DISOLO YA KULONGUKA 16
“Mpangi na Nge Ta Futumuka”!
“Yezu tubilaka [Marta] nde: ‘Mpangi na nge ta futumuka.’”—YOA. 11:23.
NKUNGA 151 Yandi Ta Binga
MAMBU YINA DISOLO YAI KE TUBILA a
1. Inki mutindu mwana mosi ya bakala monisaka nde yandi vandaka ti kivuvu ya ngolo na lufutumuku?
MATTHEW, mwana mosi ya bakala belaka maladi mosi yina yo lombaka nde bo sala yandi ba operasio mingi. Kilumbu mosi ntangu yandi vandaka ti bamvula nsambwadi, yandi ti dibuta na yandi talaka manaka ya JW Télédiffusion. Na kitini ya nsuka ya manaka yina, bo talaka video ya nkunga mosi ya ke monisa mutindu beto ta yambaka bantu yina beto vandaka kuzola ya ta futumuka. b Na nsuka ya manaka yina, Matthew simbaka bibuti na yandi na maboko mpi tubaka nde: “Mama ti papa, keti beno me mona? Ata mono me fwa, mono ta futumuka. Beno vingila mono, mambu yonso ta luta mbote.” Yindula mutindu bibuti yina kudiwaka ntangu bo zabaka nde mwana na bo vandaka ti kivuvu ya ngolo na lufutumuku.
2-3. Sambu na nki beto fwete yindula lusilu ya lufutumuku?
2 Beto fwete yindula mbala na mbala lusilu ya Yehowa ya me tala lufutumuku ya ke kwisa. (Yoa. 5:28, 29) Sambu na nki? Sambu beto me zaba ve ata fioti ntangu yina beto lenda bela maladi mosi ya ngolo to ntangu yina muntu mosi yina beto ke zolaka lenda fwa na kintulumukina. (Lon. 9:11; Yak. 4:13, 14) Kansi kivuvu na beto ya lufutumuku lenda sadisa beto na kukanga ntima na bampasi yina. (1 Bate. 4:13) Biblia ke ndimisa beto nde tata na beto ya zulu ke zabaka beto mbote mpi yandi ke zolaka beto mingi kibeni. (Luka 12:7) Yo me fwana kibeni nde, Yehowa kuzaba beto mbote sambu yandi sala beto diaka ti bikalulu yina beto vandaka ti yo mpi ti mambu yina beto zabaka dezia. Yehowa ke zolaka beto mingi kibeni, yo yina yandi me pesaka beto dibaku ya kuzinga mvula na mvula mpi ata beto me fwa, yandi ta futumuna beto diaka.
3 Na disolo yai, beto ta tubila ntete sambu na nki beto fwete kwikila na lusilu ya lufutumuku. Na nima, beto ta tubila disolo ya kele na Biblia ya ke pesa kikesa yina kele ti bangogo ya kele na verse ya me simba disolo na beto: “Mpangi na nge ta futumuka.” (Yoa. 11:23) Na nsuka, beto ta tubila mambu yina beto lenda sala sambu na kukumisa kivuvu na beto ngolo na lufutumuku.
SAMBU NA NKI BETO FWETE KWIKILA NA LUSILU YA LUFUTUMUKU?
4. Sambu na kundima lusilu mosi, beto fwete sosa ntete kuzaba nki? Pesa mbandu.
4 Sambu na kundima mambu yina muntu mosi me sila beto, beto fwete sosa kuzaba ntete kana muntu yango kele ti mpusa mpi ngolo to makuki ya kulungisa mambu yina. Beto baka mbandu: yindula nde mupepe mosi me bebisa kibeni nzo na nge. Nduku mosi me kwisa mpi me sila nge nde: ‘Mono ta yidika nzo na nge.’ Yandi kele muntu ya masonga mpi nge ke ndima kibeni nde yandi kele ti mpusa ya kusadisa nge. Kana yandi me zaba kutunga mbote mpi kana yandi kele ti bisadilu yina yo ta lomba, nge ta ndima kibeni nde yandi ta kuka kusadisa nge. Yo yina nge ta ndima mambu yina yandi me songa nge. Ebuna nki beto lenda tuba sambu na lusilu ya nzambi ya lufutumuku? Keti yandi kele kibeni ti mpusa mpi ngolo ya kulungisa yo?
5-6. Inki ke ndimisa beto kibeni nde Yehowa kele ti nzala ya ngolo ya kufutumuna bafwa?
5 Keti Yehowa kele ti nzala ya ngolo ya kufutumuna bafwa? Ya kieleka, yandi kele ti mpusa ya kusala yo. Na nsadisa ya mpeve santu, yandi sadisaka bantu na kusonika lusilu na yandi ya lufutumuku yina ta salama na bilumbu ke kwisa. (Yez. 26:19; Ozea 13:14; Kus. 20:11-13) Kana Yehowa me sila kima mosi, yandi ke lungisaka yo. (Yoz. 23:14) Yehowa kele ti mpusa ya ngolo ya kufutumuna bantu yina me fwaka. Sambu na nki beto ke tuba mpidina?
6 Beto tadila mambu yina Yobi tubaka. Yandi ndimaka kibeni nde ata yandi me fwa, Yehowa ta vanda na nzala ya ngolo ya kufutumuna yandi diaka. (Yobi 14:14, 15, noti na nsi ya lutiti.) Yehowa kele mpi ti nzala yina ya ngolo ya kufutumuna bansadi na yandi yonso yina me fwaka. Yandi kele ti nzala yina ya ngolo ya kufutumuna bo sambu bo vanda ti sante ya mbote mpi na kiese. Ebuna nki beto lenda tuba sambu na bamiliare ya bantu yina fwaka mpi zwaka ve dibaku ya kulonguka mambu ya Yehowa? Nzambi na beto ya zola ke zolaka mpi kufutumuna bo. (Bis. 24:15) Yandi ke zolaka nde bo zwa dibaku ya kukuma banduku na yandi mpi ya kuzinga mvula na mvula na ntoto. (Yoa. 3:16) Ya kieleka, Yehowa kele ti nzala ya ngolo ya kufutumuna bafwa.
7-8. Sambu na nki beto fwete ndima kibeni nde Yehowa kele ti ngolo ya kufutumuna bafwa?
7 Keti Yehowa kele mpi ti ngolo ya kufutumuna bafwa? Ee, yandi kele ti yo sambu yandi kele “Nkwa-Ngolo Yonso.” (Kus. 1:8) Yandi kele ti ngolo ya kununga konso mbeni yina, yo vanda lufwa. (1 Bak. 15:26) Kuzaba yo ke pesaka beto ngolo mpi kikesa. Beto tadila mbandu ya mpangi nkento Emma Arnold. Yandi ti dibuta na yandi kutanaka ti bampasi ya ngolo yina mekaka lukwikilu na bo na Bitumba ya Zole ya Ntoto ya Mvimba. Sambu na kupesa mwana na yandi ya nkento kikesa ntangu bantu yina bo vandaka kuzola fwaka na bacamp yina bo vandaka kusadisa bantu bisalu ya ngolo na luyalu ya Nazi, mpangi Emma tubaka nde: “Kana bantu yina me fwaka lenda zinga diaka ve, yo ke tendula nde lufwa yina kele mbeni ya bantu kele ngolo kuluta Nzambi, mpidina ve?” Ya kieleka, ata kima mosi ve kele ngolo kuluta Yehowa. Nzambi Nkwa-Ngolo Yonso yina salaka luzingu kele kibeni ti ngolo ya kufutumuna bantu yonso yina me fwaka.
8 Kima ya nkaka yina ke pusa beto na kundima nde Nzambi kele ti ngolo ya kufutumuna bafwa kele sambu yandi ke vilaka ve kima ata fioti. Yandi ke bingaka konso mbwetete na zina na yo. (Yez. 40:26) Yandi ke vilaka mpi ve bantu yina me fwaka. (Yobi 14:13; Luka 20:37, 38) Yandi lenda yibuka kukonda mpasi mambu ya fioti-fioti ya me tala bantu yina yandi ta futumuna, yo vanda mutindu bo vandaka, bikalulu na bo, mambu yina bo salaka mpi mambu yina bo zabaka ntangu bo vandaka na luzingu.
9. Sambu na nki nge ke kwikila na lusilu ya Yehowa ya lufutumuku?
9 Ya kieleka, beto fwete kwikila kibeni na lusilu ya Yehowa ya lufutumuku yina ta salama na bilumbu ke kwisa sambu beto me zaba nde yandi kele ti nzala ya ngolo mpi ngolo ya kulungisa lusilu yina. Kima ya nkaka ya ke pusa beto na kundima nde Yehowa ta futumuna bantu kele sambu yandi me futumunaka dezia bantu ya nkaka. Na ntangu ya ntama, Yehowa pesaka bansadi na yandi ya nkaka ya kwikama ngolo ya kufutumuna bantu. Yandi pesaka mpi Yezu ngolo yina. Beto tadila disolo mosi ya lufutumuku yina Yezu salaka ya kele na Yoane kapu 11.
NDUKU YA NGOLO YA YEZU ME FWA
10. Inki salamaka ntangu Yezu vandaka kulonga na Yordani na ntwala ya kukwenda na Betania? (Yoane 11:1-3)
10 Tanga Yoane 11:1-3. Yindula mambu yina salamaka na Betania na nsuka ya mvu 32 ya ntangu na beto. Yezu vandaka ti banduku ya ngolo na bwala yina. Banduku yango vandaka Lazare ti bampangi na yandi zole ya bankento. (Luka 10:38-42) Kansi Lazare belaka mpi bampangi na yandi ya bankento vandaka kudiyangisa mingi. Bo tindilaka Yezu nsangu. Yandi vandaka na Yordani mpi yo lombaka nde yandi sala bilumbu kiteso ya zole sambu na kukuma na Betania. (Yoa. 10:40) Diambu ya mawa kele nde Lazare fwaka na nima ya muntu yina kwendaka kusonga Yezu nde Lazare ke bela. Ata Yezu zabaka nde nduku na yandi Lazare fwaka, yandi salaka diaka bilumbu zole na kisika yina yandi vandaka mpi na nima yandi kwendaka na Betania. Yo yina ntangu Yezu kumaka na Betania, Lazare fwaka bilumbu iya lutaka. Yezu salaka kima mosi yina pesaka banduku na yandi kiese mpi yo kumisaka Nzambi.—Yoa. 11:4, 6, 11, 17.
11. Disolo yai ke longa beto nki na yina me tala kinduku?
11 Disolo yina ke longa beto dilongi mosi ya me tala kinduku. Yindula fioti: ntangu Maria mpi Marta tindilaka Yezu nsangu, bo songaka yandi ve na kukwisa na Betania. Bo songaka yandi kaka nde nduku na yandi ya ngolo ke bela. (Yoa. 11:3) Ntangu Lazare fwaka, Yezu lendaka kufutumuna yandi na kintama kansi yandi bakaka lukanu ya kukwenda na Betania sambu na kukutana ti banduku na yandi Maria mpi Marta. Keti nge kele ti nduku yina lenda sadisa nge kukonda nde nge lomba yandi lusadisu? Kana mpidina, nge lenda tudila yandi ntima na “bantangu ya mpasi.” (Bing. 17:17) Bonso Yezu, beto fwete vanda banduku ya mutindu yina sambu na bantu ya nkaka. Ntangu yai, beto vutuka na disolo yina mpi beto tala mambu yina salamaka na nima.
12. Inki Yezu silaka Marta mpi sambu na nki yo lombaka nde Marta kukwikila na lusilu yina? (Yoane 11:23-26)
12 Tanga Yoane 11:23-26. Marta waka nde Yezu me kuma pene-pene na Betania. Yandi kwendaka nswalu na Yezu mpi songaka yandi nde: “Mfumu, kana nge vandaka awa, mpangi na mono zolaka kufwa ve.” (Yoa. 11:21) Ya kieleka, Yezu lendaka kubelula Lazare. Kansi yandi vandaka ti mfunu ya kusala kima mosi ya kuluta mfunu. Yandi songaka Marta nde: “Mpangi na nge ta futumuka.” Yandi songaka mpi Marta kikuma ya nkaka yina fwete pusa Marta na kundima lusilu yina ntangu yandi tubaka nde: “Mono kele lufutumuku mpi luzingu.” Ya kieleka, Nzambi pesaka Yezu ngolo ya kufutumuna bafwa. Ntete, yandi futumunaka leke mosi ya nkento ntangu fioti na nima ya lufwa ya leke yina. Na nima yandi futumunaka mpi leke mosi ya bakala mpi yo ke monana nde, yandi futumunaka leke yina kaka kilumbu leke yango fwaka. (Luka 7:11-15; 8:49-55) Keti yandi lendaka kufutumuna muntu yina fwaka mpi bilumbu iya lutaka mpi nitu na yandi yantikaka dezia kupola?
“LAZARE, KWISA KUBASIKA!”
Yezu wilaka banduku na yandi yina vandaka na mpasi mawa (Tala baparagrafe 13-14)
13. Mutindu Yoane 11:32-35 ke monisa yo, nki Yezu salaka ntangu yandi monaka Maria mpi bantu ya nkaka ke dila? (Tala mpi kifwanisu ya ke wakana ti paragrafe yai.)
13 Tanga Yoane 11:32-35. Mona na mabanza mambu yina me salama na nima. Maria mpangi ya Lazare ke kwenda kukutana ti Yezu. Yandi ke vutukila kaka mambu yina mpangi na yandi Marta tubaka: “Mfumu, kana nge vandaka awa, mpangi na mono zolaka kufwa ve.” Yandi ti bantu ya nkaka kele na mawa ya ngolo. Ntangu Yezu monaka bo mpi waka bo ke dila, yo pesaka Yezu mpi mawa mingi. Yandi waka mawa mingi sambu na banduku na yandi, yo yina yandi dilaka. Yandi bakisaka mpasi yina muntu ke waka kana muntu yina yandi vandaka kuzola me fwa.
14. Mambu yina Yezu salaka ntangu Maria vandaka kudila ke longa beto nki sambu na Yehowa?
14 Mambu yina Yezu salaka ntangu yandi monaka Maria ke dila ke longa beto nde Yehowa kele Nzambi yina ke vandaka ti mawa ya nene. Sambu na nki beto ke tuba mutindu yina? Mutindu beto monaka yo na disolo ya me luta, Yezu ke landaka na mutindu ya kukuka mutindu Tata na yandi ke yindulaka mpi ke kudiwaka. (Yoa. 12:45) Yo yina, mutindu Yezu wilaka banduku na yandi yina vandaka na mpasi mawa mpi mutindu yandi dilaka, yo ke pusa beto na kundima nde Yehowa mpi ke wilaka beto mawa mingi ntangu beto ke kutana ti bampasi. (Nk. 56:8) Keti yo ke pusa nge ve na kukwenda pene-pene ya Nzambi na beto ya mawa ya nene?
Yezu monisaka nde yandi kele ti ngolo ya kufutumuna bafwa (Tala baparagrafe 15-16)
15. Mutindu Yoane 11:41-44 ke monisa yo, nki salamaka na maziamu ya Lazare? (Tala mpi kifwanisu ya ke wakana ti paragrafe yai.)
15 Tanga Yoane 11:41-44. Yezu me kuma na maziamu ya Lazare mpi yandi ke lomba bantu na kukatula ditadi yina bo fikaka na zulu na yo. Marta ke buya mpi yandi ke tuba nde nitu ya Lazare ke basisa dezia nsudi. Yezu ke vutula nde: “Keti mono songaka nge ve nde kana nge kwikila, nge ta mona nkembo ya Nzambi?” (Yoa. 11:39, 40) Na nima, Yezu me tala na zulu mpi yandi me samba na meso ya bantu yonso. Yandi ke zola kupesa Yehowa lukumu sambu na mambu yina ta salama na nima. Na nima, Yezu me binga nde: “Lazare, kwisa kubasika!” Mpi lazare me basika. Yezu salaka kima mosi yina bantu ya nkaka yindulaka nde yo lenda salama ve.—Tala noti ya kulongukila ya Yoane 11:17 na Biblia ya Kifalansa.
16. Inki mutindu disolo yina kele na Yoane kapu 11 ke kumisa lukwikilu na beto ngolo na kivuvu ya lufutumuku?
16 Disolo yina kele na Yoane kapu 11 ke kumisa lukwikilu na beto ngolo na kivuvu ya lufutumuku. Inki mutindu? Yezu songaka Marta nde: “Mpangi na nge ta futumuka.” (Yoa. 11:23) Bonso Tata na yandi, Yezu kele ti nzala ya ngolo mpi ngolo ya kulungisa lusilu yina. Mutindu yandi dilaka ke monisa nde yandi ke vandaka ti nzala ya ngolo ya kufutumuna bantu yina me fwaka mpi ya kukatula bampasi yonso yina lufwa me nataka. Ntangu Lazare basikaka na maziamu, Yezu monisaka diaka nde yandi kele ti ngolo ya kufutumuna bafwa. Yibuka diaka mambu yina Yezu songaka Marta: “Keti mono songaka nge ve nde kana nge kwikila, nge ta mona nkembo ya Nzambi?” (Yoa. 11:40) Beto kele ti bikuma ya mbote ya kundima nde lusilu ya Nzambi ya lufutumuku ta lungana. Inki beto lenda sala diaka sambu na kukumisa ngolo kivuvu na beto ya lufutumuku?
MUTINDU BETO LENDA KUMISA KIVUVU NA BETO YA LUFUTUMUKU NGOLO
17. Inki beto fwete vila ve ntangu beto ke tanga masolo ya Biblia ya ke tubila lufutumuku?
17 Tanga masolo ya lufutumuku yina salamaka na ntangu ya ntama mpi yindula yo mingi. Biblia ke tubilaka balufutumuku nana yina salamaka awa na ntoto. c Nge lenda longuka mbote-mbote masolo yina. Ntangu nge ke longuka yo, kuvila ve nde bantu yina zingaka kibeni. Babakala, bankento mpi bana vandaka na kati ya bantu yina. Tala mpi malongi yina nge lenda baka. Yindula mutindu konso disolo ya lufutumuku ke monisa nde Nzambi kele ti nzala ya ngolo mpi ngolo ya kufutumuna bantu yina me fwaka. Kima ya kuluta mfunu kele nde, yindula mingi lufutumuku ya Yezu sambu yo kele mfunu kuluta balufutumuku yonso ya nkaka. Kuvila ve nde bantu mingi monaka mutindu Yezu futumukaka mpi yo ke pusa beto na kundima nde yandi futumukaka kibeni.—1 Bak. 15:3-6, 20-22.
18. Inki mutindu beto lenda sadila mbote bankunga na beto ya ke tubilaka kivuvu ya lufutumuku? (Tala mpi noti na nsi ya lutiti.)
18 Sadila mbote “bankunga ya kimpeve” yina ke tubilaka kivuvu ya lufutumuku. d (Baef. 5:19) Bankunga yina ke sadisaka beto na kukumisa lukwikilu na beto ngolo na kivuvu ya lufutumuku. Beno widikilaka yo, beno longuka yo mpi beno tubila mambu yina bankunga yango ke tuba na lusambu ya dibuta. Sala ngolo na kukanga bankunga yina na ntu sambu yo simba ntima na nge. Na nima, ntangu nge ta kutana ti bampasi ya ngolo to kana muntu yina nge vandaka kuzola me fwa, mpeve ya Yehowa ta sadisa nge na kuyibuka bankunga yina sambu yo pesa nge kikesa mpi ngolo.
19. Inki beto lenda yindula sambu na lufutumuku? (Tala lupangu “ Inki Nge Ta Yula Bo?”)
19 Mona na mabanza mutindu bantu ta futumuka. Yehowa me pesaka beto makuki ya kudimona na nsi-ntoto ya mpa. Mpangi-nkento mosi ke tuba nde: “Mono me lutisaka ntangu mingi na kudimona na nsi-ntoto ya mpa mpi yo kele bonso nde mono ke wa nsudi ya bintuntu yina ke yela na paladisu.” Yindula nde nge me kutana ti bansadi ya Yehowa ya ntangu ya ntama yina Biblia ke tubilaka. Nge ke vingila ti mpusa ya ngolo ya kukutana ti nani? Inki bangiufula nge ta yula muntu yango? Yindula nde nge me kutana diaka ti bantu yina nge vandaka kuzola, bayina me fwaka. Yindula mambu ya ntete yina nge ta songa bo na mbala ya ntete, mutindu nge ta yamba bo mpi mutindu nge ta basisa mansanga ya kiese.
20. Inki beto fwete sala?
20 Beto ke pesaka Yehowa mersi mingi sambu na lusilu ya lufutumuku yina yandi me pesaka beto. Beto fwete ndima kibeni nde yo ta lungana sambu Yehowa kele ti nzala ya ngolo mpi ngolo ya kulungisa yo. Beto fwete landa kukumisa lukwikilu na beto ngolo na kivuvu ya lufutumuku. Kana beto sala mpidina, beto ta kwenda pene-pene ya Nzambi yina me silaka beto nde: ‘Bantu yina beno vandaka kuzola ya me fwaka, ta futumuka!’
NKUNGA 147 Lusilu ya Luzingu ya Mvula na Mvula
a Kana muntu mosi yina nge vandaka kuzola me fwaka, ntembe kele ve nde kivuvu ya lufutumuku ke pesaka nge kiese mingi. Inki mutindu nge lenda songa bantu ya nkaka kikuma yina nge ke kwikilaka na lufutumuku? Inki nge lenda sala sambu na kukumisa lukwikilu na nge ngolo na lufutumuku? Disolo yai ta sadisa beto yonso na kukumisa kivuvu na beto ya lufutumuku ngolo mingi.
b Ntu-diambu ya video yina ya nkunga vandaka: Yo Vandaka Pene-Pene. Yo basikaka na manaka ya JW Télédiffusion ya novembre 2016.
c Tala lupangu “Balufutumuku Nana Yina Biblia Ke Tubilaka” na Nzozulu ya Nkengi ya 1er août 2015, lut. 4.
d Tala bankunga yai na mukanda “Beto Yimbila Yehowa na Kiese Yonso”: “Kudimona Ntangu Bima Yonso Ta Vanda ya Mpa” (Nkunga 139), “Tula Meso na Dikabu!” (Nkunga 144) mpi “Yandi Ta Binga” (Nkunga 151). Tala mpi bankunga ya nkaka na jw.org “Yo Vandaka Pene-Pene,” “Nsi-Ntoto ya Mpa” mpi “Kwi Tala.”
