Nzambi Ke Kudiyangisaka Sambu na Nge
BIBLIA me fuluka ti bandongisila ya kuluta mbote sambu yo kele mukanda ya me katuka na Nzambi. Yo kele ve mukanda ya minganga kansi yo lenda sadisa beto kana beto kele ti basusi ya mingi, kana beto ke kuka ve kuyindula mbote, beto kele mawa-mawa, beto ke kudiwa ve mbote to ke niokwama na mabanza.
Kima ya kuluta mfunu, Biblia ke ndimisa beto nde Muntu ya Salaka Beto Yehowa Nzambi, a ke bakisaka mbote bangindu na beto mpi mutindu beto ke kudiwaka kuluta bantu ya nkaka. Yandi kele ya kuyilama sambu na kusadisa beto na kununga mambu yonso ya mpasi yina beto ke kutana ti yo. Mu mbandu beto tadila baverse yai zole ya Biblia ya ke pesa kikesa:
“Yehowa kele pene-pene ya bantu yina kele na mawa; yandi ke gulusaka bantu yina ke niokwama na mabanza.”—NKUNGA 34:18.
“Sambu mono Yehowa Nzambi na nge, mono ke simba ngolo diboko na nge ya kitata, mono Muntu ke tubila nge nde, ‘Kuwa boma ve. Mono ta sadisa nge.’”—YEZAYA 41:13.
Inki mutindu Yehowa ke sadisaka beto na kunwana ti maladi ya kuniokwama na mabanza? Mutindu nge ta mona yo na masolo ya ke landa, Yehowa ke monisaka nde yandi ke sadisaka beto na mitindu mingi.
a Yehowa kele zina ya Nzambi.—Nkunga 83:18.
