Mu yelaka na Puerto Limón, mbanza mosi ya kele ti dibungu na esti ya Costa Rica. Bibuti na mu vandaka ti bana nana, mpi mu vandaka mwana ya nsambwadi. Papa fwaka ntangu mu vandaka ti bamvula nana. Na nima, mama sansaka beto yandi mosi.

Mono vandaka kuzola mingi nsaka ya nkweso ya bo ke bingaka baseball. Mu vandaka kuzola yo mingi ntangu mu vandaka mwana-fioti. Ntangu mu zolaka kulungisa bamvula 20, mu kotaka na ekipi mosi ya fioti. Ntangu mu vandaka ti bamvula 20 ti ndambu mpi mu vandaka kubula na ekipi yina, muntu yina ke sosaka baleke ya me zaba kubula baseball songaka mu na kukwenda kubula na ekipi mosi ya nene na Nicaragua. Kansi, sambu mama vandaka kubela na ntangu yina mpi mu vandaka kukeba yandi, mu buyaka kukwenda kuzinga na Nicaragua. Yo yina, mu ndimaka ve. Na nima, muntu ya nkaka lombaka mu na kubula na ekipi ya baseball ya Costa Rica, yina salamaka na ba joueurs yina bo ponaka na ba ekipi ya fioti. Na mbala yai, mu ndimaka. Mu bulaka na ekipi ya insi banda na 1949 tii na 1952, mpi mu bulaka ba match mingi na Cuba, na Mexique, mpi na Nicaragua. Mu vandaka kubula mbote na nima. Nkutu mu bulaka ba match 17 kukonda kusala ata kifu mosi. Mu vandaka kusepela mutindu bantu vandaka kuyimba zina na mu!

Diambu ya mawa kele nde, mu vandaka mpi ti luzingu ya mansoni. Ata mu vandaka ti fianse, mu vandaka ntangu yonso ti bamakangu ya nkaka. Mu vandaka kunwa malafu mingi. Kilumbu mosi mu laukaka mingi yo yina ntangu mu telamaka na mpongi na kilumbu yina landaka, mu vandaka kuyibuka diaka ve mutindu mu vutukaka na nzo! Mu vandaka mpi kubula nsaka ya mbongo ya bo ke bingaka domino mpi loteri.

Ntangu mu vandaka ti luzingu yina, mama kumaka Mbangi ya Yehowa. Yandi mekaka kutubila mu mambu ya me tala lukwikilu na yandi, kansi yandi kukaka ve na luyantiku sambu mu kudipesaka mingi na nsaka yina. Kana ntangu ya kudia kulunga ntangu mu vandaka kusala bangalasisi, mu vandaka kuwa ve nzala! Mu vandaka kutula mabanza yonso kaka na nsaka yina. Mu vandaka kuzola baseball mingi kibeni!

Kansi, ntangu mu kumaka ti bamvula 29, mu lwalaka ngolo ntangu mu vandaka kusosa kukanga nkweso na match mosi. Ntangu mu belukaka, mu yambulaka kubula nsaka yina. Ata mpidina, mu  kumaka kudipesa na kulonga ba joueurs ya ekipi mosi ya fioti yina vandaka pene-pene na nzo na mu.

Na 1957, mu ndimaka emvitasio ya kukwenda na lukutakanu ya nene ya Bambangi ya Yehowa yina salamaka na stade mosi kisika mu bulaka baseball. Ntangu mu vandaka na banc, mu monaka nde luzitu yina Bambangi ya Yehowa vandaka kumonisa swaswanaka ti mavwanga yina bantu vandaka kusala ntangu bo vandaka kutala ba match ya baseball. Mambu yina mu monaka na lukutakanu yina pusaka mu na kuyantika kulonguka Biblia ti Bambangi ya Yehowa mpi kukwenda na balukutakanu ya dibundu.

Mu sepelaka mingi ti malongi mingi ya Biblia yina mu longukaka. Mu mbandu, Yezu tubaka nde na bilumbu ya nsuka, balongoki na yandi ta zabisa nsangu ya mbote ya Kimfumu ya Nzambi na ntoto ya mvimba. (Matayo 24:14) Mu longukaka diaka nde Bakristu ya kieleka ke salaka ve kisalu na bo sambu na kuzwa mbongo. Yezu tubaka nde: “Beno me baka ya ofele, beno pesa mpi ya ofele.”—Matayo 10:8.

Ntangu mu vandaka kulonguka Biblia, mu vandaka kufwanisa mambu yina yo ke tubaka ti mambu yina mu vandaka kumona na Bambangi ya Yehowa. Mu vandaka kusepela ti bikesa ya ngolo ya bo ke salaka sambu na kuzabisa nsangu ya mbote ya Kimfumu ya Nzambi na ntoto ya mvimba. Mu monaka mpeve ya kuditambika yina Yezu songaka balongoki na yandi na kumonisa. Yo yina, ntangu mu tangaka Marko 10:21 mpi mu monaka emvitasio ya Yezu yina ke tuba nde, “Kwisa kulanda mono,” mu kumaka ti mpusa ya kukuma Mbangi ya Yehowa.

Kansi, yo bakaka ntangu na ntwala nde mu lungisa lukanu yina. Mu mbandu, na nsungi ya bamvula mingi mu vandaka kubula nimero na mu ya “shanse” konso mposo na loteri ya nsi na beto. Kansi, mu longukaka na Biblia nde Nzambi ke buyaka bantu yina ke sambilaka “nzambi ya Menga ya Mbote” mpi bantu ya bwimi. (Yezaya 65:11; Bakolosai 3:5) Yo yina, mu bakaka lukanu ya kuyambula kubula nsaka ya mbongo. Ntangu mu yambulaka kubula loteri, nimero na mu ya “shanse” nungaka na Lumingu ya ntete! Bantu sekaka mu sambu mu bulaka ve na mposo yina, mpi bo pusaka mu na ngolo na kubula diaka, kansi mu buyaka. Mu vutukaka diaka ve ata mbala mosi sambu na kubula nsaka ya mbongo.

Mu kutanaka ti diambu ya nkaka yina mekaka ‘kimuntu na mu ya mpa’ kaka kilumbu yina mu bakaka mbotika na lukutakanu mosi ya nene ya Bambangi ya Yehowa. (Baefezo 4:24) Na nkokila yina, ntangu mu vutukaka na otele kisika mu vandaka, makangu na mu ya ntama vandaka kuvingila mu na kielo ya suku na mu. Yandi songaka mu nde, “Sammy, kwisa. Beto lutisa ntangu ya mbote!” Kansi mu tubaka na mbala mosi nde, “Ve!” Mu yibusaka yandi nde ntangu yai me kumaka kuzitisa minsiku ya bikalulu ya mbote ya Biblia. (1 Bakorinto 6:18) Yandi tubaka nde, “Inki?” Na nima, yandi vwezaka dibanza ya Biblia na yina me tala mansoni mpi yandi dindamanaka nde beto vutukila kimakangu na beto. Kansi, mu kotaka na suku mpi mu kangaka kielo. Bubu yai, mu kele na kiese ya kutuba nde banda mu me kumaka Mbangi ya Yehowa na 1958, mu ke kangamaka na bansoba yina mu me salaka na luzingu na mu.

Mu ke mona bonso nde mu fwete sonika mukanda ya ke tubila mambote ya mu me bakaka sambu mu ke landaka lutwadisu ya Biblia! Ndambu ya mambote yango kele nde ntangu yai mu kele ti banduku mingi ya mbote, luzingu ya kele ti lukanu, mpi kiese ya kieleka.

Mu ke sepelaka kaka ti baseball, kansi mu me sobaka mambu ya mu ke tulaka na kisika ya ntete. Na baseball, mu bakaka lukumu mpi mbongo, kansi bima yai zingaka ve mingi. Kansi, bangwisana na mu ti Nzambi mpi kimpangi na beto ya ntoto ya mvimba ta zinga mvula na mvula. Biblia ke tuba nde: “Nsi-ntoto ke luta, nzala na yo mpi ke luta, kansi muntu yina ke salaka luzolo ya Nzambi ke bikalaka kimakulu.” (1 Yoane 2:17) Ntangu yai mu ke zolaka Yehowa Nzambi ti bantu na yandi mingi kibeni!