1. “Ngemba ya Nzambi” kele nki mpi nki mutindu yo ke sadisaka beto? (Bafilipi 4:6, 7)

 KELE ti ngemba yina bantu ya nsi-ntoto yai me zaba ve. Yo kele “ngemba ya Nzambi” disongidila ngemba yina beto ke vandaka ti yo kana beto kele ti kinduku ya mbote kibeni ti Tata na beto ya zulu. Kana beto kele ti ngemba ya Nzambi, beto ke kudiwaka na lutaninu. (Tanga Bafilipi 4:6, 7.) Beto ke vandaka ti kinduku ya mbote ti bampangi yina ke zolaka Nzambi. Beto ke vandaka mpi ti kinduku ya ngolo ti “Nzambi ya ngemba.” (1 Bate. 5:23) Kana beto ke zaba Tata na beto ya zulu, kana beto ke tudila yandi ntima mpi kana beto ke lemfukila yandi, ngemba ya Nzambi lenda sadisa beto na kudiyangisa ve ntangu beto ke kutana ti bampasi.

2. Sambu na nki beto fwete ndima nde beto lenda zwa ngemba ya Nzambi?

² Keti beto lenda vanda ti ngemba ya Nzambi ntangu beto ke kutana ti bampasi bonso, kipupa, bisumbula ya lugangu, mavwanga yina bantu ke basisaka to mbangika? Bampasi ya ngolo ya mutindu yina lenda pesa beto boma mingi. Kansi Yezu songaka balongoki na yandi nde: “Beno bika ve nde bantima na beno kukuma kisaka-saka mpi beno bika ve nde yo lemba sambu na boma.” (Yoa. 14:27) Diambu ya kiese kele nde, bampangi ke sadilaka ndongisila yina ya Yezu. Yehowa ke sadisaka bo na kuvanda ti ngemba yina ntangu bo ke kutanaka ti bampasi ya ngolo.

3. Inki bampasi kipupa mosi lenda natila beto?

³ Kipupa lenda nata bansoba mingi na luzingu ya bantu. Beto tadila bampasi yina coronavirus natilaka bantu mingi. Kimvuka mosi ya bantu salaka bansosa mpi bo bakisaka nde bantu mingi vandaka kulala ve mbote na mpimpa na nsungi ya coronavirus. Bantu mingi kumaka kudiyangisa mingi, bankaka vandaka kuniokwama na mabanza, kunwa malafu ya ngolo mpi kusadila bima yina ke lawusaka  mpi bantu mingi ya nkaka vandaka kusadila mabuta na bo mambu na nku yonso mpi bankaka vandaka kusosa kudifwa. Kana kipupa mosi me basika na kisika yina nge ke zingaka, nki nge lenda sala sambu na kudiyangisa ve mingi mpi kuvanda ti ngemba ya Nzambi?

4. Sambu na nki mambu yina Yezu tubaka ya me tala bilumbu ya nsuka ke sadisaka beto na kuvanda na ngemba?

⁴ Yezu tubaka nde na bilumbu ya nsuka, kipupa mpi maladi yina ke mwanganaka ta vanda na “bisika ya mutindu na mutindu.” (Luka 21:11) Sambu na nki kuzaba mambu yina ke sadisaka beto na kuvanda na ngemba? Beto ke yitukaka ve ntangu beto ke monaka kipupa mosi me basika. Beto ke bakisaka nde mambu yina ke salama kaka mutindu Yezu tubaka. Yo yina, beto fwete sadila mambu yina Yezu songaka beto, bantu yina ke zinga na bilumbu ya nsuka nde: “Beno keba, beno tekita ve na boma.”​—Mat. 24:6.

5. (a) Mutindu Bafilipi 4:8, 9 ke monisa yo, beto fwete samba sambu na nki ntangu kipupa mosi me basika na kisika yina beto ke zingaka? (b) Inki mutindu kulanda lutangu ya Biblia yina bo me kotisaka ndinga natilaka mpangi-nkento mosi mambote mpi yo ke longa beto nki?

⁵ Kana kipupa mosi me basika, yo lenda pusa beto na kudiyangisa mingi mpi na kuwa boma. Mambu yina kuminaka mpangi-nkento Desi. b Papa-leki na yandi, kisoni na yandi mpi munganga na bo fwaka na maladi ya coronavirus. Yo yina, yandi waka boma mpi yandi yindulaka nde, yandi mpi ta baka yo mpi yo ta sambukila nkaka na yandi ya nkento. Yandi vandaka kuyindula nde kisalu na yandi ta fwa sambu na maladi ya coronavirus. Yandi vandaka kudiyangisa mpi sambu na mbongo yina yo ta lomba sambu na kusumba madia mpi kufutila nzo. Yandi kumaka kudiyangisa mingi, yo yina yandi vandaka kulala ve na mpimpa. Kansi mpangi Desi kumaka diaka na ngemba. Inki mutindu? Yandi sambaka Yehowa sambu Yehowa kusadisa yandi na kuvanda na ngemba mpi na kuyindula mambu ya mbote. (Tanga Bafilipi 4:8, 9.) Yandi vandaka kulanda mambu yina Yehowa vandaka “kutuba” na nzila ya lutangu ya Biblia yina bo me kotisaka ndinga. Yandi ke tuba nde: “Mambu yina bampangi yina vandaka kutanga na Biblia vandaka kusadisa mono na kudiyangisa diaka ve mpi yo vandaka kuyibusa mono nde Yehowa ke kebaka mono.”​—Nk. 94:19.

6. Inki mutindu kulonguka Biblia mpi kuvukana na balukutakanu lenda sadisa nge?

⁶ Kana kipupa mosi me basika, yo ke vandaka ve pete ntangu yonso na kusala mambu yonso yina beto vandaka kusala ntete. Kansi beto fwete bika ve nde yo kanga beto nzila ya kulonguka Biblia mpi ya kuvukana na balukutakanu. Masolo ya luzingu yina kele na mikanda na beto mpi bavideo ta yibusa nge nde bampangi na beto ke landaka kusadila Yehowa na kwikama yonso ata bo ke kutana ti bampasi ya mutindu yina. (1 Pie. 5:9) Balukutakanu ta sadisa nge na kuyindula masolo ya ke pesa kikesa ya kele na Biblia. Yo ta sadisa nge mpi na kupesa bampangi kikesa mpi na kubaka kikesa. (Bar. 1:11, 12) Kana nge ke yindula mutindu  Yehowa sadisaka bansadi na yandi ntangu bo vandaka kubela, kuwa boma to kudiwa bo mosi, lukwikilu na nge ta kuma ngolo mpi nge ta ndima kibeni nde Yehowa ta sadisa nge mpi.

7. Mbandu ya ntumwa Yoane ke longa nge nki?

⁷ Sala yonso sambu na kusolula ti bampangi. Sambu na kuditanina na kipupa yina me basika, yo lenda lomba nde beto vanda ve pene-pene ti bampangi ata ntangu beto kele kisika mosi. Na bantangu ya mutindu yina, nge lenda kudiwa bonso ntumwa Yoane. Yandi zolaka kumona nduku na yandi Gayusi kimuntu-kimuntu. (3 Yoa. 13, 14) Kansi Yoane bakisaka nde na ntangu yina yandi lendaka ve kumona Gayusi. Yo yina, Yoane sonikilaka Gayusi mukanda. Kana mpila ya kukutana ti bampangi kimuntu-kimuntu kele ve, nge lenda solula ti bo na telefone, na nzila ya video to kutindila bo ba message. Kana nge ke landa kusolula ti bampangi, nge ta kudiwa ve nge mosi mpi nge ta vanda na ngemba. Kana nge ke kudiyangisa mingi, solula ti bankuluntu mpi ndima lusadisu yina bo ta pesa nge na zola yonso.​—Yez. 32:1, 2.

8. Inki mutindu kisumbula ya lugangu lenda sala nde nge vanda ve na ngemba?

⁸ Kana mvula ya ngolo ya ke bebisaka bima, kunikana ya ntoto to tiya me bebisaka bima na kisika ya nge ke zingaka, nge lenda kudiyangisa mingi kibeni bantangu ya nda. Kana bantu yina nge vandaka kuzola fwaka, to nzo mpi bima na nge bebaka, nge waka mpasi ya ngolo kibeni, nge kondaka kivuvu mpi nkutu nge waka makasi kibeni. Yo ke tendula ve nde nge ke zolaka bima mingi ya kinsuni to nde nge me konda lukwikilu. Nge kutanaka ti bampasi ya ngolo mpi ya nkaka pusaka nge na kudiwa mutindu yina. (Yobi 1:11) Kansi nge lenda vanda na ngemba ata na bantangu ya mpasi. Inki mutindu?

9. Inki Yezu tubaka sambu na kusadisa beto na kuvanda ya kuyilama na bisumbula ya lugangu?

⁹ Yibuka mambu yina Yezu tubaka. Bantu ya nkaka ke yindulaka nde kisumbula ya lugangu lenda bwila bo ve ata fioti. Kansi beto ke zabaka nde bisumbula mingi ya lugangu lenda salama mpi ya nkaka lenda bwila beto. Yezu songaka balongoki na yandi nde “ntoto ta nikana ngolo” mpi nde bisumbula ya mutindu na mutindu ta salama na ntwala nde nsuka kukwisa. (Luka 21:11) Yandi tubaka mpi nde “kikalulu ya kufwa bansiku ta kuma mingi.” Mambu yina ke salama bubu yai, mu mbandu bantu ke sala mambu ya mubulu, bo ke kuma nku mingi mpi bo ke fwa bantu ya nkaka. (Mat. 24:12) Bampasi mpi bisumbula ke kuminaka mpi bansadi mingi ya Yehowa ya kwikama. Yezu tubaka ve ata fioti nde kana beto ke kutana ti bampasi ya mutindu yina, yo ke tendula nde Yehowa me yambula beto. (Yez. 57:1; 2 Bak. 11:25) Yehowa ke salaka ve mambu ya kuyituka sambu na kutanina beto na bisumbula yonso. Kansi yandi ta pesa beto konso kima yina beto kele ti yo mfunu sambu na kuvanda na ngemba.

10. Sambu na nki kuyilama na ntwala nde kisumbula kusalama ke monisaka nde beto ke tudilaka Yehowa ntima? (Bingana 22:3)

¹⁰ Beto ta vanda na ngemba kukonda mpasi kana beto yilamaka dezia na ntwala nde kisumbula ya lugangu kusalama. Keti kuyilama na ntwala ke tendula nde beto ke tudila ve Yehowa ntima? Mpidina ve. Nkutu kuyilama na ntwala ya kisumbula ke monisaka nde beto ke ndima nde Yehowa ta sadisa beto. Inki mutindu? Ndinga ya Nzambi ke lomba beto na kuyilama na ntwala nde bisumbula kusalama. (Tanga Bingana 22:3.) Organizasio ya Yehowa ke sadisaka beto na kuyilama na ntwala nde bisumbula kusalama na nzila ya masolo yina ke basikaka na bazulunalu, na nzila ya balukutakanu ya dibundu mpi na nzila ya baluzayisu yina beto ke zwaka. c Keti beto ke tudilaka Yehowa ntima? Kana mpidina, beto ta sadila ndongisila yina bubu yai na ntwala nde kisumbula mosi kusalama.

11. Mbandu ya mpangi Margaret ke longa nge nki?

 ¹¹ Beto tadila mbandu ya mpangi-nkento Margaret. Bamfumu ya luyalu songaka yandi na kukatuka na nzo na yandi sambu tiya ya ngolo basikaka mpi yo vandaka kupela na kisika yina yandi vandaka kuzinga. Sambu bantu mingi vandaka kutina na mbala mosi, nzila fulukaka ti bakamio mpi yo vandaka mpasi na kuluta. Mupepe fulukaka ti midinga ya ndombe mpi mpangi Margaret kukaka ve kubasika na kamio. Kansi yandi gulukaka sambu yandi vandaka ya kuyilama. Na mwa saki na yandi ya fioti, yandi tulaka karti yina lendaka kusadisa yandi na kuzaba nzila ya mbote yina yandi lendaka kutina. Yandi pusaka kamio na ntwala sambu na kuzaba nzila yina yandi lenda landa sambu na kutina. Mpangi Margaret gulukaka sambu yandi yilamaka mbote na ntwala.

12. Sambu na nki beto fwete landa lutwadisu yina bo ke pesa beto sambu na kutanina beto?

¹² Sambu na kutanina beto mpi bantu ya nkaka, bamfumu ya luyalu lenda lomba beto na kuzitisa nsiku ya kubikala na banzo sambu na mwa ntangu to bo lenda lomba beto na kukatuka kisika yina beto kele to kuzitisa bansiku ya nkaka. Bantu ya nkaka ke zolaka ve kulemfuka nswalu sambu bo ke zolaka ve kuyambula bima yina bo kele ti yo. Kansi nki Bakristu fwete sala? Biblia ke tuba nde: “Sambu na Mfumu, beno lemfuka na bima yonso ya bantu me salaka, yo vanda ntotila sambu yandi kele mfumu to baguvernere bonso nde yandi [muntu] me tindaka bo.” (1 Pie. 2:13, 14) Organizasio ya Nzambi ke pesaka beto mpi lutwadisu sambu na kutanina beto. Bo ke yibusaka beto mpi na kupesa bankuluntu adresi na beto mpi nimero na beto ya telefone sambu bo lenda solula ti beto kana kisumbula me salama. Keti nge me pesaka bo yo? Bo lenda songa beto na kubikala na banzo to na kutina, bo lenda songa beto kisika yina beto lenda bumbana, bo lenda songa beto na kutina, bo lenda songa beto mutindu beto lenda zwa bima yina beto kele ti yo mfunu, mutindu mpi ntangu yina beto lenda sadisa bantu ya nkaka. Kana beto lemfuka ve, beto lenda tula luzingu na beto mpi luzingu ya bankuluntu na kigonsa. Kuvila ve nde bankuluntu ke langidilaka beto. (Baeb. 13:17) Mpangi Margaret tubaka nde: “Mono ke ndimaka kibeni nde kulanda lutwadisu ya bankuluntu mpi ya organizasio ya Yehowa gulusaka luzingu na mono.”

13. Inki me sadisaka Bakristu mingi yina yambulaka banzo na bo na kulanda kuvanda na kiese mpi na ngemba?

¹³ Bampangi mingi yina katukaka na banzo na bo sambu na kisumbula to sambu na bitumba to sambu na mavwanga yina bantu ke basisaka, me salaka yonso sambu na kuyikama ti mutindu na bo ya mpa ya kuzinga mpi bo ke salaka mingi na kisalu  ya Yehowa. Bonso Bakristu ya mvu-nkama ya ntete yina tinaka sambu na mbangika, bo ke landaka “kuzabisa nsangu ya mbote ya ndinga.” (Bis. 8:4) Kulonga nsangu ya mbote ke sadisaka bo na kutula dikebi mingi na mambu ya Kimfumu kansi ve na bampasi yina bo ke kutana ti yo. Yo yina, bo ke landaka kuvanda na kiese mpi na ngemba.

14. Kana bantu ke niokula beto, nki mutindu yo lenda sala nde beto vanda ve na ngemba?

¹⁴ Kana bantu ke niokula beto, yo lenda sala nde beto sala diaka ve mambu yina beto ke salaka sambu na kuvanda na ngemba. Beto ke vandaka na kiese ntangu beto ke vukanaka ti bampangi, ntangu beto ke longaka nsangu ya mbote mpi ntangu beto ke salaka mambu yina yo ke lombaka nde beto sala konso kilumbu kukonda kuwa boma nde bo ta kanga beto. Kana bo me buyisa beto na kusala mambu yina, beto lenda kudiyangisa mingi mpi kuwa boma sambu na mambu yina ta salama na nima. Yo kele mbi ve na kudiwa mutindu yina. Kansi, beto fwete keba. Yezu monisaka nde kana bantu ke niokula balongoki na yandi, yo lenda pusa bo na kubula sakuba. (Yoa. 16:1, 2) Ebuna, nki mutindu beto lenda landa kuvanda na ngemba ntangu bantu ke niokula beto?

15. Sambu na nki beto fwete wa ve boma kana bantu ke niokula beto? (Yoane 15:20; 16:33)

¹⁵ Ndinga ya Nzambi ke tuba nde: “Bantu yonso yina ke zola kuzinga na kukangama na Nzambi na bumosi ti Kristu Yezu, bo ta monisa bo mpi mpasi.” (2 Tim. 3:12) Yo vandaka mpasi sambu mpangi Andrei kundima nde bantu ta niokula bansadi yonso ya Yehowa ya insi na bo ntangu bo buyisaka kisalu na beto na insi na bo. Yandi tubaka nde: ‘Bambangi ya Yehowa kele mingi awa na insi na beto. Inki mutindu bamfumu ya luyalu ta kanga beto yonso?’ Ntangu mpangi Andrei vandaka kuyindula mutindu yina, yandi vandaka kudiyangisa mingi na kisika ya kuvanda na ngemba. Bampangi ya nkaka bikaka mambu yina na maboko ya Yehowa mpi bo yindulaka ve nde bamfumu ya luyalu ta kanga bo ve. Bo zabaka nde bamfumu ya luyalu lenda kanga bo kansi bo vandaka ve kudiyangisa mingi bonso mpangi Andrei. Yo yina yandi salaka yonso sambu na kulanda mbandu na bo mpi yandi kumaka kutudila Yehowa ntima ya mvimba. Ntangu fioti na nima, yandi kumaka na ngemba mpi bubu yai yandi kele na kiese ata yandi ke kutana ti bampasi mingi. Yo kele mpi mutindu mosi sambu na beto. Ata Yezu tubaka nde bantu ta monisa beto mpasi, yandi tubaka mpi nde beto lenda bikala ya kwikama na Yehowa.​—Tanga Yoane 15:20; 16:33.

16. Inki lutwadisu beto fwete landa ntangu bantu ke niokula beto?

 ¹⁶ Kana bo me buyisa kisalu na beto, Betele to bankuluntu ta songa beto mambu yina beto fwete sala. Bo ta sala yo sambu na kutanina beto, sambu na kusadisa beto na kuzwa madia ya kimpeve mpi sambu na kusadisa beto na kulonga nsangu ya mbote na kiteso yina beto lenda sala yo. Sala yonso sambu na kulemfuka na mambu yina bo ta songa nge ata nge ke zaba ve mbote-mbote sambu na nki bo ke songa nge yo. (Yak. 3:17) Kutuba mpi ve mambu ya bampangi na beto mpi mambu ya dibundu na bantu yina kele ve ti nswa ya kuzaba yo.​—Lon. 3:7.

17. Bonso bantumwa na mvu-nkama ya ntete, nki beto fwete sala?

¹⁷ Satana ke nwanisaka bansadi ya Nzambi sambu bo “kele ti kisalu ya kuta kimbangi sambu na Yezu,” yo ke kele na kati ya bikuma ya ntete yina ke pusaka yandi na kunwanisa bo. (Kus. 12:17) Kubika ve nde Satana mpi nsi-ntoto na yandi kupesa nge boma. Kana beto ke samuna mpi ke longa nsangu ya mbote ata bantu ke telemina beto, yo ke sadisaka beto na kuvanda na kiese mpi na ngemba. Na mvu-nkama ya ntete, ntangu bamfumu ya Bayuda songaka bantumwa na kubika kulonga nsangu ya mbote, bantumwa ponaka kulemfukila Nzambi. Bo landaka kulonga nsangu ya mbote mpi yo sadisaka bo na kuvanda na kiese. (Bis. 5:27-29, 41, 42) Ya kieleka, kana bo me buyisa kisalu na beto, beto fwete vanda mayele ntangu beto ke longa nsangu ya mbote. (Mat. 10:16) Kansi kana beto ke sala yonso yina beto lenda sala, beto ta vanda na ngemba sambu beto ke sepedisa Yehowa mpi beto ke longa nsangu yina ke gulusaka luzingu ya bantu.

18. Nani lenda pesa beto ngemba ya kieleka yina beto kele ti yo mfunu?

¹⁸ Beto fwete ndima kibeni nde beto lenda vanda na ngemba ata na bantangu ya kuluta mpasi. Na bantangu yina, beto fwete vila ve nde beto kele ti mfunu ya ngemba ya Nzambi mpi yo kele ngemba yina Nzambi mpamba muntu lenda pesa beto yo. Tudila yandi ntima ntangu kipupa mosi me basika kisika ya nge ke zingaka, ntangu kisumbula ya lugangu me salama kisika ya nge ke zingaka to ntangu bantu ke niokula nge. Landa kukangama na organizasio ya Yehowa. Tula dikebi na mambu ya kitoko yina ke vingila nge na bilumbu ke kwisa. Kana nge sala mutindu yina, ‘Nzambi ya ngemba ta vanda ti nge.’ (Bafil. 4:9) Na disolo ya ke landa, beto ta tubila mambu yina beto lenda sala sambu na kusadisa bampangi yina ke kutana ti bampasi na kuvanda ti ngemba ya Nzambi.