DISOLO YA KULONGUKA 34
“Landa Kutambula na Kieleka”
“Landa kutambula na kieleka.”—3 YOA. 4.
NKUNGA 111 Bikuma ya Kiese na Beto
MAMBU YINA DISOLO YAI KE TUBILA *
1. Inki mambote beto ke bakaka ntangu beto ke songaka bampangi ya nkaka mutindu beto zabaka “kieleka”?
“INKI mutindu nge zabaka kieleka?” Ntembe kele ve nde nge me pesaka mvutu na ngiufula yina mbala mingi. Yo kele na kati ya bangiufula ya ntete yina beto ke yulaka mpangi yina beto ke zola kuzaba mbote. Beto ke zolaka kuwa mutindu bampangi na beto yantikaka kuzaba mpi kuzola Yehowa, beto ke sepelaka mingi kusonga bo sambu na nki beto ke sepelaka kuvanda Bambangi ya Yehowa. (Bar. 1:11) Masolo yina ke sadisaka beto mpi na kulanda kuvila ve nde kieleka kele kima mosi ya mfunu kibeni. Beto ke kumaka ti lukanu ya ngolo ya ‘kulanda kutambula na kieleka,’ disongidila kulanda kuzinga na mutindu yina ta pusa Yehowa na kusakumuna beto mpi na kundima beto.—3 Yoa. 4.
2. Inki beto ta tubila na disolo yai?
2 Na disolo yai, beto ta tadila bikuma yina ke pusaka beto na kuzola kieleka. Na nima, beto ta tadila mutindu beto lenda landa kumonisa nde beto ke zolaka dikabu yina ya mfunu mingi. Ntembe kele ve nde mambu yina ta sadisa beto na kupesa Yehowa mersi mingi mutindu yandi me sadisaka beto na kuzwa kieleka. (Yoa. 6:44) Yo ta sadisa mpi beto mingi na kulonga bantu ya nkaka kieleka.
SAMBU NA NKI BETO KE ZOLAKA “KIELEKA”?
3. Inki kele kikuma ya kuluta mfunu ya ke pusaka beto na kuzola kieleka?
3 Beto kele ti bikuma mingi ya ke pusaka beto na kuzola kieleka. Kikuma ya kuluta mfunu kele nde, beto ke zolaka Yehowa Nzambi, Nto ya kieleka. Na nzila ya Ndinga na yandi Biblia, beto ke zabaka nde yandi kele Nzambi ya kuluta ngolo yina salaka zulu ti ntoto mpi yandi kele Tata ya zola yina ke kebaka beto na zola yonso. (1 Pie. 5:7) Beto me zaba nde Nzambi na beto ke “wilaka bantu mawa mpi ke fwilaka bo nkenda, yandi ke waka makasi nswalu ve mpi kele ya kufuluka na zola ya kwikama mpi kieleka.” (Kub. 34:6) Yehowa ke zolaka lunungu. (Yez. 61:8) Yandi ke waka mpasi mingi ntangu yandi ke monaka beto ke niokwama mpi yandi kele ya kuyilama na kumanisa bampasi na beto yonso na ntangu ya me fwana. (Yer. 29:11) Beto ke vingila ti kiese yonso ntangu Nzambi ta manisa bampasi yonso. Yo kele na kati ya bikuma yina ke pusaka beto na kuzola Yehowa mingi kibeni.
Bakieleka ya Biblia Kele Bonso . . . Longo
Kaka mutindu longo ke sadisaka maswa na kukwenda ve kisaka-saka, kivuvu na beto ya me simbama na Biblia ke sadisaka beto na bantangu ya mpasi. Bakieleka ya Biblia ke pusaka beto mpi na kusonga bantu ya nkaka kivuvu na beto sambu na bilumbu ke kwisa (Tala baparagrafe 4-7)
4-5. Sambu na nki ntumwa Polo fwanisaka kivuvu na beto ti longo?
4 Inki kele kikuma ya nkaka ya ke pusaka beto na kuzola kieleka? Kuzaba kieleka ke natilaka beto mambote mingi. Mu mbandu, kivuvu na beto sambu na bilumbu ke kwisa kele mpi kieleka yina kele na Biblia. Sambu na kumonisa mfunu ya kivuvu yina, ntumwa Polo tubaka nde: “Beto kele ti kivuvu yai bonso longo sambu na moyo, yo kele ya kieleka mpi ngolo.” (Baeb. 6:19) Kaka mutindu longo ke sadisaka maswa na kukwenda ve kisaka-saka, kivuvu na beto ya kele na Biblia ke sadisaka beto ntangu beto ke kutana ti bampasi.
5 Na verse yina, Polo vandaka kutubila kivuvu ya kukwenda na zulu, yina Bakristu yina bo me tulaka mafuta ke vandaka ti yo. Kansi mambu yina Polo tubaka ke tadila mpi Bakristu yina kele ti kivuvu ya kuzinga mvula na mvula na paladisu awa na ntoto. (Yoa. 3:16) Ya kieleka, kuzaba kivuvu na beto ya luzingu ya mvula na mvula me sadisaka beto mingi.
6-7. Inki mambote mpangi Yvonne bakaka mutindu yandi longukaka kieleka sambu na bilumbu ke kwisa?
6 Beto tadila disolo ya mpangi Yvonne. Yandi yelaka ve na dibuta ya Bambangi ya Yehowa mpi ntangu yandi vandaka mwana-fioti, yandi vandaka kuwa lufwa boma. Yandi ke yibuka nsa mosi yina yandi tangaka, yina yandi ke vilaka ve: “Lufwa kele nzila ya bantu yonso.” Yandi ke tuba nde: “Bangogo yina salaka nde mono lala ve na mpimpa mpi mono yindula kaka mambu yina ta salama na bilumbu ke kwisa. ‘Mono vandaka kuyindula nde, ya kieleka mambu kele mingi ya kusala na luzingu.’ ‘Sambu na nki mono kele na luzingu?’ Mono vandaka kuzola ve kufwa!”
7 Ntangu mpangi Yvonne kumaka toko, yandi kutanaka ti Bambangi ya Yehowa. Yandi ke tuba nde: “Mono yantikaka kundima kibeni nde mono lenda vanda ti kivuvu ya kuzinga mvula na mvula na paladisu na ntoto.” Inki mutindu kulonguka kieleka sadisaka mpangi Yvonne? Yandi ke tuba diaka nde: “Mono ke kudiyangisaka diaka ve na mpimpa sambu na bilumbu ke kwisa to sambu na lufwa.” Mpangi Yvonne ke bakaka kieleka na valere mingi mpi yandi ke sepelaka mingi kusonga bantu ya nkaka kivuvu na yandi sambu na bilumbu ke kwisa.—1 Tim. 4:16.
Bakieleka ya Biblia Kele Bonso . . . Kima Mosi ya Ntalu
Mutindu beto ke sadilaka Yehowa bubu yai mpi mutindu beto kele ti kivuvu ya kusadila yandi na bilumbu ke kwisa kele kimvwama. Yo kele na valere mingi kuluta konso kima yina beto lenda yambula (Tala baparagrafe 8-11)
8-9. (a) Na kingana mosi ya Yezu, nki mutindu muntu yina bakaka na valere mingi kima mosi ya ntalu yina yandi zwaka? (b) Inki mutindu nge lenda monisa nde nge ke bakaka kieleka na valere?
8 Nsangu ya mbote ya Kimfumu ya Nzambi kele mpi kieleka yina kele na Biblia. Yezu fwanisaka kieleka ya Kimfumu yina ti kima mosi ya ntalu. Yezu tubaka na Matayo 13:44 nde: “Kimfumu ya zulu kele bonso kima ya ntalu yina bo me bumbaka na kilanga, yina muntu mosi me mona mpi me bumba; ebuna sambu na kiese yina yandi kele na yo, yandi me kwenda mpi me teka bima yonso yina yandi kele na yo mpi me sumba kilanga yina.” Kuvila ve nde muntu yina vandaka kusosa ve kima ya ntalu. Kansi ntangu yandi monaka yo, yandi yambulaka bima mingi sambu na kuzwa yo. Yandi tekaka bima na yandi yonso. Sambu na nki? Sambu yandi zabaka nde kima ya ntalu yina yandi zwaka vandaka na valere mingi. Yo lutaka bima yonso yina yandi yambulaka na valere.
9 Keti nge ke tadilaka kieleka mutindu yina? Ntembe kele ve nde nge ke tadilaka yo mutindu yina. Beto me zaba nde, ata kima mosi ve na nsi-ntoto yai kele na valere mingi kuluta kiese yina beto ke vandaka ti yo ya kusadila Yehowa bubu yai mpi kivuvu ya kuzinga mvula na mvula na bilumbu ke kwisa na nsi ya luyalu ya Kimfumu ya Nzambi. Dibaku yina beto kele ti yo ya kuvanda ti kinduku ya ngolo ti Yehowa kele na valere mingi kuluta konso kima yina beto lenda yambula. Beto ke sepelaka mingi “kupesa yandi kiese kibeni.”—Bakol. 1:10.
10-11. Inki pusaka mpangi Michael na kusala bansoba ya nene na luzingu na yandi?
10 Bampangi mingi me yambulaka bima ya nene sambu na kusadila Yehowa na mutindu ya mbote. Bankaka me yambulaka bisalu ya nene na nsi-ntoto yai. Bankaka me yambulaka kusosa bimvwama. Bankaka me sobaka mutindu na bo ya kuzinga ntangu bo longukaka mambu ya Yehowa. Yo kele mambu yina mpangi Michael salaka. Yandi yelaka ve na dibuta ya Bambangi ya Yehowa. Ntangu yandi vandaka leke, yandi vandaka kulonguka karate. Yandi ke tuba nde: “Mono vandaka kuzola kulanda kuvanda mbote mpi yo vandaka kima ya kuluta mfunu sambu na mono. Bantangu ya nkaka, mono vandaka kuyindula nde ata muntu mosi ve lenda nunga mono.” Kansi ntangu mpangi Michael yantikaka kulonguka Biblia, yandi longukaka mutindu Yehowa ke tadilaka mubulu. (Nk. 11:5) Mbangi mosi ya Yehowa ti nkento na yandi vandaka kulonguka ti mpangi Michael. Mpangi Michael ke tuba nde: “Bo songaka mono ve ata fioti nde mono fwete yambula nsaka ya karate. Kansi bo landaka kaka kulonga mono kieleka ya Biblia.”
11 Mpangi Michael landaka kulonguka mambu ya Yehowa mpi yandi kumaka kuzola Yehowa mingi kibeni. Mawa yina Yehowa ke wilaka bansadi na yandi, simbaka kibeni ntima ya mpangi Michael. Na nima, mpangi Michael bakisaka nde yandi fwete baka lukanu mosi ya mfunu yina ta soba luzingu na yandi. Yandi ke tuba nde: “Mono zabaka nde kuyambula nsaka ya karate ta vanda kima ya mpasi kibeni yina mono me salaka ntete ve. Kansi mono zabaka mpi nde yo ta sepedisa Yehowa mpi mono ndimaka kibeni nde kusadila yandi, kele na valere mingi kuluta konso kima yina mono lenda yambula.” Mpangi Michael zabaka nde kieleka vandaka na valere mingi kibeni. Yo yina, yandi vandaka na kiese ya kusala bansoba ya nene na luzingu na yandi.—Yak. 1:25.
Bakieleka ya Biblia Kele Bonso . . . Mwinda
Nsemo ya ngolo ke sadisaka beto na kumona nzila na mpimpa. Mutindu mosi, Ndinga ya Nzambi ke songaka beto mutindu ya kubaka balukanu ya mbote ntangu beto ke zinga na nsi-ntoto yai ya Satana (Tala baparagrafe 12-13)
12-13. Inki mutindu kieleka ya Biblia sadisaka mpangi Mayli?
12 Sambu na kumonisa valere ya kieleka, Biblia ke fwanisaka yo ti mwinda yina ke pesa nsemo na mpimpa. (Nk. 119:105; Baef. 5:8) Mpangi Mayli na Azerbaïdjan ke sepelaka mingi ti lusadisu yina yandi me zwaka na Ndinga ya Nzambi. Papa na yandi ti mama na yandi vandaka ve kusambila na dibundu mosi. Papa na yandi vandaka muntu ya Mizilma mpi mama na yandi vandaka na dibundu ya Bayuda. Yandi ke tuba nde: “Mono vandaka kundima kibeni nde Nzambi kele, kansi mono vandaka ti bangiufula mingi. Mono vandaka kudiyula sambu na nki Nzambi salaka bantu mpi sambu na nki muntu fwete mona bampasi luzingu na yandi ya mvimba kaka sambu na kuniokwama mvula na mvula na bilungi? Bantu ke tubaka nde konso kima yina ke salamaka ke vandaka luzolo ya Nzambi. Yo yina mono kudiyulaka nde: ‘Keti Nzambi ke yalaka bantu mpi ke sepelaka kumona mutindu bantu ke niokwama?’”
13 Mpangi Mayli landaka kusosa bamvutu na bangiufula na yandi. Na nima, yandi ndimaka kulonguka Biblia mpi yandi kumaka Mbangi ya Yehowa. Yandi ke tuba nde: “Mambu ya kieleka mpi ya ke wakanaka yina kele na Biblia sadisaka mono na kukuma muntu ya kiese. Bantendula ya kieleka yina mono zwaka na Ndinga ya Nzambi sadisaka mono na kuvanda ti ngemba ya mabanza.” Bonso mpangi Mayli, beto yonso ke kumisaka Yehowa “Muntu yina bingaka [beto] na kukatuka na mpimpa sambu [beto] kota na nsemo na yandi ya kuyituka.”—1 Pie. 2:9.
14. Inki beto fwete sala sambu na kuzola mingi kieleka? (Tala mpi lupangu: “ Bima ya Nkaka Yina Beto Lenda Fwanisa ti Bakieleka ya Biblia.”)
14 Bambandu yina kele kaka mwa bambandu fioti ya ke monisa valere ya kieleka. Ntembe kele ve nde, nge ke yindula bambandu mingi ya nkaka. Nge lenda baka lukanu ya kutadila bikuma ya nkaka yina ke pusaka beto na kuzola kieleka ntangu nge ke longuka Biblia nge mosi. Kana beto ke zola mingi kieleka, beto ta sosa mitindu ya kumonisa nde beto ke zolaka yo.
MUTINDU BETO KE MONISAKA NDE BETO KE ZOLAKA KIELEKA
15. Inki mutindu beto lenda monisa nde beto ke zolaka kieleka?
15 Kana beto ke longuka Biblia mbala na mbala mpi mikanda yina ke tendulaka yo, beto ta monisa nde beto ke zolaka kieleka. Ata beto me salaka bamvula mingi na kieleka to ve, ntangu yonso beto ke vandaka ti mambu mingi ya kulonguka. Disolo ya ntete ya Nzozulu ya Nkengi yai tubaka nde: “Luvunu kele mingi na nsi-ntoto yai. Yo yina, yo lenda vanda mpasi na kuzaba kieleka. Kana nge ke zola kuzwa yo, nge fwete sosa yo. . . . Kana nge me zwa yo, nge fwete tanina yo. Kusuka ve kaka na kuzaba kieleka mosi. . . . Kansi sosa kulonguka bakieleka mingi ya Biblia.” Kulonguka ke vandaka kisalu ya ngolo kansi yo ke vandaka mfunu mingi.
16. Inki metode nge ke sadilaka ntangu nge ke longukaka? (Bingana 2:4-6)
16 Bantu yonso ve ke zolaka kutanga mpi kulonguka. Kansi Yehowa ke lomba beto na ‘kulanda kusosa’ sambu na kubakisa mbote kieleka ya Biblia. (Tanga Bingana 2:4-6.) Kana beto ke landa kusala bikesa yina, yo ta natila beto mambote. Ntangu mpangi Corey ke tangaka Biblia, yandi ke tulaka dikebi na konso verse. Yandi ke tuba nde: “Mono ke tangaka konso noti na nsi ya lutiti, mono ke talaka bareferansi mpi mono ke salaka bansosa ya nkaka . . . Metode yina ke sadisaka mono na kulonguka mambu mingi.” Beto lenda sadila metode yina to ya nkaka. Kansi beto ta monisa nde beto ke bakaka kieleka na valere kana beto ke sadila ntangu na beto mpi ke sala bikesa ya kulonguka yo.—Nk. 1:1-3.
17. Kutambula na kieleka ke tendula nki? (Yakobo 1:25)
17 Ya kieleka beto me zaba nde, kulonguka kieleka mpamba me fwana ve. Sambu na kubakila yo kibeni mambote, beto fwete tambula na kieleka, disongidila kusadila mambu yina beto ke longuka. Kana beto sala mpidina, kieleka ta natila beto kiese kibeni. (Tanga Yakobo 1:25.) Inki beto lenda sala sambu na kundima kibeni nde beto ke tambula na kieleka? Mpangi mosi tubaka nde, beto fwete sala bikesa ya kuzaba bisika yina ke kwendila ve mbote na luzingu na beto mpi bisika yina beto ta zola nde beto sala diaka ngolo sambu yo kuma mbote. Ntumwa Polo tubaka nde: “Na kiteso yina beto me yela, beto landa kutambula na mutindu yina me fwana na nzila yai mosi.”—Bafil. 3:16.
18. Sambu na nki beto ke salaka yonso sambu na ‘kulanda kutambula na kieleka’?
18 Yindula mambote yina beto ke bakaka kana beto ke sala yonso sambu na ‘kulanda kutambula na kieleka.’ Beto ke kumaka ti bikalulu ya mbote mpi beto ke sepedisaka Yehowa mpi bampangi Bakristu. (Bing. 27:11; 3 Yoa. 4) Yo kele bikuma ya mbote kibeni ya ke pusa beto na kuzola kieleka mpi na kutambula na kieleka.
NKUNGA 144 Tula Meso na Dikabu!
^ Mbala mingi, beto ke bingaka balukwikilu na beto mpi mutindu na beto ya kuzinga nde “kieleka.” Yo lenda vanda nde beto me katuka kuzaba kieleka ntama mingi ve to beto me zabaka yo luzingu na beto ya mvimba. Beto ta baka mambote kana beto tadila sambu na nki beto ke zolaka kuvanda Bambangi ya Yehowa. Kana beto sala mpidina, yo ta sadisa beto na kusala kaka mambu yina ta pesa Yehowa kiese.
