Na disolo ya me luta beto tubilaka bidimbu yina Yezu pesaka. Bidimbu yango monisaka pwelele nde Nzambi tulaka Kimfumu na yandi na zulu mpi tulaka Yezu Kristu Ntotila ya Kimfumu yango.

Biblia ke tuba nde ntangu Yezu bakaka Kimfumu, yandi kulaka Satana ti bademo na yandi na zulu. Banda bo losaka Satana ti bademo na yandi na ntoto na 1914, yo me salaka nde mambu kubeba mingi na ntoto.—Kusonga 12:7, 9.

Ata mambu ke kuma kaka mpasi na ntoto, Yezu yina kele Ntotila ya Kimfumu ya Nzambi me salaka mambu sambu na kusadisa bantu na ntoto ya mvimba. Sambu bo ke longaka nsangu ya Biblia yina Yezu tubaka na ntoto ya mvimba, bantu mingi ke longukaka mpi ke sadilaka minsiku ya Biblia na luzingu na bo ya konso kilumbu. (Yezaya 2:2-4) Bantu mingi me longukaka na kutadila kisalu ya kinsuni na mutindu ya mbote, bankaka me longukaka mutindu ya kutomisa luzingu ya mabuta na bo mpi kusepela ti bima ya kinsuni kukonda kukuma mpika na yo. Bantu yai ke longuka mutindu ya kutomisa luzingu na bo bubu yai mpi ke kuma bantu yina Nzambi ke zola nde bo kota na Kimfumu na yandi.

Ata Yezu ke yalaka dezia na zulu, baluyalu ya bantu ke yala kaka na ntoto. Ata mpidina, Nzambi songaka Yezu nde: “Kwenda kuyala na kati ya bambeni na nge mpi bedisa bo.” (Nkunga 110:2) Ntama mingi ve, Yezu ta fwa kibeni bambeni na yandi mpi ta manisa bampasi ya bantu yina ke lemfukilaka Nzambi na luzolo yonso.

Na ntangu yina, Kimfumu ya Nzambi ta:

• Fwa dibundu ya luvunu. Mabundu yina me longaka mambu ya luvunu na yina me tala Nzambi mpi yina me kumisaka luzingu ya bantu mpasi ta fwa. Biblia ke fwanisaka dibundu ya luvunu ti nkento ya ndumba. Lufwa na yo ta natila bantu mingi mpasi.—Kusonga 17:15, 16.

• Sukisa luyalu ya bantu. Kimfumu ya Nzambi ta sukisa bimfumu yonso ya bantu.—Kusonga 19:15, 17, 18.

• Fwa bantu ya mbi. Inki ta kumina bantu yina ke salaka mambu ya mbi mpi ke buyaka kulemfukila Nzambi? Biblia ke tuba nde: “Kansi bantu ya mbi, bo ta katula bo na ntoto.”—Bingana 2:22.

• Kanga Satana ti bademo. Satana ti bademo ta “kusa diaka ve makanda.”—Kusonga 20:3, 10.

Ebuna nki beto lenda tuba sambu na bantu yina ke ndimaka Kimfumu ya Nzambi?

Yezu yina kele Ntotila ya ke yala na zulu, ta sala mambu mingi yina ata mfumu mosi ve lenda sala. Yandi ta yala ti bantu 144000 yina bo me ponaka na kati ya bantu. (Kusonga 5:9, 10; 14:1, 3) Yandi ta sala nde luzolo ya Nzambi kusalama na ntoto. Inki mambu Kimfumu ya Nzambi ta sala sambu na bantu yina ke zingaka na ntoto? Yo ta:

• Katula maladi mpi lufwa. Biblia ke tuba nde: “Ata muntu mosi ve ya ke zingaka na insi ta tuba nde: ‘Mono ke bela,’” mpi “lufwa ta vandaka diaka ve.”—Yezaya 33:24; Kusonga 21:4.

• Nata ngemba mpi lutaninu ya kieleka. Biblia ke tuba nde: “Ngemba ya bana na nge ta vanda mingi,” mpi “bo ta vanda, konso muntu na nsi ya nti na yandi ya vinu mpi na nsi ya nti na yandi ya bafige, ata muntu mosi ve ta pesa bo boma.”—Yezaya 54:13; Mika 4:4.

• Pesa bantu bisalu ya mbote. Biblia ke tuba nde: “Bantu ya mono me solaka ta wa kiese kibeni sambu na kisalu ya maboko na bo. Bo ta sala ve kisalu ya ngolo sambu na mpamba.”—Yezaya 65:22, 23.

• Sakumuna ntoto. Biblia ke tuba nde: “Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.”—Yezaya 35:1.

• Longa bantu mambu yina bo fwete sala sambu na kuzinga mvula na mvula. Biblia ke tuba nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.”—Yoane 17:3.

Nzambi ke zola nde nge baka balusakumunu yai. (Yezaya 48:18) Disolo yina ke landa ta tubila mambu yina nge lenda sala bubu yai sambu na kubaka balusakumunu yai ya mbote na bilumbu ke kwisa.