Ntangu Yehowa songaka bantu na ‘kufulusa ntoto mpi na kuyala yo,’ yandi monisaka nde bo ta kumisa ntoto ya mvimba Paladisu. (Kuy. 1:28) Bantu yina ta zinga mvula na mvula na ntoto ta sala mambu yina Yehowa tubaka na luyantiku. Ntoto ta kuma ve mbala mosi Paladisu sambu kilanga ya Edeni ke vandaka diaka ve. Na nima ya bitumba ya Armagedoni, beto ta vanda ti mambu mingi ya kusala sambu beto ta yidika bisika ya ntoto yina me bebaka. Beto ta vanda kibeni ti kisalu mingi.

Yo ke yibusa beto bisalu yina yo lombaka nde bantu ya Izraele kusala ntangu bo katukaka na Babilone. Ata muntu mosi ve vandaka kuzinga na insi na bo na nsungi ya bamvula 70. Kansi Yezaya tubaka nde Yehowa ta sadisa bo na kukumisa diaka insi na bo kitoko. Yezaya tubaka nde: “Yandi ta kumisa ntoto-makanga na yandi bonso Edeni mpi ntoto na yandi ya zelo na zelo bonso kilanga ya Yehowa.” (Yez. 51:3) Ya kieleka, Yehowa sadisaka bantu ya Izraele na kukumisa diaka insi na bo kitoko. Mutindu mosi mpi, Yehowa ta sadisa bantu yina ta baka  ntoto na kukumisa yo Paladisu. Yo yina, kele ti mambu yina nge lenda sala bubu yai sambu na kumonisa nde nge ke zola kusala kisalu yina.

Mu mbandu, nge lenda sala yonso sambu nzo na nge mpi nziunga na yo kuvanda bunkete. Nge fwete sala yo ata bantu yina ke zingaka pene-pene ti nge kele ve bunkete. Nge lenda sala mpi yonso sambu na kutula bunkete na Nzo ya Kimfumu mpi na Nzo ya Balukutakanu ya Nene. Nge lenda kuma mpi volontere sambu na kusadisa bampangi kana kisumbula me salama na kisika yina nge ke zingaka. Kana nge ke sala mambu yina, yo ta monisa nde nge ke zola kusadisa bampangi na nge. Nge lenda kudiyula nde: ‘Keti mono lenda longuka mambu yina mono ta sala kana Yehowa kusadisa mono na kuzinga mvula na mvula na ntoto?’

Ntangu Yezu futumunaka mwana ya Yairusi, mbala mosi yandi songaka bantu na kupesa yandi madia. (Mar. 5:42, 43) Yo vandaka ve mpasi na kudisa mwana-nkento yina vandaka ti bamvula 12. Kansi, yindula kisalu yina yo ta lomba nde beto sala ntangu Yezu ta lungisa lusilu na yandi ya ke tuba nde “bantu yonso yina kele na maziamu ya kuyibuka ta wa ndinga na yandi mpi bo ta basika.” (Yoa. 5:28, 29) Biblia ke tubila ve pwelele mambu yonso yina yo ta lomba nde beto sala kansi beto me zaba nde bantu yina ta futumuka ta vanda ti mfunu ya madia, bisika ya kuzinga mpi bilele. Nge lenda monisa banda bubu yai nde nge kele ya kuyilama sambu na kusadisa bantu yina ta futumuka. Nge lenda sala mambu yai ya ke landa.

Kana bo me pesa luzayisu nde nkengi ya nziunga ta kwisa na dibundu na beno, nge lenda bingisa yandi sambu na kudia na nzo na nge. Kana kisalu ya mpangi mosi yina ke salaka na Betele me mana to kana nkengi ya nziunga mosi ke sala diaka ve kisalu na yandi ya nziunga, nge lenda sadisa yandi na kuzwa nzo. Kana lukutakanu ya distrike to lukutakanu ya nene ke salama na kisika yina nge ke zingaka, nge lenda kuma volontere sambu na kusala bisalu yina ke salamaka na ntwala to na nima ya balukutakanu yina to nge lenda sala yonso sambu na kuyamba banzenza yina ta kwisa na lukutakanu yango.

Mutindu Bisalu 24:15 ke monisa yo, bantu mingi ta futumuka awa na ntoto. Mingi na kati na bo ta vanda bayina zwaka ve dibaku ya kuzaba Yehowa na ntwala nde bo fwa. Bo ta zwa dibaku yina ntangu bo ta futumuka. a Bansadi ya Yehowa ya bulemfu ta longa bo. (Yez. 11:9) Mpangi Charlotte yina me longaka nsangu ya mbote na Eropa, na Amerika ya Sudi mpi na Afrika ke vingilaka ti kiese yonso ntangu yina. Yandi ke tuba nde: “Mono ke vingilaka ti kiese yonso ntangu yina mono ta longa bantu yina ta futumuka. Kana mono ke tanga disolo ya muntu mosi yina zingaka na ntangu ya ntama, mbala mingi mono ke tubaka nde: ‘Kana muntu yai zolaka kuzaba Yehowa, mbala ya nkaka luzingu na yandi zolaka kuvanda mutindu ya nkaka.’ Mono ke vingilaka ti kiese yonso ntangu yina mono ta songa bantu yina ta futumuka mambu ya Yehowa mpi nde luzingu na bo ta vanda mbote kibeni kana bo sadila yandi.”

Ata bansadi ya Yehowa ya bulemfu yina zingaka na ntwala nde Yezu kukwisa awa na ntoto ta vanda ti mambu mingi ya kulonguka. Yindula kiese yina beto ta wa ntangu beto ta tendudila Daniele mutindu mambu yina yandi sonikaka lunganaka ata yandi mosi bakisaka yo ve. (Dan. 12:8) To yindula kiese yina beto ta wa ntangu beto ta tendudila Ruti ti Naomi nde bana na bo vandaka na ndonga ya bantu yina Mesia butukaka. Beto ta vanda na kiese mingi ya kulonga bantu yina ta futumuka sambu beto ta vanda ve ti mambu yina ke katulaka dikebi na beto, mambu yina ke salamaka na nsi-ntoto yai ya mbi.

Inki nge lenda sala bubu yai sambu na kuvanda ya kuyilama na kulonga bantu yina ta futumuka? Nge lenda sala bikesa ya kutomisa mutindu na nge ya kulonga mpi kulonga nsangu ya mbote mbala na mbala. (Mat. 24:14) Kana nge ke kuka ve kulonga nsangu ya mbote sambu nge me kuma mununu to sambu mambu ya nkaka ke pesa nge ve nzila ya kusala yo, nge lenda monisa nde nge kele ti mpusa ya ngolo ya kulonga bantu yina ta futumuka kana nge ke sala yonso sambu na kulonga nsangu ya mbote bubu yai.

Ya kieleka, yo kele mbote na kuyindula bangiufula yai ya mfunu: Keti nge kele ti mpusa ya ngolo ya kubaka ntoto? Keti nge ke vingilaka ti kiese yonso kukumisa ntoto Paladisu, kulungisa bampusa ya bantu yina ta futumuka mpi kulonga bo? Nge lenda monisa nde nge kele ya kuyilama na kubaka ntoto kana banda bubu yai nge ke sala mambu yina nge ta sala ntangu nge ta baka ntoto.