Keti nge tangaka na dikebi yonso banimero ya Nzozulu ya Nkengi ya me katuka kubasika? Meka kupesa mvutu na bangiufula yai:

Inki mambu iya beto lenda sala sambu na kutomisa mutindu na beto ya kuyimba?

Beto fwete telama mbote kibeni mpi kusimba mbote mukanda na beto ya bankunga. Beto fwete benda mpenza mpema. Kukangula mpenza munoko mpi kuyimba na ndinga ya ngolo.—w17.11, lut. 5.

Sambu na nki bisika yina bambanza ya lutaninu vandaka mpi banzila na yo ke yitukisa beto kibeni?

Bambanza ya lutaninu vandaka sambanu mpi bo yidikaka mbote banzila na yo. Yo yina, muntu ya ke sosa lutaninu lenda kwenda nswalu mpi kukonda mpasi.—w17.11, lut. 14.

Sambu na nki dikabu ya nkudulu yina Nzambi pesaka me luta makabu yonso?

Yo me pesaka beto dibaku ya kuzinga mpi me katulaka beto na disumu mpi lufwa. Sambu Nzambi ke zolaka mingi bana ya Adami, yandi tambikaka luzingu ya Yezu sambu na kukatula beto na disumu.—wp17.6, balut. 6-7.

Inki mutindu Nkunga 118:22 tubilaka na ntwala lufutumuku ya Yezu?

Bantu buyaka nde Yezu kele ve Mesia mpi bo fwaka yandi. Yo yina yo lombaka nde yandi futumuka sambu yandi kuma “ditadi ya kinkonko ya ntete-ntete.”—w17.12, balut. 9-10.

Keti Mesia basikaka kaka na ndonga ya bana-ntete ya dikanda ya Izraele?

Bantangu ya nkaka dibaku yango vandaka na bana-ntete, kansi bantu ya nkaka ya bakaka dibaku yina vandaka ve bana-ntete. Davidi vandaka ve mwana ya ntete ya Yese; kansi, Mesia butukaka na ndonga ya bana ya Davidi.—w17.12, balut. 14-15.

Inki minsiku ya nkaka ya lusansu Biblia ke tubilaka?

Nsiku ya Moize vandaka kulomba bantu yina kele ti bimbefo ya nkaka na kuvanda na kingenga. Yo lombaka nde bantu kuyobila na nima ya kusimba mvumbi. Nsiku lombaka bantu na kuzika mbote mvindu na bo. Nsiku lombaka na kuyotisa babebe na kilumbu ya nana na nima ya kubutuka, yo vandaka mbote sambu na ntangu yina menga ya babebe ke kumaka ti ngolo ya kukangama nswalu.—wp18.1, lut. 7.

Sambu na nki yo kele mbote nde Mukristu kuzola nitu na yandi mosi?

Biblia ke tuba nde beto fwete zola nkweno na beto bonso beto mosi. (Mar. 12:31) Babakala fwete “zola bankento na bo . . . , bonso nitu na bo mosi.” (Baef. 5:28) Kansi, zola sambu na beto mosi lenda vanda mpi kigonsa.—w18.01, lut. 23.

Inki beto fwete sala sambu na kuyela na kimpeve?

Beto fwete longuka Ndinga ya Nzambi, kuyindula mambu yina beto ke longuka mpi kusadila yo na luzingu na beto. Beto fwete ndima mpi nde mpeve santu kutwadisa beto mpi kundima na kiese yonso lusadisu ya bampangi ya nkaka.—w18.02, lut. 26.

Sambu na nki bantu ya astrolozi mpi bantu yina ke zabisaka mambu yina ta salama me fwana mpenza ve na kusonga bantu mambu yina ta salama na bilumbu ke kwisa?

Bikuma kele mingi, kansi kikuma ya ntete kele nde Biblia ke mengaka mambu yai zole.—wp18.2, balut. 4-5.

Inki beto fwete sala kana bo me bingisa beto na kudia na nzo ya muntu mpi beto me ndima?

Kana beto me ndima, beto fwete sala yonso sambu na kulungisa lusilu na beto. (Nk. 15:4) Beto fwete soba ve na nima sambu na bikuma ya mpamba-mpamba. Ziku muntu yina me bingisa beto me sala bikesa na kulamba sambu na kuyamba beto.—w18.03, lut. 18.

Inki malongi bampangi yina kele ti mikumba lenda baka na mbandu ya Timoteo?

Timoteo vandaka kuzola kibeni bantu, yandi vandaka mpi kutula mambu ya kimpeve na kisika ya ntete. Yandi vandaka kudipesa mingi na kisalu ya santu mpi vandaka kusadila mambu yina yandi vandaka kulonguka. Yandi landaka kulonguka yandi mosi mpi yandi vandaka kutula ntima na mpeve ya Yehowa. Bankuluntu mpi bansadi ya kisalu lenda landa mbandu na yandi.—w18.04, balut. 13-14.