Keti Nge Zabaka Yo?
Sambu na nki banzenza vandaka mpi na kati ya basoda ya ntotila Davidi?
BASODA yai ya banzenza vandaka mpi na kati ya basoda ya Davidi: Seleki muntu ya Amoni, Uria muntu ya Heti mpi Yitma muntu ya Moabi. a (1 Bans. 11:39, 41, 46) ‘Bantu ya Kereti, bantu ya Peleti mpi bantu ya Gati’ vandaka mpi na kati ya basoda ya Davidi. (2 Sam. 15:18) Yo ke monana nde bantu ya Kereti mpi bantu ya Peleti vandaka ya kukangama ngolo ti bantu ya Filistia. (Ezek. 25:16) Bantu ya Gati katukaka na mbanza Gati ya bantu ya Filistia.—Yoz. 13:2, 3; 1 Sam. 6:17, 18.
Sambu na nki Davidi tulaka mpi banzenza yina na kati ya basoda na yandi? Yandi ndimaka kibeni nde bo kangamaka na yandi mpi kima ya kuluta mfunu kele nde bo kangamaka na Yehowa. Mu mbandu, sambu na bantu ya Kereti mpi bantu ya Peleti, diksionere mosi ya Biblia (New Interpreter’s Dictionary of the Bible) ke tuba nde: “Bo kangamaka na Davidi na bantangu ya kuluta mpasi ya luyalu na yandi.” Inki mutindu? Ntangu “bantu yonso ya Izraele” yambulaka ntotila Davidi sambu na kulanda ‘Sheba, muntu mosi ya mavwanga,’ bantu ya Kereti ti bantu ya Peleti kangamaka kaka ti Davidi mpi bo sadisaka yandi na kusukisa mavwanga yina Sheba basisaka. (2 Sam. 20:1, 2, 7) Na dibaku ya nkaka, Adoniya mwana ya ntotila Davidi, sosaka kubotula kiti ya kimfumu. Na dibaku yai diaka, bantu ya Kereti ti bantu ya Peleti monisaka nde bo kangamaka kaka ti Davidi mpi bo sadisaka yandi na kutula Salomo ntotila sambu yandi yinga Davidi. Sambu yandi muntu Yehowa ponaka na kukuma ntotila.—1 Bant. 1:24-27, 38, 39.
Itai muntu ya Gati vandaka mpi nzenza yina kangamaka ngolo kibeni na Davidi. Itai ti basoda na yandi 600 sadisaka Davidi ntangu Absalomi mwana na yandi teleminaka yandi mpi yibaka bantima ya bantu ya Izraele sambu bo landa yandi na kisika ya kulanda Davidi, tata na yandi. Ntete, Davidi songaka Itai nde yandi fwete nwana ve sambu na yandi sambu yandi vandaka munzenza. Kansi Itai tubaka nde: “Ya kieleka mutindu Yehowa kele na luzingu mpi ya kieleka mutindu mfumu na mono ntotila kele na luzingu, konso kisika yina mfumu na mono ntotila ta vanda, yo vanda sambu na lufwa to sambu na luzingu, nsadi na nge ta vanda pana!”—2 Sam. 15:6, 18-21.
Itai kangamaka ngolo ti Davidi, muntu yina Yehowa ponaka na kuvanda ntotila
Ata bantu ya Kereti, bantu ya Peleti mpi bantu ya Gati vandaka banzenza, bo ndimaka kibeni nde Yehowa kele Nzambi ya kieleka mpi nde yandi muntu ponaka Davidi na kukuma ntotila. Davidi monisaka kibeni ntonda ya mingi mutindu yandi vandaka ti bantu yina kangamaka ti yandi mpi bo yambulaka yandi ve.
a Nsiku ya Nzambi yina kele na Kulonga 23:3-6 buyisaka bantu ya Amoni ti bantu ya Moabi na kukota na dibundu ya Izraele. Yo ke monana nde nsiku yina vandaka kumonisa nde bo fwete kuma ve bantu ya dikanda ya Izraele kansi yo vandaka kutuba ve nde bo fwete vukana ve ti bantu ya Nzambi to kuzinga ti bo. Tala mukanda Étude perspicace des Écritures volime 1, lut. 100.
