1. Kana beto ke tala bima yonso yina Yehowa me salaka, nki beto lenda tuba?

KANA beto tala bima yonso yina Yehowa me salaka, beto lenda tuba mambu yina muyimbi-bankunga Davidi tubaka. Yandi sambaka Yehowa mpi tubaka nde: “Kana mono tala zulu na nge, bisalu ya misapi na nge, ngonda ti bambwetete yina nge me yidikaka, muntu kele nani sambu nge yindula yandi, mpi mwana ya muntu kele nani sambu nge keba yandi?” (Nk. 8:3, 4) Bonso Davidi, kana beto kudifwanisa ti bima yonso yina Yehowa me salaka na zulu mpi na ntoto, beto ta bakisa nde beto kele fioti kansi Yehowa ke tudilaka beto dikebi. Mutindu beto ta mona yo, Yehowa tudilaka bantu ya ntete, Adami ti Eva dikebi mpi yandi kotisaka bo na dibuta na yandi.

2. Inki vandaka lukanu ya Yehowa sambu na bana na yandi ya ntete yina vandaka awa na ntoto?

² Adami ti Eva vandaka bana ya ntete ya Yehowa awa na ntoto mpi Yehowa vandaka Tata na bo ya zola. Yandi pesaka bo kisalu ya kusala. Yandi songaka bo nde: “Beno buta mingi mpi beno kuma mingi, beno fulusa ntoto mpi beno yala yo.” (Kuy. 1:28) Yehowa zolaka nde bo buta bana mpi bo tanina ntoto, kisika yina yandi pesaka bo na kuzinga. Kana Adami ti Eva lemfukilaka Yehowa mpi kana bo salaka mambu yina yandi lombaka bo na kusala, bo ti bana na bo zolaka kubikala na dibuta ya Yehowa mvula na mvula.

3. Sambu na nki beto ke tuba nde Yehowa pesaka Adami ti Eva kisika mosi ya mfunu na dibuta na yandi?

³ Yehowa pesaka Adami ti Eva kisika mosi ya mfunu na dibuta na yandi. Na Nkunga 8:5, Davidi tubaka mambu yai na yina me tala mutindu Yehowa salaka muntu. Yandi tubaka nde: “Nge kulumusaka yandi mwa fioti na nsi ya bawanzio, mpi nge pesaka yandi  nkembo ti lukumu.” Ya kieleka, Nzambi me pesaka ve bantu ngolo, mayele mpi makuki kiteso mosi ti bawanzio. (Nk. 103:20) Bantu kele “mwa fioti na nsi” ya bawanzio. Yo ke yitukisa kibeni! Yehowa pesaka bibuti na beto ya ntete luzingu ya mbote.

4. Inki kuminaka Adami ti Eva sambu bo lemfukilaka ve Yehowa mpi nki beto ta tubila na disolo yai?

 ⁴ Diambu ya mawa kele nde, Adami ti Eva vandaka diaka ve na dibuta ya Yehowa. Yo me natilaka bana na bo bampasi mutindu beto ta mona yo na disolo yai. Kansi Yehowa me sobaka ve lukanu na yandi. Yandi ke zolaka nde bantu ya bulemfu kuvanda bana na yandi mvula na mvula. Na disolo yai, beto ta tubila ntete mutindu Yehowa me monisaka nde beto kele mfunu na meso na yandi. Na nima, beto ta tubila mambu yina beto lenda sala sambu na kumonisa nde beto ke zola kuvanda na dibuta na yandi. Mpi na nsuka, beto ta tubila mambote yina bana ya Yehowa ta baka mvula na mvula awa na ntoto.

5. Inki beto lenda sala sambu na kupesa Yehowa lukumu mutindu yandi me salaka beto na kifwani na yandi?

⁵ Yehowa me salaka beto na kifwani na yandi sambu na kumonisa nde beto kele mfunu. (Kuy. 1:26, 27) Yo yina, beto lenda yedisa mpi kumonisa bikalulu na yandi ya kitoko mu mbandu zola, mawa, kwikama mpi lunungu. (Nk. 86:15; 145:17) Ntangu beto ke monisaka bikalulu yai, beto ke pesaka Yehowa lukumu mpi beto ke monisaka nde beto ke monisila yandi ntonda. (1 Pie. 1:14-16) Ntangu beto ke salaka mambu yina ke sepedisaka Tata na beto ya zulu, beto ke vandaka na kiese. Diaka, mutindu Yehowa me salaka beto na kifwani na yandi, yandi me pesaka beto dibaku ya kukuma bantu yina yandi ke zolaka nde bo vanda na dibuta na yandi.

6. Inki mutindu Yehowa monisaka nde bantu kele mfunu mingi ntangu yandi salaka ntoto?

⁶ Yehowa yidikilaka beto kisika ya kitoko ya kuzinga. Bamvula mingi na ntwala nde Yehowa kusala muntu ya ntete, yandi yidikaka ntoto sambu bantu kuzinga. (Yobi 38:4-6; Yer. 10:12) Yehowa kele ntima-mbote mpi yandi ke kabaka. Yo yina yandi me pesaka beto bima mingi ya mbote sambu beto vanda na kiese. (Nk. 104:14, 15, 24) Yandi bakaka ntangu ya kutala bima yina yandi salaka mpi yandi ‘monaka nde yo vandaka mbote.’ (Kuy. 1:10, 12, 31) Yandi pesaka bantu “kiyeka na zulu” ya bima ya kitoko yina yandi salaka sambu na kumonisa nde bo kele mfunu mingi na meso na yandi. (Nk. 8:6) Nzambi ke zola nde bantu ya kukuka kutanina mvula na mvula bima ya kitoko yina yandi me salaka. Keti nge ke pesaka Yehowa mersi mbala na mbala sambu na dikabu yina ya kitoko?

7. Inki mutindu Yozue 24:15 ke monisa nde muntu kele ti nswa ya kupona?

⁷ Yehowa me pesaka beto nswa ya kupona. Beto lenda pona mambu yina beto ta sala na luzingu na beto. (Tanga Yozue 24:15.) Nswa ya kupona ke tendula makuki ya beto kele ti yo ya kupona mambu yina beto ta sala. Nzambi ke zolaka beto mpi yandi ke waka kiese ntangu beto ke ponaka kusadila yandi. (Nk. 84:11; Bing. 27:11) Beto lenda sadila nswa na beto ya kupona sambu na kubaka balukanu ya mbote. Beto tadila mbandu yina Yezu me bikilaka beto.

8. Pesa mbandu ya ke monisa mutindu Yezu sadilaka nswa na yandi ya kupona.

⁸ Bonso Yezu, beto lenda pona na kutula mambote ya bantu ya nkaka na kisika ya ntete. Kilumbu mosi, ntangu Yezu ti bantumwa na yandi lembaka mingi, bo kwendaka na kisika mosi ya pima sambu na kupema. Kansi bo pemaka ve. Bantu mingi monaka bo mpi bo vandaka kuzola kibeni nde Yezu kulonga bo. Yezu waka ve makasi. Yandi wilaka bo mawa. Inki yandi salaka? “Yandi yantikaka kulonga bo mambu mingi.”  (Mar. 6:30-34) Kana beto ke landa mbandu ya Yezu mpi beto ke sadila ntangu mpi ngolo na beto sambu na kusadisa bantu ya nkaka, beto ta pesa Tata na beto ya zulu lukumu. (Mat. 5:14-16) Beto ta monisa mpi Yehowa nde beto ke zola kuvanda na dibuta na yandi.

9. Inki makuki mpi mukumba ya mfunu mingi Yehowa me pesaka bantu?

⁹ Yehowa me pesaka bantu makuki ya kubuta bana, mukumba ya kulonga bo na kuzola yandi mpi na kusadila yandi. Kana nge kele ti bana, keti nge ke monisaka ntonda sambu na dikabu yina ya mfunu? Yehowa me pesaka bawanzio makuki ya kusala mambu mingi ya mbote, kansi yandi me pesaka bo ve makuki ya kubuta. Yo yina, bibuti fwete monisa ntonda ya mingi sambu na mukumba yina bo kele ti yo ya kusansa bana. Yehowa me pesaka bibuti mukumba ya mfunu ya kusansa bana na bo ‘na malongi mpi na balukebisu na yandi.’ (Baef. 6:4; Kul. 6:5-7; Nk. 127:3) Sambu na kusadisa bibuti, dibundu ya Yehowa ke basisaka bisadilu mingi ya ke tendulaka Biblia mu mbandu, mikanda, bavideo, bankunga mpi masolo ya ke basikaka na Internet. Ya kieleka, Tata na beto ya zulu mpi Mwana na yandi, ke zolaka baleke. (Luka 18:15-17) Yehowa ke vandaka na kiese mingi ntangu bibuti ke tudilaka yandi ntima mpi ke salaka yonso sambu na kusansa mbote bana na bo ya bo ke zolaka mingi. Kana bibuti ke sala mutindu yai, bo ta sadisa bana na bo na kuzwa dibaku ya kukota na dibuta ya Yehowa mpi na kuvanda mvula na mvula na dibuta na yandi.

10-11. Inki dibaku Yehowa me pesaka beto na nzila ya kimenga ya Yezu?

¹⁰ Yehowa pesaka Mwana na yandi yina yandi ke zolaka mingi sambu beto vutuka na dibuta na yandi. Mutindu beto monaka yo na  paragrafe 4, Adami ti Eva mpi bana na bo vandaka diaka ve na dibuta ya Yehowa mpi bo vandaka diaka ve bana na yandi. (Bar. 5:12) Adami ti Eva lemfukilaka ve Nzambi na luzolo yonso. Yo yina, yo lombaka nde bo vanda diaka ve na dibuta na yandi. Ebuna bana na bo? Na zola yonso, Yehowa yidikaka mambu sambu bana na bo yina ta lemfukila yandi kuvutuka na dibuta na yandi. sambu bana yina kuvutuka na dibuta na yandi, yandi pesaka kimenga ya Yezu Kristu, Mwana na yandi mosi kaka ya kubutuka. (Yoa. 3:16; Bar. 5:19) Kimenga ya Yezu me salaka nde Nzambi kundima nde bantu 144000 yina ta landa kukangama na yandi kuvanda bana na yandi yina ta zinga na zulu.—Bar. 8:15-17; Kus. 14:1.

¹¹ Katula bo, bamilio ya bantu yina me kangamaka na Nzambi ke lemfukilaka yandi mpi ke salaka luzolo na yandi. Bo kele ti kivuvu ya kubikala mvula na mvula na dibuta na yandi na nima ya kumekama ya nsuka, na nsuka ya Luyalu ya Bamvula 1000. (Nk. 25:14; Bar. 8:20, 21) Sambu bo kele ti kivuvu yina, bo ke bingaka dezia Yehowa yina salaka bo nde “Tata.” (Mat. 6:9) Bantu yina ta futumuka, ta vanda mpi ti dibaku ya kulonguka mambu yina Yehowa ta zola nde bo sala. Ebuna, bantu yina ta pona na kulemfukila yandi, ta kuma mpi bantu ya dibuta na yandi.

12. Beto ta pesa mvutu na nki ngiufula?

¹² Mutindu beto me mona yo, Yehowa me salaka mambu mingi sambu na kumonisa nde bantu kele mfunu na meso na yandi. Yandi me kumisaka Bakristu yina bo me tulaka mafuta bana na yandi mpi yandi me pesaka bantu ya ‘kimvuka ya nene’ kivuvu ya kuvanda bana na yandi mvula na mvula na nsi-ntoto ya mpa. (Kus. 7:9) Kansi, nki beto lenda sala bubu yai sambu na kumonisa Yehowa nde beto ke zola kuvanda mvula na mvula na dibuta na yandi?

13. Inki beto fwete sala sambu na kuvanda na dibuta ya Nzambi? (Marko 12:30)

¹³ Sadila Yehowa na ntima na nge ya mvimba sambu na kumonisa nde nge ke zolaka yandi.  (Tanga Marko 12:30.) Nzambi me pesaka beto makabu mingi. Kusambila yandi kele na kati ya makabu ya kuluta nene yina yandi me pesaka beto. Kana beto ‘ke zitisa bansiku ya Yehowa,’ beto ta monisa yandi nde beto ke zolaka yandi. (1 Yoa. 5:3) Nsiku mosi na kati ya bansiku yina Yehowa ke zola nde beto zitisa, kele nsiku yina Yezu pesaka beto. Yandi songaka beto na kukumisa bantu balongoki mpi kupesa bo mbotika. (Mat. 28:19) Diaka, yandi songaka beto nde beto fwete zolana. (Yoa. 13:35) Yehowa ta ndima nde beto kota na dibuta ya bansadi na yandi ya kele na ntoto ya mvimba, kana beto ke zitisa bansiku na yandi.—Nk. 15:1, 2.

14. Inki mutindu beto lenda monisa nde beto ke zolaka bantu? (Matayo 9:36-38; Baroma 12:10)

¹⁴ Zola bantu ya nkaka. Zola kele kikalulu ya kuluta mfunu ya Yehowa. (1 Yoa. 4:8) Yehowa zolaka beto na ntwala nkutu nde beto zaba yandi. (1 Yoa. 4:9, 10) Beto ke landaka mbandu na yandi, ntangu beto ke zolaka mpi bantu ya nkaka. (Baef. 5:1) Mitindu ya kumonisa nde beto ke zolaka bantu ya nkaka kele mingi. Beto lenda longa bo mambu ya Yehowa mutindu ntangu kele ntete. (Tanga Matayo 9:36-38.) Kana beto longa bo, bo lenda zaba mambu yina bo fwete sala sambu na kukota mpi na dibuta ya Nzambi. Kana muntu me baka mbotika, beto fwete landa kuzola yandi mpi kuzitisa yandi. (1 Yoa. 4:20, 21) Inki mutindu beto lenda sala yo? Mu mbandu, beto fwete tudila yandi ntima. Kana beto me bakisa ve sambu na nki yandi me sala diambu mosi buna, beto ta yindula ve nde yandi me sala yo sambu na bikuma ya bwimi. Kansi, beto ta pesa yandi lukumu mpi beto ta mona nde yandi me luta beto.—Tanga Baroma 12:10; Bafil. 2:3.

15. Banani beto fwete wila mawa mpi kusadila mambu ya mbote?

¹⁵ Wila bantu yonso mawa mpi sadila bo mambu ya mbote. Kana beto ke zola kuvanda mvula na mvula na dibuta ya Yehowa, beto fwete sadila mambu yina kele na Ndinga na yandi. Mu mbandu, Yezu tubaka nde beto fwete wila bantu yonso mawa mpi beto fwete sadila bo mambu ya mbote ata nkutu bambeni na beto. (Luka 6:32-36) Kansi bantangu ya nkaka kusala mutindu yina lenda vanda mpasi. Yo yina, beto fwete longuka mutindu ya kuyindula mpi ya kusala mambu bonso Yezu. Kana beto ke sala yonso sambu na kulemfukila Yehowa mpi kulanda mbandu ya Yezu, beto ta monisa Tata na beto ya zulu nde beto ke zola kuvanda mvula na mvula na dibuta na yandi.

16. Inki mutindu beto lenda tanina lukumu ya dibuta ya Yehowa?

¹⁶ Tanina lukumu ya dibuta ya Yehowa. Mbala mingi na dibuta, leke ke landaka mbandu ya yaya na yandi. Kana yaya ke sadila minsiku ya Biblia, yandi ta pesa leke na yandi mbandu ya mbote. Kansi kana yaya ke sala mambu ya mbi, leke lenda landa mpi mbandu na yandi ya mbi. Yo kele mpi mutindu mosi na dibuta ya Yehowa. Kana Mukristu mosi ya me kangamaka ngolo na Yehowa me kuma aposta to me kuma kusala mansoni to ke sala mambu ya mbi, Bakristu ya nkaka lenda landa mbandu na yandi mpi kusala mambu ya mbi. Bakristu yina ke salaka mutindu yina ke bebisaka lukumu ya dibuta ya Yehowa. (1 Bate. 4:3-8) Beto fwete landa ve bambandu ya mbi mpi beto fwete bika ve ata kima mosi kubebisa kinduku na beto ti Tata na beto ya zulu yina ke zolaka beto.

17. Inki beto fwete yindula ve mpi sambu na nki?

¹⁷ Tula ntima na Yehowa kansi ve na bima ya kinsuni. Yehowa ke tuba nde yandi ta pesa beto madia, bilele mpi nzo kana beto ke sosa ntete Kimfumu na yandi mpi kana beto ke lemfukila bansiku na yandi. (Nk. 55:22; Mat. 6:33) Kana beto ke ndima nde Yehowa ta pesa beto bima yai yonso, beto ta yindula ve nde bima ya kinsuni ya nsi-ntoto yai ta tanina beto mpi ta pesa beto kiese yina ta wumela. Beto ke zabaka nde  beto ta vanda ti ngemba ya mabanza kaka kana beto ke sala luzolo ya Yehowa. (Bafil. 4:6, 7) Ata beto lenda vanda ti mbongo ya kusumba bima mingi, beto fwete tala kana beto ta vanda kibeni ti ntangu to ngolo ya kusadila bima yina yonso mpi ya kutanina yo. Keti beto ta kangama ngolo na bima na beto ya kinsuni? Beto fwete vila ve nde Nzambi me pesaka beto kisalu na dibuta na yandi. Yo yina beto fwete bika ve nde ata kima mosi kukatula dikebi na beto na kisalu yango. Ya kieleka, beto ke zola ve kuvanda bonso leke ya bakala yina buyaka kulanda Yezu sambu yandi kangamaka ngolo na bima na yandi ya kinsuni. Yo salaka nde yandi baka ve dibaku ya kusadila Yehowa mpi ya kukuma mwana na yandi.—Mar. 10:17-22.

18. Inki dibaku bantu ya bulemfu ta vanda ti yo mpi nki mambote bo ta baka mvula na mvula?

¹⁸ Bantu yina ke lemfukilaka Yehowa ta vanda ti dibaku ya kuluta nene ya kuzola yandi mpi ya kusambila yandi mvula na mvula. Bantu yina kele ti kivuvu ya kuzinga na ntoto ta vanda mpi na kiese ya kutanina ntoto, kisika ya kitoko yina Yehowa me yidikilaka bantu sambu bo zinga. Kubika fioti, Kimfumu ya Nzambi ta kumisa diaka ntoto mpi bima yonso yina kele na kati kitoko. Yezu ta katula bampasi yonso yina Adami ti Eva me nataka sambu bo bakaka lukanu ya kukatuka na dibuta ya Nzambi. Yehowa ta futumuna bamilio ya bantu mpi yandi ta pesa bo dibaku ya kuzinga mvula na mvula ti nitu ya kukuka na ntoto yina ta kuma paladisu. (Luka 23:42, 43) Ntangu bansadi ya Yehowa ya dibuta na yandi awa na ntoto ta kuma bantu ya kukuka, konso muntu ta pesaka yandi “nkembo ti lukumu” mutindu Davidi tubaka.—Nk. 8:5.

19. Inki beto fwete vila ve?

¹⁹ Kana nge kele na kati ya ‘kimvuka ya nene,’ nge kele ti kivuvu ya mbote kibeni. Kuvila ve nde Nzambi ke zolaka nge mpi yandi ke zola nde nge vanda na dibuta na yandi. Yo yina, sala yonso sambu na kusepedisa yandi. Konso kilumbu, yindula mambu yina Nzambi me tubaka nde yandi ta sala. Sepela ti dibaku ya kusambila Tata na beto ya zulu yina beto ke zolaka mingi mpi sepela ti dibaku ya kupesa yandi lukumu mvula na mvula.