1. Inki Yezu songaka balongoki na yandi na yina me tala “nsuka” mpi yandi songaka bo na kusala nki?

 BILUMBU fioti na ntwala nde Yezu kufwa, balongoki na yandi iya yulaka yandi nde: “Inki ta vanda kidimbu . . . ya nsukilu ya ngidika ya bima?” (Mat. 24:3) Ntembe kele ve nde balongoki yina vandaka kudiyula sambu na kuzaba ntangu yina bo ta fwa Yeruzalemi mpi tempelo na yo. Yezu songaka bo ntangu yina bantu zolaka kufwa Yeruzalemi mpi tempelo na yo mpi yandi songaka bo mambu yina ta sadisa bo na kuzaba nde ‘nsuka ya ngidika ya bima’ yai ya beto ke zinga me kuma pene-pene. Sambu na kilumbu yina ngidika yai ya bima ta suka, Yezu tubaka nde: “Na yina me tala kilumbu yina to ngunga yina, ata muntu mosi ve me zaba yo, yo vanda bawanzio na zulu to Mwana, kansi Tata mpamba muntu me zaba yo.” Na nima, yandi songaka balongoki na yandi na ‘kubikala ya kusikama’ mpi na “kulanda kukengila.”—Mar. 13:32-37.

2. Sambu na nki yo vandaka mfunu nde bantu yina vandaka kuzinga na nsi ya luyalu ya Bayuda kulanda kukengila?

² Yo lombaka mpi nde Bakristu ya mvu-nkama ya ntete yina vandaka Bayuda kulanda kukengila sambu bo guluka. Yezu songaka balongoki na yandi mambu yina ta sadisa bo na kuzaba ntangu yina luyalu ya Bayuda ta kuma na nsuka. Yandi tubaka nde: “Ntangu beno ta mona basoda me ziunga Yeruzalemi, beno zaba nde lufwa na yo me finama.” Yo lombaka nde bo lemfuka na mambu yina Yezu tubaka mpi bo ‘yantika kutina na bangumba.’ (Luka 21:20, 21) Bantu yina tulaka dikebi na mambu yina Yezu tubaka gulukaka ntangu bantu ya Roma fwaka Yeruzalemi.

3. Inki beto ta tubila na disolo yai?

³ Bubu yai, beto ke zinga na ntangu ya nsuka ya nsi-ntoto yai ya mbi. Yo yina, beto mpi fwete landa kutanina mabanza na beto mpi beto fwete landa kukengila. Na disolo yai, beto  ta tubila mambu yina beto lenda sala ntangu beto ke landa kukengila na mambu ya ke salama na nsi-ntoto yai. Beto ta tubila mpi mutindu beto lenda tula dikebi na mambu yina beto ke sala mpi mutindu beto lenda sadila mbote ntangu yina me bikala.

4. Sambu na nki mambu yina ke salama na nsi-ntoto ya ke lungisa baprofesi ya Biblia ke benda dikebi na beto?

⁴ Beto kele ti bikuma ya mbote ya kutula dikebi na mutindu beto ke mona mambu ya ke salama bubu yai ke lungisa baprofesi ya Biblia. Mu mbandu, Yezu songaka beto mambu yina ta salama, disongidila mambu yina ta sadisa beto na kuzaba nde nsuka ya nsi-ntoto yai ya Satana me kuma pene-pene. (Mat. 24:3-14) Ntumwa Piere siamisaka beto na kutula dikebi na mutindu baprofesi ya Biblia ke lungana sambu yo kumisa lukwikilu na beto ngolo. (2 Pie. 1:19-21) Mukanda ya nsuka ya Biblia ke yantika ti bangogo yai: “Kusonga ya Yezu Kristu, yina Nzambi pesaka yandi, sambu na kusonga bampika na yandi mambu yina fwete salama ntama mingi ve.” (Kus. 1:1) Yo yina, mambu yina ke salama na nsi-ntoto ke benda dikebi na beto sambu yo ke lungisa baprofesi ya Biblia. Beto ke vandaka ti mpusa ya ngolo ya kusonga yo bantu ya nkaka.

5. Inki beto fwete sala ve, kansi nki beto fwete sala? (Tala mpi bifwanisu ya ke wakana ti paragrafe yai.)

⁵ Ntangu beto ke tubila baprofesi ya Biblia, beto fwete vanda ve ti badute sambu na yo. Sambu na nki? Sambu beto ta zola ve ata fioti kusala kima mosi yina ta sala nde dibundu kuvanda ve na bumosi. Mu mbandu, beto lenda wa mambu yina bamfumu ya luyalu ke tuba sambu na kumanisa mavwanga mpi kutula ngemba ti lutaninu na nsi-ntoto. Na kisika ya kutuba nde mambu yango ke lungisa mambu yina 1 Batesalonika 5:3 ke tubaka, beto fwete zaba bantendula ya nsuka yina kele na mikanda na beto. Kana mambu yina beto ke tuba ke katuka na bima yina organizasio ya Yehowa me basisaka, yo ta sadisa dibundu na kulanda kuvanda na bumosi mpi “na ngindu mosi.”—1 Bak. 1:10; 4:6.

6. 2 Piere 3:11-13 ke longa beto nki?

⁶ Tanga 2 Piere 3:11-13. Ntumwa Piere ke sadisa beto na kuzaba kikuma yina beto fwete tadila baprofesi ya Biblia. Yandi ke siamisa beto na ‘kuyibuka ntangu yonso kilumbu ya Yehowa.’ Sambu na nki? Yo kele ve sambu beto ke zola kuzaba ‘kilumbu mpi ngunga’ yina Armagedoni ta kwisa kansi sambu beto sadila ntangu ya me bikala sambu na kuvanda ti “bikalulu ya santu mpi kusala bisalu ya ke monisa kukangama na Nzambi.” (Mat. 24:36; Luka 12:40) Yo ke tendula nde, beto fwete sala yonso sambu na kumonisa nde mambu yina beto ke salaka sambu na Yehowa kele sambu beto ke zolaka yandi mingi kibeni. Yo yina, beto fwete tula dikebi na mambu yina beto ke sala.

7. Inki mutindu beto lenda monisa nde beto ke tula dikebi na mambu yina beto ke sala? (Luka 21:34)

⁷ Yezu songaka balongoki na yandi na kutula dikebi kaka ve na mambu yina ke salama na nsi-ntoto. Kansi bo fwete tula mpi dikebi na mambu yina bo ke sala. Yo ke monana pwelele na mambu yina yandi tubaka, ya kele na Luka 21:34. (Tanga.) Yezu tubaka nde: “Beno keba.” Muntu yina ke tulaka dikebi na mambu yina yandi ke sala ke zabaka na ntwala bigonsa yina lenda bebisa kinduku na yandi ti Yehowa mpi yandi ke salaka yonso sambu na kutina yo. Kusala mutindu yina ke sadisaka yandi na kubikala na zola ya Nzambi.—Bing. 22:3; Yude 20, 21.

8. Inki ntumwa Polo songaka Bakristu?

 ⁸ Ntumwa Polo songaka Bakristu na kukeba. Mu mbandu, yandi songaka Bakristu ya Efezo nde: “Beno keba mbote-mbote nde mutindu beno ke tambula kuvanda ve bonso bazoba kansi bonso bantu ya mayele.” (Baef. 5:15, 16) Satana ke salaka yonso sambu na kubebisa kinduku na beto ti Yehowa. Yo yina, Biblia ke lomba beto na ‘kulanda kubakisa kana luzolo ya Yehowa kele nki’ sambu yo tanina beto na mitambu ya Satana.—Baef. 5:17.

9. Inki mutindu beto ke zabaka luzolo ya Yehowa sambu na beto?

⁹ Biblia ke songaka beto konso kima yina lenda bebisa kinduku na beto ti Yehowa. Mbala mingi, beto fwete baka balukanu na mambu yina Masonuku ke tubilaka ve pwelele. Sambu na kubaka balukanu ya mbote, beto fwete sosa kuzaba ntete “luzolo ya Yehowa.” Beto ta sala yo kana beto ke longuka Ndinga ya Nzambi mpi ke yindula mingi mambu ya beto ke longuka mbala na mbala. Kana beto ke bakisa luzolo ya Yehowa mpi ke sala yonso sambu na kuvanda ti “mabanza ya Kristu,” ntembe kele ve nde beto ta sala mambu bonso bantu ya mayele, ata na mambu yina Biblia ke tubilaka ve pwelele. (1 Bak. 2:14-16) Bantangu ya nkaka yo ke vandaka pete na kuzaba mambu yina beto fwete sala ve kansi bantangu ya nkaka yo ke vandaka ve pete.

10. Inki kele bigonsa ya nkaka ya beto fwete tina?

¹⁰ Bigonsa ya nkaka yina beto fwete tina kele kumonisa mawi ya zola sambu na muntu yina nge kele ve ti ngindu ya kukwela, kulutisa ndilu na kunwa malafu, kudia mbiki, kutuba mambu ya mbi, kutala bansaka ya mubulu, kutala pornografi mpi mambu ya nkaka ya mbi. (Nk. 101:3) Mbeni na beto Diabulu ke salaka yonso sambu na kubebisa kinduku na beto ti Yehowa. (1 Pie. 5:8) Kana beto keba ve, Satana lenda pusa beto na kuyedisa bikalulu ya mbi na mabanza mpi na bantima na beto. Mu mbandu, kulula, luvunu, lukasi, kikenene, lulendo mpi kimbeni. (Bag. 5:19-21) Ntete, nge lenda yindula nde bikalulu yina kele ve mbi. Kansi kana beto yambula yo ve nswalu, yo lenda yela bonso nti ya poison mpi yo lenda pusa beto na kusala mambu ya mbi.—Yak. 1:14, 15.

11. Inki kele kigonsa ya nkaka yina beto fwete tina mpi sambu na nki?

¹¹ Kigonsa ya nkaka ya beto fwete tina kele banduku ya mbi. Beto tadila diambu yai. Nge ke sala ti muntu mosi yina kele ve Mbangi ya Yehowa. Nge ke zola nde nduku na nge ya kisalu kuvanda ti bangindu ya mbote sambu na Bambangi ya Yehowa, yo yina nge ke vandaka mawete ti yandi mpi nge ke sadisaka yandi. Na nima, nge me kuma kudia ti yandi mbala na mbala. Kilumbu mosi, nduku na nge yina me yantika kutuba mambu ya mansoni. Ntete, nge ke sepela ve kuwa mambu yango. Na nima nge me kuma kuwa yo mbala na mbala mpi nge ke mona yo diaka ve mbi. Kilumbu mosi yandi me bingisa nge na nima ya kisalu sambu na kunwa mwa kima mpi nge me ndima. Nsuka-nsuka, nge me kuma kuyindula bonso yandi. Kana mpidina, bantangu mingi ta luta ve sambu nge kuma kusala mambu bonso yandi. Ya kieleka, beto ke vandaka mawete mpi beto ke zitisaka bantu yonso. Kansi beto fwete vila ve nde beto ta kuma bonso bantu yina beto ke lutisaka ntangu mingi ti bo. (1 Bak. 15:33) Kana beto ke keba na mambu yina beto ke sala mutindu Yezu songaka beto, beto ta sala ve kinduku ti bantu yina ke zitisaka ve bansiku ya Yehowa. (2 Bak. 6:15) Beto ta mona bigonsa mpi beto ta tina yo.

12. Balongoki ya Yezu vandaka kusala nki ntangu bo vandaka kuvingila kufwa ya Yeruzalemi mpi tempelo na yo?

¹² Yezu zolaka nde balongoki na yandi kuvanda ti mambu mingi ya kusala ntangu bo  vandaka kuvingila kufwa ya Yeruzalemi mpi tempelo na yo. Yo yina, Yezu pesaka bo kisalu mosi. Yezu songaka balongoki na yandi na kulonga nsangu ya mbote “na Yeruzalemi, na Yudea yonso mpi na Samaria, mpi tii na kisika ya kuluta ntama ya ntoto.” (Bis. 1:6-8) Yo vandaka kisalu ya nene yina Yezu pesaka balongoki na yandi. Mutindu bo salaka yonso sambu na kusala kisalu yina, yo monisaka nde bo sadilaka mbote ntangu na bo.

13. Sambu na nki beto fwete sadila mbote ntangu na beto? (Bakolosai 4:5)

¹³ Tanga Bakolosai 4:5. Sambu na kutula dikebi na mambu yina beto ke sala, beto fwete tadila mutindu beto ke sadila ntangu na beto. “Mambu ya kukonda kukana” lenda bwila konso muntu na kati na beto. (Lon. 9:11) Beto lenda fwa na kintulumukina.

14-15. Inki mutindu beto lenda sadila mbote ntangu na beto? (Baebreo 6:11, 12) (Tala mpi kifwanisu ya ke wakana ti baparagrafe yai.)

¹⁴ Beto lenda sadila mbote ntangu na beto kana beto ke sala luzolo ya Yehowa mpi kana beto ke kumisa kinduku na beto ngolo ti yandi. (Yoa. 14:21) Beto fwete “kangama ngolo, beto nikana ve, beto vanda ntangu yonso ti mambu mingi ya kusala na kisalu ya Mfumu.” (1 Bak. 15:58) Na nima, kana nsuka me kwisa, yo vanda nsuka ya luzingu na beto to nsuka ya nsi-ntoto yai ya mbi, beto ta wa ve mpasi sambu  beto me zaba nde beto salaka mingi na kisalu ya Yehowa.—Mat. 24:13; Bar. 14:8.

¹⁵ Bubu yai, Yezu ke landa kutwadisa balongoki na yandi ntangu bo ke longa nsangu ya Kimfumu ya Nzambi na ntoto ya mvimba. Yandi me lungisaka mambu yina yandi tubaka. Na nzila ya organizasio ya Yehowa, Yezu ke longaka beto mutindu ya kulonga nsangu ya mbote mpi yandi ke pesaka beto bima yonso yina beto kele ti yo mfunu sambu na kulonga yo. (Mat. 28:18-20) Beto ke salaka mambu yina Yezu songaka beto ntangu beto ke salaka yonso sambu na kulonga nsangu ya mbote mpi ntangu beto ke landaka kukengila mpi kuvingila nde Yehowa kufwa nsi-ntoto yai ya mbi. Kana beto ke sadila mambu yina kele na Baebreo 6:11, 12, beto ta kangama ngolo na kivuvu na beto “tii na nsuka.”—Tanga.

16. Inki beto fwete sala?

¹⁶ Yehowa me tulaka kilumbu mpi ntangu yina yandi ta fwa nsi-ntoto yai ya Satana. Ntangu kilumbu yina ta lunga, Yehowa ta lungisa mambu yonso yina yandi me tubaka na Ndinga na yandi. Kansi bantangu ya nkaka, beto lenda yindula nde nsuka ya nsi-ntoto yai ke kwisa ve nswalu. Ya kieleka, kilumbu ya Yehowa “ta sukinina ve!” (Hab. 2:3) Yo yina beto fwete “landa kutala Yehowa” mpi kumonisa ‘kikalulu ya kuvingila Nzambi ya luguluku na beto.’—Mika 7:7.