Biblia ke tubaka na pwelele yonso nde Yehowa lenda zaba na ntwala mambu yina ta salama. (Yez. 45:21) Kansi, yo ke tubilaka ve mambu yonso ya me tala mutindu, ntangu to nkutu mambu yina Yehowa ke ponaka na kuzaba na ntwala. Yo yina, beto ke zaba ve mambu yonso ya me tala makuki ya Yehowa ya kuzaba na ntwala mambu yina ta salama. Kansi, kele ti mwa mambu yina beto me zaba.

Yehowa kele ve ti bandilu, katula kaka yina yandi mosi me kuditudilaka. Yehowa kele ti mayele ya kukonda nsuka mpi yandi lenda zaba na ntwala konso kima yina ta salama. (Bar. 11:33) Kansi sambu yandi ke kudiyalaka na mutindu ya kukuka, yandi lenda baka lukanu ya kuzaba ve na ntwala mambu yina ta salama. Tala mpi Yezaya 42:14.

Yehowa ke salaka nde luzolo na yandi kulungana. Inki mutindu yo ke sadisa beto na kubakisa makuki ya Yehowa ya kuzaba na ntwala mambu yina ta salama? Yezaya 46:10 ke tuba nde: “Katuka luyantiku mono ke tubaka na ntwala mambu yina ta salama, mpi tuka ntama mambu yina me salama ntete ve. Mono ke tuba nde, ‘lukanu na mono ta lungana, mpi mono ta sala konso kima yina mono me zola.’”

Kikuma mosi yina lenda sala nde Yehowa kuzaba na ntwala mambu yina ta salama, kele sambu yandi kele ti ngolo ya kusala konso kima yina yandi me zola. Yandi ke nwaninaka ve na kuzaba na ntwala mambu yina ta salama, bonso nde mambu yango me salamaka dezia mpi yandi kele ti mfunu ya kutala mutindu yo ta vanda. Kansi Yehowa lenda tuba nde kima mosi ta salama na ntangu mosi buna mpi yandi sala yonso sambu yo salama kaka na ntangu yango yina.​—Kub. 9:5, 6; Mat. 24:36; Bis. 17:31.

Yo yina Biblia ke sadilaka bangogo “yidikaka,” “salaka” mpi “me baka lukanu” sambu na kutubila mambu yina Yehowa ke salaka sambu na mambu yina ta salama na bilumbu ke kwisa. (2 Bant. 19:25; noti na nsi ya lutiti; Yez. 46:11) Bo me balula bangogo yina na ngogo mosi ya ndinga ya kisina ya ke wakana ti ngogo ya nkaka ya ke tendula nde “muwumbi,” disongidila muntu yina ke salaka bima ya ntoto ya tuma. (Yer. 18:4) Mutindu muntu yina ke salaka bima ya ntoto lenda kumisa ntoto dibungu mosi ya kitoko, Yehowa mpi lenda sala nde mambu kusalama na mutindu yina yandi ke zola sambu na kulungisa luzolo na yandi.​—Baef. 1:11.

Yehowa me pesaka bantu kimpwanza ya kupona mpi yandi ke zitisaka yo. Yehowa me yidikaka ve na ntwala mambu yina ta kumina konso muntu. Yandi ke pusaka mpi ve bantu ya ntima-masonga na kusala kima mosi yina ta nata bo na lufwa. Yandi me pesaka konso muntu nswa ya kupona mambu yina yandi ke zola kusala, kansi yandi ke longa bo na kupona nzila ya mbote.

Beto tadila bambandu zole. Mbandu ya ntete kele ya bantu ya mbanza Ninive. Yehowa tubaka nde bo ta fwa mbanza yina sambu na mambu ya mbi yina bantu na yo vandaka kusala. Kansi ntangu bantu ya mbanza yina balulaka ntima, Yehowa “tadilaka diaka mpasi yina yandi tubaka nde yandi ta natila bo, ebuna yandi nataka yo ve.” (Yon. 3:1-10) Yehowa sobaka lukanu yina yandi bakaka sambu bantu ya Ninive bakaka lukanu ya kusoba bikalulu na bo na nima ya kuwa nsangu ya lukebisu ya Yehowa.

Mbandu ya zole kele profesi ya me tala ntotila Sirusi, yina zolaka kubasisa Bayuda na kimpika mpi kupesa nswa nde bo tunga diaka tempelo ya Yehowa. (Yez. 44:26–45:4) Ntotila Sirusi ya Persia lungisaka profesi yina. (Esd. 1:1-4) Sirusi vandaka ve kusambila Nzambi ya kieleka. Yehowa sadilaka Sirusi sambu na kulungisa profesi yina kansi yandi bikilaka Sirusi kimpwanza ya kupona nani yandi ta sambila.​—Bing. 21:1.

Ya kieleka, yai kele kaka mwa mambu yina Yehowa ke tadilaka na ntwala ya kusosa kuzaba na ntwala mambu yina ta salama na bilumbu ke kwisa. Yo ke pwelele nde ata muntu mosi ve lenda bakisa mbote-mbote banzila ya Yehowa, disongidila mambu yina yandi ke yindulaka mpi ke salaka. (Yez. 55:8, 9) Kansi, mambu yina beto me zaba sambu na yandi ke ndimisaka beto kibeni nde ntangu yonso yandi ke salaka mambu ya mbote, yo vanda ntangu yandi ke tadila mambu yina ta salama na bilumbu ke kwisa.