1. Inki mutindu nge ke waka sambu na kieleka?

 BANSADI ya Yehowa ke zolaka kieleka yina kele na Ndinga ya Nzambi. Lukwikilu na beto me simbamaka na yo. (Bar. 10:17) Beto ke ndimaka kibeni nde Yehowa me tulaka dibundu ya Bukristu bonso “dikunzi mpi kima ya ke simbaka kieleka.” (1 Tim. 3:15) Diaka, beto ke vandaka na kiese ya kulemfukila “bantu yina ke twadisaka” beto ntangu bo ke tendudilaka beto kieleka ya kele na Biblia mpi ke pesaka beto lutwadisu ya ke wakana ti luzolo ya Nzambi.​—Baeb. 13:17.

2. Mutindu Yakobo 5:19 ke monisa yo, nki lenda kumina beto na nima ya kulonguka kieleka?

² Kansi, na nima ya kundima kieleka mpi ya kundima nde beto fwete landa lutwadisu yina organizasio ya Yehowa ke pesa, beto lenda vila nzila. (Tanga Yakobo 5:19.) Satana ke zolaka kibeni kupusa beto na kuyambula kundima mambu yina Biblia ke tubaka to na kulanda ve lutwadisu yina organizasio ya Yehowa ke pesaka.​—Baef. 4:14.

3. Sambu na nki beto fwete kangama ngolo na kieleka? (Baefezo 6:13, 14)

³ Tanga Baefezo 6:13, 14. Kubika fioti, Diabulu ta sala yonso sambu na kukusa bantu ya makanda yonso na kutelemina Yehowa. (Kus. 16:13, 14) Beto ke zaba mpi nde Satana ta sala yonso sambu na kukusa bansadi ya Yehowa. (Kus. 12:9) Yo yina, yo kele mfunu nde beto longuka mutindu ya kuswaswanisa kieleka ti mambu ya luvunu mpi kulemfukila kieleka. (Bar. 6:17; 1 Pie. 1:22) Yo kele kibeni mfunu mingi sambu yo ta sadisa beto na kuguluka na mpasi ya nene.

4. Inki beto ta tadila na disolo yai?

 ⁴ Na disolo yai, beto ta tadila bikalulu zole yina beto fwete vanda ti yo sambu yo ta sadisa beto na kuzaba kieleka yina kele na Biblia mpi na kundima lutwadisu yina organizasio ya Yehowa ke pesaka. Na nima, beto ta tubila mambu tatu yina beto fwete sala sambu na kulanda kukangama ngolo na kieleka.

BIKALULU YINA BETO FWETE VANDA TI YO SAMBU NA KUZABA KIELEKA

5. Inki mutindu boma ya Yehowa ke sadisaka beto na kuzaba kieleka?

⁵ Boma ya Yehowa. Kuwa Yehowa boma ke tendula kuzola yandi mingi mpi kusala kaka mambu yina ke sepedisa yandi. Beto ke zolaka kibeni kuzaba mutindu mambu ya mbote me swaswana ti mambu ya mbi, mutindu kieleka me swaswana ti luvunu, sambu Yehowa kundima beto. (Bing. 2:3-6; Baeb. 5:14) Beto fwete bika ve ata fioti nde boma ya bantu kukuma ngolo kuluta zola na beto sambu na Yehowa, sambu mbala mingi mambu yina ke sepedisaka bantu ke sepedisaka ve Yehowa.

6. Inki mutindu boma ya bantu pusaka bamfumu 10 ya Izraele na kutuba ve kieleka?

⁶ Kana beto ke wa bantu boma mingi kuluta Nzambi, beto lenda vila nzila ya kieleka. Beto tadila mbandu ya bamfumu 12 yina kwendaka kutala insi yina Yehowa silaka na kupesa bantu ya Izraele. Bamfumu 10 na kati na bo vandaka kuwa bantu ya Kanana boma mingi mpi boma yina vandaka ngolo kuluta zola na bo sambu na Yehowa. Bo songaka bantu ya Izraele nde: “Beto lenda nwana ve ti bantu yina, sambu bo kele ngolo kuluta beto.” (Kut. 13:27-31) Yo kele kieleka nde na meso ya bantu, bantu ya Kanana vandaka ngolo kuluta bantu ya Izraele, kansi bantu ya Izraele zolaka kununga bantu ya Kanana sambu Yehowa vandaka ti bo. Yo lombaka nde bantu yina 10 kutula dikebi na mambu yina Yehowa zolaka nde bantu ya Izraele kusala. Yo lombaka mpi nde bo yindula mambu yina Yehowa sadilaka bo ntama mingi ve. Kana bo salaka  mutindu yina, bo zolaka kubakisa nde Yehowa kele ngolo mingi kibeni kuluta bantu ya Kanana. Kansi Yozue ti Kalebi vandaka ve bonso bantu yina 10, sambu bo zolaka kusepedisa Yehowa. Bo songaka bantu nde: “Kana Yehowa kundima beto, yandi ta kotisa beto kibeni na ntoto yina mpi ta pesa beto yo.”​—Kut. 14:6-9.

7. Inki mutindu beto lenda wa diaka Yehowa boma mingi? (Tala mpi kifwanisu ya ke wakana ti paragrafe yai.)

⁷ Sambu na kuwa diaka Yehowa boma mingi, beto fwete yindula mambu yina ta sepedisa yandi konso ntangu yina beto ke baka balukanu. (Nk. 16:8) Ntangu nge ke tanga masolo ya Biblia, kudiyula nde: ‘Inki lukanu mono zolaka kubaka kana mono vandaka pana?’ Mu mbandu, mona na mabanza nde nge kele pana mpi nge ke widikila ntangu bamfumu 10 ya Izraele ke pesa bansangu na bo ya mbi. Keti nge zolaka kundima mambu yina mpi kuwa bantu boma? To keti zola na nge sambu na Yehowa mpi nzala na nge ya kusepedisa yandi zolaka kuvanda ngolo kuluta boma ya bantu? Ndonga ya mvimba ya bantu ya Izraele buyaka kuwa mambu ya kieleka yina Yozue ti Kalebi vandaka kutuba. Yo yina, Yehowa pesaka bo ve nzila ya kukota na Ntoto ya Lusilu.​—Kut. 14:10, 22, 23.

8. Inki kikalulu beto fwete sala ngolo sambu na kuvanda ti yo mpi sambu na nki?

⁸ Kudikulumusa. Yehowa ke monisaka kieleka na bantu ya kudikulumusa. (Mat. 11:25) Beto ndimaka kulonguka kieleka na kudikulumusa yonso. (Bis. 8:30, 31) Kansi, beto fwete keba sambu beto kuma ve lulendo. Kana beto me kuma lulendo, beto lenda yantika kuyindula nde bangindu na beto mosi kele mbote kaka bonso minsiku ya Biblia mpi lutwadisu yina organizasio ya Yehowa ke pesa.

9. Inki beto fwete sala sambu na kulanda kuvanda bantu ya kudikulumusa?

⁹ Sambu na kulanda kuvanda bantu ya kudikulumusa, beto fwete vila ve nde Yehowa me luta beto ntama kibeni. (Nk. 8:3, 4) Beto fwete lomba mpi Yehowa na kusadisa beto na kukuma bantu ya kudikulumusa mingi mpi bantu yina ke ndimaka nde bo longa bo. Yehowa ta sadisa beto na kutula ve na kisika ya ntete bangindu na beto mosi kansi bangindu na yandi yina beto ke longukaka na Ndinga na yandi mpi yina yandi ke pesaka beto na nzila ya organizasio na yandi. Ntangu nge ke tanga Biblia, sosa mambu yina ke monisa kibeni nde Yehowa ke zolaka bantu ya kudikulumusa mpi yandi ke mengaka bantu ya lulendo mpi bantu yina ke kudikumisaka. Sala bikesa kibeni ya kulanda kuvanda muntu ya kudikulumusa ntangu bo me pesa nge mukumba mosi yina ke pesa nge mwa kiyeka to yina ke sala nde bantu ya nkaka kumona nge.

INKI MUTINDU BETO LENDA KANGAMA NGOLO NA KIELEKA?

10. Banani Yehowa sadilaka sambu na kupesa bantu na yandi lutwadisu?

¹⁰ Landa kutula ntima na lutwadisu ya organizasio ya Yehowa. Na Izraele ya ntama, Yehowa sadilaka Moize mpi na nima Yozue, sambu na kupesa bantu na yandi bansiku. (Yoz. 1:16, 17) Mambu vandaka kutambula mbote sambu na bantu ya Izraele ntangu bo vandaka kutadila bantu yina bonso bantu yina vandaka kumonisa Yehowa Nzambi. Bamvula mingi na nima, ntangu dibundu ya Bukristu kangukaka na mbala ya ntete, bantumwa 12 bantu vandaka kupesa lutwadisu. (Bis. 8:14, 15) Na nima, bankuluntu ya nkaka na Yeruzalemi kumaka mpi na kati ya kimvuka yina ya bantumwa. Ntangu bantu vandaka kulanda lutwadisu ya bantu yina ya kwikama, “mabundu vandaka kibeni kukuma ngolo na lukwikilu mpi kukuma mingi konso kilumbu.” (Bis. 16:4, 5) Bubu yai, mambu ke kwendilaka mpi mbote sambu na beto kana beto ke landa lutwadisu yina organizasio ya Yehowa ke pesa. Ebuna, nki mutindu Yehowa ta wa kana beto buya kundima bantu yina yandi me ponaka na kutwadisa? Sambu na kupesa  mvutu na ngiufula yina, beto tadila mambu yina salamaka ntangu bantu ya Izraele zolaka kukota na Ntoto ya Lusilu.

11. Inki kuminaka bantu ya Izraele yina teleminaka Moize yina Nzambi ponaka na kutwadisa bantu na yandi? (Tala mpi kifwanisu ya ke wakana ti paragrafe yai.)

¹¹ Ntangu bantu ya Izraele vandaka kukwenda na Ntoto ya Lusilu, babakala ya lukumu teleminaka Moize mpi mukumba yina Yehowa pesaka yandi. Bo tubaka nde: “Kimvuka ya mvimba ya bantu [Moize mpamba ve] kele santu, bo yonso, mpi Yehowa kele na kati na bo.” (Kut. 16:1-3) Ya kieleka, “Kimvuka ya mvimba ya bantu” ya Izraele vandaka santu, kansi Yehowa ponaka Moize sambu na kutwadisa bantu na yandi. (Kut. 16:28) Ntangu bo vandaka kutuba mambu ya mbi sambu na Moize, yo ke monisa nde bo vandaka kutuba kibeni mambu ya mbi sambu na Yehowa. Bo tulaka ve kibeni dikebi na mambu yina Yehowa vandaka kuzola, kansi bo tulaka dikebi na mambu yina bo mosi vandaka kuzola, disongidila kiyeka mingi mpi lukumu. Yehowa fwaka bantu yina teleminaka Moize mpi bantu mingi ya nkaka yina kotilaka bo. (Kut. 16:30-35, 41, 49) Bubu yai mpi, beto ke ndima kibeni nde Yehowa ke ndimaka ve bantu yina ke zitisaka ve lutwadisu yina organizasio na yandi ke pesaka.

12. Sambu na nki beto fwete landa kutudila organizasio ya Yehowa ntima?

¹² Beto fwete landa kutudila organizasio ya Yehowa ntima. Kana yo ke monana pwelele nde yo ke lomba nde beto soba mutindu na beto ya kubakisa kieleka mosi ya Biblia to kima mosi na mutindu na beto ya kusambila Yehowa, bampangi yina ke twadisaka ke waka ve boma ya kusala bansoba ya me fwana. (Bing. 4:18) Bo ke salaka mutindu yina sambu susi na bo ya ntete ke vandaka ya kusepedisa Yehowa. Diaka, bo ke salaka yonso sambu na kubaka balukanu ya ke wakana ti Ndinga ya Nzambi, mbandu ya mambu yina bansadi yonso ya Yehowa fwete landa.

13. “Mbandu ya mambu ya mbote” kele nki mpi nki beto fwete sala ti mambu yina?

¹³ “Landa kusimba mbandu ya mambu ya  mbote.” (2 Tim. 1:13) “Mbandu ya mambu ya mbote” kele malongi yina kele na Biblia. (Yoa. 17:17) Mambu yonso yina beto ke kwikilaka me simbama na malongi yango. Organizasio ya Yehowa ke longaka beto na kuzikisa kana balukwikilu na beto me simbama kibeni na mambu yina. Kana beto sala mutindu yina, yo ta natila beto kibeni mambote mingi.

14. Inki mutindu Bakristu ya nkaka yambulaka kukangama na “mbandu ya mambu ya mbote”?

¹⁴ Inki lenda kumina beto kana beto yambula kuwakanisa mambu yina beto ke kwikila ti “mbandu ya mambu ya mbote”? Beto tadila mbandu mosi. Na mvu-nkama ya ntete, Bakristu ya nkaka vandaka kumwanga nsangu mosi ya luvunu nde kilumbu ya Yehowa me kwisa. Mbala ya nkaka, kuvandaka ti mukanda mosi yina tubaka mambu yina mpi yina bantu yindulaka nde ntumwa Polo muntu sonikaka yo. Bakristu ya nkaka ya Tesalonika ndimaka mambu yina kukonda kuzikisa mpi nkutu bo songaka yo bantu ya nkaka. Bo zolaka kundima ve mambu yina kana bo yibukaka mambu yina Polo longaka bo ntangu yandi vandaka ti bo. (2 Bate. 2:1-5) Polo songaka bo na kukwikila ve mambu yonso yina bo ke wa. Diaka, sambu na kusadisa Bakristu ya Tesalonika na bilumbu ke kwisa, Polo sukisaka mukanda na yandi ya zole ti bangogo yai: “Yai mbote na mono, mono Polo, yina mono me sonika na diboko na mono mosi; yo kele kidimbu na konso mukanda; yai mutindu mono ke sonikaka.”​—2 Bate. 3:17.

15. Inki mutindu beto fwete kuditanina na mambu ya luvunu yina lenda monana bonso nde yo kele kieleka? Pesa mbandu. (Tala mpi bifwanisu ya ke wakana ti paragrafe yai.)

¹⁵ Mambu yina Polo songaka Bakristu ya Tesalonika ke longa beto nki? Kana beto me wa diambu mosi ya ke wakana ve ti mambu yina Biblia ke longaka to disolo mosi ya ke benda dikebi, beto fwete vanda mayele. Na Union soviétique, bambeni na beto pesaka bampangi mukanda mosi yina bo tubaka nde yo katukaka na babiro ya ke twadisaka kisalu na beto na ntoto ya mvimba. Mukanda yango vandaka kutuba nde bampangi ya nkaka fwete kabwana ti bampangi mpi bo sala organizasio na bo mosi. Mukanda yango vandaka kumonana bonso nde yo vandaka kieleka. Kansi bampangi yina vandaka  kusadila Yehowa na mutindu ya mbote ndimaka yo ve. Bo bakisaka nde mambu yina mukanda yango vandaka kutuba vandaka kuwakana ve ti yina bo longukaka. Bubu yai, bambeni na beto ke sadilaka bantangu ya nkaka Internet mpi barezo sosio sambu na kupusa beto na kukuma ti badute mpi kukabisa beto. Na kisika ya ‘kubika nde mabanza na beto kukuma kisaka-saka nswalu,’ beto fwete kuditanina mpi kutala mbote-mbote kana mambu yina beto ke wa mpi yina beto ke tanga ke wakana ti bakieleka yina beto me longukaka dezia.​—2 Bate. 2:2; 1 Yoa. 4:1.

16. Mutindu Baroma 16:17, 18 ke monisa yo, nki beto fwete sala kana bantu ya nkaka ke mwanga bansangu yina ke wakana ve ti kieleka?

¹⁶ Landa kuvanda na bumosi ti bantu yina ke kangamaka na Yehowa. Yehowa ke zolaka nde beto sambila yandi na bumosi. Beto ta landa kuvanda na bumosi kana beto ke kangama na kieleka. Bantu yina ke mwangaka bansangu yina ke wakana ve ti kieleka, ke kabisaka bampangi na dibundu. Yo yina, Nzambi ke songa beto na ‘kubuya bo.’ Kana beto sala ve mutindu yina, beto mosi mpi lenda yambula kieleka.​—Tanga Baroma 16:17, 18.

17. Inki mambote beto ta baka kana beto ke zaba kieleka mpi ke kangama ngolo na yo?

¹⁷ Kana beto ke zaba kieleka mpi beto ke kangama ngolo na yo, beto ta landa kukangama na Yehowa mpi beto ta landa kuvanda ti kimpeve ya ngolo. (Baef. 4:15, 16) Beto ta landa ve malongi ya luvunu ya Satana mpi mambu yina yandi ke tubaka. Diaka, Yehowa ta landa kutanina beto na mpasi ya nene. Landa kukangama ngolo na mambu ya kieleka, ‘ebuna Nzambi ya ngemba ta vanda ti nge.’​—Bafil. 4:8, 9.