Mpidina ve. Mambu yina Davidi sonikaka vandaka kieleka.

Tala mambu yina yandi sonikaka na verse yina mpi na baverse ya ke wakana ti yo. Yandi sonikaka nde: “Mono ta yimba bankunga sambu na kukumisa zina na nge kimakulu.” “Mono ke kumisa nge, O Yehowa Nzambi na mono, na ntima na mono ya mvimba, mpi mono ta pesa zina na nge nkembo kimakulu.” “Mono ta kumisa zina na nge mvula na mvula.”​—Nk. 61:8; 86:12; 145:1, 2.

Ntangu Davidi sonikaka mambu yina, yandi vandaka kuyindula ve nde yandi ta fwa ve. Yandi zabaka nde bantu ke fwaka sambu bo kele bantu ya masumu. Yandi mosi mpi zabaka nde yandi vandaka nsumuki. (Kuy. 3:3, 17-19; Nk. 51:4, 5) Yandi zabaka mbote nde ata bantu yina Yehowa vandaka kundima mu mbandu, Abrahami, Izaki mpi Yakobi fwaka. Davidi zabaka mpi nde nsuka-nsuka yandi ta fwa. (Nk. 37:25; 39:4) Kansi mambu yina yandi tubaka na Nkunga 61:8 ke monisa nzala na yandi mpi lukanu na yandi ya kukumisa Nzambi mvula na mvula disongidila, luzingu na yandi ya mvimba.​—2 Sam. 7:12.

Bantangu ya nkaka Davidi sonikaka mambu ya luzingu na yandi mosi mutindu bangogo ya luyantiku ya Nkunga 18, 51, mpi 52 ke monisa yo. Na Nkunga 23 Davidi bingaka Yehowa, ngungudi yina ke twadisaka, ke pesaka kikesa mpi ke taninaka. Davidi yandi mosi mpi vandaka ngungudi. Yo yina, yandi vandaka kuzola kusadila Nzambi ‘bilumbu yonso ya luzingu na yandi.’​—Nk. 23:6.

Kuvila mpi ve nde Yehowa muntu twadisaka Davidi na kusonika mambu yonso yina yandi sonikaka. Yandi sonikaka mpi mambu yina salamaka na nima ya bamvula mingi. Mu mbandu, na Nkunga 110, Davidi tubilaka ntangu yina Mfumu na yandi zolaka ‘kuvanda na diboko ya kitata ya Nzambi’ na zulu mpi yandi ta baka ngolo mingi. Sambu na kusala nki? Sambu na kununga bambeni ya Nzambi mpi sambu na ‘kupesa makanda ndola’ na ntoto. Davidi vandaka nkaka ya Yezu yina vandaka Mesia. Mesia yango zolaka kuyala banda na zulu mpi kukuma “nganga-nzambi kimakulu.” (Nk. 110:1-6) Yezu tubaka nde mambu yina Davidi tubaka na Nkunga 110 ke tadila yandi mpi nde yo ta salama na bilumbu ke kwisa.​—Mat. 22:41-45.

Ya kieleka, mpeve ya Nzambi sadisaka Davidi na kusonika mambu ya me tala ntangu na yandi mpi bilumbu ke kwisa, ntangu yina yandi ta futumuka mpi ta kumisa Yehowa mvula na mvula. Yo ke sadisa beto na kubakisa nde Nkunga 37:10, 11, 29 ke tadila ntangu yina bo sonikaka yo mpi bilumbu ke kwisa. Baverse yina lunganaka na ntangu ya ntama na Izraele mpi yo ta lungana na bilumbu ke kwisa ntangu Nzambi ta lungisa balusilu na yandi.—Tala paragrafe 8 ya disolo “Nge Ta Vanda ti Mono na Paladisu” ya kele na Nzozulu ya Nkengi yai.

Nkunga 61:8 mpi baverse ya nkaka ya ke tubila mambu ya mutindu mosi ke monisa nde Davidi vandaka kuzola kukumisa Yehowa luzingu na yandi ya mvimba na Izraele. Yo ke monisa mambu yina Davidi ta sala na bilumbu ke kwisa kana Yehowa kufutumuna yandi.