Ndongisila ya Biblia: “Zola ya mbongo kuyala ve mutindu na beno ya kuzinga, na ntangu beno ke sepela ti bima yina beto kele na yo.”—Baebreo 13:5.

Bubu yai bantu ke tubaka nde beto fwete vanda ti bima mingi. Kansi, Biblia ke tuba nde beto lenda “sepela ti bima yina beto kele na yo.” Inki mutindu?

Beto fwete vanda ve ti “zola ya mbongo.” Bantu ke salaka konso kima yina, ata yo ke bebisa sante, dibuta, kinduku, bikalulu ya mbote, yo vanda mpi lukumu na bo, kaka sambu na “zola ya mbongo.” (1 Timoteo 6:10) Yo ke nataka bampasi mingi kibeni! Nsuka-nsuka, muntu yina ke zolaka kimvwama ‘ta fulukaka yo ve ata fioti.’—Longi 5:10.

Bantu kele mfunu mingi kuluta bima. Kuvanda ti bima ya kinsuni lenda vanda mfunu kansi yo lenda zola beto ve mutindu bantu ke zolaka beto. “Nduku ya kieleka” ta sadisa beto na kuvanda na kiese.—Bingana 17:17.

Ndongisila ya Biblia: “Ntima ya kiese kele nkisi ya mbote.”—Bingana 17:22.

Bonso “nkisi ya mbote,” kiese lenda sadisa beto na kukanga ntima ntangu beto ke bela. Kansi nki mutindu beto lenda vanda na kiese ntangu beto ke bela?

Beto fwete monisa ntonda. Kana beto ke yindula kaka bampasi na beto, “bilumbu yonso” ta vanda mbi. (Bingana 15:15) Kansi, Biblia ke tuba nde: “Beno pesa matondo.” (Bakolosai 3:15) Beto fwete monisaka ntonda sambu na mambu ya mbote, ata yo kele ya fioti. Kutala mutindu ntangu ke dinda, mupepe ya kitoko, maseka ya muntu yina beto ke zolaka lenda pesa beto kiese.

Beto fwete sadisa bantu ya nkaka. Ata sante na beto kele mbote ve, beto fwete vila ve nde “kiese ke vandaka mingi na kupesa, kansi na kubaka kiese ke vandaka fioti.” (Bisalu 20:35) Ntangu bantu ya nkaka ke pesaka beto mersi sambu na mambu yina beto me sala, beto ke vandaka na kiese mpi beto ke yindulaka ve mingi mambu ya mpasi yina beto ke kutana ti yo. Beto ta vanda na kiese kana beto ke sadisa mpi bantu ya nkaka na kuvanda na kiese.

Ndongisila ya Biblia: “Zikisa mambu ya kuluta mfunu.”—Bafilipi 1:10.

Kana bankwelani ke lutisa ve ntangu mingi bo zole, makwela na bo lenda beba. Bankwelani fwete tula makwela na bo na kisika ya ntete sambu yo kele na kati ya bima ya kuluta mfunu na luzingu na bo.

Bakala ti nkento fwete salaka mambu bo zole. Beno sala manaka sambu na kusalaka mambu beno zole. Biblia ke tuba nde: “Bantu zole me luta muntu mosi.” (Longi 4:9) Beno lenda lamba beno zole, kusala bangalasisi, kutambula to kukwenda kisika mosi buna sambu na kubaka mupepe beno zole.

Monisa nde nge ke zolaka nkwelani na nge. Biblia ke siamisaka bankwelani na kuzolana mpi na kuzitisana. (Baefezo 5:28, 33) Nge lenda sekisa nkwelani na nge, kupesa yandi beze to kupesa yandi mwa kado sambu na kukumisa makwela na beno ngolo. Ya kieleka, bankwelani fwete vukisa nitu kaka bo zole.—Baebreo 13:4.