1-2. Inki mbandu lenda sadisa beto na kubakisa mambu yina kele na 1 Piere 2:21?

YINDULA nde beno ke tambula na kimvuka, na kisika mosi ya kigonsa na poto-poto. Muntu mosi yina ke zaba nzila mbote ke nata beno. Yandi kele na ntwala mpi ntangu yandi ke tambula, bidimbu ya makulu na yandi ke bikala na ntoto ya poto-poto. Kansi na nima ya mwa ntangu fioti muntu yango ke monana diaka ve. Ata mpidina nge ke wa boma ve. Nge ti bantu yina nge ke tambula ti bo, beno ke landa mbote-mbote bidimbu ya makulu na yandi.

² Bubu yai beto ke zinga na nsi-ntoto ya mbi yina kele bonso kisika yina ya kigonsa mpi Bakristu ya kieleka kele bonso bantu yina ke tambula na kisika yango. Kansi beto kele na kiese sambu Yehowa me pesaka beto Mwana na yandi Yezu Kristu yina kele Ntwadisi ya kuluta mbote mpi yina beto fwete landa mbote-mbote bitambi na yandi. (1 Pie. 2:21) Mukanda mosi ke monisa nde Piere fwanisaka Yezu ti ntwadisi mosi. Mutindu ntwadisi ke bikaka bidimbu ya makulu na yandi, Yezu mpi me bikaka bidimbu ya makulu na yandi sambu beto landa yo. Beto tadila bangiufula yai: Kulanda bitambi ya Yezu ke tendula nki? Sambu na nki beto fwete landa yo? Mpi nki mutindu beto lenda landa yo?

3. Kulanda bitambi ya muntu ke tendula nki?

³ Kulanda bitambi ya muntu ke tendula nki? Bantangu ya nkaka na Biblia, bangogo “kutambula” mpi “makulu” ke tendulaka mambu yina muntu ke salaka na luzingu na yandi. (Kuy. 6:9; Bing. 4:26) Bo lenda fwanisa luzingu ya muntu ti bidimbu ya makulu na yandi yina yandi ke bika ntangu yandi ke tambula. Yo yina, kulanda bitambi ya muntu ke tendula kulanda mbandu na yandi.

4. Kulanda bitambi ya Yezu ke tendula nki?

 ⁴ Sesepi yai kulanda bitambi ya Yezu ke tendula nki? Yo ke tendula kulanda mbandu na yandi. Na verse ya me simba disolo yai, ntumwa Piere ke tubila mbandu ya mbote yina Yezu pesaka mutindu yandi kangaka ntima na bampasi. Katula yina, beto lenda landa mbandu ya Yezu na mambu ya nkaka yina yandi salaka. (1 Pie. 2:18-25) Ya kieleka, mambu yonso yina Yezu tubaka mpi salaka kele mbandu ya mbote yina beto fwete landa.

5. Keti bantu ya kukonda kukuka lenda landa mbote mbandu ya kukuka ya Yezu? Tendula.

⁵ Keti beto lenda landa mbandu ya mbote ya Yezu ata beto kele bantu ya kukonda kukuka? Ee. Kuvila ve nde Piere tubaka nde beto fwete “landa bitambi ya [Yezu] mbote-mbote” kansi yandi tubaka ve nde beto fwete landa yo na mutindu ya kukuka. Kana beto landa bitambi na yandi mbote-mbote, ata beto kele bantu ya kukonda kukuka beto ta sadila mambu yai ya ntumwa Yoane tubaka: “Beno tambula mutindu muntu yina [Yezu] tambulaka.”—1 Yoa. 2:6.

6-7. Sambu na nki beto ke tuba nde kana beto landa bitambi ya Yezu beto ta kuma banduku ya ngolo ya Yehowa?

⁶ Kana beto landa bitambi ya Yezu beto ta kuma banduku ya ngolo ya Yehowa. Sambu na nki beto ke tuba mutindu yai? Ya ntete, Yezu pesaka mbandu ya mbote na mutindu ya kusepedisa Nzambi. (Yoa. 8:29) Yo yina kana beto landa bitambi na yandi, beto ta sepedisa Yehowa. Kana beto sala mutindu yina Tata na beto ya zulu ta pusana pene-pene na beto sambu yandi ke pusanaka pene-pene ya bantu yina ke salaka ngolo sambu na kukuma banduku na yandi.—Yak. 4:8.

⁷ Ya zole, Yezu landaka mbandu ya Tata na yandi na mutindu ya kukuka. Yo yina yandi tubaka nde: “Muntu yina me mona mono me mona mpi Tata.” (Yoa. 14:9) Kana beto landa mbandu ya Yezu mpi mutindu yandi sadilaka bantu mambu, yo ta sadisa beto na kulanda mbandu ya Yehowa. Mu mbandu, yandi wilaka muntu ya lepre mawa,  yandi kuditulaka na kisika ya nkento yina vandaka kubela maladi ya ngolo mpi yandi wilaka bantu yina fwilaka bampangi na bo mawa. (Mar. 1:40, 41; 5:25-34; Yoa. 11:33-35) Kana beto ke landa mbandu ya Yehowa, kinduku na beto ta kuma ngolo ti yandi.

8. Inki mutindu kulanda bitambi ya Yezu ta sadisa beto na ‘kununga’ nsi-ntoto?

⁸ Kana beto landa bitambi ya Yezu beto ta bika ve nde nsi-ntoto yai ya mbi kukatula beto dikebi na kulanda kusadila Yehowa. Na mpimpa ya nsuka ya luzingu ya Yezu awa na ntoto, yandi tubaka nde: “Mono me nunga nsi-ntoto.” (Yoa. 16:33) Yandi zolaka kutuba nde yandi bikaka ve nde mabanza, balukanu mpi bisalu ya bantu ya nsi-ntoto yai kukanga yandi nzila ya kusadila Yehowa. Yezu zabaka nde yandi kwisaka na ntoto sambu na kunwanina zina ya Yehowa. Yo yina yandi bikaka ve nde ata kima mosi kukanga yandi nzila ya kusala yo. Ebuna beto? Na nsi-ntoto yai, mambu kele mingi yina lenda kanga beto nzila ya kusadila Yehowa. Kana beto landa kutula dikebi na kusala luzolo ya Yehowa, beto mpi ta “nunga” nsi-ntoto yai bonso Yezu.—1 Yoa. 5:5.

9. Inki beto fwete sala sambu na kubikala na nzila ya luzingu ya mvula na mvula?

⁹ Kana beto landa bitambi ya Yezu beto ta baka luzingu ya mvula na mvula. Ntangu leke mosi ya mvwama yulaka Yezu mambu yina yandi fwete sala sambu na kubaka luzingu ya mvula na mvula, Yezu songaka yandi nde: “Kwisa kulanda mono.” (Mat. 19:16-21) Yezu songaka Bayuda yina vandaka kukwikila ve nde yandi kele Kristu mambu yai: “Mameme na mono . . . ke landaka mono. Mono ke pesa bo luzingu ya mvula na mvula.” (Yoa. 10:24-29) Yezu songaka Nikodemo muntu ya Sanedreni yina vandaka kusepela ti malongi na yandi nde bantu yina ‘ke monisa lukwikilu na yandi’ ta ‘baka luzingu ya mvula na mvula.’ (Yoa. 3:16) Beto ke monisaka lukwikilu na Yezu ntangu beto ke sadilaka mambu yina yandi longaka mpi ke salaka mambu yina yandi salaka. Kana beto sala mutindu yai, beto ta bikala na nzila ya luzingu ya mvula na mvula.—Mat. 7:14.

10. Inki beto fwete sala sambu na ‘kuzaba’ Yezu mbote? (Yoane 17:3)

¹⁰ Na ntwala ya kulanda bitambi ya Yezu mbote-mbote, beto fwete zaba yandi. (Tanga Yoane 17:3.) Beto fwete landa kusala mambu mingi sambu na ‘kuzaba’ Yezu. Beto fwete landa kulonguka mambu mingi ya me tala yandi. Mu mbandu, bikalulu na yandi ya mbote mpi mutindu na yandi ya kuyindula. Ata beto me salaka bamvula mingi na dibundu ya Yehowa, beto fwete landa ‘kuzaba’ Yehowa mpi Mwana na yandi.

11. Inki mambu Baevanzile iya ke tubilaka?

¹¹ Sambu na kusadisa beto na kuzaba Mwana na yandi, Yehowa me salaka nde bo sonika Baevanzile iya (Mukanda ya Matayo, Marko, Luka mpi Yoane) na Ndinga na yandi. Baevanzile yina ke tubilaka disolo ya luzingu ya Yezu mpi ya kisalu na yandi ya kusamuna. Yo ke tubilaka mambu  yina Yezu tubaka, mambu yina yandi salaka mpi mutindu yandi vandaka kudiwa. Mikanda yina iya ke sadisa beto na ‘kutadila na dikebi’ yonso mbandu ya Yezu. (Baeb. 12:3) Yo ke tubila bitambi yina Yezu bikaka. Yo yina, kana beto ke longuka mambu yina kele na Baevanzile, beto ta zaba Yezu mbote. Yo ta sadisa beto na kulanda bitambi na yandi mbote-mbote.

12. Inki beto lenda sala sambu na kubaka mambote na mambu yina kele na Baevanzile?

¹² Sambu na kubaka mambote na mambu yina kele na Baevanzile, beto fwete suka kaka ve na kutanga yo. Beto fwete baka mpi ntangu ya kulonguka yo na dikebi yonso mpi kuyindulula mambu yina mbote-mbote. (Tala mpi Yozue 1:8, noti na nsi ya lutiti.) Beto tadila mambu zole yina beto lenda sala sambu na kuyindulula mambu yina beto ke tanga na Baevanzile mpi kusadila yo.

13. Inki mutindu nge lenda sala bonso nde disolo yina nge ke tanga na Evanzile ke salama?

¹³ Ya ntete, sala bonso nde masolo yina nge ke tanga na Baevanzile ke salama. Mona na mabanza mambu yina salamaka mpi kudikotisa na disolo. Sambu na kusala yo, sala mwa bansosa na mikanda yina dibundu ya Yehowa me basisaka. Tala mambu yina kele na ntwala mpi na nima ya disolo yina nge ke longuka. Sosa kuzaba mambu ya me tala bantu yina disolo yina nge ke tanga ke tubila mpi bisika yina bo vandaka. Fwanisa disolo yina nge ke longuka ti disolo ya nkaka ya ke wakana ti yina nge ke longuka na Evanzile ya nkaka. Bantangu ya nkaka, nsoniki mosi ya Evanzile lenda tubila diambu mosi ya mfunu yina nsoniki ya nkaka tubilaka ve.

14-15. Inki mutindu beto lenda sadila mambu yina beto ke tanga na Baevanzile na luzingu na beto?

¹⁴ Ya zole, sadila mambu yina nge ke tanga na Baevanzile. (Yoa. 13:17) Na nima ya kulonguka mbote-mbote disolo mosi na Evanzile, kudiyula nde: ‘Keti kele ti dilongi mosi na disolo yai, yina mono lenda sadila na luzingu na mono? Inki mutindu mono lenda sadila disolo yai sambu na kusadisa muntu ya nkaka?’ Yindula muntu mosi ya nge me zaba mpi songa yandi dilongi yina nge me baka na mutindu ya mbote mpi na zola yonso.

 ¹⁵ Beto tadila mbandu mosi yina ta sadisa beto na kusadila mbote mabanza yai zole. Beto ta tadila disolo ya mufwidi ya nsukami yina Yezu monaka na tempelo.

16. Tubila mutindu mambu ya kele na Marko 12:41 salamaka.

¹⁶ Mona na mabanza disolo yina nge ke tanga. (Tanga Marko 12:41.) Mona na mabanza mutindu mambu ke salama. Beto kele na Nisani 11 ya mvu 33 ya ntangu na beto, mwa bilumbu fioti na ntwala nde bo fwa Yezu. Yezu me longa kilumbu ya mvimba na tempelo. Kansi bamfumu ya mabundu ke telemina yandi. Mingi na kati na bo yulaka yandi nde, na nki nswa yandi ke sala kisalu yina? Bankaka yulaka yandi bangiufula ya ngolo. (Mar. 11:27-33; 12:13-34) Ntangu yai, Yezu me kwenda na kisika ya nkaka na tempelo. Yo ke monana nde Yezu me kwenda kisika yina bo vandaka kubinga, Kibansala ya Bankento. Kuna, yandi ke mona bakesi ya makabu yina kele na balweka ya bibaka ya kibansala. Yandi me vanda mpi yandi ke tala mutindu bantu ke tula makabu na bakesi. Yandi ke mona mutindu bamvwama ke tula mbongo mingi ya bibende. Mbala ya nkaka sambu yandi kele pene-pene ya bakesi yo yina yandi ke wa makelele ya mbongo mutindu yo ke kota na bakesi.

17. Inki mufwidi ya nsukami yina Marko 12:42 ke tubila salaka?

¹⁷ Tanga Marko 12:42. Na nima ya mwa ntangu, nkento mosi me benda dikebi ya Yezu. Yandi kele ‘mufwidi ya nsukami.’ (Luka 21:2) Yandi ke zingaka na mpasi mpi yo ke monana nde yandi ke vandaka ve ti mbongo ya kufwana sambu na kusumba bima yina yandi kele na yo mfunu. Ata mpidina, yandi me kwenda na ntwala ya kesi mosi mpi me tula mbongo zole ya bibende na kinsweki. Mbala ya nkaka yo ke tula ve makelele ya ngolo ntangu yo ke bwa na kesi. Yezu ke zaba mbongo yina yandi me tula na kesi, yandi me tula baleptoni zole. Yo vandaka mbongo ya fioti kibeni ya bibende yina bantu vandaka kusadila na ntangu yina. Yo vandaka ve mbongo yina bo lendaka kusumba ata kandeke mosi ya ntalu fioti kibeni yina bo vandaka kuteka.

18. Mutindu Marko 12:43, 44 ke monisa yo, nki Yezu tubaka sambu na dikabu yina nkento ya mufwidi tulaka?

¹⁸ Tanga Marko 12:43, 44. Mambu yina mufwidi yai me sala me yitukisa Yezu mingi. Yo yina, yandi me binga balongoki na yandi mpi yandi me benda dikebi na bo na mufwidi yai mpi yandi me songa bo nde: “Mufwidi yai ya nsukami me tula mbongo mingi kuluta bantu yonso ya nkaka.” Na nima yandi me tuba diaka nde: “Bo yonso [disongidila bamvwama] me tula yina me lutana na zulu ya kimvwama na bo, kansi yandi, na kinsukami na yandi, yandi me tula yonso yina yandi vandaka na yo, bima na yandi yonso ya kuzingila.” Ntangu mufwidi yai ya kwikama tulaka mbongo yonso yina yandi vandaka ti yo, yandi pesaka luzingu na yandi na Yehowa mpi tulaka ntima nde Yehowa ta lungisa bampusa na yandi.—Nk. 26:3.

19. Inki dilongi ya mfunu beto ke baka na mambu yina Yezu tubaka sambu na mufwidi yina ya nsukami?

¹⁹ Sadila malongi yina nge me baka na luzingu na nge. Kudiyula nde: ‘Inki dilongi mono lenda baka na mambu yina Yezu tubaka sambu na mufwidi yina ya nsukami?’ Yindula mambu ya mufwidi yina. Ntembe kele ve nde yandi vandaka ti mfunu ya kupesa Yehowa makabu mingi. Yo yina, yandi pesaka yonso yina yandi vandaka ti yo; yandi pesaka Yehowa dikabu ya kuluta mfunu. Yezu zabaka nde dikabu na yandi vandaka mfunu mingi na meso ya Tata na yandi. Yo kele dilongi mosi ya mfunu sambu na beto. Yehowa ke sepelaka ntangu beto ke pesaka yandi makabu na beto ya kuluta mbote disongidila kisalu yina beto ke sadilaka yandi na ntima na beto ya mvimba mpi na moyo na beto ya mvimba. (Mat. 22:37; Bakol. 3:23) Yehowa ke vandaka na kiese ntangu yandi ke monaka mutindu beto ke salaka yonso sambu na kusadila yandi. Yo ke tendula ntangu yina  beto ke lutisaka mpi ngolo yina beto ke pesaka na kisalu na yandi disongidila kusamuna mpi kukwenda na balukutakanu.

20. Inki mutindu nge lenda sadila dilongi yina beto me baka na disolo ya mufwidi? Pesa mbandu.

²⁰ Inki mutindu nge lenda sadila dilongi yina nge ke baka na disolo ya mufwidi sambu na kusadisa bantu ya nkaka? Yindula bantu yina nge lenda ndimisa nde Yehowa ke sepelaka ti kisalu yina bo ke salaka sambu na kusadila yandi. Mu mbandu, keti nge ke zaba mpangi-nkento mosi ya mununu yina mbala ya nkaka ke kudiyangisa to ke kudimona mfunu ve sambu sante na yandi ke pesa yandi ve nzila ya kusamuna mingi? To keti nge ke zaba mpangi-bakala mosi yina ke bela maladi yina ke manaka ve, yina me lemba nitu sambu yandi ke kuka ve kukwenda konso mposo na Nzo ya Kimfumu? Tubila bo ‘mambu ya mbote yina ke tunga.’ (Baef. 4:29) Songa bo malongi ya ke pesa kikesa yina beto me longuka na disolo ya mufwidi yai ya nsukami. Bangogo na nge ya mbote ta sadisa bo na kundima nde Yehowa ke sepelaka ntangu beto ke pesaka yandi makabu na beto ya mbote. (Bing. 15:23; 1 Bate. 5:11) Kana nge ke sikisa bantu ya nkaka sambu bo ke pesa Yehowa makabu na bo ya mbote ata yo kele ya fioti, yo ta monisa nde nge ke landa bitambi ya Yezu mbote-mbote.

21. Inki kele lukanu na nge?

²¹ Beto ke pesaka Yehowa matondo mingi sambu masolo ya Baevanzile ke tubilaka mambu mingi yina me tala luzingu ya Yezu, yo ke sadisaka beto na kulanda mbandu na yandi mpi na kulanda bitambi na yandi mbote-mbote. Nge lenda longuka Baevanzile na kulonguka na nge mosi to na Lusambu ya Dibuta. Beto fwete vila ve nde sambu beto baka mambote na mambu yina beto ke tanga, beto fwete mona na mabanza mutindu mambu ya disolo yango ke salama mpi kusadila yo na luzingu na beto. Beto fwete landa mbandu ya Yezu na mambu yina yandi salaka mpi na mambu yina yandi tubaka. Na disolo ya ke landa, beto ta tubila malongi yina beto ta baka na bangogo ya nsuka ya Yezu na ntwala nde yandi fwa.