Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:

Inki beto fwete sala sambu na ‘kukumisa mabanza na beto ya mpa’? (Bar. 12:2)

Sambu na kukumisa mabanza na beto ya mpa beto fwete suka ve kaka na kuvanda ti bikalulu ya mbote. Kansi beto fwete kuditadila sambu na kuzaba kimuntu na beto ya kati mpi kusala bansoba ya me fwana sambu beto lemfuka na bansiku yonso ya Yehowa.—w23.01, balut. 8-9.

Inki mutindu beto fwete vanda bukati-kati ntangu beto ke mona mambu yina ke salama na ntoto?

Beto ke tulaka dikebi mutindu mambu yina ke salama na ntoto ke lungisa baprofesi ya Biblia. Na kisika ya kutuba nde mambu yango ke lungisa profesi mosi, beto fwete tubila mambu yina ke katuka na bima yina organizasio ya Yehowa me basisaka. Yo ta sadisa dibundu na kuvanda na bumosi. (1 Bak. 1:10)—w23.02, lut. 16.

Inki mutindu mbotika ya Yezu mpi ya balongoki na yandi me swaswana?

Yandi butukaka na dikanda yina kudipesaka dezia na Nzambi. Yo yina, yo lombaka ve nde yandi kudipesa na Yehowa bonso beto. Yezu vandaka muntu ya kukuka. Yandi salaka ve masumu. Yo yina yo lombaka ve nde yandi balula ntima sambu na masumu na yandi.—w23.03, lut. 5.

Inki mutindu beto lenda sadisa bantu ya nkaka na kupesa bamvutu na balukutakanu?

Beto fwete pesa bamvutu ya nkufi sambu yo pesa bantu ya nkaka dibaku ya kutuba. Beto fwete tubila mpi ve mambu mingi na mbala mosi sambu beto bikila mpi bantu ya nkaka mambu ya kutuba.—w23.04, lut. 23.

“Nzila ya Busantu” yina Yezaya 35:8 ke tubilaka kele nki?

Nzila yina ya nene ya kifwani vandaka kutendula ntete nzila yina Bayuda bakaka ntangu bo katukaka na Babilone mpi kwendaka na insi na bo. Ebuna bubu yai? Bamvula mingi na ntwala ya 1919, bo salaka kisalu ya kuyidika nzila, bo balulaka mpi bo niemaka Babiblia mpi bo salaka mambu ya nkaka ya mfunu. Bansadi ya Nzambi ke tambulaka na “Nzila ya Busantu” sambu na kukwenda na paladisu ya kimpeve yina ta natila bo mambote ya mingi.—w23.05, balut. 15-19.

Bingana kapu 9 ke tubila nki bankento zole ya kifwani sambu na kupesa ndongisila?

Bingana ke tubila “nkento ya zoba” yina ke binga bantu sambu na kunata bo na “Maziamu” mpi “mayele ya kieleka,” bonso nkento yina ke binga bantu sambu na kunata bo na “nzila ya mayele ya kubakisa mambu” mpi na luzingu. (Bing. 9:1, 6, 13, 18)—w23.06, balut. 22-24.

Sambu na nki mutindu Yehowa sadilaka Loti mambu monisaka pwelele nde yandi kele ti kikalulu ya kudikulumusa mpi yandi ke vandaka ve makambu ngolo?

Yehowa songaka Loti na kukatuka na Sodome mpi na kutina na bangumba. Ntangu yandi bondilaka Yehowa nde yandi tina na Soare, Yehowa ndimaka.—w23.07, lut. 21.

Inki nkento lenda sala kana bakala na yandi ke tala pornografi?

Yandi fwete kudipesa ve foti. Yandi fwete tula dikebi na kinduku na yandi ti Yehowa mpi kuyindula masolo ya bankento yina Biblia ke tubilaka, bayina kutanaka ti mambu ya mpasi kansi Yehowa pesaka bo kikesa. Yandi lenda sadisa bakala na yandi na kutina mambu yina lenda meka yandi.—w23.08, balut. 14-17.

Inki mutindu mayele ta sadisa beto na kuvanda mawete ntangu bantu ke tula ntembe na balukwikilu na beto?

Beto fwete tadila ngiufula to ntembe yina muntu ke tula bonso kima yina ta sadisa beto na kubakisa mambu yina yandi ke yindula to ke tudila dikebi. Yo ta sadisa beto na kupesa yandi mvutu na mawete yonso.—w23.09, lut. 17.

Mutindu Maria bakaka kikesa ke longa beto nki?

Ntangu Maria zabaka nde yandi ta kuma mama ya Mesia, yandi bakaka kikesa na bantu ya nkaka. Wanzio Gabriele mpi Elizabeti pesaka yandi kikesa yina katukaka na Masonuku. Beto mpi lenda baka kikesa na bampangi na beto ya Bakristu.—w23.10, lut. 15.

Inki mutindu Yehowa lenda pesa mvutu na bisambu na beto?

Yandi ke sila beto nde yandi ta wa bisambu na beto mpi yandi ke tadilaka kana bisambu yango ke wakana ti lukanu na yandi. (Yer. 29:12) Yandi lenda pesa mvutu na bisambu na beto na mitindu ya kuswaswana kansi yandi ta sadisa beto ntangu yonso.—w23.11, balut. 21-22.

Baroma 5:2 ke tubila “kivuvu,” ebuna sambu na nki yo ke tubila yo diaka na verse 4?

Kana muntu me wa nsangu ya mbote, yandi lenda kuma ti kivuvu ya kuzinga mvula na mvula na paladisu awa na ntoto. Kansi ntangu yandi ke kutana ti bampasi, ke kangila yo ntima mpi ke bakisa nde Nzambi ke sepela ti yandi, kivuvu na yandi ta landa kukuma ngolo mpi yandi ta baka yo na valere.—w23.12, balut. 12-13.