DISOLO YA KULONGUKA 27
NKUNGA 73 Pesa Beto Kikesa
Vanda Kikesa Bonso Zadoki
“Zadoki [vandaka] leke mosi ya bakala ya ngolo mpi ya kikesa.”—1 BANS. 12:28.
NA BUNKUFI
Mutindu mbandu ya Zadoki lenda sadisa beto na kuvanda kikesa.
1-2. Zadoki vandaka nani? (1 Bansangu 12:22, 26-28)
MONA na mabanza mutindu bantu 340 000 me vukana sambu na kutula Davidi ntotila ya Izraele. Bo me sala bilumbu tatu na bangumba ya matadi pene-pene ya mbanza Ebroni. Bo ke seka, bo ke solula mpi bo ke yimba na kiese yonso sambu na kukumisa Yehowa. (1 Bans. 12:39) Zadoki, leke mosi ya bakala, vandaka mpi na kati ya bantu yango. Bantu mingi zabaka ve nde yandi vandaka pana. Kansi Yehowa monaka yandi mpi zolaka nde beto zaba nde yandi vandaka pana. (Tanga 1 Bansangu 12:22, 26-28.) Zadoki vandaka nani?
2 Zadoki vandaka nganga-nzambi mpi yandi vandaka kusala ti nganga-nzambi ya nene Abiatare. Zadoki vandaka mpi muntu ya ke monaka mambu, disongidila nde Nzambi pesaka yandi mayele mingi mpi makuki ya kubakisa luzolo na yandi. (2 Sam. 15:27) Bantu vandaka kulomba Zadoki bandongisila. Yandi vandaka mpi kikesa. Na disolo yai, beto ta tubila mingi-mingi kikesa na yandi.
3. (a) Sambu na nki bansadi ya Yehowa fwete vanda kikesa? (b) Inki beto ta tubila na disolo yai?
3 Na bilumbu yai ya nsuka, Satana ke nwanisa mingi kibeni bansadi ya Nzambi. (1 Pie. 5:8) Beto fwete vanda kikesa ntangu beto ke vingila nde Yehowa kufwa Satana mpi nsi-ntoto na yandi ya mbi. (Nk. 31:24) Beto tala mitindu tatu yina beto lenda landa mbandu ya kikesa ya Zadoki.
PESA MABOKO NA KIMFUMU YA NZAMBI
4. Sambu na nki bansadi ya Yehowa fwete vanda kikesa sambu na kupesa maboko na Kimfumu na yandi? (Tala mpi kifwanisu ya ke wakana ti paragrafe yai.)
4 Bansadi ya Yehowa ke pesaka maboko na ntima ya mvimba na Kimfumu na yandi. Kansi, yo ke lombaka kikesa sambu na kusala yo. (Mat. 6:33) Mu mbandu, yo ke lombaka kikesa sambu na kuzitisa minsiku ya Yehowa mpi kulanda kulonga nsangu ya mbote ya Kimfumu na nsi-ntoto yai ya mbi. (1 Bate. 2:2) Nsi-ntoto yai kele ya kukabwana kibeni na mambu ya politiki mpi yo ke lombaka kikesa mingi sambu na kukota ve na mambu yina. (Yoa. 18:36) Bansadi mingi ya Yehowa ke kutanaka ti bampasi ya mbongo, bo ke bulaka bo to bo ke tulaka bo na boloko sambu bo ke buyaka kukota na mambu ya politiki to kukuma basoda.
Inki nge ta sala kana bantu ya nkaka ke kota na mambu ya politiki? (Tala paragrafe 4)
5. Sambu na nki yo lombaka nde Zadoki kuvanda kikesa sambu na kusadisa Davidi?
5 Zadoki kwendaka ve na Ebroni kaka sambu na kusepela mutindu bo tulaka Davidi ntotila. Yandi kwendaka ti binwaninu na yandi mpi yandi vandaka ya kuyilama sambu na kunwana. (1 Bans. 12:38) Na luzolo yonso, yandi ndimaka kulanda Davidi na bitumba mpi kunwanisa bambeni ya Izraele. Yo lenda vanda nde Zadoki vandaka ve ti eksperiansi mingi na bitumba, kansi yandi vandaka kikesa mingi.
6. Inki mutindu Davidi vandaka mbandu ya mbote ya kikesa sambu na Zadoki? (Nkunga 138:3)
6 Na wapi nganga-nzambi Zadoki bakaka kikesa? Yandi zabaka bantu mingi ya ngolo mpi ya kikesa. Ntembe kele ve nde mbandu na bo sadisaka yandi. Mu mbandu, bantu ya Izraele zolaka kutula Davidi ntotila sambu yandi “vandaka kutwadisa Izraele na bitumba” ti kikesa yonso. (1 Bans. 11:1, 2) Davidi vandaka kulomba Yehowa lutwadisu ntangu yonso sambu na kunwanisa bambeni na yandi. (Nk. 28:7; tanga Nkunga 138:3.) Zadoki vandaka mpi ti bantu ya nkaka yina vandaka mpi bambandu ya mbote sambu na yandi. Mu mbandu Yehoyada mpi mwana na yandi Benaya ti bamfumu ya nkaka 22 ya makanda, bayina vukanaka ti Davidi. (1 Bans. 11:22-25; 12:26-28) Bo yonso zolaka kutula Davidi ntotila mpi kutanina yandi.
7. (a) Inki bambandu ya kikesa beto kele ti yo na bilumbu na beto? (b) Mbandu ya mpangi Nsilu ya bo me tubila na video ke longa nge nki?
7 Kana beto ke yindula mutindu bantu ya nkaka monisaka kikesa sambu na kupesa maboko na Kimfumu ya Yehowa, yo ke pesaka beto mpi kikesa. Yezu Kristu, Ntotila na beto, buyaka ti kikesa yonso na kukota na mambu ya politiki ya nsi-ntoto ya Satana. (Mat. 4:8-11; Yoa. 6:14, 15) Yandi vandaka kulomba Yehowa kikesa ntangu yonso. Na bilumbu na beto, beto kele mpi ti bambandu ya bampangi mingi ya baleke ya babakala yina me buyaka kukuma basoda to kukota na mambu ya politiki. Nge lenda tanga masolo na bo na jw.org. a
SADISA BAMPANGI
8. Inki ntangu yo ke lombaka nde bankuluntu kuvanda kikesa sambu na kusadisa bampangi?
8 Bansadi ya Yehowa ke sadisanaka. (2 Bak. 8:4) Kansi bantangu ya nkaka, yo ke lombaka kikesa sambu na kusala mpidina. Mu mbandu, na ntangu ya bitumba, bankuluntu ke salaka yonso sambu na kupesa bampangi kikesa, lusadisu mpi mbala ya nkaka bima ya kinsuni to ya kimpeve yina bo kele ti yo mfunu. Zola ke pusaka bo na kusala mutindu yina ata yo lenda vanda kigonsa sambu na bo. (Yoa. 15:12, 13) Bo ke landaka kibeni mbandu ya kikesa ya Zadoki ntangu bo ke salaka mutindu yina.
9. 2 Samuele 15:27-29 ke tuba nde Davidi lombaka Zadoki na kusala nki? (Tala mpi kifwanisu ya ke wakana ti paragrafe yai.)
9 Luzingu ya Davidi vandaka na kigonsa. Mwana na yandi Absalomi zolaka kubotula yandi kimfumu. (2 Sam. 15:12, 13) Yo lombaka nde Davidi kukatuka na Yeruzalemi nswalu. Yandi bingaka bansadi na yandi mpi songaka bo nde: “Beno telama mpi beto tina, sambu ata muntu mosi ve na kati na beto ta guluka na maboko ya Absalomi!” (2 Sam. 15:14) Ntangu bansadi na yandi vandaka kubasika na Yeruzalemi, Davidi bakisaka nde yo lombaka nde muntu mosi kubikala sambu na kupesa yandi bansangu ya mambu yina Absalomi vandaka kukana kusala. Yo yina, yandi songaka Zadoki mpi banganga-nzambi ya nkaka na kuvutuka na Yeruzalemi sambu na kulungisa mukumba yina. (Tanga 2 Samuele 15:27-29.) Yo lombaka nde bo sala mambu na mayele yonso. Mambu yina Davidi lombaka banganga-nzambi yina na kusala vandaka kutula kibeni luzingu na bo na kigonsa. Absalomi vandaka muntu ya bwimi, yandi vandaka nku mpi yandi zolaka kukota tata na yandi mosi nsoki. Yindula mambu yina yandi zolaka kusala Zadoki ti banganga-nzambi yina ya nkaka, kana yandi zabaka mambu yina Davidi songaka bo na kusala.
Davidi lombaka Zadoki na kusala kima mosi ya kigonsa (Tala paragrafe 9)
10. Inki mutindu Zadoki ti bantu yina vandaka ti yandi taninaka Davidi?
10 Davidi songaka Zadoki mpi Ushai, nduku na yandi ya ngolo na kusala kima mosi sambu na kusadisa yandi. (2 Sam. 15:32-37) Ushai salaka mambu yina Davidi songaka yandi, yandi salaka bonso nde yandi ke sadisa Absalomi mpi yandi songaka Absalomi mambu yina yandi fwete sala sambu na kunwanisa Davidi. Mambu yina Ushai songaka Absalomi na kusala zolaka kubikila Davidi ntangu ya kuyilama sambu na bitumba. Na nima, Ushai songaka Zadoki ti Abiatare mambu yango. (2 Sam. 17:8-16) Bo yonso zole salaka yonso sambu na kusonga Davidi mambu yina. (2 Sam. 17:17) Yehowa sadisaka Zadoki ti banganga-nzambi ya nkaka sambu na kusala kima mosi ya mfunu sambu na kutanina luzingu ya Davidi.—2 Sam. 17:21, 22.
11. Inki mutindu beto lenda landa mbandu ya kikesa ya Zadoki ntangu beto ke sadisa bampangi?
11 Kana bampangi na beto kele na kigonsa mpi bo me lomba beto na kusadisa bo, nki mutindu beto lenda vanda kikesa bonso Zadoki? (1) Landa lutwadisu. Na bantangu yina, yo ke vandaka mfunu mingi nde beto landa kuvanda na bumosi. Landa lutwadisu yina Betele ke pesa. (Baeb. 13:17) Mbala na mbala, bankuluntu fwete tadila lutwadisu yina organizasio ya Yehowa ke pesaka sambu na kuzaba mambu yina bampangi fwete sala sambu na kuyilama sambu na bisumbula mpi mambu yina bo fwete sala kana kisumbula me salama. (1 Bak. 14:33, 40) (2) Vanda kikesa mpi mayele. (Bing. 22:3) Yindula na ntwala ya kusala mambu. Kuditanina mbote-mbote. (3) Tudila Yehowa ntima. Kuvila ve nde Yehowa ke zolaka kibeni nde nge ti bampangi ya nkaka kuvanda na lutaninu. Yandi ta sadisa nge na kuvanda na lutaninu ntangu nge ke sadisa bampangi.
12-13. Mambu yina kuminaka mpangi Viktor mpi Vitalii ke longa nge nki? (Tala mpi kifwanisu ya ke wakana ti paragrafe yai.)
12 Beto tadila mbandu ya mpangi Viktor mpi Vitalii, yina salaka bikesa ya kupesa bampangi ya Ukraine madia mpi masa. Mpangi Viktor ke tuba nde: “Beto vandaka kusosa madia bisika yonso. Mbala mingi bo vandaka kubula masasi na lweka na beto. Mpangi mosi pesaka madia yina vandaka na kisika yina yandi vandaka kubumba bima. Yo sadisaka bampangi mingi na kuzwa madia yina sadisaka bo mwa ntangu. Ntangu beto vandaka kukotisa bima na kamio na beto, bombe mosi bwaka na kiteso ya bametre 20 ti kisika yina beto vandaka. Kilumbu yina ya mvimba, mono lombaka Yehowa na kupesa mono kikesa sambu na kulanda kusadisa bampangi.”
13 Mpangi Vitalii ke tuba nde: “Yo lombaka kikesa mingi. Voyage ya ntete yina mono salaka bakaka bangunga 12. Ntangu yonso yina mono vandaka na nzila, mono vandaka kusamba Yehowa.” Mpangi Vitalii vandaka kikesa mpi mayele. Yandi ke tuba diaka nde: “Mono vandaka kulomba Yehowa na kupesa mono mayele mpi na kusadisa mono na kuvanda muntu ya kudikulumusa. Mono vandaka kukwenda kaka na banzila yina bamfumu pesaka bantu nswa ya kuluta. Lukwikilu na mono kumaka ngolo ntangu mono monaka mutindu bampangi vandaka kusala na bumosi. Bo vandaka kukatula bima yina vandaka kukanga nzila, bo vandaka kubaka madia, bilele mpi bima ya nkaka ya mfunu mpi bo vandaka kutula yo na kamio. Diaka, bo vandaka kupesa mono ti Viktor madia mpi bisika ya kupema ntangu beto vandaka na voyage.”
Vanda kikesa mpi mayele ntangu nge ke sadisa bampangi na bantangu ya mpasi (Tala baparagrafe 12-13)
LANDA KUKANGAMA NA YEHOWA
14. Inki mutindu beto lenda wa kana muntu mosi yina beto ke zolaka me yambula Yehowa?
14 Kana mpangi na beto ya dibuta to nduku na beto mosi ya ngolo me yambula Yehowa, yo ke salaka beto mpasi mingi kibeni kuluta. (Nk. 78:40; Bing. 24:10) Kana nge ke zolaka muntu yina mingi kibeni, yo lenda vandila nge mpasi mingi na kukanga ntima na diambu yina. Mbandu ya Zadoki ta pesa nge kikesa.
15. Sambu na nki yo lombaka nde Zadoki kuvanda kikesa sambu na kulanda kusadila Yehowa? (1 Bantotila 1:5-8)
15 Zadoki landaka kukangama kaka na Yehowa ata Abiatare, nduku na yandi ya ngolo, yambulaka Yehowa. Diambu yai salamaka na nsuka ya luyalu ya Davidi. Ntangu Davidi kumaka mununu mpi zolaka kufwa, mwana na yandi Adoniya sosaka kubaka kiti ya kimfumu ata Yehowa tubaka nde Salomo muntu ta yinga Davidi. (1 Bans. 22:9, 10) Abiatare kotilaka Adoniya. (Tanga 1 Bantotila 1:5-8.) Diambu yina Abiatare salaka monisaka nde yandi yambulaka Davidi mpi Yehowa. Yindula mpasi yina Zadoki waka sambu na yo. Yandi salaka ti Abiatare bamvula kuluta 40 na kinganga-nzambi. (2 Sam. 8:17) Bo vandaka kukeba “Sanduku ya Nzambi ya kieleka” bo zole. (2 Sam. 15:29) Bo zole vandaka kupesa Davidi maboko mpi bo vandaka kusala mambu mingi na kisalu ya Yehowa.—2 Sam. 19:11-14.
16. Inki sadisaka Zadoki na kulanda kaka kusadila Yehowa?
16 Zadoki landaka kaka kusadila Yehowa ata Abiatare yambulaka yandi. Davidi zabaka nde yandi lenda tudila Zadoki ntima ntangu yonso. Ntangu Davidi zabaka mambu yina Adoniya zolaka kusala, yandi lombaka Zadoki, Natani mpi Benaya na kutula Salomo ntotila. (1 Bant. 1:32-34) Mbandu ya bansadi ya nkaka ya Yehowa, mu mbandu Natani mpi bantu ya nkaka yina sadisaka ntotila Davidi, kumisaka lukwikilu ya Zadoki ngolo mpi pesaka yandi kikesa. (1 Bant. 1:38, 39) Ntangu Salomo kumaka ntotila, yandi “tulaka Zadoki nganga-nzambi na kisika ya Abiatare.”—1 Bant. 2:35.
17. Inki mutindu nge lenda landa mbandu ya Zadoki kana muntu mosi yina nge ke zolaka me yambula Yehowa?
17 Inki mutindu nge lenda landa mbandu ya Zadoki? Kana muntu mosi yina nge ke zolaka me yambula Yehowa, monisa Yehowa nde nge ke landa kusadila yandi. (Yoz. 24:15) Yehowa ta pesa nge ngolo mpi kikesa. Samba Yehowa mpi kangama ti banduku na nge yina ke sadilaka yandi. Yehowa ke sepelaka mingi mutindu nge ke kangamaka kaka na yandi mpi yandi ta sakumuna nge sambu na yo.—2 Sam. 22:26.
18. Mbandu ya mpangi Marco ti nkento na yandi Sidse ke longa nge nki?
18 Beto tala mbandu ya mpangi Marco ti nkento na yandi Sidse. Bana na bo zole ya bankento yambulaka kieleka. Mpangi Marco ke tuba nde: “Bibuti ke zolaka mingi kibeni bana na bo yantika kilumbu yina bo ke butukaka. Bo lenda sala konso kima yina sambu na kutanina bo na kigonsa. Yo yina, kana bana me yambula Yehowa, yo ke salaka bibuti mpasi mingi kibeni.” Yandi ke tuba diaka nde: “Kansi Yehowa vandaka ti beto. Yandi salaka yonso sambu mono ti nkento na mono kupesana kikesa. Ntangu mono vandaka ya kulemba, nkento na mono vandaka ngolo, mpi ntangu yandi vandaka ya kulemba, mono vandaka ngolo.” Mpangi Sidse ke tuba nde: “Beto zolaka ve kukuka kukanga ntima kana Yehowa pesaka beto ve ngolo. Mono vandaka kudiyangisa mingi mpi mono vandaka kuyindula nde, yo vandaka foti na mono mutindu bana na mono yambulaka kusadila Yehowa. Na nima ya mwa ntangu, mpangi-nkento mosi yina mono monaka ve bamvula mingi kwisaka na mono, yandi tulaka maboko na yandi na mapeka na mono, yandi talaka mono na meso mpi yandi songaka mono nde: ‘Sidse, kuvila ve nde yo kele ve foti na nge.’ Yehowa sadisaka mono na kulanda kusadila yandi na kiese yonso.”
19. Inki nge fwete sala?
19 Yehowa ke zola nde bansadi na yandi yonso kuvanda kikesa bonso Zadoki. (2 Tim. 1:7) Kansi, yandi ke zola ve nde beto tula ntima na ngolo na beto mosi. Yandi ke zola nde beto tudila yandi ntima. Yo yina, lomba Yehowa lusadisu kana nge me kutana ti diambu mosi yina ke lomba nde nge vanda kikesa. Ndima kibeni nde yandi ta sadisa nge na kuvanda kikesa bonso Zadoki.—1 Pie. 5:10.
NKUNGA 126 Kangula Meso, Vanda Ngolo
