1. Sambu na nki beto ke pesaka bamvutu na balukutakanu?

 SAMBU na nki beto ke kwendaka na balukutakanu ya dibundu? Kikuma ya ntete kele sambu na kukumisa Yehowa. (Nk. 26:12; 111:1) Beto ke kwendaka mpi na balukutakanu sambu na kupesana kikesa na bantangu yai ya mpasi. (1 Bate. 5:11) Ntangu beto ke tulaka misapi na zulu mpi ke pesaka bamvutu, beto ke salaka mambu yina zole.

2. Inki mabaku beto ke vandaka ti yo ya kupesa bamvutu na balukutakanu?

² Konso mposo, beto ke vandaka ti mabaku ya kupesa bamvutu na balukutakanu na beto. Mu mbandu, na balukutakanu ya nsuka ya mposo, beto ke pesaka bamvutu na Kulonguka ya Nzozulu ya Nkengi. Na balukutakanu ya kati-kati ya mposo, beto lenda pesa bamvutu na Bimvwama ya Kimpeve, na Kulonguka ya Biblia ya Dibundu mpi na masolo ya nkaka.

3. Inki bampasi beto lenda kutana ti yo ntangu beto ke pesa bamvutu na balukutakanu mpi nki mutindu Baebreo 10:24, 25 lenda sadisa beto?

³ Beto yonso ke zolaka kukumisa Yehowa mpi kupesa bampangi na beto kikesa. Kansi ntangu beto ke pesa bamvutu na balukutakanu, beto lenda kutana ti mambu ya mpasi. Beto lenda wa boma ya kupesa bamvutu to beto lenda vanda ti mpusa ya ngolo ya kupesa bamvutu na balukutakanu kansi bo ke pona beto ve mbala mingi. Inki lenda sadisa beto? Mvutu kele na mukanda yina ntumwa Polo sonikilaka Bakristu ya Ebreo. Ntangu yandi tubilaka mfunu ya kuvukana na balukutakanu, yandi tubaka nde beto fwete tula dikebi na ‘kupesana kikesa.’ (Tanga Baebreo 10:24, 25.) Kana beto ke bakisa nde bampangi ta baka kikesa ntangu beto ke pesa bamvutu na balukutakanu,  beto ta wa ve boma ya kunangula musapi sambu na kupesa mvutu. Kana bo me pona beto ve mbala na mbala, beto lenda vanda kaka na kiese sambu na bampangi ya nkaka yina me zwa dibaku ya kupesa mvutu.​—1 Pie. 3:8.

4. Inki mambu tatu beto ta tubila na disolo yai?

⁴ Na disolo yai, beto ta tubila ntete mambu yina beto lenda sala sambu na kupesa bampangi kikesa na dibundu ya fioti, disongidila dibundu yina bantu kele ve mingi sambu na kupesa bamvutu. Na nima, beto ta tubila mambu yina beto lenda sala sambu na kupesa bampangi kikesa na dibundu ya nene yina bantu mingi lenda pesa bamvutu. Na nsuka, beto ta tubila mambu yina beto lenda sala sambu na kupesa bampangi kikesa na mambu yina beto ke tuba ntangu beto ke pesa bamvutu.

5. Inki mutindu beto lenda pesana kikesa na dibundu ya fioti?

⁵ Na dibundu ya fioti to na kimvuka, bantu lenda vanda ve mingi sambu na kupesa bamvutu. Bantangu ya nkaka, yo lenda lomba nde mpangi yina ke twadisa kuvingila mwa fioti sambu na kupona muntu mosi. Yo lenda sala nde lukutakanu kuwumela mpi yo pesa ve bampangi kikesa. Inki nge lenda sala? Nangulaka musapi na nge mbala na mbala. Kana nge sala mpidina, yo lenda pusa bampangi na kupesa bamvutu mbala mingi.

6-7. Inki beto lenda sala sambu na kuwa ve boma ya kupesa bamvutu?

⁶ Inki nge lenda sala kana nge ke wa boma na kupesa bamvutu? Bantu mingi mpi ke waka boma. Kansi sambu na kupesa kibeni bampangi kikesa, nge lenda sala mambu yina ta sadisa nge na kuwa ve boma ya kupesa bamvutu. Inki nge lenda sala?

⁷ Kana nge tadila diaka mambu yina bo tubaka na masolo ya me luta ya Nzozulu ya Nkengi, yo lenda sadisa nge. b Mu mbandu, yilama mbote. (Bing. 21:5) Kana nge yidika mbote disolo yina beno ta longuka na lukutakanu, yo ta sadisa nge na kupesa bamvutu kukonda mpasi. Pesa bamvutu ya nkufi. (Bing. 15:23; 17:27) Mvutu ya nkufi ta sadisa nge na kuwa ve boma. Bampangi lenda bakisa kukonda mpasi mvutu ya nkufi yina kele ti nsa mosi to bansa zole na kisika ya kupesa mvutu ya nda yina kele ti bangindu mingi na kati. Kana nge pesa mvutu ya nkufi na bangogo na nge mosi, yo ta monisa nde nge yilamaka mbote mpi nde nge ke bakisa mbote disolo yina beno ke longuka.

8. Inki mutindu Yehowa ke tadilaka bikesa yina beto ke salaka?

⁸ Ebuna, nki nge lenda sala kana nge sadila mambu yina beto me katuka kutubila kansi nge ke wa kaka boma ya kupesa bamvutu? Ndima nde Yehowa ta sepela ti bikesa yina nge ke sala na masonga yonso sambu na kupesa bamvutu. (Luka 21:1-4) Yehowa ke lombaka beto ve na kusala mambu yina beto ta kuka ve kusala. (Bafil. 4:5) Tadila mambu yina nge lenda sala, tula lukanu ya kusala yo mpi samba sambu Yehowa kupesa nge ntima ya madidi. Nge lenda kuditudila ntete lukanu ya kupesa mvutu ya nkufi.

9. Inki mpasi nge lenda kutana ti yo na dibundu ya nene?

⁹ Kana dibundu na beno kele ti bansamuni mingi, nge lenda kutana ti diambu ya nkaka ya mpasi. Mbala ya nkaka, bampangi mingi kibeni ke songaka misapi yo yina mpangi yina ke twadisa lenda mona ve musapi na nge. Mu mbandu, mpangi-nkento Danielle ke sepelaka  kupesa bamvutu na balukutakanu. c Yo kele na kati ya mambu yina yandi ke salaka sambu na kusambila Yehowa. Yandi ke salaka yo sambu na kupesa bampangi kikesa mpi sambu na kukumisa lukwikilu na yandi ngolo. Kansi ntangu yandi kwendaka na dibundu mosi ya nene, bo vandaka kupona yandi ve mingi. Nkutu bantangu ya nkaka, yandi vandaka kupesa ve ata mvutu mosi na lukutakanu ya mvimba. Yandi ke tuba nde: “Mono vandaka kuwa makasi. Mono vandaka kumona bonso nde mono me sala ve kima mosi ya mfunu. Kana bo ke pona nge ve mbala na mbala, nge lenda yantika kudiyula kana bo ke sala yo ve na luzolo.”

10. Inki diaka beto lenda sala sambu na kupesa bamvutu na balukutakanu?

¹⁰ Keti nge mpi ke kudiwaka bonso mpangi-nkento Danielle? Kana mpidina, yo lenda pusa nge na kuyambula kupesa bamvutu na balukutakanu. Kansi kusala yo ve. Inki nge lenda sala? Nge lenda yidika bamvutu mingi na konso lukutakanu. Kana bo pona nge ve na luyantiku, nge ta vanda kaka ti mabaku ya kupesa bamvutu na ntwala nde lukutakanu kumana. Ntangu nge ke yidika Kulonguka ya Nzozulu ya Nkengi, tala mutindu konso paragrafe ke wakana ti ntu-diambu ya disolo yina nge ke yidika. Kana nge sala mutindu yina, nge ta vanda kaka ti bamvutu ya mbote ya kupesa. Diaka nge lenda yidika bakomantere na baparagrafe yina ke tubila bakieleka ya mudindu yina ke vandaka mpasi mingi na kutendula. (1 Bak. 2:10) Sambu na nki? Sambu bantu mingi ve lenda songa misapi na baparagrafe yina. Ebuna, nki nge lenda sala kana nge me sadila mambu yonso yina beto me tubila kansi balukutakanu mingi me luta bo ke pona nge ve na kupesa mvutu? Nge lenda solula ti mpangi yina ke twadisa kulonguka na ntwala lukutakanu mpi nge songa yandi kisika yina nge ke zola kupesa mvutu.

11. Bafilipi 2:4 ke lomba beto na kusala nki?

¹¹ Tanga Bafilipi 2:4. Na nsadisa ya mpeve santu, ntumwa Polo siamisaka Bakristu na kusosa mambote ya bantu ya nkaka. Inki mutindu beto lenda sadila mambu yina ntangu beto kele na balukutakanu? Kana beto ke yibuka nde bantu ya nkaka mpi ke zolaka kupesa bamvutu.

12. Inki mutindu beto lenda pesa bampangi kikesa na balukutakanu? (Tala mpi kifwanisu ya ke wakana ti paragrafe yai.)

 ¹² Yindula diambu yai: Kana nge ke solula ti banduku na nge, keti nge ta tuba mingi mpi bo, bo tuba fioti? Ve. Nge ta zola mpi nde bo tuba. Mutindu mosi mpi, ntangu beto kele na balukutakanu, beto ke zolaka mpi nde bantu mingi kutuba. Yo yina, kima mosi yina beto lenda sala sambu na kupesa bampangi na beto kikesa kele kupesa bo dibaku ya kupesa bamvutu. (1 Bak. 10:24) Beto tala mutindu beto lenda sala yo.

13. Inki mutindu beto lenda pesa bantu mingi dibaku ya kupesa bamvutu?

¹³ Kima ya nkaka ya beto fwete sala kele kupesa bamvutu ya nkufi sambu yo pesa bantu ya nkaka dibaku ya kutuba. Bankuluntu mpi bampangi ya kuyela na kimpeve fwete pesa mbandu na diambu yai. Ata ntangu nge ke pesa mvutu ya nkufi, kutubila ve mambu mingi na mbala mosi. Kana nge tubila bangindu yonso ya kele na paragrafe, yo lenda sala nde bantu ya nkaka kutuba ve. Na paragrafe yai, beto me tubila bangindu zole: kupesa bamvutu ya nkufi mpi kutubila ve mambu yonso na mbala mosi. Kana bo me pona nge muntu ya ntete sambu na kupesa mvutu na paragrafe yai, nge lenda tubila diambu mosi.

14. Inki lenda sadisa beto na kuzaba mbala ikwa beto ta tula musapi na zulu? (Tala mpi kifwanisu ya ke wakana ti paragrafe yai.)

¹⁴ Sadila mayele na nge sambu na kuzaba mbala ikwa nge ta tula musapi na zulu. Kana beto ke nangula musapi mbala na mbala, yo lenda pusa mpangi yina ke twadisa na kupona beto mingi ata bantu ya nkaka me zwa ntete ve dibaku ya kutuba. Yo lenda lembisa bantu ya nkaka mpi yo lenda sala nde bo tula ve musapi na zulu.​—Lon. 3:7.

15. (a) Inki beto fwete sala kana bo me pona beto ve sambu na kupesa mvutu? (b) Inki mutindu bampangi yina ke twadisa lenda tudila bantu yonso dikebi? (Tala lupangu “ Kana Nge Ke Twadisa.”)

¹⁵ Kana bantu mingi me tula misapi na zulu, yo lenda sala nde beto pesa ve bamvutu mbala  mingi mutindu beto ke zola. Bantangu ya nkaka, mpangi yina ke twadisa lenda pona beto ve. Yo lenda lembisa beto kansi beto fwete wa ve makasi kana bo me pona beto ve.​—Lon. 7:9.

16. Inki mutindu beto lenda pesa bantu yina me pesa bamvutu kikesa?

¹⁶ Kana nge me pesa ve bamvutu mbala mingi mutindu nge ke zola, nge lenda landa ti dikebi yonso bamvutu yina bantu ya nkaka ke pesa mpi na nima ya lukutakanu, sikisa bo. Kana nge sikisa bampangi, yo lenda pesa bo kikesa kaka mutindu bamvutu yina nge zolaka kupesa na lukutakanu zolaka kupesa bo kikesa. (Bing. 10:21) Kusikisa bampangi kele na kati ya mambu yina beto lenda sala sambu na kupesana kikesa.

17. (a) Inki mutindu bibuti lenda sadisa bana na bo na kuyidika bamvutu ya mbote? (b) Mutindu video monisaka yo, nki kele mambu iya ya lenda sadisa beto na kuyidika bamvutu? (Tala mpi noti na nsi ya lutiti.)

¹⁷ Inki diaka beto lenda sala sambu na kupesana kikesa na balukutakanu? Kana nge kele kibuti, sadisa bana na nge ya fioti na kuyidika bamvutu na kuwakana ti bamvula na bo. (Mat. 21:16) Bantangu ya nkaka, disolo ya beto ke longuka lenda tubila mambu ya nene. Mu mbandu, mambu ya makwela to mambu ya me tala bikalulu ya mbote kansi yo lenda vanda ti paragrafe mosi to zole yina mwana na nge lenda pesa mvutu. Diaka, sadisa bana na nge na kubakisa nde konso ntangu yina bo ke tula misapi na zulu, bantangu ya nkaka bo lenda pona  bo ve na kupesa bamvutu. Kana nge tendudila bo mambu yina, yo ta sadisa bo na kulemba ve nitu kana bo me pona bo ve.​—1 Tim. 6:18. d

18. Inki beto fwete sala sambu na kubenda ve dikebi ya bantu na kimuntu na beto ntangu beto ke pesa bamvutu? (Bingana 27:2)

¹⁸ Beto yonso lenda yidika bamvutu ya mbote ya ke kumisa Yehowa mpi ya ke pesa bampangi kikesa. (Bing. 25:11) Bantangu ya nkaka, yo lenda lomba nde beto tubila na bunkufi mwa disolo ya luzingu na beto kansi beto fwete tuba ve mambu mingi ya me tala beto. (Tanga Bingana 27:2; 2 Bak. 10:18) Beto fwete landa kubenda dikebi ya bantu na Yehowa, na Ndinga na yandi mpi na bansadi na yandi. (Kus. 4:11) Kana ngiufula ya paragrafe ke lomba beto na kutubila mambu na beto, beto lenda sala yo, mu mbandu ngiufula yina kele na paragrafe ya ke landa ya disolo yai.

19. (a) Inki ta salama kana beto yonso ke tudila bantu ya nkaka dikebi na balukutakanu? (Baroma 1:11, 12) (b) Inki nge ke sepelaka ti yo ntangu nge ke pesaka bamvutu na balukutakanu?

¹⁹ Ata beto kele ve ti bansiku ya pwelele ya me tala kupesa bamvutu, beto yonso fwete sala yonso sambu na kupesana kikesa. Beto lenda pesa bantu ya nkaka kikesa ata beto me pesa ve bamvutu mingi. To kana beto ke sepela ti mabaku yina beto me zwa ya kupesa bamvutu mpi kana beto ke sepela ti yina mpi ya bampangi me zwa ya kupesa bamvutu. Kana beto ke tula dikebi na mambote ya bampangi ntangu beto kele na balukutakanu, beto yonso ta “pesana kikesa.”​—Tanga Baroma 1:11, 12.