1. Inki ke pesaka beto kiese?

BETO ke vandaka na kiese mingi ya kuwa nde bansadi ya Nzambi ke bikaka nde nsemo na bo kusema! Na mvula ya me luta, Bambangi ya Yehowa longukaka Biblia ti bantu kuluta 10 000 000. Bantu mingi yina ke sepelaka ti kieleka kwisaka na Lusungiminu mpi longukaka ntendula ya kimenga ya Yezu yina kele dikabu ya zola ya Yehowa.—1 Yoane 4:9.

2, 3. (a) Inki ke kangaka beto ve nzila ya kupela “bonso minda”? (b) Inki beto ta tadila na disolo yai?

² Na ntoto ya mvimba, Bambangi ya Yehowa ke tubaka bandinga mingi. Kansi yo ke kangaka ve dibuta ya bampangi ya ntoto ya mvimba nzila ya kupesa Yehowa nkembo. (Kusonga 7:9) Yo vanda beto ke tubaka nki ndinga to ke zingaka nki kisika, beto lenda pela “bonso minda na nsi-ntoto.”—Bafilipi 2:15.

³ Kisalu na beto ya kusamuna, bumosi na beto ya Bukristu mpi kikalulu na beto ya kulanda kukengila ke pesaka Yehowa lukumu. Inki mutindu beto lenda bika nde nsemo na beto kusema na mambu yai tatu?—Tanga Matayo 5:14-16.

4, 5. (a) Katula kisalu ya kusamuna, nki mutindu nsemo na beto lenda sema? (b) Kuvanda mawete ke nataka nki mambote? (Tala kifwanisu ya luyantiku ya disolo.)

⁴ Kusamuna mpi kukumisa bantu balongoki kele mutindu ya mbote ya kubika nde nsemo na beto kusema. (Matayo 28:19, 20) Disolo “Lumière dans les ténèbres” na Nzozulu ya Nkengi ya Yuni 1, 1925, tubaka nde na bilumbu ya nsuka, muntu mosi ve ta bikala ya kwikama na Mfumu kana yandi “bika ve nde nsemo na yandi kusema.” Yo yikaka nde: “Yandi fwete sala yo ntangu yandi ke zabisa bantu nsangu ya mbote mpi ntangu yandi ke zinga na kuwakana ti nsemo yango.” Katula kisalu ya kusamuna, bikalulu na beto ke pesaka Yehowa lukumu. Bantu mingi ke zabaka beto sambu beto ke samunaka. Ntangu beto ke sekisaka bo mpi ke pesaka bo mbote na kiese, yo ke sadisaka bo na kutuba mambu ya mbote sambu na beto mpi sambu na Nzambi ya beto ke sambilaka.

⁵ Yezu songaka balongoki na yandi nde: “Ntangu beno ke kota na nzo, beno pesa bantu ya nzo yina mbote.” (Matayo 10:12) Na babwala yina Yezu samunaka, bantu vandaka ti kikalulu ya kuyamba banzenza na banzo na bo. Na bisika mingi bubu yai, bantu ke sepelaka diaka ve kuyamba banzenza na banzo na bo. Mbala mingi bantu ke vandaka nsoni-nsoni to ke waka makasi kana munzenza me kwisa na nzo na bo. Kansi kana beto kele mawete, bo ta kudiwa mbote. Ntangu nge ke samunaka na kisika ya bantu mingi ti shario ya mikanda, keti nge me bakisaka ntete ve nde kana nge ke sekisa bantu mpi ke pesa bo mbote na mawete yonso, bo ke kudiwaka mbote na kupusana mpi kubaka mukanda? Nkutu bo lenda sepela kusolula ti nge!

6. Inki ke sadisaka mpangi mosi ya mununu ti nkento na yandi na kulanda kusamuna?

⁶ Mpangi mosi ya mununu ti nkento na yandi na Angleterre ke samunaka diaka ve nzo na nzo sambu bo me kumaka kubela. Bo ke tululaka mesa ya mikanda na ntwala ya lupangu na bo. Nzo na bo kele pene-pene ya ekole mosi, yo yina bo ke tulaka mikanda yina ta benda dikebi ya bibuti yina ke kwisaka kubaka bana na bo na ekole. Bibuti ya nkaka ke bakaka mikanda, mu mbandu Les jeunes s’interrogent. Réponses pratiques, Volime 1 mpi 2. Mbala mingi mpangi-nkento mosi ya mupasudi-nzila ke samunaka ti bo. Bibuti yina me bakisaka nde mpangi-nkento ke vandaka mawete mpi bampangi yai ya minunu ke zolaka mpenza kusadisa bantu ya nkaka. Nkutu kibuti mosi me yantikaka kulonguka Biblia.

7. Inki mutindu nge lenda sadisa banzenza yina kele na insi na beno?

⁷ Ntama mingi ve, bantu mingi tinaka bansi na bo mpi me kumaka kuzinga na bansi ya nkaka. Inki nge lenda sala sambu na kusadisa banzenza yina ke zingaka na insi na beno na kulonguka Biblia? Ya ntete, nge lenda longuka mutindu ya kupesa mbote na ndinga na bo. Diaka, kana nge ke sadila application JW Language, nge lenda longuka mwa bangogo yina ta pusa bo na kutelema mpi kusepela kusolula ti nge. Ya zole, nge lenda songa bo bavideo ti mikanda yina kele na jw.org na ndinga na bo.—Kulonga 10:19.

8, 9. (a) Inki mutindu Lukutakanu Luzingu mpi Kisalu ke sadisaka beto? (b) Inki mutindu bibuti lenda sadisa bana na kutomisa mutindu ya kupesa bamvutu na balukutakanu?

⁸ Yehowa ke pesaka beto kibeni bisadilu yina beto kele na yo mfunu sambu beto samuna  mbote. Mu mbandu, mambu yina beto ke longukaka na Lukutakanu Luzingu mpi Kisalu ke sadisaka beto na kudibongisa mbote sambu na kusala mvutukilu ya mpa mpi kuyantika kulonguka Biblia ti bantu.

⁹ Ntangu bantu ya mpa ke kwisaka na balukutakanu, mbala mingi bo ke yitukaka ntangu bo ke monaka bana ke pesa bamvutu. Nge lenda longa bana na nge na kupesa bamvutu na bangogo na bo mosi. Bantu ya nkaka me longukaka kieleka sambu bo waka bana ke tubila balukwikilu na bo na mutindu ya pete mpi ya masonga.—1 Bakorinto 14:25.

10. Inki mutindu lusambu ya dibuta lenda sadisa mabuta na kuvanda na bumosi?

¹⁰ Ntangu beto ke salaka ngolo na kusadisa dibuta na beto na kusala kumosi mpi na ngemba, beto ke pesaka Yehowa lukumu. Mu mbandu, kana nge kele kibuti, kudibongisa sambu na kusala Lusambu ya Dibuta mbala na mbala. Mabuta mingi ke talaka kumosi JW Télédiffusion mpi na nima bo ke tubilaka mutindu bo lenda sadila malongi yango. Kuvila ve nde lutwadisu yina mwana-fioti kele na yo mfunu me swaswana ti ya toko. Sala ngolo sambu na kusadisa konso muntu na kati ya dibuta na kubaka mpenza mambote ya lusambu ya dibuta.—Nkunga 148:12, 13.

11-13. Inki mutindu beto lenda sadisa dibundu na beto na kuvanda na bumosi?

¹¹ Ata nge kele leke, nge lenda sadisa konso muntu na kudimona nde yandi kele mfunu na dibundu. Mutindu mosi ya kusala yo kele kusala kinduku ti bampangi yina kele bambuta. Yula bo mambu yina me sadisaka bo na kulanda kusadila Yehowa bamvula mingi. Bo lenda longa nge malongi ya mfunu mingi kuluta. Yo ta siamisa nge ti bo mpi! Beto yonso, baleke to bambuta, lenda yamba bantu ya mpa yina ke kwisaka na Nzo ya Kimfumu. Nge lenda pesa bo mbote, kusekisa bo, kupesa bo bisika ya kuvanda mpi kusonga bo na bampangi ya nkaka. Sadisa bo na kudiwa mbote.

¹² Kana nge ke twadisa balukutakanu ya kisalu ya bilanga, nge lenda sadisa bambuta na kulanda kubika nde nsemo na bo  kusema. Pesa bo teritware ya mbote. Pona baleke yina lenda samuna ti bo. Mbala mingi, bampangi ya minunu mpi bayina ke belaka ke lembaka nitu sambu bo ke kukaka diaka ve kusamuna mingi. Kansi bo ta kudiwa mbote kana bo zaba nde nge ke tudila bo dikebi mpi ke bakisa mambu na bo. Ata bo kele bambuta to me salaka bamvula mingi na dibundu, kikalulu na nge ya mawete lenda siamisa bo na kulanda kusamuna ti kikesa.—Levi 19:32.

¹³ Bantu ya Izraele vandaka na kiese ya kusambila Yehowa na bumosi. Muyimbi-bankunga sonikaka nde: “Yo kele mbote kibeni mpi kiese mingi nde bampangi kuzinga kumosi na bumosi!” (Tanga Nkunga 133:1, 2.) Yandi fwanisaka bumosi yina ti mafuta ya bo ke tulaka muntu, yina ke kumisaka mpusu mbote mpi ke basisaka nsudi ya kitoko. Mutindu mosi, beto lenda pesa bampangi kikesa kana beto ke zinga mbote ti bo mpi beto kele mawete. Yo ke sadisaka dibundu na kuvanda na bumosi. Keti nge lenda sala bikesa ya kuzaba mbote bampangi ya dibundu na beno?—2 Bakorinto 6:11-13, noti na nsi ya lutiti.

14. Inki mutindu nsemo na nge lenda sema kisika yina nge ke zingaka?

¹⁴ Nsemo na nge lenda sema konso kisika yina nge kele. Kana nge kele ntima-mbote, yo lenda sadisa bantu ya ke zingaka pene-pene na nge na kulonguka mambu ya Yehowa. Kudiyula nde: ‘Inki bantu ke yindulaka sambu na mono? Keti nzo na mono kele ya kuyidika mbote mpi bunkete? Keti kisika yina lupangu na mono kele ke vandaka bunkete? Keti mono ke sadisaka bantu?’ Yula bampangi ya nkaka mutindu ntima-mbote mpi mbandu na bo ya mbote me sadisaka bampangi na bo, bantu ya ke zingaka pene-pene na bo, banduku na bo ya kisalu to ya nzo-nkanda.—Baefezo 5:9.

15. Sambu na nki beto fwete landa kukengila?

¹⁵ Kana beto ke zola nde nsemo na beto kusema ngolo, beto fwete zaba mbote nsungi yai ya beto ke zinga. Mbala mingi, Yezu songaka balongoki na yandi nde: “Beno landa kukengila.” (Matayo 24:42; 25:13; 26:41) Kana beto ke yindula nde “mpasi ya nene” me finama ntete ve, beto ta vanda ve ya kuyilama na kusadisa bantu ya nkaka na kuzaba Yehowa. (Matayo 24:21) Na kisika nde nsemo na beto kusema ngolo, yo ta kita malembe-malembe mpi nkutu yo lenda fwa.

16, 17. Inki nge lenda sala sambu na kulanda kukengila na kimpeve?

¹⁶ Bubu yai beto fwete landa kukengila mingi kuluta. Mambu ya nsi-ntoto ke landa kaka kubeba. Ata mpidina, beto me zaba nde nsuka ta kwisa na ntangu yina Yehowa me tulaka. (Matayo 24:42-44) Na ntwala nde yo salama, beto fwete vanda ntima-nda mpi kutula dikebi na bilumbu ke kwisa. Tangaka Biblia konso kilumbu mpi landa na kusamba Yehowa. (1 Piere 4:7) Landa mbandu ya bampangi yina me sadilaka Yehowa bamvula mingi. Mu mbandu, nge lenda tanga disolo ya mpangi yina kele na Nzozulu ya Nkengi ya Kifalansa ya Aprili 15, 2012, balutiti 18-21 na ntu-diambu, Cramponné depuis 70 ans au pan du vêtement d’un Juif.

¹⁷ Kudipesa mingi na kisalu ya Yehowa. Sadila bantu ya nkaka mambu na mawete mpi lutisaka ntangu ti bampangi. Mpidina, nge ta vanda na kiese mpi nge ta mona nde ntangu ke kwenda nswalu. (Baefezo 5:16) Bansadi ya Yehowa salaka mambu mingi na bamvula me luta. Bubu yai, beto ke sala ngolo mingi kuluta. Bisalu ya Yehowa ke yela na mutindu ya kuyituka. Nsemo na beto ke sema ngolo kibeni!

18, 19. Inki mutindu bankuluntu lenda sadisa beto na kusadila Yehowa na kikesa? Pesa mbandu.

 ¹⁸ Ata beto ke salaka bifu mingi, Yehowa ke ndimaka nde beto sadila yandi. Sambu na kusadisa beto, yandi me pesaka beto ‘makabu ya bantu,’ disongidila bankuluntu. (Tanga Baefezo 4:8, 11, 12.) Yo yina kana bankuluntu me kwisa kutala nge, baka mambote na ntangu yina nge ke lutisa ti bo sambu mayele mpi bandongisila na bo kusadisa nge.

¹⁹ Mu mbandu, mpangi mosi ti nkento na yandi na Angleterre kutanaka ti mwa bampasi na makwela mpi bo lombaka lusadisu na bankuluntu zole. Nkento vandaka kutuba nde bakala na yandi vandaka kutwadisa ve mbote dibuta na bo na mambu ya kimpeve. Bakala tubaka nde yandi ke longaka ve mbote mpi ndimaka nde yandi vandaka ve kudibongisa sambu na kusala lusambu ya dibuta mbala na mbala. Bankuluntu sadisaka bankwelani yai na kuyibuka mbandu ya Yezu. Bo siamisaka bakala na kulanda mutindu Yezu vandaka kutudila balongoki na yandi dikebi. Bo siamisaka nkento na kumonisila bakala na yandi ntima-nda. Bo pesaka bo mpi mwa bandongisila na mutindu bo lenda sala lusambu ya dibuta ti bana na bo zole. (Baefezo 5:21-29) Bakala salaka bikesa sambu na kukuma mfumu ya mbote ya dibuta. Bankuluntu siamisaka yandi na kuyambula ve kansi na kulanda kutula ntima na mpeve ya Yehowa. Zola mpi ntima ya mbote yina bankuluntu monisaka sadisaka kibeni dibuta yai!

20. Inki mambote nge ta baka kana nge bika nde nsemo na nge kusema?

²⁰ Biblia ke tuba nde: “Kiese na konso muntu yina ke waka Yehowa boma, yina ke tambulaka na banzila na yandi.” (Nkunga 128:1) Nge ta vanda na kiese kana nge ke bika nde nsemo na nge kusema. Yo yina longa bantu mambu ya Nzambi, sala ngolo sambu na kusadisa dibuta na nge ti dibundu na kuvanda na bumosi mpi landa na kukengila. Mbandu na nge ya mbote ta sadisa bantu ya nkaka na kupesa nkembo na Tata na beto, Yehowa.—Matayo 5:16.