1. Inki mutindu bansadi ya Yehowa vandaka kusala mambu na ndonga na mvu-nkama ya ntete?

 KANA Yehowa me pesa bansadi na yandi kisalu, yandi ke zolaka nde bo sala yo na ndonga. (1 Bak. 14:33) Mu mbandu, yandi ke zolaka nde bo longa nsangu ya mbote na ntoto ya mvimba. (Mat. 24:14) Yehowa me pesaka Yezu mukumba ya kutwadisa kisalu yango. Yezu ke salaka yonso sambu kisalu yango kusalama na ndonga kibeni. Na mvu-nkama ya ntete, ntangu bo kangulaka mabundu na bisika mingi, bo tulaka bankuluntu mpi bo pesaka bo mukumba ya kutwadisa. (Bis. 14:23) Kimvuka mosi ya bankuluntu ti bantumwa vandaka na Yeruzalemi mpi bo vandaka kubaka balukanu ya nkaka yina mabundu yonso vandaka kulanda. (Bis. 15:2; 16:4) Sambu bampangi vandaka kulanda lutwadisu yina bo vandaka kupesa bo, “mabundu vandaka kibeni kukuma ngolo na lukwikilu mpi kukuma mingi.”​—Bis. 16:5.

2. Banda na 1919, nki mutindu Yehowa ke twadisaka bansadi na yandi mpi ke pesaka bo madia ya kimpeve?

² Yehowa ke landaka kuyidika bansadi na yandi tii bubu yai. Banda na 1919, Yezu ke sadilaka kimvuka mosi ya fioti ya Bakristu yina bo me tulaka mafuta sambu na kuyidika kisalu ya kulonga nsangu ya mbote mpi sambu na kupesa balongoki na yandi madia ya kimpeve. a (Luka 12:42) Yo kele pwelele nde Yehowa ke sakumuna kisalu ya kimvuka yina.​—Yez. 60:22; 65:13, 14.

3-4. (a) Pesa mbandu mosi ya ke monisa mfunu ya kusala mambu na ndonga. (b) Inki beto ta tadila na disolo yai?

³ Kana Yehowa yidikaka ve mambu na ndonga, beto zolaka kukuka ve kusala kisalu yina Yezu me pesaka beto. (Mat. 28:19, 20) Mu mbandu kana bo ke kabisilaka beto ve bateritware ya kulonga nsangu ya mbote, kana konso muntu ke longaka kisika yina  yandi me zola. Yo zolaka kusala nde beto longa mingi na teritware mosi, kansi ve na bateritware ya nkaka. Inki mambote ya nkaka beto ke bakaka mutindu mambu ke salamaka na ndonga?

⁴ Mutindu Yezu salaka nde balongoki na yandi kusala mambu na ndonga ntangu yandi vandaka na ntoto, bubu yai mpi yandi ke landaka kusadisa bansadi ya Nzambi na kusala mambu na ndonga. Na disolo yai, beto ta tadila mbandu yina Yezu bikaka mpi mutindu organizasio ya Yehowa ke landaka mbandu yango. Beto ta tubila mpi mambu yina beto lenda sala sambu na kumonisa nde beto ke tudilaka organizasio ya Yehowa ntima mingi.

ORGANIZASIO NA BETO KE LANDAKA MBANDU YA YEZU

5. Inki mutindu organizasio ya Yehowa ke landaka mbandu ya Yezu? (Yoane 8:28)

⁵ Yezu longukaka na Tata na yandi ya zulu mambu yina yandi fwete sala mpi yina yandi fwete tuba. Organizasio ya Yehowa ke landaka mbandu ya Yezu ntangu yo ke sadilaka Ndinga ya Nzambi sambu na kusadisa beto na kuzaba mambu ya mbote mpi ya mbi, mpi ntangu yo ke pesaka beto lutwadisu. (Tanga Yoane 8:28; 2 Tim. 3:16, 17) Mbala na mbala, bo ke yibusaka beto na kutanga Ndinga ya Nzambi mpi na kusadila mambu yina beto ke tanga. Inki mambote beto ke bakaka ntangu beto ke sadilaka ndongisila yina?

6. Inki mambote beto ke bakaka ntangu beto ke longukaka Biblia?

⁶ Beto ke bakaka mambote mingi kibeni ntangu beto ke longukaka Biblia na nzila ya mikanda na beto. Mu mbandu, yo ke sadisaka beto na kufwanisa mambu yina Biblia ke tubaka ti lutwadisu yina organizasio ke pesaka beto. Kana beto me mona nde lutwadisu yina me katuka na Biblia, yo ke salaka nde beto tudila diaka organizasio ya Yehowa ntima mingi.​—Bar. 12:2.

7. Inki nsangu Yezu longaka mpi nki mutindu organizasio ya Yehowa ke landaka mbandu na yandi?

⁷ Yezu longaka “nsangu ya mbote ya Kimfumu ya Nzambi.” (Luka 4:43, 44) Diaka, Yezu songaka balongoki na yandi na kulonga nsangu ya Kimfumu. (Luka 9:1, 2; 10:8, 9) Bubu yai, bantu yonso yina kele na organizasio ya Yehowa ke longaka nsangu ya Kimfumu konso kisika yina bo ke zingaka ata bo kele ti mikumba mingi na organizasio.

8. Inki dibaku ya nene beto kele ti yo?

⁸ Beto kele ti dibaku ya nene ya kusonga bantu ya nkaka mambu ya me tala Kimfumu ya Nzambi. Bantu yonso ve kele ti dibaku yina. Mu mbandu ntangu Yezu vandaka awa na ntoto, yandi pesaka ve bampeve ya mbi nzila ya kutuba mambu ya me tala yandi. (Luka 4:41) Bubu yai, na ntwala nde muntu kuyantika kulonga nsangu ya mbote ti bansadi ya Yehowa, yandi fwete lungisa ntete mambu yina bo ke lombaka na ntwala ya kusala yo. Beto ke monisaka nde beto ke sepelaka mingi kibeni ti dibaku ya kulonga nsangu ya mbote ntangu beto ke salaka yo konso ntangu yina mpi na konso kisika yina. Na mbandu ya Yezu, beto ke salaka yonso sambu na kukuna bankeni ya kieleka ya Kimfumu na bantima ya bantu mpi kulosila yo masa.​—Mat. 13:3, 23; 1 Bak. 3:6.

9. Inki mutindu organizasio ya Yehowa me zabisaka bantu zina ya Nzambi?

⁹ Yezu songaka bantu zina ya Nzambi. Yezu sambaka Tata na yandi ya zulu mpi yandi tubaka nde: ‘Mono me zabisaka zina na nge.’ (Yoa. 17:26) Organizasio ya Yehowa ke landaka mbandu ya Yezu ntangu yo ke salaka yonso sambu na kusadisa bantu ya nkaka na kuzaba zina ya Nzambi. Na Mbalula ya Nsi-Ntoto ya Mpa, bo me vutulaka zina ya Nzambi na bisika yina yo vandaka ntete na bandinga ya kisina yina bo sonikaka Biblia mpi yo me salaka nde bantu mingi kuzaba zina ya Nzambi. Bubu yai, mbalula  yango kele ya mvimba to ya kitini na bandinga kuluta 270. Na Bangindu ya Ngika A4 mpi A5 ya mbalula yango, nge ta mona mambu mingi ya me tala mutindu bo vutulaka zina ya Nzambi na bisika yina yo vandaka ntete na Biblia. Bangindu ya Ngika C ya kele na Biblia ya kulongukila ya Kifalansa, kele ti mambu mingi ya ke monisa nde zina ya Nzambi fwete vanda mbala 237 na Masonuku ya Kigreki ya Bukristu.

10. Inki dilongi nge me baka na mambu yina nkento yina ke zingaka na Birmanie tubaka?

¹⁰ Na mbandu ya Yezu, beto ke zolaka kusadisa bantu mingi kibeni na kuzaba zina ya Nzambi. Ntangu nkento mosi ya bamvula 67 na Birmanie zabaka nde Nzambi kele ti zina, yandi dilaka mpi yandi tubaka nde: “Yai kele mbala ya ntete ya mono ke wa nde zina ya Nzambi kele Yehowa. . . . Beno me longa mono kima ya kuluta mfunu yina mono me longukaka ntete ve.” Mutindu mbandu yina ke monisa yo, kuzaba zina ya Nzambi lenda soba kibeni luzingu ya bantu ya ntima-masonga.

LANDA KUTUDILA ORGANIZASIO YA YEHOWA NTIMA MINGI

11. Inki mutindu bankuluntu lenda monisa nde bo ke tudilaka organizasio ya Yehowa ntima? (Tala mpi kifwanisu ya ke wakana ti paragrafe yai.)

¹¹ Inki mutindu bankuluntu lenda monisa nde bo ke tudilaka organizasio ya Yehowa ntima? Kana bo me pesa bo lutwadisu, bo fwete tanga yo mbote-mbote mpi bo fwete sala yonso sambu na kusadila yo. Mu mbandu, bo ke pesaka bo lutwadisu na yina me tala mutindu ya kusala masolo na balukutakanu, mutindu ya kusamba sambu na dibundu mpi mutindu ya kukeba mameme ya Kristu. Kana bankuluntu ke sadila lutwadisu yina organizasio ya Yehowa ke pesa bo, yo ta sala nde bampangi kubakisa nde Yehowa ke zolaka bo mpi nde yandi ke tudilaka bo dikebi.

12. (a) Sambu na nki beto fwete landa lutwadisu ya bampangi yina ke twadisaka? (Baebreo 13:7, 17) (b) Sambu na nki beto fwete tula dikebi na bikalulu na bo ya mbote?

¹² Kana bankuluntu me pesa beto lutwadisu, beto fwete landa yo na luzolo yonso. Kana beto sala mutindu yina, yo ta vandila bo pete na kulungisa mukumba na bo mbote. Biblia ke tuba nde beto fwete lemfukila bantu yina ke twadisaka beto mpi beto fwete wila bo. (Tanga Baebreo 13:7, 17.) Yo lenda vanda mpasi bantangu ya nkaka. Sambu na nki? Sambu bo kele bantu ya kukonda kukuka. Kana beto ke tula dikebi na bifu na bo na kisika ya kutula dikebi na bikalulu na bo ya mbote, beto ta sadisa bambeni na beto. Inki mutindu? Bambeni na beto ke zolaka kupusa beto na kundima ve nde Yehowa ke sadilaka organizasio na yandi sambu na kutwadisa beto. Yo yina, kana beto ke yindula mambu ya mbi sambu na bankuluntu, beto lenda yantika mpi kuyindula mambu ya mbi sambu na organizasio mpi beto tudila yo diaka ve ntima. Inki beto fwete sala sambu na kuzaba mambu ya luvunu yina bambeni na beto ke tubaka mpi kubuya yo?

KUBIKA VE NDE BANTU YA NKAKA KUPUSA NGE NA KUTUDILA DIAKA VE ORGANIZASIO NTIMA

13. Inki mutindu bambeni ya Yehowa ke pusaka bantu na kutadila organizasio na yandi na mutindu ya mbi?

¹³ Bambeni ya Yehowa ke sosaka kupusa bantu na kutadila mambu ya mbote ya organizasio ya Yehowa na mutindu ya mbi. Mu mbandu, Biblia ke longaka beto nde Yehowa ke zolaka nde bansadi na yandi kuvanda bunkete na nitu, na bikalulu mpi na kimpeve. Yandi ke tuba nde bo fwete basisa na dibundu konso muntu yina ke landa kusala mambu ya mbi mpi ke balula ve ntima. (1 Bak. 5:11-13; 6:9, 10) Beto ke lemfukilaka nsiku yina kele na Masonuku. Yo yina, bambeni na beto ke tubaka nde beto kele makambu ngolo, beto ke pesaka bantu foti mpi beto ke zolaka ve bantu.

14. Nani kele na kisina ya mambu ya luvunu yina bo ke tubaka sambu na organizasio ya Yehowa?

 ¹⁴ Sosa kuzaba nani ke nwanisaka beto kibeni. Satana Diabulu ke mwangaka mambu ya luvunu sambu na organizasio ya Yehowa. Yandi kele “tata ya luvunu.” (Yoa. 8:44; Kuy. 3:1-5) Yo yina, yandi ke sadilaka bantu na yandi sambu na kumwanga mambu ya luvunu sambu na organizasio ya Yehowa. Yo monanaka pwelele na mvu-nkama ya ntete.

15. Inki bamfumu ya mabundu salaka Yezu mpi balongoki na yandi?

¹⁵ Ata Yezu, Mwana ya Nzambi, vandaka muntu ya kukuka mpi salaka mambu mingi ya kuyituka, Satana sadilaka bantu ya nkaka sambu na kumwanga mambu mingi ya luvunu sambu na yandi. Mu mbandu, bantwadisi ya mabundu songaka bantu nde “mfumu ya bademo” muntu pesaka Yezu ngolo ya kubasisa bademo. (Mar. 3:22) Ntangu bo vandaka kusambisa Yezu, bamfumu ya mabundu tubaka nde yandi vwezaka Nzambi mpi bo pusaka bantu na kulomba lufwa na yandi. (Mat. 27:20) Na nima, ntangu balongoki ya Yezu vandaka kulonga nsangu ya mbote, bantu yina vandaka kutelemina bo “pusaka bantu na kusala mavwanga mpi bo pusaka bo na” kuniokula Bakristu yina. (Bis. 14:2, 19) Nzozulu ya Nkengi ya 1^er décembre 1998 tubaka mambu yai sambu na Bisalu 14:2: “Bayuda yai buyaka ka bo kuwa, olie yo suka pana, bo bakaka kisalu ya kulonga Bantu ya Makanda ya nkaka kimbeni ti Bakristu.”

16. Inki beto fwete yibuka ntangu beto ke wa mambu ya luvunu?

¹⁶ Satana sukaka ve na kukusa bantu na mvu-nkama ya ntete. Bubu yai mpi yandi ke landaka ‘kukusa ntoto ya mvimba.’ (Kus. 12:9) Kana nge me wa mambu ya mbi sambu na organizasio ya Yehowa to sambu na bampangi yina ke twadisaka, yibuka mambu yina bambeni ya  Nzambi sadilaka Yezu mpi balongoki na yandi na mvu-nkama ya ntete. Mutindu Biblia tubaka yo na ntwala, bubu yai bo ke niokula bansadi ya Yehowa mpi bo ke tuba mambu ya luvunu sambu na bo. (Mat. 5:11, 12) Beto ta ndima ve mambu ya luvunu yina bantu ke tubaka sambu na organizasio, kana beto ke zaba kisina na yo mpi beto ke sala nswalu kima yina lenda tanina beto. Inki beto fwete sala sambu na kuditanina?

17. Inki beto fwete sala sambu na kutina kigonsa ya masolo ya luvunu? (2 Timoteo 1:13) (Tala mpi lupangu “ Inki Nge Fwete Sala Kana Nge Me Wa Masolo ya Luvunu?”)

¹⁷ Buya masolo ya luvunu. Ntumwa Polo tubaka pwelele mambu yina beto fwete sala kana beto me wa masolo ya luvunu. Yandi songaka Timoteo na ‘kusonga bantu ya nkaka nde . . . bo tula ve dikebi na masolo ya luvunu’ mpi nde bo “buya masolo ya luvunu yina ke vwezaka.” (1 Tim. 1:3, 4; 4:7) Bebe lenda lokuta kima ya mvindu mpi yandi tula yo na munoko, kansi mbuta ta sala yo ve ata fioti sambu yandi ke zaba mbote nde kana yandi sala yo, yo lenda pesa yandi maladi. Beto ke buyaka masolo ya luvunu sambu beto ke zabaka kisina na yo. Kansi, beto ke ndimaka kaka “mambu ya mbote” ya kieleka.​—Tanga 2 Timoteo 1:13.

18. Inki mutindu beto lenda monisa nde beto ke tudilaka organizasio ya Yehowa ntima?

¹⁸ Beto me tubila kaka mitindu tatu yina organizasio ya Yehowa ke landaka mbandu ya Yezu. Ntangu nge ke longuka Biblia, tala mitindu ya nkaka yina organizasio ya Yehowa ke landaka mbandu ya Yezu. Sadisa bampangi ya nkaka na dibundu na kutudila organizasio ya Yehowa ntima mingi. Landa kumonisa nde nge ke tudila organizasio ya Yehowa ntima, ntangu nge ke sadila Yehowa na mutindu ya mbote mpi nge ke kangama kaka na organizasio yina yandi ke sadila sambu na kulungisa luzolo na yandi. (Nk. 37:28) Beto fwete landa kubaka na valere dibaku yina beto kele ti yo ya kuvanda na kati ya bansadi ya zola mpi ya kwikama ya Yehowa.