Kisalu ya kulonga nsangu ya mbote ya Kimfumu ya Nzambi ke na kusalama na ntoto ya mvimba, kaka mutindu Yezu tubaka. (Matayo 24:14) Mukanda ya Daniele ke songa beto nde Kimfumu yango kele luyalu yina Nzambi ke twadisa. Kapu 2 ya mukanda yai ke tubila mbikudulu mosi ya ke monisa kulandana ya baluyalu to bimfumu ya bantu, banda na Babilone ya ntama tii na bilumbu na beto. Ntangu yo ke tubila mambu yina ta salama, verse 44 ke tuba nde:

“Nzambi ya zulu ta tula kimfumu mosi yina ta fwa ve ata fioti. Kimfumu yina ta kwenda ve na bantu ya nkaka. Yo ta bedisa mpi ta sukisa bimfumu yina yonso, mpi yo mpamba ta bikala kimakulu.”

Mbikudulu yai mpi bambikudulu ya nkaka ya Biblia ke monisa nde Kimfumu ya Nzambi ta yinga bimfumu yonso ya bantu mpi ta nata lutaninu mpi ta tula mambu ya bantu na ndonga na ntoto. Luzingu ta vanda nki mutindu na nsi ya luyalu ya Kimfumu ya Nzambi? Tala mwa balusilu ya kiese yina ta lungana ntama mingi ve.

• BITUMBA TA VANDA DIAKA VE

  Nkunga 46:9 ke tuba nde: “[Nzambi] ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; yandi ke yoka bapusu-pusu ya basoda na tiya.”

  Yindula mutindu nsi-ntoto ta vanda kana bo baka mayele mpi mbongo yonso yina bo ke sadilaka bubu yai sambu na kusala minduki mpi kusadila yo sambu na kusala mambu yina ke natila bantu mambote kansi ve sambu na kufwa bo! Lusilu yai ta lungana na nsi ya luyalu ya Kimfumu ya Nzambi.

• MALADI TA VANDA DIAKA VE

  Yezaya 33:24 ke tuba nde: “Ata muntu mosi ve ya ke zingaka na insi ta tuba nde: ‘Mono ke bela.’”

  Yindula nsi-ntoto yina ata muntu mosi ve ta bela maladi ya ntima, kansere, malaria, to konso maladi ya nkaka. Beto ta vanda diaka ve na mfunu ya balupitalu mpi bankisi. Bantu yonso ta vanda ti mavimpi ya kukuka na bilumbu ke kwisa.

• NZALA TA VANDA DIAKA VE

  Nkunga 72:16 ke tuba nde: “Mbuma ta vanda mingi kibeni na ntoto; yo ta fuluka na nsongi ya bangumba.”

  Ntoto ta basisa madia mingi sambu na bantu yonso mpi bantu yonso ta vanda ti madia mingi. Nzala mpi kukonda madia ta vanda diaka ve.

• MPASI, MAWA, MPI LUFWA TA VANDA DIAKA VE

  Kusonga 21:4 ke tuba nde: “[Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”

   Bantu ta zinga kukonda nsuka ti nitu ya kukuka na paladisu awa na ntoto! Yai mambu yina Yehowa Nzambi mpi Ngangi na beto ya zola me silaka beto.

Keti mambu yai kele kaka ndosi? Ata bantu mingi ke ndimaka nde luzingu yina Biblia ke sila mpi ke tubila kele kibeni kitoko, kansi sambu na bikuma mingi, bantu ya nkaka ke ndimaka ve nde bantu ta zinga mvula na mvula. Yo ke yitukisa ve sambu ata muntu mosi ve bubu yai me zingaka dezia luzingu ya mutindu yai sambu na kusonga beto mutindu yo ke vandaka.

Banda ntama, bantu ke vandaka na kimpika ya masumu mpi ya lufwa mpi bo ke kutanaka ti mambu ya mpasi, yo yina bantu mingi ke monaka nde luzingu ke vandaka kaka mutindu yai. Kansi, yo me swaswana kibeni ti lukanu yina Yehowa Nzambi mpi Ngangi na beto vandaka na yo sambu na bantu.

Sambu na kundimisa beto nde mambu yonso yina yandi me silaka ta lungana, Nzambi tubaka kibeni sambu na ndinga na yandi nde: “Yo ta vutuka ve na mono kana yo buta ve mbuma, kansi yo ta lungisa kibeni konso kima yina kele kiese na mono, mpi yo ta nunga kibeni na mambu yina mono me tinda yo na kusala.”—Yezaya 55:11.

Biblia ke tubaka nde Yehowa kele Nzambi “yina lenda kusa ve.” (Tito 1:2) Sambu yandi me silaka beto mambu yai yonso ya kitoko sambu na bilumbu ke kwisa, yo ta vanda mbote nde beto kudiyula nde: Keti ya kieleka bantu ta zinga mvula na mvula na Paladisu yina Nzambi me silaka beto awa na ntoto? Inki beto fwete sala sambu na kubakila lusilu yai ya Nzambi mambote? Na balutiti yina ke landa, beto ta tubila mambu ya mfunu yina ta pesa bamvutu na bangiufula yai.