KANA muntu mosi ya nge ke zolaka me fwa, ziku nge lenda wa bampasi mingi, mu mbandu mawa, kumona nde nge kele nge mosi, mpi kuvanda ve ti ngolo. Mbala ya nkaka nge lenda wa mpi makasi, kudiyangisa, mpi kuwa boma. Nge lenda nkutu kudiyula kana luzingu kele na mfunu.

Kuyindula ve nde yo kele mbi na kuwa mawa. Kuwa mawa ke monisaka nde nge vandaka kuzola mingi muntu yina me fwa. Keti nge lenda baka kikesa ntangu nge kele na mawa?

Ata nge lenda yindula nde mpasi na nge ta mana ve, nge lenda baka kikesa kana nge sadila bandongisila yai:

WA MAWA NTANGU NGE KELE NA MFUNU YA KUSALA YO

Bantu yonso ve ke waka mawa mutindu mosi to na nsungi ya ntangu ya mutindu mosi. Kansi, kudila lenda pesa mwa kikesa. Vanessa, yina beto me tubila na luyantiku, ke tuba nde: “Mono vandaka kuzola kaka kudila; mono vandaka na mfunu ya kukatula mpasi.” Sofía, yina mpangi na yandi ya nkento fwaka na kintulumukina, ke tuba nde: “Mono ke waka mpasi kibeni kana mono yindula mambu yina salamaka; yo kele bonso nde mono me kangula mputa mpi ke yobisa yo. Yo ke vandaka kibeni pete ve na kukanga ntima na mpasi yai, kansi yo ke salaka nde mputa kubeluka.”

SONGA BANTU YA NKAKA BANGINDU NA NGE MPI MUTINDU NGE KE KUDIWA

Ya kieleka, bantangu ya nkaka nge lenda zola kudivandila. Kansi, kukanga ntima nge mosi na mpasi yina  lufwa ke nataka kele kilo yina nge ta kuka ve kunata nge mosi. Jared, yina kele ti bamvula 17 mpi yina tata na yandi me fwaka, ke tuba nde: “Mono vandaka kusonga bantu ya nkaka basusi na mono. Mono ke ndima ve nde mono songaka bo yo mbote-mbote, kansi mono vandaka na kiese mutindu mono salaka bikesa ya kusonga bo.” Janice, yina beto tubilaka na disolo ya ntete, ke tubila diaka mambote ya nkaka: “Kusolula ti bantu ya nkaka pesaka mono kibeni kikesa. Mono bakisaka nde bo vandaka kubakisa mono mpi nde mono vandaka ve mono mosi.”

NDIMA LUSADISU

Munganga mosi ke tuba nde: “Ntangu bantu yina kele na mpasi ya lufwa ke bikaka nde banduku mpi bantu ya dibuta na bo kusadisa bo kaka na nima ya ntangu yina bo me fwisa muntu mosi ya bo vandaka kuzola, yo ke vandaka mpasi ve nde bo kanga ntima na bampasi yina.” Songa banduku na nge mambu ya bo lenda sala sambu na kusadisa nge, sambu bo lenda vanda na mfunu ya kusadisa nge, kansi bo ke zaba ve mutindu ya kusala yo.—Bingana 17:17.

KWENDA PENE-PENE NA NZAMBI

Tina ke tuba nde: “Ntangu bakala na mono fwaka na kintulumukina na maladi ya kansere, mono lendaka diaka ve kusonga yandi mambu na mu, yo yina mono kumaka kusonga Nzambi mambu na mono yonso! Konso kilumbu na suka, mono vandaka kulomba yandi na kusadisa mono na kukanga ntima kilumbu yina. Nzambi vandaka kusadisa mono na mitindu mingi.” Tarsha, yina vandaka ti bamvula 22 ntangu mama na yandi fwaka, ke tuba nde: “Kutanga Biblia konso kilumbu vandaka kupesa mono kikesa ya mingi. Yo vandaka kusadisa mu na kuyindula mambu ya ke pesa kikesa.”

YINDULA NTANGU YINA BANTU TA FUTUMUKA

Tina ke tuba diaka nde: “Ntete, kivuvu ya lufutumuku vandaka kupesa mono ve kikesa sambu mono vandaka na mfunu ya bakala na mono mpi bana na mono vandaka na mfunu ya tata na bo, kaka na ntangu yina. Kansi bubu yai bamvula iya me luta, mono ke tulaka ntima na kivuvu yai. Yo ke pesaka mono kikesa mpi ke sadisaka mono na kukanga ntima. Mono ke yindulaka ntangu yina mono ta mona yandi diaka, yo ke pesaka mono ngemba mpi kiese!”

Ya kieleka, nge ta wa ve mbote kaka na mbala mosi. Kansi, mambu yina Vanessa kutanaka ti yo ke pesa kikesa. Yandi ke tuba nde: “Nge lenda yindula nde nge ta kuka ve ata fioti kukanga ntima, kansi nge ta kudiwa mbote malembe-malembe.”

Kuvila ve nde luzingu kele kaka na mfunu ata nge lenda vanda kaka na mfunu ya muntu yina me fwa. Na lusadisu ya Nzambi, nge lenda zwa banduku ya mbote mpi kukuma ti luzingu ya mbote. Diaka, kubika fioti Nzambi ta futumuna bafwa. Yandi ke zola nde nge kutana diaka ti muntu yina nge vandaka kuzola. Mpidina, mpasi yina nge ke wa na ntima ta mana kimakulu!