorinto 10:31.

11. Inki mutindu kansansa ya mpangi mosi lenda swaswana ti ya mpangi ya nkaka?

¹¹ Ata beto ke bikaka nde Biblia kulonga kansansa na beto, mutindu na beto ya kuyindula lenda swaswana na diambu mosi buna. Mu mbandu, kunwa malafu. Biblia ke buyisa ve kunwa malafu, kansi yo ke tubaka nde beto fwete nwa ve malafu mingi to kulawuka. (Bingana 20:1; 1 Timoteo 3:8) Kana Mukristu ke nwaka ve malafu mingi, keti yo ke tendula nde yandi kele ve ti mambu ya nkaka yina yandi lenda tadila? Ve. Ata kansansa na yandi ke pesa yandi nzila ya kunwa malafu, yandi fwete tadila mpi kansansa ya bantu ya nkaka.

12. Inki mutindu Baroma 14:21 lenda sadisa beto na kuzitisa kansansa ya bantu ya nkaka?

¹² Polo monisaka nde beto fwete zitisa kansansa ya bantu ya nkaka ntangu yandi sonikaka nde: “Yo kele mbote na kudia ve mbisi, na kunwa ve vinu, mpi na kusala ve konso kima yina ke budisa mpangi na nge sakuba.” (Baroma 14:21) Yo yina ata beto kele ti nswa ya kunwa malafu, beto ta kangama ve na nswa yina kana beto me zaba nde yo ke yangisa kansansa ya mpangi ya nkaka. Mbala ya nkaka mpangi mosi vandaka kunwa malafu mingi na ntwala ya kulonguka kieleka mpi me yambulaka yo. Beto fwete sala ve ata kima mosi yina ta pusa yandi na kuvutukila bifu na yandi ya ntama. (1 Bakorinto 6:9, 10) Kana nge bingisa mpangi ya mutindu yina na nzo na nge, keti nge ta pusa yandi na kunwa malafu, ata yandi ke buya kunwa? Ata fioti ve!

13. Inki mutindu Timoteo zitisaka kansansa ya bantu ya nkaka sambu na kusadisa bo na kundima nsangu ya mbote?

 ¹³ Ntangu Timoteo vandaka toko, yandi zabaka nde luyotisu vandaka mfunu mingi sambu na Bayuda yina yandi kwendaka kulonga, yo yina yandi ndimaka nde bo yotisa yandi ata yo vandaka mpasi kibeni. Bonso Polo, Timoteo zolaka ve kuyangisa kansansa ya bantu ya nkaka. (Bisalu 16:3; 1 Bakorinto 9:19-23) Keti nge ke ndimaka mpi kusala bibansa sambu na mambote ya bantu ya nkaka?

14, 15. (a) Inki mutindu beto lenda yela na kimpeve? (b) Inki mutindu Bakristu ya kuyela na kimpeve ke sadilaka bampangi ya nkaka mambu?

¹⁴ Beto yonso fwete suka ve kaka na “malongi ya ntete-ntete ya me tala Kristu” kansi beto fwete sala “ngolo sambu beto kuma bantu ya kuyela.” (Baebreo 6:1) Kuyela na kimpeve ke tendula kaka ve kusala bamvula mingi na dibundu. Yo ke lombaka bikesa sambu na kuyela na kimpeve. Beto fwete landa kuyela na nzayilu mpi na mayele ya kubakisa mambu. Yo yina beto fwete tangaka Biblia konso kilumbu. (Nkunga 1:1-3) Kana nge ke tanga Biblia mbala na mbala, nge ta bakisa mbote-mbote bansiku mpi minsiku ya Yehowa.

¹⁵ Inki kele nsiku ya kuluta mfunu sambu na Bakristu? Zola kele nsiku ya kuluta mfunu. Yezu songaka balongoki na yandi nde: “Na diambu yai, bantu yonso ta zaba nde beno kele balongoki na mono—kana beno ke zolana beno na beno.” (Yoane 13:35) Bo ke bingaka zola “nsiku ya kimfumu” mpi “kulungana ya nsiku.” (Yakobo 2:8; Baroma 13:10) Yo ke yitukisa beto ve na kumona nde zola kele mfunu mingi, sambu Biblia ke tubaka nde “Nzambi kele zola.” (1 Yoane 4:8) Zola ya Nzambi ke sukaka kaka ve na mawi. Yandi ke monisaka yo na bisalu. Yoane sonikaka nde: “Yina mutindu zola ya Nzambi monanaka sambu na beto, nde Nzambi tindaka Mwana na yandi mosi kaka ya kubutuka na nsi-ntoto sambu beto baka luzingu na nzila na yandi.” (1 Yoane 4:9) Kana beto ke monisa zola sambu na Yehowa, na Yezu, na bampangi mpi na bantu ya nkaka, beto ta monisa nde beto kele bantu ya kuyela na kimpeve.—Matayo 22:37-39.

16. Ntangu beto ke yelaka na kimpeve, sambu na nki beto ke bakaka na mbalu mingi minsiku ya Biblia?

¹⁶ Ntangu beto ke yelaka na kimpeve,  beto ke kumaka kuzola mingi minsiku ya Biblia. Sambu bansiku ke tadilaka kaka diambu mosi ya siki-siki kansi minsiku ke tadilaka mambu mingi ya kuswaswana. Mu mbandu, mwana ke bakisaka ve kigonsa ya kusala kinduku ti bantu ya mbi, yo yina bibuti ya mayele fwete tudila yandi bansiku sambu na kutanina yandi. (1 Bakorinto 15:33) Kansi kana mwana me yela na kimpeve, yandi ke longukaka mutindu ya kusadila minsiku ya Biblia. Minsiku yina ta sadisa yandi na kupona banduku ya mbote. (Tanga 1 Bakorinto 13:11; 14:20.) Kana beto ke sadila minsiku ya Biblia, kansansa na beto ta kuma kusala mbote. Beto ta bakisa pwelele luzolo ya Nzambi na konso diambu.

17. Sambu na nki beto lenda tuba nde beto kele ti bisadilu yonso yina lenda sadisa beto na kubaka balukanu ya mbote?

¹⁷ Beto kele ti bisadilu yonso yina lenda sadisa beto na kubaka balukanu yina ke sepedisaka Yehowa. Biblia kele ti bansiku mpi minsiku yina lenda sadisa beto na kukuma ya “kufwana kibeni sambu na konso kisalu ya mbote.” (2 Timoteo 3:16, 17) Minsiku ya Biblia ke sadisaka beto na kubakisa mabanza ya Yehowa. Kansi yo ke lombaka bikesa sambu na kuzwa yo. (Baefezo 5:17) Beto kele ti Index ya mikanda na beto, Mukanda ya Bansosa Sambu na Bambangi ya Yehowa, Watchtower Library, BIBLIOTHÈQUE EN LIGNE mpi application JW Library yina ke sadisaka beto. Kana beto ke sadila bisadilu yai, beto ta baka mambote na kulonguka na beto mosi mpi ya dibuta.

18. Inki mambote beto ta baka kana beto ke sadila bansiku mpi minsiku ya Yehowa?

¹⁸ Luzingu na beto ke tomaka kibeni ntangu beto ke sadilaka bansiku mpi minsiku ya Yehowa! Bankunga 119:97-100 ke tuba nde: “Mono ke zolaka nsiku na nge mingi! Mono ke yindululaka yo kilumbu ya mvimba. Ntuma na nge ke kumisa mono mayele kuluta bambeni na mono, sambu mono ke vandaka ti yo kimakulu. Mono kele ti mayele mingi ya kubakisa mambu mbote-mbote kuluta balongi na mono yonso, sambu mono ke yindululaka bangibusa na nge. Mono ke salaka mambu ti mayele ya kubakisa kuluta bambuta, sambu mono ke zitisaka bantuma na nge.” Kana beto ke yindula mingi bansiku mpi minsiku ya Nzambi, beto ta kuma ti mayele mpi nzayilu mingi. Diaka, kana beto ke sadila bansiku mpi minsiku na yandi sambu na kulonga kansansa na beto, “kuyela na beto ta kuma kibeni kiteso mosi ti kuyela ya Kristu.”—Baefezo 4:13.