“Kana beno lomba kima mosi na Tata, yandi ta pesa beno yo na zina na mono.”—Yoane 16:23.

Ya kieleka, mambu yina Yezu tubaka ke monisa pwelele nde Yehowa ke zola nde beto samba yandi ve na nzila ya bifwanisu, ya basantu, ya bawanzio to ya bantu yina me fwaka, kansi yandi ke zola nde beto samba yandi na zina ya Yezu Kristu. Kana beto ke samba Nzambi na zina ya Yezu, yo ta monisa nde beto ke bakisa nde Nzambi ke waka bisambu na beto sambu na mambu yina Yezu salaka sambu na beto. Yezu tubaka nde: “Ata muntu mosi ve ke kwisaka na Tata kana yandi kwisa ve na nzila na mono.”—Yoane 14:6.

“Beno kangula bantima na beno na ntwala na yandi.”—Nkunga 62:8.

Ntangu beto ke samba Yehowa, beto fwete tuba bonso beto ke tuba ti tata mosi ya zola. Na kisika ya kutanga bisambu na mukanda mosi buna to ya kuvutukila bisambu yina beto me kangaka na ntu, beto fwete tubila yandi na luzitu yonso mambu yina ke katuka na ntima.

“Konso kima yina beto ke lomba na kuwakana ti luzolo na yandi, yandi ke waka beto.”—1 Yoane 5:14.

Yehowa ke songaka beto na Biblia mambu yina yandi ta sadila beto mpi yina yandi ke zola nde beto sadila yandi. Sambu Nzambi kundima bisambu na beto, beto fwete samba “na kuwaka ti luzolo na yandi.” Sambu na kusala yo, beto fwete longuka Biblia sambu na kuzaba yandi mbote. Kana beto sala mutindu yai, Nzambi ta sepela ti bisambu na beto.

Samba Sambu na Bima Yina Nge Kele ti Yo Mfunu. Beto lenda samba Nzambi sambu na bima yina beto ke vandaka ti yo mfunu konso kilumbu. Mu mbandu, madia, bilele mpi nzo. Beto lenda samba mpi Nzambi sambu yandi pesa beto mayele ya kubaka balukanu ya mbote mpi ngolo ya kukanga ntima na bampasi. Beto lenda samba Nzambi na kupesa beto lukwikilu, na kulolula beto mpi na kusadisa beto.—Luka 11:3, 4, 13; Yakobo 1:5, 17.

Samba Sambu na Bantu ya Nkaka. Bibuti yina ke zolaka bana na bo ke vandaka na kiese ntangu bana ke monisilanaka zola. Beto kele bana ya Yehowa, yo yina yandi ke zolaka mpi nde beto tudila bantu ya nkaka dikebi mpi beto zola bo. Yo kele mbote na kusamba sambu na nkwelani na beto, bana na beto, dibuta na beto mpi banduku na beto. Longoki Yakobo sonikaka nde: “Beno samba sambu na bankaka.”—Yakobo 5:6.

Pesa Mersi. Biblia ke tuba sambu na Ngangi na beto nde: “Yandi salaka mambu ya mbote mutindu yandi ke pesaka beno mvula mpi bansungi yina bambuma ke basikaka mingi, ebuna yandi ke pesaka beno madia mingi mpi ke fulusaka bantima na beno na kiese.” (Bisalu 14:17) Kana beto yindula mambu yonso yina Nzambi me salaka sambu na beto, yo ta pusa beto na kupesa yandi mersi ntangu beto ke samba. Ya kieleka, beto fwete lemfukila Nzambi sambu na kumonisa ntonda na beto.—Bakolosai 3:15.

Bantangu ya nkaka, beto lenda lemba nitu sambu beto me baka ve mvutu nswalu na bisambu ya masonga yina beto salaka. Keti yo ke tendula nde Nzambi ke kudiyangisaka ve sambu na beto? Ve. Beto tadila bambandu yina ke monisa nde beto fwete landa kusamba.

Steve yina beto tubilaka na disolo ya ntete, ke tuba nde: “Kana mono landaka ve kusamba, mono zolaka kuvidisa kivuvu ya kuvanda diaka na kiese.” Inki sadisaka yandi? Yandi yantikaka kulonguka Biblia mpi yandi bakisaka mfunu ya kisambu mpi ya kulanda kusamba. Yandi ke tuba diaka nde: “Mono ke pesaka Nzambi mersi sambu na lusadisu ya zola yina banduku na mono pesaka mono. Bubu yai mono ke vandaka na kiese mingi.”

Inki beto lenda tuba sambu na Jenny yina kudiwaka bonso nde Nzambi vandaka ve kuwa bisambu na yandi? Yandi ke tuba nde: “Ntangu mono vandaka kudimona nde mono kele ve mfunu, mono lombaka Nzambi na kusadisa mono na kuzaba sambu na nki mono vandaka kumona nde mono kele ve mfunu.” Inki mutindu kisambu sadisaka yandi? Yandi ke tuba diaka nde: “Kusolula ti Nzambi me sadisaka mono na kuditadila mutindu Nzambi ke tadilaka mono, na kumona nde ata ntima na mono ke bedisa mono, Nzambi ke bedisaka mono ve. Yo me sadisaka mono mpi na kuyambula ve.” Yo natilaka yandi nki mambote? Yandi ke tuba nde: “Kisambu me sadisaka mono na kumona nde Yehowa kele muntu ya kieleka, ya zola, Nzambi yina ke kudiyangisaka sambu na mono, Tata mpi Nduku yina ke vandaka ntangu yonso ya kuyilama na kusadisa mono kana mono ke sala yonso na kulanda kusala mambu yina yandi ke zolaka.”

Beto tadila mpi mbandu ya Isabel. Ntangu yandi bakaka divumu, minganga songaka yandi nde mwana na yandi ta butuka ti kifu mosi ya ngolo na nitu. Yandi kudiyangisaka mingi. Bantu ya nkaka songaka yandi na kubasisa divumu. Yandi ke tuba nde: “Mono monaka bonso nde bampasi yonso yina vandaka na ntima na mono zolaka kunatila mono lufwa.” Inki yandi salaka? Yandi ke tuba diaka nde: “Mono vandaka kusamba Nzambi mbala mingi sambu yandi sadisa mono.” Na nima, yandi butaka mwana ya bakala na zina ya Gerard mpi mwana yango vandaka ti kifu na nitu. Keti Isabel monaka nde Nzambi pesaka mvutu na bisambu na yandi? Ee! Na nki mutindu? Yandi ke tuba nde: “Ntangu mono ke talaka mwana na mono ya bakala yina me lungisa bamvula 14 bubu yai ke sepela ti luzingu ata yandi kele ti kifu na nitu, mono ke bakisaka nde yandi kele mvutu na bisambu na mono mpi lusakumunu ya kuluta nene yina Yehowa Nzambi me pesaka mono.”

Mambu ya masonga yina bampangi yai me tuba ke sadisa beto na kuyindula mambu yai ya muyimbi bankunga tubaka nde: “Nge ta wa diambu yina bantu ya kudikulumusa ke lomba, O Yehowa. Nge ta kumisa ntima na bo ngolo mpi nge ta tudila bo dikebi ya mingi.” (Nkunga 10:17) Yai kele kibeni bikuma ya mbote ya ke sadisa beto na kulanda kusamba Nzambi.

Biblia kele ti bisambu mingi yina Yezu salaka. Kansi kisambu mosi ya me zabanaka mingi kele kisambu yina yandi longaka balongoki na yandi. Inki mambu beto lenda longuka na kisambu yango?