Mono butukaka na Ciudad Mante, mbanza mosi ya kitoko na Tamaulipas, na insi Mexique. Bantu ya mbanza yina ke kabaka mpi bo kele mawete. Kansi yo kele mawa na kumona nde sambu na mubulu yina ke salamaka kuna, mbanza yai kumaka kisika mosi ya kigonsa.

Beto butukaka bana-babakala iya mpi mono kele mwana ya zole. Bibuti na mono pesaka mono mbotika na Dibundu ya Katolika mpi na nima mono kumaka kuyimba na korale ya parwase. Mono vandaka na nzala ya kusepedisa Nzambi sambu mono vandaka kuwa boma nde yandi ta sambisa mono mpi ta yoka mono na bilungi ya tiya kimakulu.

Ntangu mono vandaka ti bamvula tanu, papa yambulaka beto. Yo pesaka mono mawa mingi mpi mono kumaka kuwa bonso nde kima mosi ke konda. Beto vandaka kuzola yandi mingi, kansi mono bakisaka ve sambu na nki yandi yambulaka beto. Yo lombaka nde mama kusala bangunga mingi na kisalu sambu na kudisa beto iya.

Yo yina mono kumaka kutina nzo-nkanda sambu na kulutisa ntangu ti bana yina vandaka bambuta na mono. Bo longaka mono kufinga, kunwa makaya, kuyiba mpi kubula bantu makofi. Sambu mono zolaka kumonina bantu ya nkaka, mono longukaka kusala bokse, kunwana mpi kusadila minduki. Mono kumaka toko mosi ya nku. Mbala mingi mono vandaka kunwana ti minduki mpi nitu na mono vandaka kufuluka ti menga mpi bo vandaka kuyambula mono bonso mvumbi na bala-bala. Yo vandaka kupesa mama mpasi kibeni ntangu yandi vandaka kumona mono mutindu yina. Yandi vandaka kubaka mono mpi kunata mono nswalu na lupitalu!

Ntangu mono vandaka ti bamvula 16, Jorge nduku na mono ya kileke kwisaka kutala beto na nzo. Yandi songaka beto nde yandi kele Mbangi ya Yehowa mpi nde yandi ke zola kuzabisa beto nsangu mosi ya mfunu. Yandi sadilaka Biblia sambu na kuzabisa beto mambu yina yandi ke kwikilaka. Mono me tangaka ntete ve Biblia mpi mono vandaka na kiese ya kuzaba zina ya Nzambi mpi balukanu na yandi. Jorge lombaka beto na kulonguka Biblia ti yandi mpi beto ndimaka.

Mono vandaka na kiese ya kuzaba kieleka ya me tala bilungi ya tiya, yo kele ve dilongi ya Biblia. (Nkunga 146:4; Longi 9:5) Ntangu mono zabaka yo, mono vandaka diaka ve kuwa Nzambi boma na mutindu ya mbi. Kansi,  mono kumaka kumona yandi bonso Tata ya zola yina ke zolaka mambote ya bana na yandi.

Ntangu mono vandaka kulonguka Biblia, mono bakisaka nde mono fwete soba kimuntu na mono. Yo lombaka nde mono yedisa kikalulu ya kudikulumusa mpi mono yambula mambu ya nku. Ndongisila yina kele na 1 Bakorinto 15:33 sadisaka mono mingi. Yo ke tuba nde: “Banduku ya mbi ke bebisaka bikalulu ya mbote.” Mono bakisaka mpi nde kana mono ke zola kusoba kimuntu na mono, mono fwete vukana diaka ve ti bantu yina ke vandaka ti bupusi ya mbi na zulu na mono. Yo yina, mono yambulaka banduku na mono ya ntama mpi mono bakaka banduku na dibundu, disongidila bantu yina ke yidikaka makambu na bo ti makofi ve mpi na mubulu ve kansi na nzila ya bansiku ya Biblia.

Verse ya nkaka yina sadisaka mono kele Baroma 12:17-19. Yo ke tuba nde: “Beno vutula mbi sambu na mbi ata na muntu mosi ve. . . . Kana mpila kele, beno sala yonso sambu na kuzinga na ngemba ti bantu yonso. . . . Beno vutula ve mbi sambu na mbi, . . . sambu bo me sonikaka nde: ‘Yehowa ke tuba nde, “Mono muntu ke vutulaka mbi; mono muntu ta pesa ndola.”’” Mono ndimaka nde Yehowa ta manisa mambu ya kukonda lunungu na mutindu na yandi mpi na ntangu yina yandi me zola. Malembe-malembe, mono yambulaka mambu ya nku.

Mono ta vilaka ve mambu yina salamaka kilumbu mosi na nkokila ntangu mono vandaka kuvutuka na nzo. Kimvuka ya batoko yina vandaka kunwanisa beto ntama nwanisaka mono mpi mfumu na bo bulaka mono na mukongo mpi tubaka nde “Nge mpi vutula!” Na ntangu yina mono salaka kisambu mosi ya nkufi mpi mono lombaka Yehowa na kusadisa mono na kukanga ntima na mambu yina. Ata mono waka nzala ya ngolo ya kuvutula mbi sambu na mbi, mono tinaka. Kilumbu yina landaka, mono kutanaka ti mfumu ya kimvuka yina. Mono waka makasi ya ngolo mpi mono sambaka diaka Yehowa sambu yandi sadisa mono na kudiyala. Mono yitukaka sambu toko yina kwisaka na ntwala na mono mpi songaka mono nde: “Lolula mono sambu na mambu yina salamaka mazono na mpimpa. Na kutuba masonga, mono ke zola kukuma bonso nge. Mono ke zola kulonguka Biblia.” Mono waka kiese kibeni mutindu mono kukaka kuyala makasi na mono! Sambu na yo, beto yantikaka kulonguka Biblia.

Diambu ya mpasi kele nde na ntangu yina, bantu ya nkaka ya dibuta na beto yambulaka kulonguka Biblia. Kansi, mono bakaka lukanu ya ngolo sambu na kulanda kulonguka mpi kubika ve nde ata muntu mosi to kima mosi kuvutula mono nima. Mono zabaka nde kana mono ke vukana mbala na mbala ti bansadi ya Nzambi, bamputa na mono ya mabanza ta beluka mpi bo ta kuma dibuta na mono. Mono landaka kuyela na kimpeve, mpi na 1991 mono bakaka mbotika mpi kumaka Mbangi ya Yehowa.

Mono vandaka muntu ya makasi, kumonina bantu ya nkaka mpi nku. Kansi Ndinga ya Nzambi me sobaka kibeni luzingu na mono. Ntangu yai, mono ke longaka nsangu ya ngemba ya Biblia na bantu yina ke zola kuwa. Bamvula 23 me lunga banda mono ke salaka kisalu ya kusamuna ntangu yonso.

Mono salaka na biro ya filiale ya Bambangi ya Yehowa na Mexique sambu na mwa ntangu. Kuna, mono kutanaka ti Claudia, mpangi-nkento mosi ya kikesa kibeni mpi beto kwelanaka na 1999. Mono ke pesaka Yehowa matondo sambu yandi me sakumunaka mono mpi me pesaka mono nkento yai ya kwikama!

Beto vandaka na dibundu ya Ndinga ya Bidimbu ya Mexique mpi beto vandaka kusadisa bababa na kuzaba Yehowa. Na nima, bo tindaka beto na Bélize sambu na kulonga bantu ya insi yina Biblia. Ata luzingu na beto awa kele mpenza ya kukonda mindondo, beto kele na bima yonso ya beto kele na yo mfunu sambu na kuvanda na kiese. Beto ta yambula yo ve ata nki mutindu.

Na nima, mama vutukilaka kulonguka Biblia mpi bakaka mbotika. Diaka, mbuta na mono, nkento na yandi mpi bana na bo me kumaka Bambangi ya Yehowa. Banduku na mono ya nkaka ya ntama yina mono longaka nsangu ya Kimfumu me kumaka mpi kusadila Yehowa.

Diambu ya mawa kele nde bantu ya nkaka ya dibuta na beto me fwaka sambu bo sobaka ve kikalulu na bo ya nku. Kana mono landaka kaka nzila yina, ntembe kele ve nde mono zolaka kufwa bonso bo. Mono ke pesaka Yehowa mersi mutindu yandi me bendaka mono na yandi mpi na bansadi na yandi yina longaka mono na kusadila bansiku ya Biblia na mawete ti kukanga ntima yonso.