LUZIA KE VANDAKA TI KIFU NA DIKULU YA KIMAMA. Ntangu yandi vandaka mwana, yandi belaka maladi ya buka-buka. Ntangu yandi vandaka ti bamvula 16, mwana-nkento mosi yina Luzia vandaka muntu na yandi ya kisalu, songaka Luzia nde “Nzambi pesaka nge ndola ya kifu na nitu sambu nge vandaka ve kulemfukila mama na nge.” Bamvula mingi na nima, Luzia ke yibukaka kaka mpasi yina yandi waka.

NTANGU DAMARIS ZABAKA NDE YANDI VANDAKA TI MALADI YA KANSERE YA BUTOMFU, tata na yandi yulaka yandi nde: “Inki nge salaka sambu mambu yai kukumina nge? Yo ke monana nde nge salaka diambu mosi ya mbi kibeni. Yo yina Nzambi ke pesa nge ndola.” Mambu yina tata ya Damaris tubaka pesaka yandi mpasi mingi.

Banda ntama bantu ke yindulaka nde Nzambi muntu ke pesaka bantu ndola ya maladi. Mukanda mosi (Manners and Customs of Bible Lands) ke tuba nde na bilumbu ya Kristu bantu mingi vandaka kuyindula nde “bantu vandaka kubela sambu na disumu na bo mosi to ya bampangi na bo, mpi nde bo vandaka kubaka ndola sambu na disumu yina.” Mukanda mosi (Medieval Medicine and the Plague) ke tuba nde na ntangu ya ntama (Moyen Age), “bantu ya nkaka vandaka kuyindula nde Nzambi muntu vandaka kupesa bo ndola ya maladi sambu na masumu na bo.” Yo yina ntangu maladi mosi fwaka bamilio ya bantu na Eropa ya mvimba na mvu-nkama ya 14, keti Nzambi muntu vandaka kupesa bantu ya mbi ndola? To keti maladi yina katukaka na mikrobe mutindu bantu ya ke salaka bansosa ya kimunganga me tubilaka yo? Bantu ya nkaka lenda yula nde, keti Nzambi ke pesaka kibeni bantu ndola ya maladi sambu na masumu na bo? *

TADILA DIAMBU YAI: Kana maladi mpi bampasi kele ndola yina Nzambi ke pesaka bantu, sambu na nki Yezu belulaka bantu ya maladi? Keti yo zolaka ve kubebisa lunungu ya Nzambi? (Matayo 4:23, 24) Yezu zolaka ve ata fioti kusala mambu yina vandaka kuwakana ve ti luzolo ya Nzambi. Yandi tubaka nde: “Mono ke salaka ntangu yonso mambu yina ke pesaka yandi kiese,” mpi “mono ke sala mutindu Tata songaka mono na kusala.”—Yoane 8:29; 14:31.

Biblia ke tubaka pwelele nde: Yehowa Nzambi “ke kondaka ve lunungu ata fioti.” (Kulonga 32:4) Mu mbandu, Nzambi lendaka ve ata fioti kusadisa avio mosi kisumbula sambu na kufwa bantu mingi ya me sala mbi ve, kaka sambu yandi ke zola kupesa muntu mosi na kati ndola! Na kuwakana ti lunungu ya Nzambi, Abrahami, nsadi ya Nzambi ya kwikama tubaka nde Nzambi lendaka ve ata fioti kufwa “muntu ya lunungu ti muntu ya mbi.” Yandi yikaka nde “ngindu lenda kwisila [Nzambi] ve ata fioti” na kusala mutindu yina. (Kuyantika 18:23, 25) Biblia ke tuba diaka nde Nzambi ke salaka ve “mambu na nku yonso”; yandi ke salaka ve “mambu ya mbi.” —Yobi 34:10-12.

Bampasi ya beto ke kutanaka ti yo ke tendula ve nde Nzambi ke pesaka beto ndola sambu na disumu mosi buna. Yezu monisaka yo pwelele ntangu yandi ti balongoki na yandi kutanaka ti muntu yina butukaka kifwa-meso. “Balongoki na yandi yulaka yandi nde: ‘Rabi, nani salaka disumu, muntu yai to bibuti na yandi, sambu yandi butuka kifwa-meso?’ Yezu vutulaka nde: ‘Yandi ve muntu salaka disumu, bibuti na yandi mpi ve, kansi yo vandaka sambu bisalu ya Nzambi kumonana na mbandu na yandi.’”—Yoane 9:1-3.

Na kutadila bangindu yai ya luvunu, ziku balongoki ya Yezu yitukaka ntangu yandi songaka bo nde muntu yina ve mpi bibuti na yandi ve bantu salaka disumu yina natilaka yandi mpasi yina. Yezu belulaka kaka ve kifwa-meso yina, kansi yandi salaka yo sambu na kukatula  bangindu ya luvunu yina bantu vandaka na yo nde bampasi kele ndola yina Nzambi ke pesaka bantu. (Yoane 9:6, 7) Bantu yina ke belaka maladi ya ngolo bubu yai lenda baka kikesa na kuzaba nde Nzambi kele ve na kisina ya bampasi na bo.

Biblia ke ndimisa beto nde

• “Nzambi lenda mekama ve na mambu ya mbi, mpi yandi mosi ke mekaka ve ata muntu mosi.” (YAKOBO 1:13) Ya kieleka, ntama mingi ve, Nzambi ta katula “mambu ya mbi” yina ke niokulaka bantu banda bamvula mingi, mu mbandu maladi, bampasi mpi lufwa.

• Yezu Kristu “belulaka bantu yonso yina vandaka kubela.” (MATAYO 8:16) Ntangu Yezu belulaka bantu yonso yina kwisaka na yandi, yandi monisaka mambu yina Kimfumu ya Nzambi ta sala na ntoto ya mvimba.

• “Yandi [Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—KUSONGA 21:3-5.

Ebuna, sambu na nki bantu ke kutanaka ti bampasi mingi? Bantu ke yulaka ngiufula yai banda ntama. Kana Nzambi kele ve na kisina ya bampasi, nani kele na kisina na yo? Disolo yina ke landa ta pesa bamvutu na bangiufula yai.