Ata Muntu Mosi Ve Lenda Tina Lufwa
YINDULA nde nge ke tala video ya muntu mosi ya me zabanaka mingi, yo lenda vanda mizisie mosi ya nene mpi ya nge ke zolaka mingi. Bo me yantika kutubila kileke na yandi ntangu yandi vandaka kulonguka kubula miziki. Bo ke monisa mpi mutindu yandi ke bula miziki na bisika mingi, ke sala banzietelo na bansi mingi mpi me zabana na ntoto ya mvimba. Na ntwala nde video kumana, bo me monisa nde yandi me fwa.
Video yai kele ve ya luvunu kansi yo kele disolo ya kieleka ya muntu mosi ya me fwaka. Ata muntu yango vandaka mizisie, muntu ya mayele, muntu ya ke salaka bansaka to muntu ya me zabanaka mingi, mambu ya bo ke songaka na televizio ntangu bantu ya mutindu yai ke fwaka ke vandaka mbala mingi kiteso mosi. Ziku muntu yango salaka mambu mingi ya mbote kansi yindula mambu mingi ya nkaka yina yandi zolaka kusala kana yandi nunaka ve mpi fwaka ve.
Lufwa ke pesaka beto mpasi mingi, kansi yo kele diambu yina ta kumina beto yonso. (Longi 9:5) Ata beto sala bikesa ya nki mutindu, beto ke nunaka kaka mpi ke fwaka. Nkutu, beto lenda fwa na kintulumukina na aksida to na maladi mosi ya ngolo. Mutindu Biblia ke tubaka, beto kele bonso “lubungi yina ke monikaka sambu na ntangu fioti mpi na nima yo ke vilaka.”—Yakobo 4:14.
Bantu ya nkaka ke monaka nde luzingu kele na mfunu ve yo yina bo ke tubaka nde “beto dia mpi beto nwa, sambu mbasi beto ta fwa.” (1 Bakorinto 15:32) Bo ke salaka mutindu yai sambu bo ke monaka nde bo lenda fwa konso ntangu yina mpi bo ke zabaka ve nde bafwa ta futumuka. Mbala mingi kana beto ke kutana ti mpasi ya ngolo, beto lenda kudiyula nde: ‘Keti luzingu ya nkaka kele?’ Na wapi beto lenda baka mvutu?
Bantu mingi ke tudilaka siansi ntima. Bubu yai, bantu ya mayele mpi minganga me zabaka mambu yina muntu lenda sala sambu na kuzinga mingi. Nkutu bantu ya nkaka ya mayele ke sala bansosa sambu na kuzaba mambu yina lenda sadisa bantu na kuzinga diaka mingi kuluta. Ata bo ke salaka bikesa mingi, bantu ke landaka kudiyula nde: Sambu na nki beto ke nunaka mpi ke fwaka? Keti kilumbu kele Nzambi ta katula lufwa? Masolo ya ke landa ta tubila mambu yai mpi yo ta pesa mvutu na ngiufula yai: Keti luzingu ya nkaka kele?