Mu butukaka na bwala mosi na République Démocratique Allemande, na kitini yina bo ke bingaka Saxony. Beto vandaka kuzinga na kiese mpi kuzolana mingi na nzo, mpi bibuti na mono longaka mono bikalulu ya mbote. République Démocratique Allemande vandaka luyalu ya Bakoministe (dilongi ya ke tubaka nde bantu yonso kele kiteso mosi), yo yina sambu na bantu mingi na Saxony, dibundu vandaka na mfunu ve. Kansi sambu na mono, mu vandaka ve kundima nde Nzambi kele. Malongi zole vandaka ti bupusi ya ngolo na luzingu na mono na ntwala nde mu lungisa bamvula 18: dilongi ya ke tubaka nde Nzambi kele ve mpi dilongi ya ke tubaka nde bantu yonso kele kiteso mosi.

Mu vandaka kusepela ti kominisme sambu yo ke longaka nde bantu yonso kele kiteso mosi. Diaka, mu vandaka kuyindula nde bo fwete kabula bima kiteso mosi na bantu yonso, ebuna yo zolaka kusala nde bantu yonso kuvanda ti luzingu ya mutindu mosi. Yo yina, mu kudipesaka na kimvuka mosi ya baleke ya Bakoministe. Ntangu mu lungisaka bamvula 14, mu kumaka kusala bantangu mingi na kimvuka mosi yina ke bakaka bapapie yina bo me sadilaka dezia sambu na kusala bima ya nkaka. Bamfumu ya mbanza Aue vandaka kusepela mingi na mambu yina mu vandaka kusala, yo yina bo pesaka mu kado. Ata mu vandaka kaka leke, mu zabanaka ti bamfumu ya nkaka ya nene ya politiki ya République Démocratique Allemande. Mu vandaka kumona nde mu kele ti balukanu ya mbote mpi nde mu ta vanda ti luzingu ya mbote na bilumbu ke kwisa.

Kansi na nima, kivuvu na mono yonso manaka na mbala mosi. Na 1989, kibaka ya Berlin bwaka mpi kimvuka ya bansi ya koministe ya Eropa ya Esti fwaka. Mu kutanaka ti bampasi mingi. Ntangu fioti na nima, mu bakisaka nde bo vandaka kusadila bantu mingi mambu ya mbi na République Démocratique Allemande. Mu mbandu, bo vandaka kumona bantu yina vandaka ve kundima malongi ya Bakoministe bonso bantu ya kukonda mfunu. Inki mutindu mambu ya mutindu yai lendaka kusalama? Keti Bakoministe vandaka kutuba ve nde bantu yonso kele kiteso mosi? Keti malongi ya Bakoministe vandaka kaka mambu ya luvunu? Mu kumaka kudiyangisa mingi.

Yo yina, mu sobaka lukanu na mono mpi mu kudipesaka na kubula miziki mpi kusala bifwanisu. Banda pana, mu kumaka kulonguka miziki na nzo-nkanda, mu vandaka kuzola kutanga na nzo-nkanda ya nene sambu na kukuma muntu ya lukumu na miziki. Diaka, mu losaka bikalulu ya mbote yina mu longukaka na kileke. Kulutisa ntangu ya mbote mpi kuzola bana-bankento mingi na mbala mosi kumaka mfunu. Ata mpidina, miziki, kusala bifwanisu mpi kusala mambu yonso ya mu vandaka kuzola, manisaka ve basusi na mono. Nkutu bifwanisu  yina mu vandaka kusala vandaka kupesa boma mingi. Inki ta salama na bilumbu yina ke kwisa, mpi nki kele lukanu ya luzingu?

Nsuka-nsuka, mu yitukaka mingi ntangu mu zwaka bamvutu yina mu vandaka kusosa. Kilumbu mosi na nkokila, mono ti banduku na mu ya nzo-nkanda vandaka kutubila bilumbu ke kwisa. Mandy * mwana ya nzo-nkanda na beto yina vandaka Mbangi ya Yehowa pesaka mu ndongisila ya mbote. Yandi tubaka nde: “Andreas, kana nge ke zola kuzwa bamvutu na bangiufula ya me tala luzingu mpi bilumbu ke kwisa, tadila Biblia mbote-mbote.”

Mu ndimaka kibeni ve, kansi mu bakaka lukanu ya kusosa bamvutu na Biblia. Mandy songaka mu na kutanga mukanda ya Daniele kapu ya zole, mpi mambu yina mu tangaka yitukisaka mu. Mbikudulu yai ke tubila kulandana ya bimfumu yina ta vanda ti bupusi ya ngolo na ntoto ya mvimba tii na bilumbu na beto. Mandy songaka mu bambikudulu ya nkaka ya Biblia ya ke tubila bilumbu ke kwisa. Nsuka-nsuka, mu zwaka bamvutu na bangiufula na mono! Kansi, nani sonikaka bambikudulu yina, mpi nani lendaka kutuba mbote-mbote na ntwala mambu yina ta salama na bilumbu ke kwisa? Keti yo lenda vanda nde Nzambi kele?

Mandy nataka mono na Horst ti nkento na yandi Angelika, yina kele Bambangi ya Yehowa mpi bo sadisaka mu na kubakisa Ndinga ya Nzambi mbote-mbote. Na nima ya ntangu fioti, mu bakisaka nde Bambangi ya Yehowa mpamba bantu ke sadilaka zina ya Nzambi Yehowa mbala na mbala mpi bo ke bendaka dikebi ya bantu na zina yango. (Nkunga 83:18; Matayo 6:9) Mu longukaka nde Yehowa Nzambi ke pesa bantu kivuvu ya kuzinga mvula na mvula na paladisu awa na ntoto. Nkunga 37:9 ke tuba nde: “Bantu yina ke tulaka kivuvu na Yehowa ta baka ntoto.” Mu waka kiese ntangu mu zabaka nde kivuvu yai kele sambu na bantu yonso yina ke zitisaka bansiku ya Nzambi ya ke tubila bikalulu ya mbote yina kele na Biblia.

Kansi, mu vandaka kukuka ve kusoba bikalulu na mono sambu na kuzinga mutindu Biblia ke lomba. Sambu mu nungaka na kisalu na mono ya miziki, mu kumaka muntu ya lulendo, yo yina yo lombaka nde mu longuka ntete na kumonisa kudikulumusa. Diaka, yo vandaka pete ve sambu mu yambula bikalulu na mu ya mbi. Mono ke tonda Yehowa sambu yandi ke monisaka ntima-nda na bantu yina ke salaka ngolo na kusadila mambu yina Biblia ke longa, sambu yandi ke lolulaka bo mpi ke bakisaka bo!

Malongi ya Bakoministe mpi ya bantu yina ke tubaka nde Nzambi kele ve vandaka ti bupusi ya ngolo na luzingu na mu na ntwala nde mu lungisa bamvula 18, kansi banda ntangu yina Biblia ke sobaka luzingu na mono. Mambu yina mu longukaka lembikaka basusi na mu sambu na bilumbu ke kwisa mpi yo pesaka mu lukanu na luzingu. Na 1993 mu bakaka mbotika mpi mu kumaka Mbangi ya Yehowa, mpi na 2 000 mu kwelanaka ti Tabitha mpangi mosi ya kikesa. Beto ke lutisaka ntangu mingi na kusadisa bantu na kuzaba Biblia. Bonso mono, bantu mingi ya beto ke kutanaka ti bo, bo longaka bo malongi ya Bakoministe mpi dilongi yina ke tubaka nde Nzambi kele ve. Mu ke waka kiese mingi ntangu mu ke songaka bo mutindu ya kuzaba Yehowa.

Ntangu mu yantikaka kuvukana ti Bambangi ya Yehowa, bibuti na mono kudiyangisaka mingi. Kansi banda ntangu yina, bo me monaka mutindu kuvukana ti Bambangi ya Yehowa me sobaka luzingu na mono. Mu kele na kiese sambu bo me kumaka kutanga Biblia mpi kukwenda na balukutakanu ya Bambangi ya Yehowa.

Mono ti Tabitha ke zingaka mbote na makwela sambu beto ke zitisaka mbote-mbote bandongisila yina Biblia ke pesaka bantu yina me kwelaka. Mu mbandu kusadila bandongisila na yo ya ke tadila kukangama na nkento to bakala na nge ke landaka kukumisa ngolo makwela na beto.—Baebreo 13:4.

Mu ke vandaka diaka ve ti boma sambu na luzingu mpi mu ke kudiyangisaka diaka ve sambu na bilumbu ke kwisa. Mu kele na kiese ya kuvanda na kati ya dibuta ya bampangi ya ntoto ya mvimba, yina kele na ngemba mpi na bumosi. Na kati ya dibuta yai, beto ke monaka bantu yonso kiteso mosi. Yai kele kima yina mu vandaka kusosa mpi kuzola kuvanda ti yo luzingu na mu ya mvimba.