NA KITATU 18 janvier 2023, nsangu mosi ya mfunu basikaka na jw.org nde mpangi Gage Fleegle ti mpangi Jeffrey Winder me kuma bampangi ya Nto-Kimvuka ya Bambangi ya Yehowa. Bampangi yai zole ke sadilaka Yehowa na mutindu ya mbote banda bamvula mingi.

Mpangi Fleegle yelaka na westi ya Pennsylvanie na États-Unis. Bibuti na yandi vandaka Bambangi ya Yehowa mpi bo longaka yandi kieleka. Ntangu yandi kumaka toko, dibuta na yandi kwendaka na mbanza mosi ya fioti, kisika mpusa ya bansamuni vandaka mingi. Mwa ntangu fioti na nima, yandi bakaka mbotika na 20 novembre 1988.

Bibuti ya mpangi Fleegle vandaka kupesa yandi kikesa ntangu yonso sambu yandi sala kisalu ya ntangu yonso. Na nzo na bo, bo vandaka kuyamba bankengi ya nziunga mpi bampangi ya ke sadilaka Yehowa na Betele. Mpangi Fleegle vandaka kumona mutindu bampangi yina vandaka na kiese. Na 1^er septembre 1989, mwa ntangu fioti na nima ya kubaka mbotika, yandi kumaka mupasudi-nzila nsadisi. Na nima ya bamvula zole, yandi lungisaka lukanu mosi yina yandi kuditudilaka banda ntangu yandi vandaka ti bamvula 12, lukanu ya kusadila Yehowa na Betele. Yandi kotaka Betele na octobre 1991 na Brooklyn.

Na Betele, yandi salaka kisalu ya kukangisa mikanda (reliure) bamvula 8 mpi na nima yandi salaka na Departema ya Kisalu. Na ntangu yina, yandi salaka mpi mwa bamvula na dibundu ya ndinga Russe. Na 2006, yandi kwelaka mpangi-nkento Nadia mpi mpangi Nadia kutaka yandi na Betele. Bo yonso zole salaka mwa bamvula na dibundu ya Kiportige mpi na nima bo salaka bamvula kuluta 10 na dibundu ya Kiespaniole. Mpangi Fleegle salaka bamvula mingi na Departema ya Kisalu. Na nima, yandi kumaka kusala na Biro ya Komite Sambu na Kulonga. Na nima ya kusala kuna, yandi salaka na Biro ya Komite ya kisalu.  Na mars 2022, yandi kumaka nsadisi na Komite ya Kisalu ya Nto-Kimvuka.

Mpangi Winder yelaka na mbanza Murrieta na Californie na États-Unis. Bibuti na yandi longaka yandi kieleka mpi yandi bakaka mbotika na 29 mars 1986. Na ngonda yina landaka, yandi kumaka mupasudi-nzila nsadisi. Yandi sepelaka mingi ti kisalu yina, yo yina yandi zolaka kulanda kusala yo. Na nima ya kusala kisalu ya kimupasudi-nzila nsadisi bangonda mingi, yandi kumaka mupasudi-nzila ya ntangu yonso na 1^er octobre 1986.

Ntangu mpangi Winder vandaka toko, yandi kwendaka kutala bampangi na yandi zole ya bambuta yina vandaka kusadila Yehowa na Betele. Yo pesaka yandi nzala ya kufulusa formilere sambu na kukota na Betele ntangu yandi ta kuma mbuta. Na mai 1990, bo bingaka yandi na Betele ya Wallkill.

Na Betele, mpangi Winder salaka na badepartema mingi. Mu mbandu, na Biro ya Ke Talaka Mambu ya Bunkete, Biro ya Ke Talaka Bisalu ya Ferme mpi na Biro ya Betele. Yandi kwelaka mpangi Angela na 1997 mpi mpangi Angela kutaka yandi na Betele. Na 2014, bo tindaka bo na Warwick, kisika yina mpangi Winder pesaka maboko sambu na kutunga babiro ya ke twadisaka kisalu na ntoto ya mvimba. Na 2016, bo kwendaka na Nzo ya Malongi ya Bambangi ya Yehowa na Patterson. Kuna, mpangi Winder salaka na Departema ya Bavideo. Bamvula iya na nima, bo vutukaka na Warwick mpi mpangi Winder kumaka kusala na Biro ya Komite Sambu na Bansadi. Na mars 2022, yandi kumaka nsadisi na Komite Sambu na Bansadi ya Nto-Kimvuka.

Beto ke samba Yehowa sambu yandi sakumuna kibeni bampangi yai ya yandi me pesa beto “bonso makabu,” mutindu bo ke landa kusadila yandi ngolo sambu na mambote ya Kimfumu.​—Baef. 4:8.