Diambu ya mawa kele nde ntangu mono lungisaka bamvula kiteso ya 13, kinduku na mono ti Yehowa vandaka diaka ve ngolo. Mono vandaka kumona nde bana ya nzo-nkanda vandaka na kimpwanza mpi mono vandaka na mfunu ya kimpwanza yina. Bansiku ya bibuti na mono mpi ya Biblia kumaka kizitu sambu na mono. Ata mono vandaka kundima nde Yehowa kele, kimpeve na mono yantikaka kubeba.

Ata mpidina, mono yambulaka ve kusamuna. Mono vandaka ve kusamuna mingi, mono vandaka ve kudibongisa na ntwala ya kukwenda na kisalu ya kusamuna, yo yina yo vandaka mpasi sambu na kuyantika disolo ti muntu. Mono vandaka ve ti bantu ya kuvutukila mpi mono vandaka kusepela diaka ve ti kisalu ya kusamuna. Mono vandaka kudiyula nde: ‘Inki mutindu bampangi ya nkaka ke landaka kusamuna, konso mposo mpi konso ngonda?’

Ntangu mono lungisaka bamvula 17, mono vandaka kibeni ti mfunu ya kuvanda na kimpwanza. Yo yina mono kangaka bima na mono, mono katukaka na nzo mpi mono kwendaka na Australie. Yo pesaka bibuti na mono mpasi kibeni. Bo kudiyangisaka mingi kansi bo yindulaka nde mono ta landa kusadila Yehowa.

 Na Australie kimpeve na mono vandaka diaka mbote ve. Mono kumaka kutina balukutakanu. Mono kangakama ti batoko ya nkaka mpi beto vandaka kukwenda na balukutakanu mpi na nima beto vandaka kukwenda na babare na mpimpa sambu na kunwa malafu mpi kukina. Ntangu mono ke yindulaka mambu yina, mono ke bakisaka nde na ntangu yina, mono vandaka dikulu mosi na kieleka mpi dikulu ya nkaka na nganda kansi mono vandaka ve na kiese ata fioti.

Kiteso ya bamvula zole na nima, mono lutisaka mwa ntangu ti mpangi-nkento mosi yina zabaka ve nde yandi vandaka kusadisa mono na kutadila diaka mambu ya luzingu na mono. Mono vandaka kuzinga nzo mosi ti bampangi-bankento tanu yina vandaka mpi me kwela ntete ve mpi beto bingisaka nkengi ya nziunga ti nkento na yandi Tamara sambu na kulutisa mposo mosi na nzo na beto. Ntangu nkengi ya nziunga vandaka kusala mambu ya dibundu, beto vandaka kulutisa ntangu ti nkento na yandi mpi beto vandaka kuseka. Mono vandaka kusepela ti ntangu yina beto vandaka kulutisa. Mpangi Tamara vandaka kutudila bantu dikebi mpi yo vandaka ve mpasi sambu na kusolula ti yandi. Yo yitukisaka mono na kumona nde muntu ya kimpeve ke lutisa ntangu ti beto mpi ke seka ti beto.

Mpangi Tamara vandaka muntu mosi ya tiya-tiya. Zola na yandi sambu na kieleka mpi sambu na kisalu ya kusamuna, sambukilaka mono. Yandi vandaka na kiese mingi ya kusala bikesa sambu na kusadila Yehowa kansi mono vandaka ve na kiese sambu mono vandaka ve kusala bikesa sambu na kusadila Yehowa. Mono sepelaka mingi ti kikalulu na yandi ya mbote mpi kiese ya kieleka yina yandi vandaka na yo. Mbandu na yandi bendaka dikebi na mono na kieleka yai ya mfunu ya kele na Biblia: Yehowa ke zolaka bantu yonso yina ke sadilaka yandi “na kiese” mpi ti “milolo ya kiese.”—Nk. 100:2.

Mono vandaka ti mfunu ya kukuma ti kiese yina mpangi Tamara vandaka ti yo kansi yo lombaka nde mono soba kibeni. Yo bakaka ntangu kansi mono yantikaka kusoba malembe-malembe. Mono yantikaka kudibongisa na ntwala ya kukwenda na kisalu ya kusamuna mpi mono kumaka kusala kisalu ya kimupasudi-nzila nsadisi mbala na mbala. Yo  sadisaka mono na kusolula ti bantu kukonda mpasi mpi na kuditudila ntima. Sambu mono kumaka kusadila mingi Biblia na kisalu ya kusamuna, mono kumaka kusepela mingi ti kisalu ya kusamuna. Na nima mono kumaka kusala kisalu ya kimupasudi-nzila nsadisi konso ngonda.

Mono yantikaka kusala kinduku ti bampangi ya bamvula yonso, bayina vandaka kusala bikesa ya kusadila Yehowa mpi vandaka na kiese ya kusadila yandi. Mbandu na bo ya mbote sadisaka mono na kutadila diaka mambu yina mono fwete tula na kisika ya ntete na luzingu na mono mpi na kuyantika kutanga Biblia konso kilumbu. Mono yantikaka kusepela mingi kibeni ti kisalu ya kusamuna mpi mono kumaka mupasudi-nzila ya ntangu yonso. Mono kumaka na kiese mpi mono vandaka kudiwa mbote na dibundu.

Mvula mosi na nima, mono kutanaka ti mpangi Alex, muntu mosi ya mbote yina ke zolaka Yehowa mpi kisalu ya kusamuna. Yandi vandaka nsadi ya kisalu mpi yandi salaka kisalu ya kimupasudi-nzila bamvula 6. Alex samunaka mpi mwa bamvula na Malawi, ntangu mpusa ya bansamuni vandaka kuna. Kuna, yandi kangamaka ti bamisionere yina pesaka yandi mbandu ya mbote mpi bo siamisaka yandi na kulanda kutula mambu ya Kimfumu na kisika ya ntete.

Na 2003, beto kwelanaka ti Alex mpi beto landaka kusala kisalu na beto ya ntangu yonso. Beto me bakaka malongi mingi ya mbote mpi Yehowa me sakumunaka beto na mitindu mingi kibeni.

Na 2009, beto kumaka bamisionere na Timor-Oriental, insi mosi ya fioti na archipel Indonésien. Beto yitukaka mingi kibeni, beto waka kiese mpi beto vandaka na mwa boma. Bangonda tanu na nima, beto kumaka na Dili, ntu-mbanza ya insi yina.

Kuna luzingu vandaka ve kiteso mosi ti kisika yina beto katukaka. Yo lombaka nde beto yikama ti mutindu bantu ke zingaka kuna, ndinga ya mpa, madia mpi luzingu na bo. Na kisalu ya kusamuna, mbala mingi beto vandaka kukutana ti bantu yina  vandaka kibeni bansukami, bantu yina me tangaka ve mingi mpi bayina vandaka kuniokwama. Bantu mingi vandaka ti bifu na nitu, bo vandaka kuniokwama na mabanza sambu na bitumba mpi mubulu. *

Mono kumaka kusepela mingi ti kisalu ya kusamuna. Mu mbandu kilumbu mosi mono kutanaka ti Maria, * mwana-nkento mosi ya bamvula 13 yina vandaka ti bilele ya mvindu. Bamvula fioti lutaka banda mama na yandi fwaka mpi yandi vandaka kukutana ti papa na yandi na mpasi. Maria zabaka ve mambu yina yandi fwete sala na luzingu na yandi. Mono ke yibuka kilumbu mosi yandi vandaka kudila ntangu yandi vandaka kusonga mono mambu yina vandaka kuyangisa yandi. Kansi mono bakisaka ve mambu yina yandi vandaka kutuba sambu na ntangu yina mono zabaka ve mbote ndinga yina yandi vandaka kutuba. Mono sambaka Yehowa mpi mono lombaka yandi na kusadisa mono na kupesa Maria kikesa mpi na nima mono yantikaka kutanga baverse yina lenda pesa yandi kikesa. Na nima ya bamvula fioti, mono monaka mutindu kieleka sobaka luzingu mpi bikalulu ya Maria. Yandi bakaka mbotika mpi bubu yai yandi ke longukaka ti bantu Biblia. Bubu yai, Maria kele ti dibuta ya nene ya kimpeve mpi yandi me kumaka na kiese.

Yehowa ke sakumuna kisalu ya kusamuna na Timor-Oriental. Bansamuni mingi me baka mbotika na bamvula 10 ya me katuka kuluta. Mingi na kati na bo kele bapasudi-nzila, bansadi ya kisalu mpi bankuluntu. Bankaka ke sadilaka Yehowa na babiro ya ke balulaka mikanda na bandinga ya nkaka. Yo ke pesaka mono kiese mingi na kuwa mutindu bo ke yimbaka na balukutakanu, mutindu bo ke vandaka na kiese mpi mutindu bo ke yelaka na kimpeve.

Luzingu yina beto vandaka ti yo na Timor-Oriental vandaka ve kiteso mosi ti yina beto vandaka ti yo na Australie. Kansi mono ke vandaka kaka na kiese ya mingi. Bantangu ya nkaka beto vandaka kukota na kamio mosi ya fioti ya kufuluka ti bantu, ti bambisi ya kukawuka mpi ndunda. Bilumbu ya nkaka beto vandaka kulonguka ti bantu Biblia na kanzo mosi ya tiya mingi, yina vandaka mvindu mpi bansusu vandaka kutambula-tambula na kati. Ata mpidina, mono vandaka kaka na kiese mpi mbala mingi mono vandaka kutuba nde: ‘Luzingu yai kele mbote kibeni!’

Mono ke pesaka bibuti na mono mersi mingi mutindu bo salaka bikesa sambu na kulonga mono banzila ya Yehowa mpi mutindu bo sadisaka mono ntangu mono vandaka leke. Mono me monaka kieleka yina Bingana 22:6 ke tubaka. Papa ti Mama kele na kiese mingi sambu na mono ti Alex. Bo ke sepelaka mutindu Yehowa ke sadilaka beto. Banda na 2016 beto ke salaka na kisalu ya nziunga na Australie mpi na teritware ya Betele ya Australie.

Mono ke ndimaka ve nde ntete mono vandaka ve kuzola kisalu ya kusamuna. Kansi bubu yai mono me kumaka kuzola kisalu ya kusamuna. Mono me bakisa nde ata beto ke kutana ti mambu ya kiese to ya mpasi na luzingu, beto ta vanda ti kiese ya kieleka kaka kana beto ke sadila Nzambi na ntima ya mvimba. Ya kieleka bamvula 18 yina mono me sala na kisalu ya Yehowa ti Alex, me sadisa mono na kuvanda na kiese kibeni. Mono me bakisa kieleka ya mambu yina muyimbi-bankunga Davidi songaka Yehowa. Yandi tubaka nde: “Bantu yonso yina ke tinaka na nge ta vanda na kiese; bo ta tulaka milolo ya kiese ntangu yonso . . . mpi bantu yina ke zolaka zina na nge ta yangalala na nge.”—Nk. 5:11.