Bangiufula ya Batangi
Sambu na nki na ntwala nde Yezu kufwa yandi tubaka mambu yina Davidi tubaka na Nkunga 22:1?
Mambu yina Yezu tubaka na Matayo 27:46 kele na kati ya mambu yina yandi tubaka na ntwala nde yandi fwa. Yandi tubaka nde: “Nzambi na mono, Nzambi na mono, sambu na nki nge me yambula mono?” Ntangu Yezu tubaka mambu yai, yandi lungisaka mambu yina muyimbi-bankunga Davidi tubaka na Nkunga 22:1. (Mar. 15:34) Yo ta vanda mbi kana beto yindula nde Yezu tubaka mambu yai sambu yandi yindulaka nde Tata na yandi yambulaka yandi to sambu yandi kondaka lukwikilu na ntangu yina. Yezu zabaka mbote sambu na nki yo lombaka nde yandi fwa mpi yandi ndimaka kufwa na luzolo yonso. (Mat. 16:21; 20:28) Yandi zabaka mpi nde ntangu yandi ta fwa, Yehowa ta katula “lupangu ya lutaninu” na nziunga na yandi. (Yobi 1:10) Yehowa pesaka nzila nde Yezu kumonisa nde yandi ta bikala ya kwikama tii na lufwa ata yandi kutana ti mambu ya nki mutindu.—Mar. 14:35, 36.
Sambu na nki Yezu tubaka mambu yina kele na Nkunga 22:1? Ata beto me zaba ve na pwelele yonso bikuma yango kansi beto tadila mwa bikuma yina lendaka kupusa Yezu na kutuba mambu yai. *
Ntangu Yezu tubaka mambu yai, yo lenda vanda nde yandi vandaka kumonisa nde Yehowa ta sadisa yandi ve ntangu yandi ta fwa. Yo lombaka nde Yezu kupesa kimenga ya luzingu na yandi kukonda lusadisu ya Yehowa. Yo lombaka nde yandi fwa sambu “yandi meka lufwa sambu na bantu yonso.”—Baeb. 2:9.
Ntangu Yezu tubaka mambu yina kele na Nkunga 22:1, yo lenda vanda nde yandi zolaka kutubila mukanda ya mvimba ya bankunga. Na bilumbu ya Yezu, Bayuda vandaka kukanga baverse mingi ya Bankunga na ntu. Kana bo me wa muntu me tubila verse mosi ya mukanda ya Bankunga, mbala mosi bo vandaka kuyibuka mukanda ya mvimba ya bankunga. Kana Yezu vandaka kutubila mukanda ya mvimba ya bankunga, yandi zolaka kusadisa balongoki na yandi yina vandaka Bayuda na kuyibuka bambikudulu mingi ya kele na nkunga yai ya ke tubila mambu yina ta salama na ntwala nde yandi fwa. (Nk. 22:7, 8, 15, 16, 18, 24) Diaka, baverse ya nsuka ya Nkunga 22 ke kumisa Yehowa mpi ke tuba nde yandi kele Ntotila ya ntoto ya mvimba.—Nk. 22:27-31.
Ntangu Yezu tubaka mambu yai ya Davidi tubaka, yo lenda vanda nde yandi vandaka kumonisa nde yandi salaka ve ata diambu mosi ya mbi. Ntangu fioti na ntwala nde Yezu kufwa, bo kusilaka yandi makambu na tribinale mpi ntangu bo sambisaka yandi bo tubaka nde yandi ke vweza. (Mat. 26:65, 66) Bantu ya Sanedrini vukanaka nswalu na mpimpa mpi bo zengilaka yandi nkanu yina wakanaka ve ti nsiku. (Mat. 26:59; Mar. 14:56-59) Ntangu Yezu tubaka nde: “Nzambi na mono, Nzambi na mono, sambu na nki nge me yambula mono?” Yo lenda vanda nde yandi zolaka kumonisa nde yandi salaka ve diambu mosi ya mbi yina lombaka nde bo fwa yandi na mutindu yina.
Yo lenda vanda nde Yezu zolaka kumonisa nde mutindu Yehowa pesaka nzila nde Davidi muntu yina sonikaka Nkunga 22 kuniokwama, yo ke tendula ve nde Yehowa vandaka kundima yandi diaka ve. Ngiufula yina Davidi yulaka na Nkunga 22:1 ke monisa ve nde yandi kondaka lukwikilu. Na nima ya kuyula ngiufula yina, yandi landaka kutula ntima nde Yehowa ke gulusaka bantu na yandi mpi Yehowa landaka kusakumuna yandi. (Nk. 22:23, 24, 27) Mutindu mosi ata Yezu, “Mwana ya Davidi” niokwamaka na zulu ya nti ya mpasi, yo ke tendula ve nde Yehowa vandaka kundima yandi diaka ve.—Mat. 21:9.
Yo lenda vanda nde Yezu zolaka kumonisa mpasi ya ngolo yina yandi vandaka kuwa mutindu Yehowa taninaka yandi ve ntangu bo vandaka kuniokula yandi sambu yandi monisa kwikama na yandi tii na lufwa. Lukanu ya Yehowa vandaka ve nde Mwana na yandi kuniokwama mpi kufwa. Kansi yo vandaka mfunu nde yandi niokwama mpi yandi fwa sambu Adami ti Eva lemfukilaka ve Yehowa. Yezu salaka ve ata diambu mosi ya mbi kansi yo lombaka nde yandi niokwama mpi yandi fwa sambu na kupesa mvutu na bangiufula yina Satana basisaka mpi sambu na kupesa luzingu na yandi bonso kimenga, sambu na kusumba diaka luzingu yina bantu vidisaka. (Mar. 8:31; 1 Pie. 2:21-24) Yo yina Yehowa tanikaka ve Yezu ntangu bo vandaka kuniokula yandi na ntwala nde yandi fwa.
Yo lenda vanda nde Yezu zolaka kusadisa balongoki na yandi sambu bo bakisa kikuma yina Yehowa pesaka nzila nde yandi fwa mutindu yina. * Yezu zabaka nde mutindu yandi fwaka bonso muntu ya mbi na zulu ya nti ya mpasi, yo ta budisa bantu mingi sakuba. (1 Bak. 1:23) Kana balongoki ya Yezu kutula dikebi kaka na kikuma yina Yezu fwilaka, bo ta bakisa mfunu ya lufwa na yandi. (Bag. 3:13, 14) Bo bakisaka nde yandi vandaka Ngulusi kansi yandi vandaka ve muntu ya mbi.
Yo vanda konso kikuma yina pusaka Yezu na kutuba mambu yina kele na Nkunga 22:1, yandi bakisaka nde yandi vandaka kusala luzolo ya Yehowa mutindu yandi vandaka kufwa na zulu ya nti ya mpasi. Ntangu fioti na nima ya kutuba mambu yina kele na nkunga yai, Yezu tubaka nde: “Yo me lungana!” (Yoa. 19:30; Luka 22:37) Ya kieleka, mutindu Yehowa taninaka ve Yezu ntangu bo vandaka kuniokula yandi na ntwala nde yandi fwa, yo salaka nde Yezu kulungisa mambu yonso yina Yehowa tindaka yandi na kusala. Yo sadisaka yandi diaka na kulungisa mambu yonso yina bo sonikaka sambu na yandi “na Nsiku ya Moize, na Bambikudi, mpi na Bankunga.”—Luka 24:44.
^ par. 2 Tala mpi paragrafe 9 mpi 10 ya disolo “Malongi Yina Beto Ke Baka na Bangogo ya Nsuka ya Yezu” ya kele na Nzozulu ya Nkengi yai.
^ par. 4 Ntangu Yezu vandaka na kisalu na yandi ya kusamuna awa na ntoto, bantangu ya nkaka yandi vandaka kutuba mambu mpi kuyula bangiufula yina vandaka kumonisa ve mutindu yandi vandaka kudiwa. Yandi vandaka kusala mutindu yina sambu na kuzaba bangindu ya balongoki na yandi.—Mar. 7:24-27; Yoa. 6:1-5; tala Nzozulu ya Nkengi ya Oktobri 1, 2010, balut. 12-13.
