PAPA ya John bakaka mbotika na nsuka ya bamvu 1950 na mbanza mosi ya fioti na Gujarat na insi Inde. Kansi John, bampangi na yandi tanu mpi mama na bo vandaka bantu ya Katolika mpi kudipesaka mingi na dibundu na bo. Yo yina bo vandaka kuzola ve balukwikilu ya papa na bo.

Kilumbu mosi, papa ya John tindaka John na kupesa mukanda na Mbangi ya Yehowa mosi. Kansi na suka yina, John lwalaka ngolo na musapi ntangu yandi vandaka kukangula tono. Sambu yandi zolaka kulemfukila papa na yandi, yandi kangaka kitende ya lele na mputa yina mpi kwendaka kupesa mukanda.

John kumaka na nzo yango mpi yandi pesaka mukanda na nkento ya mpangi yina. Nkento yai vandaka Mbangi ya Yehowa. Yandi monaka mputa na musapi ya John mpi sadisaka yandi. Mpangi-Nkento bakaka nkisi, yobisaka mputa ya John mpi kangaka yo bande. Na nima, yandi pesaka John mwa kima ya kudia. Ntangu yonso ya bo lutisaka ti John, mpangi-nkento vandaka kuzabisa yandi mambu ya Biblia na mawete yonso.

Sambu mpangi-nkento yina monisilaka John ntima-mbote, malembe-malembe John kumaka kusepela ti Bambangi ya Yehowa. John yulaka yandi malongi zole ya Bambangi ya Yehowa yina me swaswana ti ya Dibundu ya Katolika. Yandi yulaka mpangi-nkento kana Yezu kele Nzambi to kana Bakristu fwete sambila Maria. Sambu mpangi-nkento zabaka Gujarati, ndinga yina John ke tubaka, yandi pesaka John mvutu na ndinga Gujarati mpi tangilaka yandi verse ya Biblia, na nima yandi pesaka John kamukanda “Nsangu ya Mbote ya Kimfumu.”

Ntangu John tangaka kamukanda yina, yandi bakisaka nde mambu yina yandi vandaka kutanga vandaka kieleka. John yulaka mumpe bangiufula zole yina yandi yulaka mpangi-nkento. Mumpe waka makasi mingi, losilaka yandi Biblia mpi nganinaka yandi nde: “Nge me kuma Satana! Songa mono verse yina ke tuba nde Yezu kele ve Nzambi. Songa mono verse yina ke tuba mpi nde beto fwete sambila ve Maria. Pesa mono mvutu!” Mambu yina mumpe salaka pesaka John mpasi. John songaka mumpe nde yandi ta mona yandi diaka ve na dibundu ya Katolika. Banda kilumbu yina, John ke kwendaka diaka ve!

John yantikaka kulonguka Biblia ti Bambangi, ndimaka kieleka mpi kumaka kusadila Yehowa. Na nima, bantu mingi ya dibuta na bo kumaka mpi Bambangi ya Yehowa. Bamvula kiteso ya 60 me luta, kidimbu ya mputa na musapi ya John ke yibusaka yandi kikuma yina me pusaka yandi na kusadila Yehowa luzingu na yandi ya mvimba.—2 Bakorinto 6:4, 6.